Matyu 24 - Nobonob Baibel

Jesus gog taknu epponak keeke, keeke laalanu ele aum

¹ Amu Jesus Nug Kayaknu mettid lag uua no, nuhikkud ippunittak awak danab ag Nug gumidna doppig. Ag dona, Nug amegppa appig. “Antte! Kayaknu mettid lag nuhig tomppan keeke oh ele imu, ag imuppa lag enanag hadna autna aoppig,” aon appig.

² Anam aeg amu Jesus Nug oɗelagppa awa aum. “Ag keeke amu oh anidtteb, amge da genab ag amelagppa attem, men imu laa ag loppaɗppeg, nena qena, laa nug laa qaɗeppa iinab daama. Ohnab loppaɗppeg, honap nena qekkulag,” awa aum.

³ Jesus Nug Olipnu Qaukoppa ta dayeye amu ippunittak awak danab ag akka gumidna goppig. Ag gona appig. “Na ig amenigppa ame amu, kobol amu haen ganeb bekku? Ele amu, epponak keeke aɗi tatam beeb, ig na uɗikkutnu, amu gog tak haen miag daatte ele doognig,” aon appig.

⁴ Ag anam aeg, Jesus oɗelagppa awa aum. “Danab laa ag hambuppualadmanu ag dabmeig!

⁵ Aɗinu? Danab kuɗum ag da onilppa uɗin, ‘Da am Kristus,’ anana, kuɗum laa buppualadkkulag.

⁶ Ag bannu doonna, bannu ulah nai ele dooglag. Keeke amu genab bekkulag, amge doyeg! Ag aib ottaippig! Keeke amu bekkulagnab, amge wan haen malak iitta.

⁷ Wan laa ag wan laa ele nug qekkulag. Ɗo maɗoɗ laa ag ɗo maɗoɗ laa ele nug qekkulag. Aben laalappa amu enug haen okkai nebeppeg, mim ele nekkulag.

⁸ Kobol amu oh am nid dokkunu ah ag guittak tatam dootteb, amubia aakkuib.

⁹ Anam amu haen amuppa laala ag ag aɗualadna, eheɗ hattanna, ag aqappeg mauhkkulag. Am geha danab ah oh ag ahilagnu nau ninig ele dooglag. Aɗinu? Da onil ahilagppa daatte.

¹⁰ Am haen amuppa danab ah kuɗum ag dahilnu oolagppa genab doyak ele, ag amu uun, da dimeɗan, akka akka nug dimug mekkulag.

¹¹ Propet hambuppuak kuɗum ele ag ahan, danab ah kuɗum buppualadkkulag.

¹² Nau hak kobol am okkai mekku amunu, danab ah ag nug oo mauhak kobol uuglag,

¹³ amge laa nug ɠagattag dayebeb ukkeb, keeke oh ba maleb, haen amuppa ele nug ɠagattag daakku amu, nug padal ii mema.

¹⁴ Amu danab ah oh dooglagnu ag Kayaknu ɗo maɗoɗnu Nai Ena wan atu ohppa mehuqppeg, danab ah dooppeg, geha haen amuppa gog tak haen bekku.

¹⁵ Aria, propet Daniel nug keeke naunab laa, nug aab he nauhtte ele amu, nug amunu yom. Danab aun nug nai imu ebqette amu nug meu nuhig tutukku aokkunu dabmaɗ! Aria, ag keeke naunab amu aben gun eleppa meppeg dayebeb anidna amu, laa ag

¹⁶ Juda wanppa daatteb, ag oolna qaukoppa ukkeg!

¹⁷ Danab nug nuhig lag koɗokko uɗem ukkakppa daatte, nug aguppa dayaya, nug oolkkunuib dabmaama, nug lag ooppa noa keeke aib awom. Iitta! Nug oola ukkaɗ!

¹⁸ O laa nug dad okkaippa dayaya, nug oolkkunuib dabmaama, eɗua ulahnu lamen nuhig aokkunu lakka aib ukkom.

¹⁹ Am haen amuppa ah oolkad ele, ah ag nid yuɗ huh madatteb ele amu, ahilagnu gadonnab gadon.

²⁰ Ag oug haenppa o Sabat deɗppa oolmananu ag unuqitteg!

²¹ Aɗinu? Haen amuppa amu, uug naunab bekku. Uug naunab amubia nug digmak haenppa uɗiak gemu ele laa ii beum, dimppa ele amubia ii daama.

²² Anam daatte amunu, Kayak Nug haen amu tutu daakkunu, haen amu ii okkullo, danab ah oh padal melob, amge Kayak nug nuhikkud tituanattom ele, Nug amu dilag dabma, haen tutu okkulkku.

²³ Aria, haen amuppa laa nug ag amelagppa, ‘Antteg! Kristus Nug ippa ina daatte,’ o iitta, ‘Kristus uppa uma daatte,’ ab amu ag oolagppa genab aib dooppig.

²⁴ Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta.

²⁵ Doyeg! Keeke amu ii neumppa, da ag dabmekkulagnu nai iikku ag amelagppa ain malami.

²⁶ Amunu laa ag, ag amelagppa, ‘Nug atu taɗakppa daatte,’ aon amelagppa appeg am ag appa aib goppig. O ag, ‘Nug lag imu ooppa daatte,’ aon amelagppa appeg amu, ag oolagppa genab aib dooppig.

