Matyu 21 - Nobonob Baibel

Jesus Nug donki attan Jerusalem teum

¹ Aria ag gona, Jerusalem gukkuidna, ag aab Betpasi, Olipnu Qaukoppa dayom, ag aab amuppa tekkulagnu tenana, appa Jesus Nug ippunittak awak danab aɗit laa maate gokkulahnu a daaeheh,

² Nug aa amelahppa aum. “Aa goya, aab nakok miag amuppa teya neegya, aa pahanab donki laa, muɗippa qakkak, amu nag, ⌊nakok okkai meum,⌋ amu ele daapeɗ anatkkulah. Anatya amu aa uhuqatya, diiatya dahilppa uɗieɗ!

³ Aa anam hebepeɗ, danab laa nug anata, nai laa ab amu, aa inam aiɗ! ‘Naɗi Nug ahilahppa uɗat ele.’ Anam apeɗ amu, nug pahanab mateb, aa diiatya uɗiglah,” awa aum.

⁴ Aria, keeke amu oh am propet nai laa mattiak, nai amu elele medakkunu heum.

⁵ Nai amuam inam. “Ag danab ah Sion daatteb amelagppa appeg doyeg! ‘Antteg! King ahilag Nug ahilagppa aakku uɗitte. Nug nukka nug onig qe ne, ⌊Nug danab onig iitta bia,⌋ Nug donki laa attan dayaya, aakku uɗitte. Yo, Nug donki nag laa ⌊nakok okkai meum⌋ attan dayaya, aakku uɗitte’ ”

⁶ Aria, Jesus Nug aa amelahppa aum amu, ippunittak awak danab aɗit aa goya, Jesus aum amubia Nug oɗe dim lamidpiɗ.

⁷ Aa donki anig, nag ⌊nakok okkai meum⌋ ele diiatya ukkaeh, ag lamen ulahnu donki qaɗelahppa duqappig. Duqaeg amu Jesus Nug donki attan ta dayom.

⁸ Am danab ah huanaknab ag ele lamen ulahnu ahilkad ibppa duqappig. Duqaegeg, danab ah laala ag ad eppeg okkulna, ibppa duqadppig.

⁹ Ag anam duqeg, Jesus ugekke, danab ah kuɗumnab ag anuqna ukkaegeg, laa ag Jesus dim lamittegeg gona, ag oh enan appig. “Ig Dawit Bekka onig humatu! Laa nug Naɗi onigppa uɗitte amu, ig Naɗi Nug itidkkunu oonig daatte. Kayak, Nug attannab daatte amu, ig Nug onig humatu!” aon eppig.

¹⁰ Danab ah ag anam eegeg, Jesus Nug Jerusalem aab ooppa no, danab ah aab okkai amu ooppanu ag huanak ottaina appig. “Danab umu am aun?” aon appig.

¹¹ Ag anam oɗ meeg amu, danab ah kuɗumnab ag Jesus omalppig ele ag appig. “Nug amu Jesus, Nug am propet, Galilinu aab Nasaret danab,” aon appig.

Jesus Kayaknu mettid lakkanu danab laala lamattom

¹² Anam amu, Jesus Nug Kayaknu mettid lag nuhig tomppan keeke oh ele ooppa noa, Nug danab appa mana mettaknu keeke dadennu maadppig, laala daden meppig ele, Nug ag oh lamattom. Appan danab laala ag men doɗo baolippig ele amu, Nug ahilag balal huma awe, ukka na qe, am laala ag uppuɗil beɗulag nakok maatteg daden maadppig ele, Nug ahilag dayak aben ele huma awe, ukka na qeum.

¹³ Jesus Nug anam hewowa, Nug aum. “Kayak naippa yaak inam daatte. ‘Danab ag da laul am danab ah dilag unuqiɗak lag daatte dooglag,’ amge ag heeg, nug yab danab naunab dilag lokkumak aben bia daatte!” awa aum.

¹⁴ Jesus Kayaknu mettid lakka dayeye amu, danab laala ag amelag gaɗuak, amu baelag nau autaut oippig ele ag Nug gumidna uɗieg, Nug bappalattom.

