Matyu 13 - Nobonob Baibel

Danab ee aeg datta tauɗomnu nai

¹ Jesus Nug dimppa deɗ amuppaib lakkanu aha noa, Galili le ameg ihippa dayom.

² Dayeye danab ah huanak uɗin qagmeppig amunu, Jesus Nug uub attan ta, heɗep na dayeye, danab ah oh ag le ihippa hippaidna daappig.

³ Ag anam daaegeg, Jesus Nug keeke danab ag dootteb ii dootteb ele ouaqata ippuanittak naippa keeke kuɗum ag amelagppa mattiom. Nug inam mattia aum. “Ee aeg eppak danab nug ee aeg ebakkunu aha, dad okkaippa ukka ee eppaknu abenppa oiyaya, ee aeg tauɗom.

⁴ Nug tauɗa ugekke, ee aeg laala danab ib oittebppa nena qena niiegeg, ai ag uɗin, ee aeg amu lappig.

⁵ Ee aeg laala ag wan men duqe ukkak amuppa nena qeppig; amu wan unuqag iitta amunu pahanab beppig,

⁶ amge haen aam na, keeke beppig ele qe amu, ag diɗilag wan ooppanab ii noum amunu bunaɗppig.

⁷ Am ee aeg laala ag wan uud keeke qaun ele beppigppa nena qeeg, keeke qaun ele bena, naɗi ma teguattom.

⁸ Amge ee aeg laala ag wan enappa nena qena, ena bena, meu oppig. Ee aeg laala ag meulkad 100 oppig. Laala ag meulkad 60 oppig, amu laala ag 30 oppig.

⁹ Danab nug daug ele dayeb, nug doyaɗ!” awa aum.

¹⁰ Jesus Nug anam a amu ippunittak awak danab ag dona oɗ medappig. “Attemun na keeke danab ag dootteb ii dootteb ele ouaqatna ippunadna, amelagppa madittem?” aon appig.

¹¹ Aeg amu Nug inam aum. “Ag dahilad amu, Kayak Nug ag Kayaknu ɗo maɗoɗnu keeke diig lokkumak amu dooglagnu doyak mattom amunu, ag dootteb, amge danab laa, ag am iitta ⌊amunu ag meu dooglagnu da ag amelagppa keeke danab ag dootteb ii dootteb ele ouaqaten ippunatten madittem⌋.

¹² Danab nug Kayaknu keeke awa, uɗat pehettak medatte amu, Kayak Nug amu laa ele medakku. Metteb, nug happiak ele daakku, amge danab nug Kayaknu keeke awa, uɗat pehettak ii medatte amu, Kayak nug nuhig keeke awom amu eɗua aɗidkku.

¹³ Amu da keeke danab ag dootteb ii dootteb ele ouaqatete ippuanatte, amelagppa madittem, amunu diig am inam. Ag neegtteb, amge ii anidtteb. Ag nai daulagppa dootteb, amge oolagppa ele ii dootteb, nai diignu ele amu, ag oolag ii maidtte.

¹⁴ Amunu propet Aisaia, nug Kayak oɗe awa, nai mattiom, nai amu elele medatte. Nai amuam inam. ‘Ag nai daulagppa doon doon daaglag, amge nai meu am tutukku ii doomna. Ao, ag neegna neegna daaglag, amge ag diig tutukku ii anidmana.’

¹⁵ Aɗinu? Danab ah imu ag oolag ɠagattag eppom. Ag daulagppa dooglagnu nakokib elele. Ag amelag heeg amuhak daatte. Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag.” Aisaia nug anam yom.

¹⁶ Aria, Jesus nai amu mattia mala, Nug nai baula tuɗitta aum. “Anam, amge ag itittak ena aoppig daatteb! Aɗinu? Ag amelagppa keeke anidtteb, daulagppa nai dootteb, amu ag oolag maidtte.

¹⁷ Amu ele da genab ag amelagppa attem. Kayaknu propet kuɗum amu genab tutukku hak danab aɗi ele ag keeke gemu ag anidtteb ele imu anidkkulagnu oolag huana heum, amge ag laa ii anidppig. Ag nai gemu ag dootteb amu, ag amu dooglagnu oolag huana heum, amge ag ii dooppig.

¹⁸ Amunu ag danab nug ee aeg dad okkaippa tauɗomnu nai, nai amuam keeke danab ag dootteb ii dootteb ele ouaqata ippunittak nai amu, nai amunu diig mehuqak doyeg!

¹⁹ Haen danab laa nug Kayaknu ɗo maɗoɗnu nai doya, oo ii maidtte amu, Satan nug paha he, Kayak nai nug ooppa dayom iitta mette. Ee aeg ibppa nena qeppig ele amu, nai amu anam ippunigtte.

²⁰ Aria, ee aeg wan men duqe ukkakppa nena qeppig ele amu, nai amu inam ippunigtte. Danab laa nug nai doya, oo gamag ahehe, pahanab aotte.

