Matyu 14 - Nobonob Baibel

Herot Antipas nug Layattak Jon baag otaɗom

¹ Haen amuppa Herot Antipas nug Jesus onig binag ele doyom.

² Doya amu nuhikkud maɗi nid amelagppa aum. “Danab amuam Layattak Jon mauhowa, eɗua hibaittom amunu, kobol danab hekkunu elele iittanu ɠagattag okkai okkai amu nuhigppa bette,” awa aum.

^3-4 Amunu diig am Herot, Pilip ele, aa eamag, amu Herot nug Pilip wau Herodias aɗitta awe, Jon nug Herot amegppa aum. “Na nug wau aome, amuppa na ɗo tippalme, kobol amuam ena iitta,” awa aum. Nug anam awa attom amunu, Herot nug Jon hippala, maniguittakppa meum.

⁵ Amu nug Jon qeeb mauhkkunu heum, amge nug danab ah dilag baɗom. Aɗinu? Danab ah ag Jonnu, “Nug am Kayaknu propet,” aon appig.

⁶ Anam dayom, amge Herotnu menuak deɗppa, Herodias aɗeg ɗo danab kuɗum noolagppa ahi goɗe, Herot nug ittag qeum

⁷ amunu, nug nai ɠagattag qetta ana, nug nid ahin keeke aɗi laa aokkunu ab amu medakkununab aum.

⁸ Nid ahin amu anig nug dabmak mettom amunu nug aum. “Na Layattak Jon baag otaɗna, ikki tappiɗppa mena, haen imuppa meɗakkut,” awa aum.

⁹ Nid ahin nug anam a amu King Herot nug oo uug nau ele dayom, amge nug tatam nai ɠagattag qetta aawo, ɗo danab ag nug ele ee lappig amu, ag ele nai amu dooppig amunu nug aum. “Layattak Jon ikki tappiɗppa mena, aon dona metteg!” awa aum.

¹⁰ Nug anam ana amu nug he, maɗi nid laa nug ukka, maniguittakppa appa Jon baag otaɗom.

¹¹ Baag otaɗa, nug ikki tappiɗppa ma, nid ahin mettom. Nid ahin mette amu, nid ahin nug awa ukka, anig mettom.

¹² Layattak Jonnu ippunittak awak danab ag nai doona uɗin, Jon gaɗa aon gona boumppig. Ippunittak awak danab ag Jon boumona, ag gona Jesus amegppa appig.

Jesus danab 5,000 ee mattom

¹³ Haen Jesus nai amu doya amu, Nug aben amu uua, uub awa, aben danab ii daatteb, appa gokkunu ukkom. Nug anam ugekke amu, danab ah kuɗumnab ag nai doona, ag aab laalappanu ahan, Jesus ugekke, ag baelagppa Nug dim lamidna goppig.

¹⁴ Ag anam heeg, haen Jesus ukka eeɗa, danab ah kuɗumnab ag gona daaegeg anatta, Nug ahilagnu oo bodoetta le me, ahilkad danab ah oɗe ele bappalattom.

¹⁵ Bappalatte, tueb mekkunu he, nuhig ippunittak awak danab ag Jesus gumidna dona amegppa appig. “Laih imuam aben danab ii daatteb. Aam ele ukka notte amunu, danab ah kuɗumnab imu amelagppa appe, ag aabaab gona, ee daden mena laig!” aon appig.

¹⁶ Ippunittak awak danab ag anam aeg amu, Jesus Nug aum. “Aɗinu da appi gokkulagnu atteb? Ag ee madappeg laig!” awa aum.

¹⁷ Nug anam a amu, ag amegppa appig. “Amge ig ippa ee kuɗum laa iitta, bret kunum tanig ele, amu kakai aɗit eleib daatteb,” aon appig.

¹⁸ Anam aeg amu, Nug aum. “Akkan dona, da meɗeg!” awa aum.

