Mak 9 - Nobonob Baibel

¹ Jesus Nug anam ana amu, Nug nai baula tuɗitta aum. “Da genab ag amelagppa attem. Danab laala gemu ippa hippaidna daatteb ele amu, ag paha ii mauhmana. Iitta. Tatam Kayaknu ɗo maɗoɗ ɠagattag ele beeb anidna mauhkkulag,” awa aum.

Jesus beɗu eɗuom

² Aria, deɗ eblaih laippu uue Jesus Nug Pita, Jems, Jon ele omalatta, qauko okkai laappa te, ag akka daappig. Appa daanna amu, Jesus Nug beɗu eɗuom.

³ Beɗu eɗue, nuhig lamen ele hakkabnab eppom. Wan imuppanu danab laa nug lamen heeb, hakkabnab amubia bekkunu elele iitta.

⁴ Jesus Nug anam dayeye amu, Elaiya Moses ele aa tulai doeh, Jesus ele nai madippig.

⁵ Anam daaegeg amu, Pita nug Jesus amegppa aum. “Ippunittak danab, ig aben imuppa daagnignu am enanag amunu, na appe, ig peh ewam buugnig; nahip laippu, Mosesnu laippu, amu Elaiyanu laippu ele,” awa aum.

⁶ Aɗinu nug anam aum? Ag baɗan daanna, nai laa anak iitta amunu, Pita nug nai amu aum.

⁷ Ag anam daaegeg, lombig laa ag tonattette, lombig ooppa baag laa inam a dooppig. “Imuam da Bekkal, da nuhignu ool mauhtte. Ag nuhig nai doyeg!” awa aum.

⁸ Baag anam doona amu, ag pahanab neekkeg ugekke, ag danab laa ii anidppig. Jesus nukka ag ele daanna anidppig.

⁹ Ag anam antteg amu, Jesus Nug ag ele ahan, qauko uun nonana, Jesus Nug ag kobol amu anidppig ele, ag amunu danab laa amegppa paha amananu ɗo ɠagattag meum. Nug, Nug am Danab Bekkalag amu, Nug tatam mauhakppanu eɗua hibaitteb ag mattiglagnu aum.

¹⁰ Jesus Nug anam a amu ippunittak awak danab ag nai amu aon laa amegppa ii appig, amge ag akka akka appig. “Mauhakppanu eɗua hibaittak nai am aɗi meu ippunigtte?” aon appig.

¹¹ Ag akka akka anam anana amu, ag Jesus oɗ medappig. “Aɗinu ihinig ɗo mehuqak danab ag, ‘Elaiya nug tatam uɗikkununab daatte; dimppa Kristus uɗikku,’ atteb?” aon appig.

¹² Ag anam aeg amu Jesus Nug aum. “Ɗo mehuqak danab ag, ‘Elaiya nug tatam uɗia, keeke oh bappaidkku,’ atteb amu, ag genab atteb, amge ag dahilad, ag Kayak nai laa ele dabmekkulag. Nai amuam inam. ‘Danab Bekkalag da, da guittak dooppi geɗilkkulag.’

¹³ Anam amge da ag amelagppa attem. Elaiya nug matu uɗiom amu, ag nuhigppa eheɗ hekkulagnu oolagppa dayom bianab ag heppig. Kayak Nai amunu niiom bia ag heppig,” awa aum.

Nid laa ouɗi nau ele amu, Jesus ouɗi amu lamittom

¹⁴ Jesus Nug nuhikkud ippunittak awak danab ewam ele ag anam anana amu, ag nuhikkud ippunittak awak danab laa gumadna gona, ag danab ah kuɗumnab qagmena, ippunittak danab laa taliliadna daaegeg, ɗo mehuqak danab laala ag Jesusnu ippunittak awak danab ele ag a ona a doak nai madippig ele anadppig.

¹⁵ Danab ah ag Jesus anidna, ag huana ottaina, ag ahan gumidna gona, “Aakku uɗime,” appig.

¹⁶ Anam aeg amu Jesus Nug ag oɗ mattom. “Ag keeke aɗinu ɗo mehuqak danab ele nai aeg ona aeg dotte?” awa aum.

¹⁷ Nug anam a amu danab ah kuɗum oolagppan danab laa nug Jesusnu oɗmak nob ma aum. “Ippunittak danab, nid dahil nug ouɗi nau ele, nai mattiaknu elele iitta amunu da awe, na gumitte uɗimi.

