Matyu 17 - Nobonob Baibel

Jesus beɗu eɗuom

¹ Deɗ eblaih laippu uue, Jesus Nug Pita, Jems, Jon ele, ag omalatta, qauko okkai laappa te, ag akka daappig. Jems, Jon ele amu, aa am eamag.

² Appa daanna, Jesus Nug beɗu eɗuom. Beɗu eɗue amu, Nug iɗu am aam amahlak bia amahalele, nuhig lamen amu hakkabnab, amahlak bia dayom.

³ Anam amahalele amu, Moses, Elaiya ele aa tulai doeh, Jesus ele nai madippig.

⁴ Mattiegeg amu, Pita nug Jesus amegppa aum. “Naɗi, ig aben imuppa daagnignu am enanag amunu, na appe, da peh ewam buukkul; nahip laippu, Mosesnu laippu, amu Elaiyanu laippu ele,” awa aum.

⁵ Nug anam mattieye, lombig hakkab amemɗia awak ele tonattette, lombig ooppanu baag laa inam a dooppig. “Imuam da Bekkal, da nuhignu ool mauhtte. Da nuhignu enanag doottem. Ag nuhig nai doyeg!” awa aum.

⁶ Awa a amu, ippunittak awak danab ag nai amu doona, ag eheɗ nau baɗan, nena qena, iɗulag wanppa lokkumidna niippig.

⁷ Ag anam baɗan heegeg, Jesus Nug gumatta doa, aɗalatta, Nug ag amelagppa aum. “Ag aheg! Ag aib baɗappig.”

⁸ Jesus anam a amu, ag ikkilag human, danab laa ii anidppig, Jesus nukkaib anidppig.

⁹ Ag anam hewona, ahan qaukoppanu nenana, Jesus Nug ippunittak awak danab, ag keeke anidppig amunu mattimnanu ɗo ma, amelagppa inam aum. “Ag danab laippu laa amegppa kobol anidppig amunu aib madippig! Ag anam daappeg ukkeb, Danab Bekkalag da, da eɗue mauhakppanu hippaidppi ag mattiglag,” awa aum.

¹⁰ Nug anam a amu, ippunittak awak danab ag Jesus oɗ medappig. “Aɗinu ihinig ɗo mehuqak danab ag, ‘Elaiya nug tatam uɗikkununab daatte; amu dimppa Kristus uɗikku,’ atteb?” aon appig.

¹¹ Aeg amu Jesus Nug aum. “Ɗo mehuqak danab ag, ‘Elaiya nug tatam uɗia, keeke oh bappaidkku,’ atteb amu, ag genab atteb,

¹² amge da ag amelagppa attem. Elaiya nug matu uɗiom amu ag nug ii dooppig, ag nuhigppa eheɗ hekkulagnu oolagppa dayom amu ag heppig. Amubia Danab Bekkalag da, da guittak meɗappeg dookkul,” awa aum.

¹³ Jesus Nug nai anam mattieye, ippunittak awak danab ag Nug Layattak Jonnu aum dooppig.

Jesus Nug ouɗi nau laa lamittom

¹⁴ Aria ag gona, danab ah kuɗum noolagppa teppig. Teeg amu danab laa nug Jesus toppa ukka, gateg qaun o aum.

¹⁵ “Naɗi na nid danab dahilnu oot gai-iitta doon oot mettan ehanitte! Nuhig oɗe am beɗu mauhak, amu oɗe amuppa deɗ laala nug beɗu huan hahaɗeɗe, na qette. Haen kuɗum nug mauha, aab aɗuppa na qette amu leppa ele na qette.

¹⁶ Amunu da nug awe, ippunittak awak danab nahipad gumatte gomi, amge ag heppeg ena daakkunu elele iitta,” awa aum.

¹⁷ Nug anam a amu, Jesus Nug oɗeppa awa aum. “Ag oh oolagppa genab doyak iitta. Ag eheɗ haknu ag tiilagppa daatte! Da ag ele haen elab daamut, amge ag dahilnu oolagppa genab ii dootteb amunu, da ool uug ele. Ag haen ganeb ag dahilnu oolagppa genab dooglag? Ag nid omalna dahilppa doig!” awa aum.

¹⁸ Nug anam a, ag omalna doeg, Jesus Nug ouɗi nau nid amu uuitta gokkunu haknunab a, nug nid uuitte, amu geha aakku nid beɗuppa oɗe amu iitta meum.

¹⁹ Jesus Nug anam he amu, ippunittak awak danab ag akkaib dona, Jesus oɗ medappig. “Aɗinu ig ouɗi nau amu lamidkkunignu elele iitta?” aon appig.

²⁰ Aeg amu Jesus Nug ag amelagppa aum. “Ahilag ooppa genab doyak am iitta bia amunu ag elele iitta. Da genab ag amelagppa attem, ahilag ooppa genab doyak nakokib dayeb, ad mastet aeg bia amu, ag keeke okkai hekkulagnu elele. Ao, ooppa genab doyak ahilag nakokib anam dayeb amu ag qauko umunu, ‘Na ahan laih uppa wa!’ appeg amu, geha wakku. Amunu ag aɗi hekkulagnu daatte amu ag hekkulagnu elele.

²¹ ((Amge ib laappa laa nug ouɗi nau imubia ii lamidma. Iitta. Unuqittak, amu ee ohnu kud ma dayaknu ele amuppaib,” awa aum.))

Jesus Nug mauhowa, eɗua hippaidkkunu baula aum

²² Jesus Nug anam a, ag oh Galili gona daanna, Jesus Nug ippunittak awak danab amelagppa baula aum. “Danab Bekkalag da amu, laa nug geha da danab eppelagppa meiɗeb,

²³ ag heppeg da mauhkkul. Mauhppi, deɗ ewamppa Kayak heeb, da eɗue hippaidkkul,” awa aum. Nug anam a, nuhikkud ippunittak awak danab ag oolagppa uugnab dooppig.

Jesus Nug mana mettaknu takis aum

²⁴ Amu dimppa ag gona Kaperneam teppig. Teeg amu Kayaknu mettid lagnu takis awak danab ag Pita toppa uɗin inam appig. “Ahilag ippunittak danab nug Kayaknu mettid lakkanu takis hettete o iittate?” oɗ medappig.

²⁵ Ag anam oɗ mettaeg amu Pita nug, “Yo,” awa aum. Nug anam ana, lag ooppa no, amu Jesus Nug tatam Pita oɗ mettom. “Saimon, na attem doottem? Wan imuppanu king ag aun toppanu takis aotteb? Ag bekkalkad, amu dilagppa aottebte? O iitta danab ah gumadtteb ele, ag amu dilagppan aottebte?” awa aum.

²⁶ Nug anam a amu Pita nug aum. “Ag gumadtteb dilagppan aotteb,” awa aum. Nug anam a amu Jesus Nug oɗeppa awa aum. “Anam amu, ag bekkalkad dilagppa amu ag takis ii aotteb. ⌊Da am Kayak Bekka amunu, da takis imu ii helom,⌋

²⁷ amge ag oolag nauhmanu, Pita na gona, le amegppa huk ena, kakai tatam aokkut amu oɗe haqana, na men doɗo anidkkut. Anidna aon, ihinih takis amuppa hekkut,” awa aum.