Matyu 23 - Nobonob Baibel

Jesus kobol naunu aum

¹ Dimppa Jesus Nug danab ah kuɗumnab appa daappig, amu nuhikkud ippunittak awak danab ele amelagppa aum.

² “Ɗo gumak danab-Parasia amu ɗo mehuqak danab ele ag Mosesnu ɗo ag ippunadtteb, Moses nug nuhig haenppa dayaya heum bia

³ amunu, ag nai oh ag amelagppa maditteb amu, ag doon dim lamitteg! Amge kobol ag hetteb ele am ag aib dim lamidppig. Ag nai kuɗum maditteb, amge ag akka amu ii dim lamidtteb.

⁴ Ag keeke uug ele itan, danab gukkalkadppa mattaeg maotteb, amge ag akka ag eppelag doɗo laa uug amu maoglagnu nakok ii meeg otte.

⁵ Ag keeke oh danab amelagnuib hetteb. Ag Kayak nai inaknu kunup okkai henan, uɗalagppa amu eppelagppa ele qakkana, unuqittak lamen daugppa bala elab elab ele hetteb.

⁶ Ag hobul haenppa, nai doyak lakka ele aben anuqakppa daaglagnu, oolag mauhtte,

⁷ amu ee oɗiak abenppa ele danab ah ag humadkkulagnu, ahilagnu, ‘Ippunittak danab,’ akkulagnu ele oolag mauhtte,” awa aum.

⁸ Anam ana amu Nug nai tuɗitta ippunittak awak danab nuhikkud amelagppa aum. “Amge ag amu, ag danab laala ag ahilagnu, ‘Ippunittak danab,’ akkulagnu oolag aib dayom. Laippu aakkuib am ahilag ippunittak danab, ag oh am awag amag aakkuib daatteb.

⁹ Am wan imuppa ag laanu, ‘Mama,’ aib appig. Ag Mamelag laippu aakkuib amu Nug hab aabppa daatte.

¹⁰ Am laa ele, laa nug ahilagnu, ‘Ikki danab,’ aib aum. Ahilag ikki danab laippu amu Kristus.

¹¹ Amunu ag oolagppa danab laa nug ahilag okkai daakkunu oo dayeb amu, nug am ahilag maɗi nidib dayad!

¹² Am danab aun nug onig humatte amu Kayak Nug heeb, danab amu nug onig nekku. Ge danab aun nug onig qe nette amu, Nug danab amu onig am humakku.

¹³ O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag Kayaknu ɗo maɗoɗnu od danab ah amelagppa maitteb. Ag akka amu ag amuppa ii notteb. Am danab ah ag amuppa nokkulagnu hetteb amu, ag ippulag oo netteb.

¹⁴ ((O gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag ah qab hambuppualadna, ag laulkad yab aotteb. Ag yab awona, ahilag hipunin amu danab ah amelagppa lokkumkkulagnu ag unuqittak elab hetteb amunu, epeɗiak haenppa geha ag uug okkainab aoglag.))

¹⁵ O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Wan laappanu danab nug Juda kobol aokkunu ag uɗat okkainab, hik aqeeqe hetteb. Heegeg, danab amu nug Juda kobol awa, nug ahilag kobol nau kuɗum ag hetteb, amu eɗittak haaha, ag padal maknu ibppa daatteb, amge nug am padal maknu ibppanab daatte.

¹⁶ O gadonnab gadon ag amelag gaɗuak ele, amge ag danab ah ele ib ippunadkkulagnu hetteb. Ag dabmeig! Ag atteb, ‘Danab nug Kayaknu mettid lag onigppa nuhig nai ɠagattag qedatte dayeb amu, nai amuam hamu. Amge laa nug Kayaknu mettid lagnu gol onigppa nuhig nai ɠagattag qedatte dayeb amu, nug meu genab hette, nug aɗi keeke hekkunu aum amu nug hekkunab,’ aon atteb.

¹⁷ Ag am Kayak dab-ii-maama ii dim lamittak danab, amelag gaɗuak ele. Aɗi am keeke anuqak? Kayaknu mettid lagnu gol, amutai am anuqak, o iitta Kayaknu mettid lag, amuam he Kayaknu lag ooppanu gol Kayaknu daatte, amutai am anuqak?

¹⁸ Am ag laa ele inam atteb. ‘Laa nug mana mettaknu qaɗab, amu onigppa nuhig nai ɠagattag qedatte ele amu, nai amuam hamu. Amge nug qaɗabppa mana mettaknu doɗ, amu onigppa nai ɠagattag qedatte dayeb amu, nug keeke meu hette, nug aɗi keeke hekkunu aum amu nug hekkunab,’ aon atteb.

¹⁹ Ag ameg gaɗuak danab! Aɗi am keeke anuqak? Mana mettaknu doɗ amutai am anuqak o iitta mana mettaknu qaɗab, nug he mana mettak Kayaknu daatte, amutai anuqak?

²⁰ Amunu, aun nug mana mettaknu qaɗab onigppa nuhig nai ɠagattag qedatte amu, nug keeke qaɗab qaɗeppa niitteb amu oh eleppa nuhig nai ɠagattag qedatte.

