Matyu 19 - Nobonob Baibel

Jesus ewau pakuak kobolnu mattiom

¹ Jesus nai amu mattia mala, Nug aha Galili uua, Judanu wan atu laa Jodan le laih dayom ele amu, appa ukkom.

² Jesus ugekke, danab ah huanak ag Nug dim lamidna ukkaeg, Nug aben amuppa oɗe danab bappalattom.

³ Nug bappalattette, ɗo gumak danab-Parasia laala ag Jesus ma anttak mettaglagnu Nug gumidna uɗin, inam oɗ medappig. “Ihinig ɗoppa danab nug oo uug ohppa ah nuhig lamitteb gokku am enate o ena iittate?” aon appig.

⁴ Aeg amu Jesus Nug nob ma aum. “Ag Kayak naippa nai iite ebqeppig? Nai amuam inam. ‘Tatam keeke oh heum haenppa Kayak Nug danab ah haatom amu, Nug laa am danab, laa am ah haatom.’

⁵ Nug anam haatowa, ‘diig amunu ewau matulak haenppa danab nug anig mameg ele uuata, nug wau ele matulak daaya, aɗit amu aa ouqak laippu daaglah.’

⁶ Aa anam heya, aa baula aɗit iitta. Aa am laippu. Aa laippu amunu, keeke Kayak nukka matulatom amu, danab laa nug aib otaɗom,” awa aum.

⁷ Jesus Nug anam a amu, ɗo gumak danab-Parasia ag amegppa appig. “Na anam attem, amge attemun Moses nug ihinigppa ɗo laa meum, amu ɗo amuppa danab nug wau lamidkkunu oo dayeb amu nug uɗug laa ewau okkulaknu ya, wau mettowa, lamitteb gokku?” aon appig.

⁸ Anam aeg amu Jesus Nug aum. “Ag Kayak oɗe dim lamidkkulagnu uuppig amunu, Moses nug ag ahilkad ah lamadkkulagnu ɗo anam meum. Amge anukka digmak haenppa kobol amu ii dayom.

⁹ Amunu da ag amelagppa inam attem. Danab laa, nug wau ewau pakkua gappai ii heum, amge gamu nug ah amu lamittowa, nug ah bau aotte amu, danab amu nug aakku ewau pakkua gappai hak kobol hette,” awa aum.

¹⁰ Jesus Nug anam mattie amu nuhikkud ippunittak awak danab ag Nug amegppa appig. “Ewau otaɗaknu kobol am anam daatte dayeb, danab nug ah ii aokku am ena,” aon appig.

¹¹ Ag anam aeg, Jesus Nug aum. “Danab oh ag nai ag madippig dim lamidkkulagnu elele iitta. Laala ag anam hekkulagnu ɠagattag aoppig ele, ag am hekkulag.

¹² Am genab, danab laala ag beɗulagppa kobol laala daatte amunu, ag ah ii diitteb. Laala ag anilkad oolagppa dona mattoi daatteb. Laa danab ag heeg mattoi daatteb. Laa ag Kayaknu ɗo maɗoɗnu uɗatnu hena, beɗulag hagakka aona, ah ii aotteb. Anam daatte amunu, amu laa nug nai amu dim lamidkkunu elele dootte am nug dim lamidkku,” awa aum.

Jesus nid naunau itittak ena mattom

¹³ Haen amuppa ag nid naunau laa omaladna, Jesus Nug eppeg qaɗelagppa ma, ahilagnu unuqidkkunu Nug gumidna goppig, amge ippunittak awak danab ag amu anidna, ag laa nid diin goppig ele nakok aladppig.

¹⁴ Nakok alatteg, am Jesus Nug aum. Danab ag nid naunau bia daatteb, ag am Kayaknu ɗo maɗoɗ ooppa daatteb amunu, ag nid naunau uuadppeg, dahilppa doig! Ag ib ahilag aib oo neppig.

¹⁵ Nug anam ana amu, Nug eppeg ag qaɗelagppa mewowa, dimppa Nug aben amuppan aha, laih ukkom.