²¹ Nug nai doya aotte, amge nuhig ooppa genab doyak am ɠagattag iitta, haen tutunuib amunu, deɗ laa nug Kayaknu nai dim lamidtte, diig amunu uug laa bette o danab laala ag nuhigppa eheɗ hetteb amu, nug pahanab nuhig ooppa genab doyak paɗatte.

²² Ee aeg wan uud keeke qaun ele beppigppa nena qeppig ele amu, nai amu inam ippunigtte. Danab laa nug nai dootte, amge wannu haen imunu uug laala, enub awak uɗatnu ameg qak kobol ele, keeke amu oh danab amu nug ooppa he, Kayak nai iitta ma, meu ii otte.

²³ Aria, ee aeg wan enappa nena qeppig ele amu, nai amu inam ippunigtte. Danab nug nai daugppa doya dabmedatte, nai diig ele oo maidtte amu, nug meu ena otte, laa 100, laa 60, laa 30 eppakppanu eɗittak, anam otte,” awa aum.

Kayaknu ɗo maɗoɗnu nai digdig

²⁴ Jesus baula ele keeke danab ag dootteb ii dootteb ele ouaqata ippuanatta, mattia aum. “Kayaknu ɗo maɗoɗ am danab laa, nug wit aeg ena dad okkai nuhigppa tauɗom, amubia daatte.

²⁵ Danab amu nug tauɗom, amge tuqan, danab ah niiegeg, danab wit aeg tauɗom ele, nuhig kekeɗ laa uɗia, gikkiɗah nau haɗag wit dad okkai amuppa tauɗowa ukkom.

²⁶ Dimppa wit amu ba meu o amu, ag gikkiɗah nau ele ba okkai meeme anidppig.

²⁷ Antteg amu, maɗi nid nuhikkud ag dad okkai mameg toppa gona appig. ‘Danab naɗi, na wit aeg enaib dad nahip-ppa tauɗme amunu, attem he, gikkiɗah nau ele beum?’ aon appig.

²⁸ Aon aeg amu, nug ag amelagppa aum. ‘Kekeɗ laa nug anam heum.’ Nug anam a amu, maɗi nid ag oɗ medappig. ‘Ig gota, gikkiɗah nau amu qakkaladkkunignu oot daattete?’ oɗ medappig.

²⁹ Ag anam oɗ medappig, amge nug ag amelagppa aum. ‘Iitta. Ag gikkiɗah nau hiɗanna amu, wit ele hiɗaladmanade!

³⁰ Uuppeg, aɗit oh meu awak haen ameg mak beiɗ! Bepeɗ, da meu awak haenppa meu awak danab amelagppa appi, gikkiɗah nau tatam hiɗaladna, ehakkadna, aab aɗuppa manaknu mekkulag, amge ag wit qagmena, ee bakkale lag dahilppa mekkulag,’ ” awa aum.

³¹ Jesus Nug anam ana amu Nug keeke danab ag dootteb ii dootteb ele ouaqata ippunittak nai baula ele inam aum. “Kayaknu ɗo maɗoɗ amu mastet aeg, danab laa nug awa, dad nuhigppa eppom bia.

³² Mastet aeg nug am ee laa aeg bia iitta. Nug aeg nakoknab, amge nug ba okkai mewowa, dad ooppanu ee laa oh eɗatta, ad ma dayeye, ai ag uɗin, nug eppegppa teɗ hena daatteb,” awa aum.

³³ Ana amu Nug baula ele keeke danab ag dootteb ii dootteb ele ouaqata ippuanatta, amelagppa mattia inam aum. “Kayaknu ɗo maɗoɗ am yis bia. Ah laa nug plaua kuɗum awa, yis ele kabolie, dimppa plaua oh titiɗa okkai meum,” awa aum.

³⁴ Nai imu oh am Jesus Nug keeke danab ag dootteb ii dootteb ele ouaqata ippuanatta, danab ah kuɗum appa daappig amelagppa mattiom. Nug nai diig laappa ii mattiom.

³⁵ Nuhig hak amuppa amu, propet laa nai mattiom, nai amu elele mettom. Propet nug inam aum. “Da oɗel oppaten, keeke danab ag dootteb ii dootteb ele ouaqaten ippuanatten, nai madikkul. Da keeke digmak haenppanu lokkumak daye uɗie gemu batak amunu akkul,” awa aum.

³⁶ Aria, Jesus Nug danab ah kuɗum appa daappig uuatta, lakka teum. Te amu, nuhikkud ippunittak awak danab ag gumidna uɗin appig. “Na gikkiɗah nau dad okkaippa beum, nai amuam keeke danab ag dootteb ii dootteb ele ouaqata ippunittak nai amu, na nai amunu diig mehuqna ippunigppe dootu!” appig.

³⁷ Ag anam aeg, Nug aum. “Danab nug ee ena ebatte, amuam Danab Bekkalag da.

