Matyu 20 - Nobonob Baibel

Kayaknu ɗo maɗoɗnu nai

¹ Aria, Jesus Nug nai tuɗitta aum. “Kayaknu ɗo maɗoɗ am imubia. Danab nug wan okkai ele, nug buttuanab aha, ee oɗiak abenppa maɗi nid nuhig uɗat hekkulagnu anadkkunu ukka, nug laa ag deɗ amuppa uɗat aoglagnu daaegeg anatta, nug ag nuhig grep dadppa uɗat hekkulagnu diiom.

² Ag deɗ laippunu uɗatnu daden silwa men doɗo tanig ele aoglagnu oolag laippu mena, uɗat hekkulagnu maatte goppig.

³ Aria, 9 kilok keeke nug eɗua ukka, danab laala ag ee oɗiak abenppa hamu hippaidna daaegeg anattom.

⁴ Nug anatta, ag amelagppa aum. ‘Ag ele gona, grep dad dahilppa uɗat heppeg, da daden tutukku madakkul,’ awa aum.

⁵ Nug anam a, ag goppig. Aria, aam ameg tutukkuppa, aam ameg ewamppa ele nug eɗua ukka, anamib heum.

⁶ Amu tueb, aam ameg tanig ele keeke, nug eɗua ukka, uɗat nid baula ele hippaidna daaegeg anattom. Anatta amu, nug aum. ‘Ag aɗi diignu deɗ laippu oh hamu daaeg uɗie, tueb meum?’ awa aum.

⁷ Anam a amu, ag nai nob mena appig. ‘Danab laa nug ig uɗat laa ii mekkom,’ aon appig. Ag anam aeg, nug ag amelagppa aum. ‘Ag ele grep dad dahilppa gona, uɗat heig!’ awa aum.

⁸ Aria, uɗat haen iitta me, grep dad mameg nug uɗat amu gumak danab onigppa e uɗie, amegppa inam aum. ‘Na uɗat nid onilagppa eppe uɗippeg, ahilag uɗat nob daden matte! Madakkut, amge laa dim doppig, amu dilagppa digmena, daden madappe ukkeb, tatam doppigppa bate!’ awa aum.

⁹ Dad mameg nug anam a amu, uɗat nid ag aam ameg tanig eleppa uɗat digmeppig ele, ag uɗin, anen anen silwa men doɗo tanig ele aoppig.

¹⁰ Anamib ukke ukke, danab ag buttuanab tatam digmena heppig ele, ag dona, ag oolagppa appig. ‘Ig am daden okkai aognig,’ aon appig. Amge iitta, ag ele silwa men doɗo tanig eleib aoppig.

¹¹ Haen ag anam aona amu, ag dad mameg aidna,

¹² inam appig. ‘Danab umu ag dimnab doppig, ag aua laippuib uɗat heppig, am na ahilag uɗat nob daden, amu ihinig ele melemel laippu mattame. Amge ig buttuanab uɗat digmeta, uɗat huanak heutut, aam ele huanak iqom,’ aon appig.

¹³ Ag anam aeg, amu dad mameg nug oɗelagppa awa, ag oolagppanu laippu laa amegppa nai inam aum. ‘Layal, da nahipnu eheɗ laa ii hemi. Da na ele uɗat nob dadennu oonih laippu iite memuɗ?

¹⁴ Nahip daden aon ukke! Daden da na mettami, daden anamib da danab dimnunab imu ele madakkulnu ool daatte,’ awa aum.

¹⁵ Nug anam ana, nug tuɗitta aum. ‘Da dahil keekeppa, keeke laala hekkulnu ool dayeb amu, da hekkulnu elele iittate? O iitta, da danab imu laa oh ehanadkkulnu hettem amu, na amunu amen qe, oot elele ii daattete?’ ” Jesus Nug anam aum.

¹⁶ Jesus Nug anam ana amu, Nug nai tuɗitta aum. “Amubia dim daatteb amu, ag anuqkkulag. Anuqak daatteb amu, ag dim daaglag,” awa aum.

Jesus Nug mauhowa, eɗua hippaidkkunu baula aum

¹⁷ Jesus nai anam mattiowa, Nug aha Jerusalem ugekke, danab laala ele oh goppig. Ag ibppa ukkaegeg, Jesus Nug nuhikkud ippunittak awak danab 12 diia, piɗe wana, agib amelagppa nai inam mattia aum.