¹⁵ Amge haen mana mettak danab okkai amu ɗo mehuqak danab ele ag Jesus kobol enanag heum anidna, nid naunau ag oolag gamag ahe, Kayaknu mettid lag nuhig tomppan keeke oh ele appa, “Ig Dawit Bekka onig humatu!” enan appig ele anidna, amu mana mettak danab okkai amu ɗo mehuqak danab ele ag oolag nauhe,

¹⁶ Nug oɗ medappig. “Na nid naunau aɗitai atteb umu doottemte?” aon appig. Aeg amu Jesus Nug amelagppa aum. “Da doottem, amge ag nai laa daatte ele amu ag iite ebqeppig. Nai amuam inam. ‘Na he, nid naunau amu nid yuɗ huhppanu ele ag na binan humaglagnu dootteb.’ ”

¹⁷ Nug anam ana, Nug aha uuatta, aab okkaippanu dimittim ukkom. Nug ukka, tuqan amuppa Betani appa dayom.

Jesus a, ad fig bunaɗom

¹⁸ Wakkaɗe buttua Jesus Nug aha, eɗua aab okkaippa ugekke, enug qeum.

¹⁹ Nug enug qe, ad fig laa ib daugppa dayeye antta, meu lakkunu waum, amge meu laa ii anttom. Iitta! Uɗugib anttom. Antta amu Nug ad amu amegppa inam aum. “Na baula meut iinab omana! Iittanab iitta,” awa aum. Anam a ad fig nug pahanab bunaɗom.

²⁰ Ad nug bunaɗe amu ippunittak awak danab ag anam anidna, ag eheɗ ottaina appig. “Attem he, ad fig nug pahanab bunaɗom?” aon appig.

²¹ Ag anam aeg, Jesus Nug oɗelagppa awa aum. “Da genab ag amelagppa attem, ag oolagppa genab doonna, dabmak laippu ele daanna amu, ag ele da ad figppa hemi amu, ag amubia hekkulag. Am ag keeke amuib ii hemana. Iitta. Ag qauko imu amegppa, ‘Na ahan yuppa ukke!’ appeg amu, nug anam nokku.

²² Amu ele ag oolagppa genab doonna unuqidkkulag amu, ag keeke aɗi aɗi aoglagnu unuqidna amu, ag aoglag,” awa aum.

Aun Jesus ɠagattag mettomnu oɗ medappig

²³ Amu dimppa Jesus Nug Kayaknu mettid lakka noa, danab ah amelagppa nai mattieye, mana mettak danab okkai, amu Juda dilag ikki danab ele ag Jesus gumidna gona, oɗ mettan appig. “Na ɠagattag aɗippa uɗat imu hettem? Aun nug ɠagattag amu mettom?” aon appig.

²⁴ Ag anam aeg amu Jesus oɗelagppa awa aum. “Da ele keeke laippunu ag oɗ madakkulnu hettem. Da ag oɗ madappi, oɗmak dahil imu nob mekkulag dayeb amu, da ɠagattag aɗippa uɗat hettem amu appi dooglag.

²⁵ Oɗmak dahil am inam. Jonnu layattak am adeppanu beum? Keeke amuam hab aabppanu keeke, o iitta danabnu keekeib?” awa aum. Jesus anam a amu, ag akka akka mattin appig. “Ig, ‘Habnu keeke,’ apput amu Nug, ‘Anam dayom dayeb amu, ag aɗinu oolagppa genab ii dooppig?’ akku.

²⁶ Amge ig, ‘Danabnu keeke,’ akkunig amu, danab oh ag Jonnu, nug am propet dootteb amunu, ig ahilagnu baɗattem,” akka akka aon appig.

²⁷ Ag anam ana amu, ag Jesusnu nai nob eɗun, “Ig ii doottem,” aon appig. Aeg amu Jesus Nug aum. “Aakku amunu, da ele ɠagattag aɗippa uɗat hettem amu appi ii doomna,” awa aum.

Danab laa, nug bekoɗ aɗit ele dilag nai

²⁸ Jesus Nug nai anam mattiowa, Nug nai baula ele tuɗitta aum. “Ag attem dootteb? Danab laa nug nid danab aɗit ele, amu nug aha ukka, nid tatamnu amegppa, ‘Na gona grep dad dahilppa uɗat he!’ awa a, nid amu nug,

²⁹ ‘Da uumi, da ii gopa,’ awa aum, amge dimppa nug nuhig dabmak eɗue, nug ukkom.

³⁰ Aria, mamelah nug nid gehanu gumitta ukka, anamib aum. Nug anam a, amu bekka gehanu nug, ‘Da ukken hekkul,’ aum, amge ii ukkom.

