Matyu 18 - Nobonob Baibel

Kayaknu ɗo maɗoɗ ooppa aun nug okkai daakku

¹ Haen amuppa Jesusnu ippunittak awak danab ag Jesus gumidna uɗin oɗ medappig. “Aun am Kayaknu ɗo maɗoɗ ooppa okkai daatte?” aon appig.

² Aeg amu Jesus Nug nid nakok laa awa, ag oolagppa me, hibaitta dayeye,

³ Nug aum. “Da genab ag amelagppa attem, ag oolag ii eɗueb, ag nid naunau ag ⌊mamelkad waalagppa⌋ daatteb bia ⌊Kayak waappa⌋ ii daaglag amu, ag Kayaknu ɗo maɗoɗ ooppa iinab nomana.

⁴ Amunu laa nug onig qe ne oitte, nid nakok imubia amu, nug Kayaknu ɗo maɗoɗ ooppa, laa oh eɗattak daatte.

⁵ Amu ele, danab aun nug da onilnu nid nakok laa imubia ele laippu dayaknu ooppa eleleib dootte amu, nug aakku da ele laippu dayaknu ooppa eleleib dootte.

⁶ Danab laa nug nid nakok laa, nug dahilnu ooppa genab dootte ele, nug nuhig ooppa genab doyak heeb nauhkku dayeb amu, amuam naunab. Danab amunu amu, nug ii heum haenppa danab ag nug baagppa ee aeg ganuɗaknu men okkai qakkan, maoppeg yuppa noa mauhlo, amuam nakok nau, amge nug dayaya, nid nakok laanu ooppa genab doyak heeb nauhkku, amuam naunab nau.

⁷ Wan imuppan danab ag laala hipunin hekkulagnu eeɗadtteb amu, ahilagnu gadonnab gadon. Kobol amuam genabnab daatte, amge danab nug anam hette, nuhignu am gadonnab gadon.

⁸ Amunu na eppen o baen nug he, na hipunin hettem dayeb amu na eppen o baen laih amu okkulna maoppe ukkaɗ! Na baen o eppen laihigib ele daanna, bauklel aokkut amuam ena. Amge na eppen o baen aɗit oh ele daakkut, ag na mawidppeg aab aɗu ii qauha, hanhan eotteppa gokkut am ena iitta.

⁹ Amubia na amen nug he, na hipunin hettem dayeb, na amen laih kehan, maoppe ukkaɗ! Na amen laihigib ele daanna, na bauklel aokkut amuam ena. Amge na amen aɗit oh ele daakkut, ag na mawidppeg, padal mak aben aab aɗ eleppa gokkut, amuam ena iitta,” awa aum.

Sipsip padal mekkunu dayomnu nai

¹⁰ Jesus Nug anam ana amu Nug aum. “Ag dabmena autna aweg! Da ag amelagppa inam attem. Nid naunau dilag engel ag haen oh da Mamel, hab attan daatte amu, ag Nug noobppa daanna, ag atognoadtteb amunu, ag nid nakok laippu laanu amu, nug am keeke hamu aib dooppig.

¹¹ ((Aɗinu? Danab Bekkalag da amu da danab hipuninppa nauhppig amu, ag eɗue diiadkkulnu uɗimi.))

¹² Am ag attem dootteb? Danab laa nug sipsip 100 ele, am laippu laa nug nukka matakka wana oiyaya, qettoɗkku dayeb amu, sipsip mamelag nug 99 uuatteb, qauko nakokppa daabppeg, nug ukka, laippu amu iite mattima?

¹³ Da genab ag amelagppa attem, haen nug mattia antta amu, maɗoɗppan gamag ahak 99 dilag matagna ii oippig ele, amu eɗittak, laippu amunu am maɗoɗppan gamag ahak okkainab aokku.

¹⁴ Anam amu, da Mamel, hab attan daatte amu, Nug nid nakok laa padal mekkunu oo ii daatte.

Layag eheɗ heeb ehanittaknu nai

¹⁵ Amu laa ele, na layap nug nahipnu eheɗ heeb amu, na goppe, aa aya daayya, nuhig eheɗ hak amu ippunidkkut. Ippunidppe, nug nahip nai dookku amu, nug na layap daakku.

¹⁶ Amge nug nahip nai ii doyeb amu, na Kayak naippa nai daatte, amubia hekkutnu, na danab laippu, o aɗit ele diiatppe, na ele gona nai mattieg! Kayak naippa nai amunu daatte am inam. ‘Aɗi heehe anttomnu mattiak danab aɗit, o iitta ewam ag danab laa eheɗ heum appeg amu, nai amunu am genab doyeg! Laippuib ab amu, ag genab bia aib dooppig.’

¹⁷ Aria ag nai madippeg, nug amu dilag nai ele doyak uueb amu, na Kayaknu tamaniak amelagppa akkut. Appe, amu ele nug ii doyeb amu, na nuhignu, nug am Kayaknu tamaniak ooppa ii daatte, nug am dimittim danab, anam doye!

