Matyu 16 - Nobonob Baibel

Laa ag Jesus Nug epponak keeke heeb anidkkulagnu appig

¹ Deɗ laa ɗo gumak danab-Parasia amu ɗo gumak danab-Sadyusi ele ag Jesus gumidna gona, ag Jesus ma anttak mettanna, Nug Kayak dabmettaknu kobol danab haknu elele iitta laa heeb anidkkulagnu oɗ medappig,

² amge Jesus Nug nob ma aum. “Haen tueb meum amu, ag atteb, ‘Aam aam eeɗe, hab kokoɗ eppom amunu, atu ena daakku,’ aon atteb.

³ Aria buttua amu ag atteb, ‘Gemu amu lombig hinqak, hab am kokoɗ amunu haen nau, gu ulah ele daakku,’ aon atteb. Ag hab waappan keeke epeɗikkulagnu dootteb, amge ag haen gemu imunu Kayak dabmettaknu kobol danab haknu elele iitta daatteb anidna epeɗikkulagnu ii dootteb.

⁴ Ag danab nau. Ag Kayak uuna, kobol laala dim lamadtteb ele. Ag da Kayak dabmettaknu kobol danab haknu elele iitta heppi anidkkulagnu atteb, amge da laa ii hepa. Jona nuhigppa aɗi beum aakkuib ag ippunadkkul.” Jesus anam awowa, Nug uuatta ukkom.

⁵ Uuatta ukke, Jesus Nug nuhikkud ippunittak awak danab ele uubppa tena, le ameg mataɗna goppig, amge ippunittak awak danab ag bret ele awa ukkaknu daulag atiom.

⁶ Ag anam gona tewona amu, Jesus Nug ag amelagppa aum. “Ag ɗo gumak danab-Parasia amu ɗo gumak danab-Sadyusi ele dilag yisnu dabmeig!” awa aum.

⁷ Nug anam a amu, ippunittak awak danab ag akka akka appig. “Ig bret ii aomut amunu Nug anam aum,” aon appig.

⁸ Aeg, Jesus Nug ag aɗi nai am mattiegeg doya, Nug aum. “O danab, ag oolagppa genab nakokib dootteb ele, ag akka akka aɗinu bret iittanu nai maditteb?

⁹ Ag diignu doyak tutukku iite dootteb? Ag bret kunum tanig ele danab 5,000 laeg, kaleg gane inaeg ambeum am ag amelagppa iite dotte?

¹⁰ Amu ag bret kunum eblaih aɗit ele amu danab 4,000 laeg, ag kaleg gane inaeg ambeum am ag amelagppa iite dotte?

¹¹ Ag attemun keeke imunu ii dooppig? Da bretnu ii ami, amge da baula attem. Ag ɗo gumak danab-Parasia, ɗo gumak danab-Sadyusi ele dilag yisnu dabmeig!” awa aum.

¹² Jesus anam a amu ippunittak awak danab ag dooppig, Nug yisnu ii aum. Iitta. Nug ɗo gumak danab-Parasia amu ɗo gumak danab-Sadyusi ele dilag nainu aum.

Pita nug, Jesus am Kristus, miag atia aum

¹³ Aria, Jesus Nug nuhikkud ippunittak awak danab ele ag gonana, ag Sisaria Pilipai gukkuidna wanana, amu Jesus Nug ag oɗ mattom. “Danab ag, Danab Bekkalag da, ag dahilnu, ‘Da am aun,’ ag amunu aɗi atteb?” awa aum.

¹⁴ Nug anam a amu, ag appig. “Laa ag nahipnu, ‘Layattak Jon,’ atteb; laa ag, ‘Nug am Elaiya,’ atteb; amu laa ag, ‘Nug am Jeremaia,’ o, ‘Nug am propet oolagppan laa,’ aon atteb,” aon appig.

¹⁵ Ag anam aeg amu, Jesus Nug aum. “Anam aakku amge ag akka, ag dahilnu aɗi atteb?” awa aum.

¹⁶ Jesus anam a amu, Saimon Pita Nug oɗeppa awa aum. “Na am Kristus, na Kayak bauklel ele Bekka,” awa aum.

¹⁷ Pita a amu, Jesus Nug oɗeppa awa aum. “Saimon, Jona bekka, Kayak Nug na itittak ena mettom daatte. Danab wanppanu laa nai amu ii ippunittom. Iitta. Da Mamel hab attan daatte, Nug na ippunittom

¹⁸ amunu, da na amenppa attem. Na am Pita, na am men, amu men imuppa da tamaniak dahil buukkul. Buuppi, Satannu ɠagattag nug qeeb ii nema.

¹⁹ Da Kayaknu ɗo maɗoɗnu odnu ki daatteb amu, da na medakkul. Keeke na wanppa qagakkut amu, keeke amu hab aabppa ele qakkak daakku. Aria, keeke na wanppa uhuqkkut amu, keeke amu hab aabppa ele uhuqak daakku,” awa aum.

²⁰ Jesus Nug anam ana amu, Nug nuhikkud ippunittak awak danab ag laa amelagppa nuhignu, “Nug am Kristus,” amananu ɗo ɠagattag meum.

Jesus Nug mauhowa, bau hippaidkkunu aum

²¹ Haen amuppa Jesus Nug digma, Nug ib laa iitta, Nug Jerusalem ukkeb, appa Juda dilag ikki danab, mana mettak danab okkai, amu ɗo mehuqak danab ele ag heppeg, Nug guittak kuɗum dookku, ag qeppeg mauhkku, deɗ ewam uueb Kayak heeb, Nug eɗua hippaidkku amu, Nug nuhikkud ippunittak awak danab amelagppa aum.

²² Jesus Nug amunu a amu, Pita nug Jesus omala, piɗe wana, digma daug bata, amegppa aum. “Naɗi, na nahip-ppa keeke amu iinab bema, iittanab!” awa aum.

²³ Pita anam awa a amu, Jesus Nug eɗua Pita amegppa aum. “Satan, na dimulppa gona, da ippulppa aib daame! Na Kayaknu dabmak ii dim lamidttem; na danab dilag dabmak dim lamidttem,” awa aum.

²⁴ Haen amuppa Jesus Nug nuhikkud ippunittak awak danab amelagppa aum. “Laa nug da dim lamiɗkkunu oo dayeb amu, nug nuhig dabmak dim lamidkkunu dab-iinab-mema. Iitta. Nug nuhig ad emaitak mawa, da dim lamiɗaɗ!

²⁵ Aɗinu? Danab laa nug wanppan bau daakkunu dabmak anuqak aotte amu, dimppa nug bauklel hanhannu ii aoma, amge laa nug dahilnu anuqak dootte, wanppanu bau dayaknu anuqak ii dootte amu, nug am bauklel hanhannu aokku.

²⁶ Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku? Nug amuppa bauklel hanhannu daden mekku? Iittanab!

²⁷ Danab Bekkalag da, da Mamelnu binag amahlak oppiaawak ele uɗippi, engel ele uɗignig, amu haen amuppa da danab ah dilag hak, amu nob eɗue madakkul.

²⁸ Da genab ag amelagppa attem. Danab laala gemu ippa hippaidna daatteb ele, ag paha ii mauhmana. Iitta. Tatam ag Danab Bekkalag da, dahil ɗo maɗoɗ ele awen nebippi, ag mauhkkulag,” awa aum.