Nid bau enub kuɗum elenu nai

¹⁶ Aria, danab laa Jesus gumitta uɗia aum. “Ippunittak danab, da aɗi keeke ena heina da bauklel hanhannu aokkul?” awa aum.

¹⁷ A amu Jesus Nug aum. “Na aɗinu da keeke enanu oɗ meɗattem? Laippu aakkuib Nug am ena amunu, na bauklel aokkutnu na ɗo nuhig dim lamidkkut,” awa aum.

¹⁸ Anam a amu danab amu nug aum. “Aɗi ɗo dim lamidkkul?” awa aum. A amu Jesus Nug aum. “Na danab aib qeppe mauhom. Na ewau aib pakkuna gappai heme. Na yabhok aib heme. Na hettoɗiakppa, aben laa oh eleppa, na layapnu nai hambuppuak aib mattime.

¹⁹ Na mamen, anin ele binalah mate! Na nakka nahipnu oot mauhtte, amubia na laipad dilagnu ele oot mauhaɗ!” awa aum.

²⁰ Awa a amu nid bau aum. “Da ɗo amu oh dim lamitti uɗie, gemu ele anamib hettem, amge da aɗi laa hekkul?” awa aum.

²¹ A amu Jesus Nug amegppa aum. “Na genab tutukku hak danab elelenab bekkutnu amu na gona, na enun oh meppe, danab laala daden meppeg, na men doɗo amu oh aon, daɗek danab mattona amu, na hab attan enun okkai ele daakkut. Anam hewona amu na eɗun dona, da dim lamiɗe!” awa aum.

²² Awa a amu nid bau amu doya, nug oo uugnab ele ukkom. Aɗinu? Nug enub kuɗum ele.

²³ Jesus Nug anam mattiowa, nuhikkud ippunittak awak danab amelagppa aum. “Da genab ag amelagppa attem, danab nug enub kuɗum ele nug Kayaknu ɗo maɗoɗ ooppa noaknu am uug okkai ele.

²⁴ Da baula ag amelagppa attem, doɗ kamel nug koitaknu tutui giɗoppa noa laih gokkunu am uug ele, amge danab enub kuɗum ele, nug Kayaknu ɗo maɗoɗ ooppa gokkunu, amuam uug okkainab ele,” awa aum.

²⁵ Jesus Nug anam a amu, nuhikkud ippunittak awak danab ag huanak ottaina dabmak kuɗum aoppig. Ag anam henana appig. “Anam dayeb amu aun nug padal memanu ehanittak aokkunu elele?” aon appig.

²⁶ Ag anam aeg amu, Jesus Nug ag tutukku neekkattatta, amelagppa aum. “Danab ag akka elele iitta, amge Kayak Nug keeke oh hekkunu elele,” awa aum.

²⁷ Jesus Nug anam a amu Pita nug oɗeppa awa aum. “Antte, ig ihinig keeke oh uuta, na dim lamidttem amunu, ig aɗi am ihinignu aognig?” awa aum.

²⁸ Nug anam a amu Jesus Nug eɗua, ag oh amelagppa aum. “Da genab ag amelagppa attem, keeke oh bau bak haenppa, Danab Bekkalag da, da sia king binag amahlak oppiaawak ele dahilppa daabppi, ag da dim lamiɗtteb ele ag sia king 12ppa daanna, Israel dilag huu okkai 12 amu gumadkkulag.

²⁹ Aria, danab aun nug da onilnu ha, nug anig, mameg, awakkud, amakkud, apakkud, appinkkud, nug wau, bekkod, aɗekkud, nug laug amu nuhig dad okkai ele uuatta, da dim lamiɗtte amu, nug hamu ii daama. Iitta. Nug amu bia amge laippuib iitta, nug 100 awa, nug bauklel hanhannu ele aokku.

³⁰ Amge danab kuɗum anuqak daatteb amu, ag dim daaglag. Am kuɗum laa ag dim daatteb amu, ag anuqkkulag,” awa aum.