¹⁸ Da genab ag amelagppa attem, keeke ag wanppa qakkaglag amu, keeke amu hab aabppa ele qakkak daakku. Aria, keeke ag wanppa uhuqkkulag amu, keeke amu hab aabppa ele uhuqak daakku.

¹⁹ Anam amunu, da genab ag amelagppa attem, ag oh wan imuppa daatteb imu, ag oolagppanu aɗit laa keeke laanu oolah laippu meya, Kayak amunu oɗ medapeɗ amu, da Mamel hab aabppa daatte, Nug matakku.

²⁰ Ao, danab aɗit, o ewam aakkuib ag da onilppa, aben adekkuppa qagmekkulag amu, da ele ag oolagppa daakkul,” awa aum.

Layagnu hipunin uhuqa mettaknu nai

²¹ Jesus Nug nai amu mattia male amu, Pita nug Jesus gumitta doa aum. “Naɗi, da layal nug dahilppa hipunin heeb amu, da hipunin nuhig gane batak uhuqen medakkul? Da haen eblaih aɗit ele uhuqen medakkulte?” awa oɗ mettom.

²² Pita nug anam a amu, Jesus amegppa aum. “Eblaih aɗit batak iitta. Iitta! Na amu eɗittak haen ohppa uhuqna mette!

²³ Anam amunu Kayaknu ɗo maɗoɗ nug am king laa bia, nug nuhikkud maɗi nid nuhigppanu lon aoppig, ag anen anen lon amunu daden nob eɗuglagnu dabmak awom.

²⁴ Nug dabmak awa, nug uɗat amu digmeum. Digme amu, nuhig maɗi nid laa nug men doɗo milion kuɗum lonnu daden nob dayom,

²⁵ amge nug lonnu nob eɗukkunu elele iitta. Amunu king nug nuhikkud daup ag danab amu, ah nuhig, nug bekkod aɗekkud, amu nuhig keeke oh ele ee oɗiak abenppa maadppeg, danab laala ag daden meppeg, king nug amuppa lonnu nob eɗua aokkun aum.

²⁶ Nug anam aum amunu, maɗi nid amu nug danab okkai noobppa gateg qaun o, amegppa aum. ‘Na dahilnu oot doyeb, amel mekkutnu unuqttem. Da lon nahip-ppanu aomi amu, da lon amunu daden nob oh eɗue medakkul!’ awa aum.

²⁷ Awa a amu, danab okkai nug nuhig maɗi nidnu oo bodoetta le me, nuhig lonnu nob oh uhuqa mettom. Uhuqa mettowa, nug he ukkom.

²⁸ Amge haen maɗi nid amu nug noa ugakka, ibppa nuhig uɗat laippu laa anttom; layag amu nug nuhigppanu lon awom, amu lon amunu daden nob men doɗo nakokib. Aria antta, nug layag baagppa aɗe, ulah pehettak aokkunu elele iitta daye, nug amegppa aum. ‘Na lon dahilppanu aome amu, na lon amunu daden nob meɗe,’ awa aum.

²⁹ Awa a amu nuhig uɗat laippu nug gateg qaun o, layag amegppa aum. ‘Na dahilnu oot doyeb, amel mekkutnu unuqttem. Da lon nahip-ppanu aomi amu, da lon amunu daden nob oh eɗue medakkul,’ awa aum.

³⁰ Nug anam awa aum, amge laa nug uua he, ag omalna gona, maniguittak ooppa meeg dayeye, nuhig lonnu daden nob oh eɗua mettowa, nug eɗua dimittim dokkunu aum.

³¹ Nug anam he, laikkud uɗat laippu ag kobol amu anidna, ag oolagppa ena iittanab dooppig. Anam doon, ag oh gona, ahilag okkai noobppa nai amu oh madippig.

³² Ag mattieg amu, danab naɗi nug maɗi nid amu onigppa e uɗie, nug aum. ‘Na maɗi nid nau! Tatam na dahilppa unuqme amu, da nahip lonnu daden nob oh da uhuqen mettami.

³³ Da nahipnu ool gai-iitta doye ool metten ehanidmi, am aɗinu na layapnu anambia ii heme?’ awa aum.

³⁴ Aria, danab naɗi nug oo nauhe, nug maɗi nid amu maniguittak gumak danab eppelagppa me, ag nob nau medappeppeg, nug anam dayaya, danab okkaippanu lon awom, nug lon amunu daden nob oh eɗua mettowa, nug eɗua dimittim dokkunu aum.

³⁵ Anam amunu ag lailagnu eheɗ hak oolag ohppa uhuqna ii medappeg amu, da Mamel, hab aabppa daatte, Nug ele ahilagppa anamib hekku,” awa aum.