³⁸ Aria, dad okkai amu wan atu oh ippunigtte. Ee aeg ena amu Kayaknu ɗo maɗoɗnu danab. Aria, gikkiɗah nau amu Satannu danab.

³⁹ Amu kekeɗ gikkiɗah nau haɗag dad okkaippa tauɗom ele amu Satan. Aria, ee meu awak haen, amuam gog tak haen. Ee awak maɗi nid am Kayaknu engel.

⁴⁰ Am danab ag gikkiɗah nau hiɗaladna qagmena, aab aɗuppa maitteb, amubia Kayaknu engel ag wan gog tak haenppa anamib hekkulag.

⁴¹ Danab Bekkalag da, da dahilad engel heppi, ag gona, danab Kayaknu ɗo maɗoɗ ooppa daatteb ele, ag oolagppanu wannu etetuab nau, ig eeɗigtteb ele, amu oh amu aria danab ag kobol eheɗ hetteb ele, ag qagmaadna diin,

⁴² ag akkan, agappeg aab aɗuppa tekkulag. Appa danab ag gaana, aelkad ele emalkkulag.

⁴³ Haen amuppa amu genab tutukku hak aɗi, ag am Kayak bekkod, ag Mamelagnu ɗo maɗoɗ ooppa daanna, ag aam amahala miag atiak daatte bia miag atiak daaglag. Danab nug daug ele dayeb, nug doyaɗ!” awa aum.

⁴⁴ Jesus nai anam mattiowa, Kayaknu ɗo maɗoɗnu, keeke danab dootteb ii dootteb ele ouaqata, ippuanatta, imu mattiom. Mattiaya Nug aum. “Kayaknu ɗo maɗoɗ am enub okkainab ele dad okkaippa lokkumak dayom, am amubia. Danab laa nug enub amu antta, baula awa lokkumowa, nug gamag ahak okkainab doya, nug nukka keeke nuhig oh me, daden meeg, men doɗo amu awa ukka, nug wan amu daden meum.

⁴⁵ Aria laa amu, Kayaknu ɗo maɗoɗ am keeke laihnu awa dadennu mak danab nug perl ena ena mattiom, am amubia.

⁴⁶ Nug perl laippu amu, nuhig nob okkainab, amu mattia anttowa amu, nug nuhig keeke oh me, daden meeg, men doɗo amu awa, perl amu daden ma awom.

⁴⁷ Aria laa amu, Kayaknu ɗo maɗoɗ am uhui ag le amegppa eeg no, kakai digdignu noppig, am amubia.

⁴⁸ Noeg, uhui ambe, ag uhui eeɗeg uɗia, audam be, ag heɗep nena daanna, kakai ena amuib epeɗiadna, kaleg laalappa maadppig, amge kakai nau amu, ag akkaeg goppig.

⁴⁹ Amubia gog tak haenppanu deɗ am anam aakku bekku. Engel ag nena, danab nau ag genab tutukku hak danab oolagppa daatteb qagmaadna,

⁵⁰ agappeg aab aɗuppa tekkulag. Appa danab ag gaana, aelkad emalna daaglag,” awa aum.

⁵¹ Jesus Nug anam ana, Nug oɗ mattom. “Ag nai mattimi imu oh diig dooppigte?” awa aum. Nug anam oɗ matte amu, ag, “Yo,” appig.

⁵² Ag, “Yo,” aon aeg amu, Nug ag amelagppa aum. “Anam amu ɗo mehuqak danab oh, ag Kayaknu ɗo maɗoɗ ooppa noppig ele amu, ag am lag okkai mameg bia daatteb. Nug keeke maknu oo nuhigppanu keeke alag, bau ele akke do madatte,” awa aum.

Nasaret danab ag Jesus dimedappig

⁵³ Jesus Nug nai keeke danab ag dootteb ii dootteb ele ouaqata ippuanatta amu oh mattia malowa Nug aab amu uua ukkom.

⁵⁴ Nug appag diigppa ukka, nug Juda dilag nai doyak lakka digma, danab ah amelagppa Kayak nai mehuqom. Nai mehuqe, ag dabmak kuɗum aona appig. “Doyak dabmak ena ele imu, kobol danab hekkunu elele iitta haknu ɠagattag ele amu, imu oh amu, Nug adeppanu awom?

⁵⁵ Nug am lag hak danab bekka! Ig doottem, Maria amu nug anig. Nug amakkud am Jems, Josep, Judas, Saimon ele.

⁵⁶ Nug appinkkud amu ag oh ig ele iite daattem? Amunu Nug keeke imu oh am adeppanu awom?” aon appig.

⁵⁷ Ag anam anana ag oolagppa Jesusnu ena ii dooppig, amge Jesus Nug ag amelagppa aum. “Propet nug aab ohppa amu binag ele, amge nug appag diigppa amu nug laugppa ele amu nug binag iitta,” awa aum.

⁵⁸ Amu appa Nug oɗe danab kuɗum ii bappalattom. Aɗinu? Ag oolagppa genab ii dooppig.