Matyu 22 - Nobonob Baibel

Ewau matulaknu hobulnu nai

¹ Jesus baula keeke danab ag dootteb ii dootteb ele ouaqata, ippuanatta aum.

² “Kayaknu ɗo maɗoɗ nug am imubia. King laa nug bekka ah aokkunu heehe, danab okkai amu nug ee naɗi heum.

³ Nug ee hewowa, nuhikkud maɗi nid laala maatte, ag king nug anukka ewau matulak hobulnu deɗ mattom ele amu, ag onilagppa eppeg, uɗin hobulppa daaglagnu goppig. Gona onilagppa eppig, amge ag hobulppa ukkaknu uuppig.

⁴ Danab ii ukkaeg amu, king nug maɗi nid laa maatte gokkulagnu daaegeg, nug amelagppa aum. ‘Ag gona, danab aun aɗi da hobulnu deɗ mattami ele, ag ag amelagppa inam appeg dooglag. “Da lanaknu keeke oh bappaidmi. Da dahil makau okkai ebehi ele, amu makau titiɗak ele aqadmi, keeke oh babaittak daatte amunu, ag ah awak hobulppa uɗieg,” aon aig!’ awa aum.

⁵ King nug anam a, maɗi nid ag gona appig, amge hobulppa ukkaknu danab ag uuppig. Laa nug nuhig dad okkai uɗatppa ukkom, laa amu nuhig men doɗo uɗatppa ukkom.

⁶ Laala ag anam heppig, amge laa oh ag kingnu maɗi nid aɗualadna makkuɗadna, aqaeg mauhppig.

⁷ Am king nug nai anam doya, nug oppoɗi huanak be ameg ele kokoɗ eppe, nug he, nuhikkud ban danab ag gona, danab ag nuhikkud maɗi nid aqaeg mauhppig ele, ag ohnab aqappig; aab okkai ahilag ele manaeg ewa, iitta meum.

⁸ Aria, king nug baula nuhikkud maɗi nid amelagppa aum. ‘Ewau matulak hobulnu ee oh am babaittak daatte, amge danab hobul imuppa daaglagnu deɗ mattami ele, ag uun heeg, dahil neekkakppa uɗiglagnu elele iitta daappig

⁹ amunu, ag gona, ib oɗatleppa danab ah oh ag anadna appeg, ewau matulak hobul imuppa uɗieg!’ awa aum.

¹⁰ King nug anam a, maɗi nid ag ibppa ukkadna, danab ah ena, nau ele oh anadna qagmaadppig. Qagmaatteg, ag ewau matulak hobulppa dayak aben amu ambeum.

¹¹ Aria, dimppa king nug danab ah qagmeppig amu anadkkunu noum. Noa amu danab laippu laa nug ewau matulaknu hobulppa dayaknu lamen beɗuppa ii meum anttom.

¹² King nug danab amu antta amu, nug amegppa aum. ‘Lai, attemun na ewau matulaknu hobulnu lamen ⌊mettami amu⌋ ii mena, lag imu ooppa neme?’ Nug anam a amu, danab amu nug nai iitta, toetta dayom.

¹³ Nug anam dayeye, king nug nuhikkud maɗi nid amelagppa aum. ‘Ag aɗan, eppeg baeg ele hippalna, maoppeg dimittim gatatuppa noaɗ! Appa danab ag gaanna, aelkad emalna daaglag,’ awa aum.” Jesus Nug anam aum.

¹⁴ Jesus Nug anam ana amu Nug nai tuɗitta aum. “Ao, Kayak Nug danab ah kuɗum onilagppa ette, amge laippu laippu tituanadtte,” awa aum.

Sisar takis mettaknu Jesus oɗ medappig

¹⁵ Jesus Nug nai amu mattia male, ɗo gumak danab-Parasia ag ahan, laih gona, ag attem heppeg, Jesus Nug nai eheɗ laa ab, ib anidna heppeg, ɗo danab Nug aɗaglagnu nai madippig.

¹⁶ Ag anam hena, ag ahilkad ippunittak awak danab, am Herotnu ehanittak danab ele, ag amunu laala maatteg, Jesus gumidna gona appig. “Ippunittak danab, ig doottem, na am danab tutukku. Na danab okkai onig ele, o danab onig iitta, na amu ohnu dab-ii-mettem. Iitta. Na doyak diig genabib, na nai amuppanuib mattin, danab ah Kayaknu kobol ippunadttem

¹⁷ amunu, na keeke imu appe doognig. Na attem doottem? Ig takis Sisar mettagnig am kobol tutukku, o kobol tutukku iitta?” aon appig.

¹⁸ Ag anam appig, amge Jesus Nug ag eheɗ hekkulagnu heppig doya, Nug aum. “Ag am hambuppuak danab. Aɗinu ag heppeg, ɗo danab ag da aɗailkkulagnu hetteb?

¹⁹ Men doɗo takisnu laa ippuniɗppeg anttei!” awa aum. Awa a, ag men doɗo laa, onig Danarius, ag amu aon doppig.

²⁰ Ag amu aon doeg, Jesus ag oɗ mattom. “Men doɗo imuppa am aun onig, dottog ele daatte?” awa oɗ mattom.

²¹ Jesus anam oɗ matte amu, ag “Sisarnu,” aon appig. Ag anam aeg, Jesus ag amelagppa aum. “Aria, ag Sisarnu keeke Sisar mettaglag, amge Kayaknu keeke ag Kayak metteg!” awa aum.