¹⁸ “Doyeg, ig gemu iikku Jerusalem gottem. Gopput, laa nug Danab Bekkalag da, mana mettak danab okkai amu ɗo mehuqak danab ele eppelagppa meiɗeb, ag da hettoɗiakppa meiɗna, iuppeg mauhkkulnu nai qakkana,

¹⁹ ag iitta aɗi eppelagppa meiɗkkulag. Meiɗppeg, ag aon aon iuna, bu qaun eleppa eheɗ mataɗilna, ad emaitakppa atuliɗkkulag. Ag anam atuliɗppeg mauhe, deɗ ewamppa, Kayak heeb, da eɗuen hippaidkkul,” awa aum.

Jon Jems ele anilah nug Jesus keeke laanu oɗ mettom

²⁰ Haen amuppa Sebedi wau nug bekoɗ, Jems, Jon ele, ag Jesus gumidna gona, anilah nug Jesus noobppa gateg qaun o, keeke laanu oɗ medakkunu heum.

²¹ Nug anam heum amu, Jesus Nug aum. “Na aɗi keekenu oot hette?” awa aum. Jesus Nug anam a amu, ah nug Jesus amegppa aum. “Na appe, nid dahilaɗ aɗit imu aa nahip ɗo maɗoɗppa na heqon laih laih daaglah; laippu laa na heqon naɗiap-ppa dayebeb, laa na heqon nanehppa daakku,” awa aum.

²² Anilah nug anam a amu, Jesus Nug aum. “Ag atteb amu, ag keeke amunu tutukku ii dootteb. Keeke laa le mua ele bia da lakkul amu, aa amu lakkulahnu elelete?” awa aum. Nug anam a amu, aa Nug amegppa apiɗ. “I am elele,” aoya apiɗ.

²³ Aa anam aeh, Jesus Nug amelahppa aum. “Genab, le mua ele da lakkul amu, aa lakkulah, amge aun nug da heqol naɗiap-ppa daakku, aun nug da heqol nanehppa daakku amu, da akkulnu elele iitta. Da mamel Nug aben aɗit amu aunnu babaittom amu, aa aakkuib amuppa daaglah,” awa aum.

²⁴ Ag anam mattieg amu, ippunittak awak danab eblaih tanig ele laa ag nai amunu doona, ag eamag dilahnu oolag nauhom.

²⁵ Ag oolag nauhom, amge Jesus Nug ag onilagppa e doeg, Nug ag amelagppa aum. “Ag dootteb. Wan imuppan iitta aɗi danab ah ag danab okkai waalagppanab daatteb, amu okkai danab ag ɗo aɗi metteb, danab ah ag amuib dim lamidtteb.

²⁶ Amge kobol amu ag oolagppa aib dayom. Iitta. Danab nug ag oolagppa okkai daakkunu oo dayeb amu, nug ahilag maɗi nid dayaɗ!

²⁷ Ele amu, danab laa nug ag oolagppa anuqak daakkunu oo dayeb, nug ahilag begbeg maɗi nid dayaɗ!

²⁸ Yo, nug Danab Bekkalag da, da hettem amubia haɗ! Am inam. Danab Bekkalag da, da wan imuppanu danab ah ag da ehaniɗkkulagnu ii uɗimi. Iitta. Da ag ehanadkkulnu uɗimi, amu da dahil mauhakppa danab ah kuɗum eɗue diiadkkulnu ele uɗimi,” awa aum.

Jesus ameg gaɗuak danab aɗit bappalatom

²⁹ Jesus Nug nai amu mattia male, ag ahan Jeriko uuglagnu aab daugppa ukkaegeg, danab ah kuɗumnab ag Jesus dim lamidppig.

³⁰ Ag anam dim lamittegeg, danab aɗit amelah gaɗuak ele, aa ib daugppa heɗep neya daayya, haen aa Jesus ib amuppa uɗitte dooya amu, aa huanak eya apiɗ. “Naɗi, na Dawit Bekka, na ihinihnu oot gai-iitta doon oot metan ehanite!” aoya epiɗ.

³¹ Anam eeh amu danab ah kuɗumnab amu ag aa alatna, “Aa oɗelah qamuteɗ!” appig, amge aa baula huanak eya apiɗ. “Naɗi, na Dawit bekka, na ihinihnu oot gai-iitta doon oot metan ehanite!”

³² Aa anam eeheh amu, Jesus baeg ya daya, onilahppa e doeh, amelahppa aum. “Da ahilahppa aɗi hekkulnu oolah daatte?” awa aum.

³³ Nug anam a amu, aa oɗeppa aoi apiɗ. “Naɗi, na heppe i neegkkunihnu oonih daatte,” apiɗ.

³⁴ Anam aeh amu Jesus Nug ahilahnu oo bodoetta le me, Nug eppeg aa amelahppa me, geha aakkunab aa amelah obate, neegya ahaya, Jesus dim lamidpiɗ.