Mak 7 - Nobonob Baibel

Kayaknu ɗo am danabnu ɗo eɗidtte

¹ Aria, amu dimppa ɗo gumak danab-Parasia laa, amu ɗo mehuqak danab laa ele ag Jerusalemnu ahan, Jesus gumidna gona,

² Jesusnu ippunittak awak danab laala, ag Juda dilag ɗo amuppanab eppelag ii ihappig, ag eppelag hamu ihona, ee lanan daaegeg anadppig.

³ Ɗo gumak danab-Parasia amu Juda danab laala ele ag eppelag ii ihana, ag alalkad appig amubia, ag ee ii latteb.

⁴ O ag ee oɗiak abenppanu eɗun, lakka gona, ag haen amu ele ag ⌊ɗo dim lamidna⌋ eppelag ii ihana amu ag ee ii latteb. Ag ɗo laala kuɗum amubia dim lamidtteb; kap ihaknu, nippud ihaknu, amu tappiɗ ihaknu ele.

⁵ Ɗo gumak danab-Parasia, amu ɗo mehuqak danab ele ag anam hanhan hedappig amunu, ag Jesusnu ippunittak awak danab eppelag ii ihappig, ee laeg anadna, ag Jesus amegppa appig. “Ippunittak awak danab nahipad ag eppelag ii ihona, ee latteb. Aɗinu ag alai aɗi anukka ɗo meppig niitte ii dim lamidtteb?” aon appig.

⁶ Ag anam aeg amu, Jesus Nug ag amelagppa aum. “Anukka amu propet Aisaia nug ag hambuppuak danab, ahilagnu propet nai tutukku yom. Nai amuam inam. ‘Danab ah imu ag oɗelagppan nai mattiakppa da gumiɗna uɗitteb, amge ag oolag da ii meɗatteb.

⁷ Ag dup nona binal metteb, amge ag kobol genab dim lamidna ii hetteb. Iitta. Ag danab dilag dabmakppaib, amu ag danab dilag ɗoppaib amu hetteb.’

⁸ Ag gemu daatteb amu, ag Kayaknu ɗo uuna, danab dilag ɗo aakkuib dim lamidtteb,” awa aum.

⁹ Jesus Nug anam ana amu, Nug nai baula tuɗitta aum. “Ag ahilag dabmak anukkanu dim lamidkkulagnu, Kayaknu ɗo tabappeg nekkunu doon autna aotteb.

¹⁰ Imu antte! Moses nug aum. ‘Na mamen, anin ele binalah mate!’ Amu nug inam ele aum. ‘Danab nug anig, o mameg eheɗ laa aokkunu anak waappa daakkunu akku dayeb amu, ag qeppeg mauhaɗ!’

¹¹ Moses nug anam aum, amge ag inam atteb. ‘Danab laa nug men doɗo laa anig mameg ehanatkkunu ele, amge nug aa amelahppa, “Da men doɗo imu matakkulnu elele iitta. Da Kayaknu tituana metta, nuhig daakkunu hamu mettaknu tituanmi,” akku dayeb amu,

¹² nug anig mameg ele ii ehanatma.’

¹³ Ag ag alalkad dilag ɗonu anuqak doon dim lamidtteb amuppa ag heeg, Kayaknu ɗo amu hamu bia daatte. Ag keeke kuɗum amubia hetteb,” awa aum.

¹⁴ Aria, Jesus Nug baula danab ah kuɗum appa daappig gumidna gokkulagnu e, ag ukkaeg, Nug ag amelagppa aum. “Ag nai dahil daulagppa doon, nai diig tutukku doyeg!

¹⁵ Keeke dimittimnu danab ooppa notte ele, keeke amu danab oo dubuttid ii medatte. Iitta! Keeke nau danabnu dabmakppa lokkumak dayaya, nai oɗeppanu dimittim bette, amuam he, danab oo am dubuttid ele daatte.

¹⁶ ((Danab nug daug ele dayeb amu nug doyaɗ!” awa aum.))

¹⁷ Nug anam ana amu, Nug danab ah ele uuatta, lakka ukke, nuhikkud ippunittak awak danab ag keeke danab ag dootteb ii dootteb ele ouaqata ippuanittak nai amu diignu oɗ medappig.

¹⁸ Oɗ mettaeg amu Jesus Nug aum. “Ag am danab laala ag dabmak iitta biate amunu, ag nai amunu diig ii dootteb? Ag doyeg! Dimittimnu keeke nug danab ooppa noa heeb, danab amu nug oo dubuttid ele ii daama.

¹⁹ Aɗinu? Danab nug ee latte amu ee amu nug danabnu dabmak abenppa ii gotte. Iitta. Nug danab biigppa ukke, biie gotte,” awa aum. Jesus Nug anam aum amunu ig doottem. Ee oh lanaknu am enaib.