²² Haen ag Jesusnu nai anam doona amu, ag dabmak kuɗum aonna, ag Nug uuidna goppig.

Danab mauhowa, eɗua hippaidkkunu oɗmak

²³ Deɗ amuppaib ɗo gumak danab-Sadyusi ag Jesus toppa uɗippig. Danab amu ag, “Danab mauhtteb amu ag eɗun ii hippaidmana,” aon adappig amunu, ag Jesus inam oɗ mettan appig.

²⁴ “Ippunittak danab, Moses nug aum. ‘Danab laa nug nid iitta ele mauheb amu, nug amag nug awag wau aweb, nid menuglah, amge aa nid menuglah amu, nid amuam danab amunu iitta, awagnu daakku.’ Moses nug anam yom.

²⁵ Aria, eamakkud eblaih aɗit ele ag ig oonigppa daappig. Ag anam daanna, awalag tatamnu nug ah awa, nug nid iitta dayaya mauhom. Mauhe nug amag nug awag wau awom.

²⁶ Am nug amag nug dimugppanu amu ele anamib heum. Aa amalti ele anamib heeg ukke, eblaih aɗit batak amu oh anamib heppig.

²⁷ Amu oh dimppa ah amu ele mauhom.

²⁸ Aria, eamakkud amu oh ag ah amu aakkuib aoeg, nug ag waalag dayom amunu, eɗua hibaittak haenppa ah amu nug eamakkud eblaih aɗit amu ag oolagppa aunnab wau daakku?” aon appig.

²⁹ Ag anam aeg am Jesus Nug oɗelagppa awa aum. “Ag am Kayak nai ii doonna, Kayaknu ɠagattag ele ag ii dootteb amunu, ag madittebnu diignu doyak tutukku iitta ele daan, nai maditteb.

³⁰ Amu eɗua hibaittak haen dimppa danab ag ah ii diimna, ah ele ag danab ii diimna. Iitta. Ag engel hab aabppa daatteb bia daaglag.

³¹ Amge eɗua hibaittak amunu amu ag Kayak naippa, nai laa Kayak Nug ag dooglagnu Moses amegppa mattie, nug yom amu, ag iite ebqeppig. Nai amuam inam.

³² ‘Da am Abrahamnu Kayak, Aisaknu Kayak, amu Jakopnu Kayak ele,’ awa aum. Kayak Nug danab mauhppig dilag Kayak ii daatte; Nug danab bau daatteb dilag Kayak daatte,” awa aum.

³³ Danab ah kuɗumnab ag qagmena daappig ele, ag Nug nai amu mattie doona, ottaina dabmak kuɗum aoppig.

Kayaknu ɗo anuqak

³⁴ Aria, Jesus Nug nai amuppa ɗo gumak danab-Sadyusi oɗelag qamute, ɗo gumak danab-Parasia ag amu doona, ag ⌊Jesus aɗaglagnu ib anidkkulagnu⌋ qagmeppig.

³⁵ Amu ag oolagppa laippu laa, nug ɗo mehuqak danab doyak amu okkainab ele, nug Jesus oɗ mettom.

³⁶ “Ippunittak danab, ɗo atten am ɗo oh eɗattak, nug okkainab daatte?” awa oɗ mettom.

³⁷ Nug anam oɗ mette amu, Jesus amegppa aum. “ ‘Naɗi, nahip Kayak, na nuhignu na meut ohppa, oot ohppa, nahip dabmak ohppa ele oot mauhaɗ!’

³⁸ Ɗo amu am okkainab, nug anuqak daatte.

³⁹ Aria, ɗo laa ele amubia daatte am inam. ‘Na nakka nahipnu oot mauhtte, amubia na laipad dilagnu ele oot mauhaɗ!’

⁴⁰ Ɗo aɗit amu aa propet nai, amu ɗo laa oh dilag tonattak daattep,” awa aum.

Kristusnu oɗmak

⁴¹ Jesus Nug anam a, ɗo gumak danab-Parasia ag aakku qagmena daaegeg, Jesus oɗ mattom.

⁴² “Kristus, nuhignu amu ag attem dootteb? Aun bekka amu Kristus?” awa aum. Nug anam a amu ag, “Dawit bekka,” aon appig.

⁴³ Anam aeg am Nug aum. “Anam dayeb amu, aɗinu Dawit nug Kayak Ouɗinu ehanittak awa, nug Kristusnu, ‘Naɗi,’ awa aum?

⁴⁴ Nug inam aum. ‘Yawe Nug dahil Naɗi amegppa inam aum. Na da eppel naɗiap-ppa daappe ukkeb, da nahip kekeɗ na waatppa maadkkul.’

⁴⁵ Ag iikkud antteg! Danab nug, nug bekkanu, ‘Naɗi’ ii atte, amge Dawit nug nukka, nug Kristusnu, ‘Naɗi,’ aum amunu, ig attemun Kristusnu, ‘Nug am Dawit bekka,’ akkunig?” awa aum.

⁴⁶ Jesus anam oɗ matte amu, laippu laa ag oolagppa nai amu nob mekkunu elele iitta dooppig amunu, haen amuppa digmak ag Jesus baula keeke laanu oɗ mettaglagnu baɗana, oɗ ii medappig.