¹⁸ Haen ouɗi nau amu nug nid dahil aɗa, nug buɗie, wanppa na qa, hipaɗu neene, nug aeg emala, beɗu ele taiedatte. Amunu da nahipad ippunittak awak danab ouɗi nau amu lamidkkulagnu oɗ mattami, amge ag elele iitta,” awa aum.

¹⁹ Danab nug anam a amu, Jesus Nug oɗeppa awa aum. “Ag oh oolagppa genab doyak iitta. Da ag ele haen elab daamut, amge ag dahilnu oolagppa genab ii dootteb amunu, da ool uug ele. Ag haen ganeb ag dahilnu oolagppa genab dooglag? Ag nid omalna dahilppa doig!” awa aum.

²⁰ Nug anam a amu ag nid omalna, Jesus toppa waeg, ouɗi nau nug Jesus antta, nug paha he, nid nug beɗu hahaɗeɗe, na qa wanppa niiaya, itoɗieye, hipaɗu neum.

²¹ Anam heehe amu Jesus Nug nid mameg oɗ mettom. “Nid imu nug inam hette ele amu, haen adekkuppanab digmeum?” Awa a amu nid mameg nug aum. “Nug nid nakokppa imu digmeum.

²² Haen kuɗum ouɗi nau nug nid imu heeb mauhkkunu ha, nug buɗie, aab aɗuppa o leppa na qette amunu, na elele daattem dayeb, na ihinihnu oo bodoetta le mak doona ehanite!” awa aum.

²³ Nug anam a amu Jesus Nug aum, “Da hekkulnu elele, amge na amunu ootppa genab doottemte? Danab nug ooppa genab doyak ele amu, nug keeke oh hekkunu elele,” awa aum.

²⁴ Jesus Nug anam a amu nid mameg nug aum. “Da oolppa genab nakokib doottem, amge na heppe okkai baɗ!” awa aum.

²⁵ Nug anam a amu Jesus Nug danab ah kuɗum ag qaiettan uɗin qagmeeg antta, Nug ouɗi nau amegppa haknunab ana, “Oɗe ituak, daug ituaknu ouɗi nau, na nid imu paɗaidna gona, bau eɗun nug beɗuppa aib uɗime!” awa aum.

²⁶ Jesus Nug anam a amu ouɗi nau nug ewowa, nug nid huan uɗala, uuitta ukkom. Ugekke amu nid nug mauhak bia niieye, danab laala kuɗum ag, “Nug mauhom,” appig.

²⁷ Ag anam appig, amge Jesus Nug nid eppegppa aɗa ehanitte, nug aha hibaittom.

²⁸ Aria, dimppa Jesus Nug lakka ukke, nug nuhikkud ippunittak awak danab ele daanna, ag Nug oɗ medappig. “Aɗinu ig ouɗi nau amu lamidkkunignu elele iitta?” aon appig.

²⁹ Aon aeg amu Jesus Nug aum. “Laa nug ouɗi nau imubia ib laappa ii lamidma. Iitta. Unuqittakppa aakkuib,” awa aum.

Jesus Nug baula attem mauhkkunu aum

³⁰ Ag anam hewona amu ag ahan nona, Galili wanppa Kaperneam gokkulagnu gonana, Jesus Nug danab laa nug Nug adeppa daatte dookkunu oo ii dayom.

³¹ Aɗinu? Nug nuhikkud ippunittak awak danab nuhignu inam ippuanattatta aum. “Danab Bekkalag da amu, laa nug geha da danab eppelagppa meiɗeb, ag heppeg da mauhkkul. Mauhoya amu deɗ ewamppa da eɗuen hippaidkkul,” awa aum.

³² Nug anam aum, amge ag nai amunu oolag tutukku ii maittom, amge ag Jesus Nug nai amu mehuqkkunu oɗ mettaglagnu baɗappig.

Aun Kayak amegppa okkai daatte

³³ Ag gona, Kaperneam tena, lakka daanna amu Jesus Nug oɗ mattom. “Ig ibppa oitta amu ag aɗi keekenu madippig?”

³⁴ Nug anam oɗ matte amu ag ibppa, aun ag oolagppanu am okkai daattenu aeg ona aeg doum amunu, ag Jesusnu oɗmak amu nob ii meppig.