²⁷ Ag aakku dootteb, amemɗi nug aam bedeppa digma amahala ukka, aam nodeppa malatte, amubia Danab Bekkalag da, da uɗikkulnu haen amu, da anamib uɗippi aniɗkkulag.

²⁸ Mauhak gaɗalag niitteb, aben amuppa kaub ag uɗin appa qagmetteb.

²⁹ Aria, haen amunu uug nau iitta meeb, pahanab aam ii amahalma, kalam ele ii amahalma, hoɗoppai laa ag habppanu nena qebeppeg, laa ag ippulag tutukku ii dim lamidmana.

³⁰ Haen amuppa amu Danab Bekkalag da, dahil epponak keeke habppa bekku. Beeb amu wanppanu danab ah oh gaaglag. Gaappeg, Danab Bekkalag da, da lombig hab waappa daatteb, da lombig amuppa ɠagattag okkai, binag amahlak oppiaawak ele uɗippi aniɗkkulag.

³¹ Uɗien, trampet gayebeb, da dahilad engel heppi, ag gona, danab ah dahilad da tituanadmi amu aben oh wanppanu, habppanu ele qagmaadna, diin uɗiglag.

³² Nai amunu amu ag ad fignu kobol dabmena dabmak aweg! Ag ad fig nug uɗug bau bekkunu digma haultte anidna amu, ag haen amuppa, ‘Aam haen aakku digmette,’ aon atteb.

³³ Anam amu, amubia ag kobol digdig oh da amunu ami ele amu bebeppeg anidna, ag dahilnu, ‘Nug eɗua uɗikkunu haen miag, odppa daatte,’ dooglag.

³⁴ Da genab ag amelagppa attem, danab ah haen imunu oh ii mauhadppeg, geha keeke amu oh bekku.

³⁵ Hab wan ele am iitta mekkulah, amge nai dahil am iitta iinab mema.

Danab laippu laa nug haen deɗ ele ii dootte

³⁶ Anam, amge laippu laa nug amunu haen, deɗ ele ii dootte. Engel hab aabppa daatteb ele ii dootteb. Da ele ii doottem. Mama nukka keeke amu dootte.

³⁷ Noanu haenppa danab ag kobol aɗi aɗi heppig, amubia Danab Bekkalag da, da eɗue uɗikkulnu haenppa amu, danab ag kobol anamib hekkulag.

³⁸ Hiɗ naɗi ii beum haenppa danab ah ag ee lanana, le lanana, ewau matulak aona, ah nug mettanna, anam heegeg ukke, Noa uubppa teum.

³⁹ Ag amu henana, hiɗ bekkunu dab-ii-mettaegeg, hiɗ ba diia ukkom, amubia Danab Bekkalag da, da uɗikkul haenppa, ag anamib daaglag.

⁴⁰ Geha danab aɗit omelahppa daapeɗ, Kayak Nug laippu awawa, laa uuitteb daakku.

⁴¹ Ah aɗit aa bretnu plaua kalu nekkunu hebepeɗ, laa amu awawa, laa am uuitteb daakku.

⁴² Amunu ag Danab Bekkalag da, da eɗuen nekkulnu dabmenan dayeg! Aɗinu? Deɗ adekkuppa ahilag Naɗi uɗikku amu, ag ii dootteb.

⁴³ Ag doyeg! Lag mameg nug haen adekkuppa tuqan yabhok danab uɗikku doolo, nug ib aɗaɗa heeb, yabhok danab nug laug loppaɗa, lag ooppa ii nolo.

⁴⁴ Amunu ag ele bappaidna dayeg! Aɗinu? Danab Bekkalag da, da haen laa ag ii dabmekkulag ele, haen amuppa uɗikkul,” awa aum.

⁴⁵ Jesus Nug anam ana, Nug nai tuɗitta aum. “Maɗi nid laa doyak dabmak ena ele, nug oo metta ii uuak kobol haaha daatte amu, nuhig okkai nug maɗi nid amu nuhikkud maɗi nid laa gumattatta, haenppa ee madakkunu uɗat medakkunu elele.

⁴⁶ Aria, dimppa maɗi nid amunu okkai nug laih ukkakppanu eɗua uɗia, maɗi nid amu nug danab okkai nuhig anukka amegppa aumbia hette anidkku dayeb amu, nuhignu am ena.

⁴⁷ Da genab ag amelagppa attem. Danab okkai nug maɗi nid amu nuhig keeke ohnu ikkilag meeb daakku.

⁴⁸ Amge maɗi nid amu nug danab ena iitta daya, ooppa, ‘Danab okkai dahil nug paha ii uɗima,’ dabmekku dayeb,

⁴⁹ nug digma, maɗi nid laa, maɗi ah laa ele makkuɗattatta, nug le ɠagattag laeg kaaka aqak danab ele ee lanana, le ele labeppeg,

⁵⁰ nuhig okkai nug haen, deɗ ele maɗi nid amu nug ii doyom, ii dabmeum ele, amuppa eɗua uɗikku.

⁵¹ Uɗia amu, danab okkai nug maɗi nid amu eheɗnab hettowa, awa meeb, nug hambuppuak danab ele daaglag. Appa danab ag gaanna, aelkad emalna daaglag.