²¹ Am laa nug mettid lag onigppa nuhig nai ɠagattag qedatte amu, nug mettid lag amu Kayak, Nug aguppa daatte, nug Nug onigppa ele nuhig nai ɠagattag qedatte.

²² Am laa nug hab onigppa nuhig nai ɠagattag qedatte amu, nug Kayaknu sia king, amu aun Nug amuppa daatte ele amu, Nug onigppa ele nuhig nai ɠagattag qedatte.

²³ O gadonnab gadon ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag keh naunau amu oh oppateg, ameg eblaih tanig ele neeg, ameg laippu amu Kayak medatteb, amge ag ɗo laa okkai ii dim lamidna oitteb. Ɗo ag ii dim lamidna oitteb ele am, nai doya mala hettoɗia epeɗia elele mettak kobol, laa dilagnu oo gai-iitta doya oo metta ehanittak kobol, amu oo metta ii uuak kobol ele. Ag ɗo ii dim lamidtteb, amu laa dim lamidtteb ele, ag amu oh dim lamidlob, amuib am tutukku.

²⁴ Ag ippunittak danab nau, ag amelag gaɗuak ele! Ag peipe lewappanu maut-tteb, amge ag kamel lewa ele lana, toppua gotteb.

²⁵ O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag kap, tappiɗ ele gaɗaib ihatteb, amge ooppa baubau awaknu hik qak, beɗu dim lamittak kobol ele ambak daattep.

²⁶ Ɗo gumak danab-Parasia ag amelag gaɗuak! Tatam ag kap, tappiɗ ele oo ihappeg, oppiaawak dayeb amu, gaɗa ele amu dubuttid iitta, oppiaawak daakku.

²⁷ O gadonnab gadon, ɗo gumak danab-Parasia am ɗo mehuqak danab ele. Ag hambuppuak danab. Ag dabmeig! Ag am boumaknu moɗ bia daatteb. Laa ag moɗ amuppa gau hakkab laaidtteb amunu, dimittim am anttak nuhig ena, amge ooppa amu danab mauhak beɗulag ebehilag, keeke digdig oh dubuttid ele daatteb. Ag amubia daatteb.

²⁸ Ag anamnab aakku daatteb amunu, danab laa ag ag anidna ag, ‘Umuam genab tutukku hak danab,’ aon atteb, amge ag ɗo gumak danab-Parasia amu ɗo mehuqak danab ele amu, ag oolag ooppa ag hambuppuak danab, amu nau hak danab daatteb.

²⁹ O gadonnab gadon, ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag propet mauhppig dilag boumak aben bappaidna, ag genab tutukku hak danab mauhppig dilag moɗ bala medatteb.

³⁰ Ag anam hena ag atteb. ‘Ig alai aɗi dilag haenppa daalom amu, ig ag ehanadta, propet tiilag ii aɗalom,’ aon atteb.

³¹ Nai amuppa ag danab ag propet aqaeg mauhppig ele, ag ag buɗulkad daatteb danab ah ippunadtteb.

³² Ag alalkad kobol hedappig amu, ag amuib hena gog metteg!

³³ Ag danab nau, mat nau bia! Kayak Nug ag hettoɗiakppa maatteb, ag padal mekkulag. Ag attem hena amu ii anidmana?

³⁴ Amunu ag doyeg! Da propet, amu danab doyak dabmak ena ele, ag Kayak nai tutukku dootteb, amu ippunittak danab ele ana maadppi, ahilagppa uɗiglag. Uɗippeg amu ag laa aqappeg mauhppeg, laa ag ad emaitakppa atuladna, ag laa ahilkad nai doyak lag ooppa bu qaun eleppa eheɗ mataɗadkkulag. Ag mataɗadna, ag lamadppeg, ag aab okkai laappa goppeg, baula lamadppeg, aab okkai laappa gona, anamib oiglag.

³⁵ Anam amunu, wan imuppanu genab tutukku hak danab aqe mauhak digmak Abel, nug am genab tutukku hak danab, nug mauhe uɗie, Berekia bekka Sekaraia, ag nug qaɗab, Kayaknu mettid lag ele gamagppa qeeg mauhom, nuhig mauhak batak amu, qe mauhak hipunin amu oh danab ah haen geha imunu ag qaɗelagppa daakku.

³⁶ Da genab ag amelagppa attem. Keeke imu oh am danab ah gemu daatteb ele dilagppa bekku.

Jesus Jerusalemnu gayom

³⁷ O Jerusalem, Jerusalem, na propet aqae mauhtteb, maɗi nid Kayak nahip-ppa maatte uɗitteb ele, na ag ele menppa aqae mauhtteb. Da haen kuɗum na begapad, matuk anig nakkud haugppa qagmaatta tonadtte, amubia qagmaadkkulnu hemi, amge ag uuppig.

³⁸ Antteg! Ag appalag am geha uɗ ba, aab dakkeɗ bia daakku.

³⁹ Aɗinu? Da ag amelagppa attem. Ag da baula paha ii aniɗmana. Iitta. Ag, ‘Laa nug Naɗi onigppa uɗitte amu, ig Naɗi Nug itidkkunu oonig daatte,’ awona, ag da eɗun aniɗkkulag,” awa aum.