³⁵ Ag anam heeg amu Jesus Nug heɗep na daya, Nug ippunittak awak danab 12 onilagppa e doeg, Nug aum. “Danab laa nug anuqak daakkunu oo dayeb amu, nug danab laala oh waalagppanab dayaya, ahilag maɗi nid dayaɗ!” awa aum.

³⁶ Nug anam ana amu Nug nid nakok laa awa, ag oolagppa me, hibaitta dayeye, oɗakkia aum.

³⁷ “Danab laa nug da onilnu nid nakok laa imubia ele laippu dayaknu ooppa eleleib dootte amu, nug da ele laippu dayaknu ooppa eleleib dootte. Amu laa nug da ele laippu dayaknu ooppa eleleib dootte amu, nug daib nug ele laippu dayaknu ooppa eleleib ii dootte. Iitta. Nug da Mamel ele laippu dayaknu ooppa eleleib dootte,” awa aum.

Ehanittak kobol am nob ena ele

³⁸ Jesus Nug anam a amu Jon nug Jesus amegppa aum. “Ippunittak danab, ig danab laa nug na oninppa ouɗi nau lamatte anidmut, amge nug ig dim lamikke ii oittem amunu, ig nug ouɗi nau lamadmanu ɗo memut,” awa aum.

³⁹ Awa a amu Jesus Nug aum. “Laa nug kobol danab haknu elele iitta amubia da onilppa hette ele nug paha dahilnu nai eheɗ laa akkunu elele iitta amunu, ag nuhig uɗat amu aib okkulppig.

⁴⁰ Aɗinu? Danab nug ihinig kekeɗ iitta amu, nug am ig lainig.

⁴¹ Da genab ag amelagppa attem. Aun nug ag anatta, ag am dahilad amunu nug da onilppa ag ehanatta, le ougib kap-ppa madatte amu, Kayak Nug danab amu nob ena medakku, Nug daug iinab atima.

Laa he, hipunin haknu nai

⁴² Danab laa nug nid nakok laa, nug dahilnu ooppa genab dootte ele, nug nuhig ooppa genab doyak heeb nauhkku dayeb amu, amuam naunab. Danab amunu amu, nug ii heum haenppa danab ag nug baagppa ee aeg ganuɗaknu men okkai qakkan, maoppeg yuppa noa mauhlo, amuam nakok nau, amge nug dayaya, nid nakok laanu ooppa genab doyak heeb nauhkku, amuam naunab nau.

⁴³ Na eppen he, na hipunin hettem dayeb, na eppen laih amu okkule! Na eppen laihigib ele daanna, na haen oh bauklel daakkut, amuam ena. Amge na eppen aɗit oh ele daanna, padal mak abenppa gokkut, amuam ena iitta. Appanu aab amu, nug ii qauhtte.

⁴⁴ ((Ge! Appa amu gawat ag ii mauhtteb, amu aab ele nug ii qauhtte.))

⁴⁵ Amu na baen he, na hipunin hettem dayeb, na baen laih amu okkule! Na baen laihigib ele daanna, na haen oh bauklel daakkut amuam ena. Amge na baen aɗit oh ele daappe, ag na mawidppeg padal mak abenppa gokkut, amuam ena iitta.

⁴⁶ ((Appa amu gawat ag ii mauhtteb, amu aab ele nug ii qauhtte.))

⁴⁷ Laa ele amu na amen he, na hipunin hettem dayeb, na amen laih amu kehan, maoppe ukkaɗ! Na amen laihigib ele daanna hab aabppa gokkut, amuam ena. Amge na amen aɗit oh ele daappe, ag na mawidppeg padal mak abenppa gokkut, amuam ena iitta.

⁴⁸ Appa amu gawat ag ii mauhtteb, amu aab ele nug ii qauhtte,” awa aum.

⁴⁹ Yu aab ele am nakok uɗat laippu bia hettep, amu Jesus Nug nai baula tuɗitta aum. “Aab am keeke laala ewa he, oppiaawak daatte. Yu kalu amu, nug ele anam. Aria, ag da dim lamiɗtteb ele amu, deɗ laala ag uug anidkkulag. Uug amuam aab ewak bia. Nug heeb, ag elele oiglag.

⁵⁰ Yu kalu am keeke ena, amge nug yu ubuhi iitta dayeb amu attem hepput, nug eɗua ubuhi ele daakku? Dahil nai am yu kalu ena, nuhig ubuhi ii iitta meum ele, amubia amunu, ag dahil nai tutukku doonna, ag hanhan nug maɗoɗ daanna oiyeg!” awa aum.