²⁰ Aria, Jesus Nug anam ana amu, Nug nai baula tuɗitta aum. “Eheɗ hak nau oh am danabnu dabmakppa digmette amunu keeke amu nug he, danab oo dubuttid medatte.

²¹ Kobol eheɗ imu oh danabnu dabmakppanu bette; dabmak eheɗ, ewau pakkua gappai hak kobol, gappai hak kobol digdig laa, yabhok kobol, danab qe mauhak kobol,

²² baubau awaknu hik qak kobol, oo aeg bak kobol, nai hambuppuak anak kobol, gappai heeb baknu kobol, laan ameg qe oo elele ii dayak kobol, danab laanu baeg qak nai anak kobol, beɗuppa tak kobol, amu Kayak dab-ii-maama hak ele.

²³ Kobol amu oh danabnu dabmakppa digmen bena heeg, danab nug oo dubuttid ele daatte,” awa aum.

Wan laappan ah nug Jesusnu ooppa genab doyom

²⁴ Aria, dimppa Jesus Nug aab amu uua aha ukka, aab okkai onig Tair guguittak, appa lag laappa ta, appa lokkuma daakkunu ha dayom. Amge danab laala ag Jesus uɗiom daatte dooppig amunu, Jesus Nug lokkuma ii dayom.

²⁵ Lokkuma ii dayom amunu, ah laa, nug aɗeg am ouɗi nau ele, nug Jesus appa dayom doya, nug paha gumitta ukka, Jesus noobppa laippun gateg qaun o, gomela, iɗu wanppa meum.

²⁶ Ah amu nug am Grik ah. Nug Ponisia wan, Siria gumappig ele, amuppanu ah. Nug Jesus gumitta ukka, Jesus Nug heeb, ouɗi nau nug aɗeg beɗuppa dayom amu lamidkkunu unuqom.

²⁷ Ah nug anam a amu Jesus Nug aum. “Ig nid naunau dilag bret aot, qai mattagnig am kobol ena iitta amunu, nid naunau ag tatam lappeg, oolag dittiaɗ!” awa aum.

²⁸ Awa a amu ah nug aum. “O Naɗi, na attem am genab, ge nid naunau ag bret lanana heeg, bret huppu nakok balalppanu na qette ele amu qai ag balal waappa daana latteb,” awa aum.

²⁹ Nug anam a amunu Jesus ⌊Nug ahnu ooppa genab doyak okkai ele antta,⌋ Nug aum. “Na ena ame! Na oot gamag ahebeb, lautppa ukke! Ouɗi nau nug na aɗen uuittom,” awa aum.

³⁰ Jesus anam a, ah nug eɗua laugppa ukka, nug aɗeg niiaknu balalppa niieye anttom. Ouɗi nau nug genab uuitta ukkom.

Jesus Nug danab oɗe, daug ele ituak babaittom

³¹ Dimppa Jesus Nug Tair guguittak dayom, Nug appanu aha ukka, aab okkai Saidonnu wanppa ukkowa, Nug le ameg Galili appa noa, Nug Dekapolis wan atu, Nug amuppa ukkom.

³² Nug no amu danab laala ag danab daug ituak, nai elele ii maditte ele Jesus toppa omalna gona, Jesus eppeg danab amu qaɗeppa ma ehanidkkunu unuqppig.

³³ Unuqeg amu Jesus Nug nukka danab amu omala, piɗe wana, eppeg doɗo danab daug laih laihppa maate noeh, hunua, lemaɗu aɗom.

³⁴ Nug anam ha amu, Nug hab aabppa neekkekke, oo hik boppane, danab amegppa, “Epata,” aum. “Epata,” eɗuak am “Matulak daye!”.

³⁵ Jesus Nug anam a amu, danab amu nug daug paha matule, lemaɗu ele uug iitta me, nug nai ele ena mattiom.

³⁶ Aria, Jesus Nug anam ha amu Nug aakku keeke amunu mattimnanu ɗo ɠagattag meum. Meum amge ag amu dim ii lamidppig. Iitta. Ag gona, amunu madippig. Nug heum, amunu amananu Nug baubau, “Aib,” aum, amge ag amu dim ii lamidppig. Iitta. Ag tuɗidna, huana Nug heumnu madippig.

³⁷ Danab ah ag Jesus heum anidna, ag huanak ottaina, ag dabmak kuɗum aonna, ag appig. “Nug aɗi hette amu Nug enaib hette. Danab daulag ituak ele Nug he, ag nai dootteb, amu danab oɗetup ele ag nai maditteb,” aon appig.