¹⁹ Ana amu, Nug danab ah amelagppa, “Ag gikkiɗahppa dayeg!” awona, Nug bret tanig ele, kakai aɗit ele amu diia aɗa, Nug hab attan neekkakka, Kayak amegppa, “Ena hen mekkame,” awa aum. Anam hewowa amu, Nug bret pane ne, ippunittak awak danab matte, ippunittak awak danab ag diin panin, danab ah madappig.

²⁰ Mattaeg, danab ah oh ag laeg, oolag dittie, ee big dayom amu, ippunittak awak danab ag aon, kaleg 12 inaeg, ambeum.

²¹ Danab ee lappig ele am ebqak 5,000 anam. Ah nid naunau ele am ebqak amu ooppa ii daatteb, danabib ebaqappig.

Jesus Nug baegppa le qaɗeppa tappa ukkom

²² Ag ee lana malaeg, Jesus paha Nug nuhikkud ippunittak awak danab amelagppa aum. “Da danab ah kuɗum imu oh qatiglagnu abippi, ag ahan uubppa tena, Galili le ameg mataɗna, laih ukkeg!” awa aum.

²³ Nug anam a amu, ag ahan ukkaegeg, Jesus Nug danab ah amelagppa, “Enad ukkeg,” awowa, Nug nukka unuqidkkunu qaukoppa nakok ta dayom. Ta dayeye, aam no, amu Nug nukka qauko amuppa dayom.

²⁴ Qaukoppa dayeye amu, uub ukka, le amegppa wan uma dayomppa wa, ulah naɗi uub gotteppanu uɗia heum amunu, duban uub qeum.

²⁵ Anam he ukke, buttuanab 3 kilok ukka 6 kilok batak, haen gamag amuppa Jesus le qaɗeppa tappa, nuhikkud ippunittak awak danab gumatta ukkom.

²⁶ Haen ippunittak awak danab ag Jesus le qaɗeppa tappa uɗieye anidna amu, ag baɗak eheɗ nau doon, “Umu am dottog,” ana, oolag baɗe huanak eppig.

²⁷ Huanak eppig, amge Jesus Nug pahanab amelagppa aum. “Ag ɠagattag dayeg! Ag aib baɗappig. Imu daib,” awa aum.

²⁸ Jesus anam a amu, Pita nug Jesus oɗeppa awa, inam aum. “Naɗi, genab am na, na aakku daattem dayeb na appe, da uub uuen, na gumitte wakkul,” awa aum.

²⁹ Pita anam a amu, Jesus aum. “Na do!” awa aum. Nug anam a, Pita nug uub uua noa, le qaɗeppa tappa ukka, Jesus nakok gumitta gokkunu waum.

³⁰ Nug anam wanana amu, ulah huanak heehe antta baɗa, le ooppa nokkunu ha, Jesus onigppa ewa aum. “Naɗi, na da ehaniɗe!” awa eum.

³¹ Pita anam a amu, pahanab Jesus eppeg bahia, Pita aɗa, amegppa aum. “Na ootppa genab nakokib doottem. Aɗinu na dabmak aɗit ele?”

³² Jesus Nug anam Pita amegppa a, haen aa uub attan oolya tepiɗ amu, ulah toettom.

³³ Ulah toette, uub attan daappig ele ag Jesus noobppa dup nona binag mena appig. “Genab na am Kayak Bekka,” aon appig.

³⁴ Jesus nuhikkud ele ag uub attan gona, le ameg mataɗona, Genesaret ihippa eeɗna teppig.

³⁵ Eeɗna teeg amu, danab appanu ag Jesus anidna, ag Nug dooppig amunu, ag nai meeg, aab taliliak amu ohppa ukke doona, ag oɗe danab oh diin, Jesus toppa uɗippig.

³⁶ Uɗina ag oɗe danab Jesusnu lamen elab daugib aɗaglagnu unuqppig. Unuqeg, danab ag anam heppig ele, ag oh beɗulag ena dayom.