³¹ Am nid aɗit amu oolahppa aun nug mameg oɗe dim lamittom?” awa aum. A amu ag appig, “Nid tatamnu,” aon appig. Ag anam aeg, am Jesus amelagppa aum. “Da genab ag amelagppa attem. Takis awak danab, amu ib baag ah ele ag Kayaknu ɗo maɗoɗ ooppa noaknu ib nakok paha neegna anidtteb; ag mana mettak danab okkai, Juda dilag ikki danab ele, ahilag neekka anttak eɗittak.

³² Aɗinu? Jon nug uɗia, ag mana mettak danab okkai, amu Juda dilag ikki danab ele, nug ahilagppa genab tutukku hak kobol ippuanattom, amge ag oolagppa genab ii dooppig. Takis awak danab, amu ib baag ah ele ag amu oolagppa genab dooppig. Oolagppa genab doyeg, ag mana mettak danab okkai, amu Juda dilag ikki danab ele ag amu anidppig, amge ag oolag eɗue, oolagppa genab ii dooppig,” awa aum.

Danab nau grep dad gumappignu nai

³³ Jesus baula ele amelagppa aum. “Ag keeke danab ag dootteb ii dootteb ele ouaqata ippuanittak nai imu baula doyeg! Danab laa nug wan ele amu, nug grep dad eppowa, aɗ ita, dad ooppa amu nug grep meu tappa leppu awaknu aben laa ha, nug neekkeb ukkeb aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab, dimppa ag dad amunu meu laih mettaglagnu ag eppelagppa mewowa, nug aha, atu laih umanab ukkom.

³⁴ Dimppa, haen grep meu awak haen miag do, nug nuhikkud maɗi nid laa maatte, ag grep meu nuhig aoglagnu dad uɗat danab gumadna goppig.

³⁵ Ag ukkaeg amu, dad uɗat danab ag nuhikkud maɗi nid amu diin, laa makkuɗna, laa qeeg mauhe, laa amu menppa makkuɗppig.

³⁶ Ag anam heeg amu, dad mameg nug nuhikkud maɗi nid laala baula maatte goppig. Nug tatam maatte goppig amubia iitta, nakok kuɗum maatte goppig. Ukkaeg, dad uɗat danab ag tatam heppig, anamib eɗun heppig.

³⁷ Dimppa dad mameg nug, ‘Da bekkal amu, ag nuhignu ena elele dooglag,’ anana, nug bekkanab me ukkom.

³⁸ Nug me ukkom, amge haen dad uɗat danab ag nid amu anidna, akka akka nai mattina appig. ‘Nid imu nug dimppa mamegnu keeke oh aokku amunu, ahappeg, ig qepput mauheb, ig dad nuhig imu aotu!’ aon appig.

³⁹ Ag anam awona, ag nid amu aɗana, maoeg dad dimittim no, ag qeeg mauhom,” awa aum.

⁴⁰ Jesus anam awona, Nug nai tuɗitta oɗ mattom. “Aria, ag attem dootteb? Dimppa dad mameg nug uɗia, dad uɗat danab attem hadakku?” awa aum.

⁴¹ Jesus Nug anam a amu, ag appig. “Nug maɗi nid nau amu aqa aut autanab aweb mauhkkulag. Mauhppeg, nug grep dad amu eɗua awa, dad gumak danab laa eppelagppa meeb, dimppa ag meu ena haenppa aon mettaglag,” aon appig.

⁴² Aeg amu, Jesus Nug amelagppa aum. “Ag Kayak naippa nai laa daatte amu, ag iite ebqeppig? Nai amuam inam. ‘Men laa, lag hak danab ag men amu uuppig, amge lag mameg nug men amu awa me, lagnu men anuqak daatte. Naɗi Nug men amu he, men amu anuqaknab dayeye, ig amenigppa anidta, ig enanag doot, dabmak kuɗum aottem.’

⁴³ Amunu da ag amelagppa attem. Kayak Nug nuhig ɗo maɗoɗ ahilagppanu awa, danab laa eppelagppa meeb, ag meu ena aon mettaglag.

⁴⁴ ((Am laa nug men amu attan na qekku amu, nug nakok nauhkku, amge men amu nug laa qaɗeppa na qekku amu, nug nauha auta aokku,” awa aum.))

⁴⁵ Jesus Nug keeke danab ag dootteb ii dootteb ele ouaqata, ippuanattak nai laala mattiom amu, mana mettak danab okkai amu ɗo gumak danab-Parasia ele ag Nug ahilagnu nai mattiom dooppig.

⁴⁶ Ag anam doona, aɗaglagnu ib madippig, amge danab ah kuɗum ag Jesusnu, Nug am propet laa dooppig amunu, ag Nug aɗaglagnu baɗappig.