Mak 6 - Nobonob Baibel

Propet nug aab diigppa binag iitta

¹ Anam hewowa, deɗ laa Jesus Nug appag diigppa gokkunu ahe, nuhikkud ippunittak awak danab ele ag oh goppig.

² Ag gona tena daanna, Sabat deɗppa Nug Juda dilag nai doyak lakka ta, digma Kayaknu nai ippuanattom. Ippuanatte amu danab ag doona, dabmak kuɗum aona appig. “Danab imuam attemun? Aun danab imu doyak dabmak ena ele imu oh mettom? Nug attem ha kobol danab haknu elele iitta laala hette?

³ Nug lag hak danab iite daatte! Ig doottem, nug am Maria bekka. Nug amakkud am Jems, Josep, Judas, Saimon ele. Amu nug appinkkud ag oh ig ele iite daattem?” aon appig. Ag anam anana, ag oolagppa Jesusnu ena iinab dooppig.

⁴ Anam Jesusnu ena iinab doyeg, Jesus Nug ag amelagppa aum. “Propet nug aab ohppa amu binag ele, amge nug appag diigppa, nug tiilag laippu ele oolagppa, amu nug laugppa ele nug binag iitta,” awa aum.

⁵ Ag nuhignu oolagppa genab ii dooppig amunu, appa Nug kobol danab haknu elele iitta laala helo bia ii heum. Iitta. Nug oɗe danab laippu laippu aakkuib Nug eppeg qaɗelagppa ma bappalattom.

⁶ Ag oolagppa genab ii dooppig amunu, Nug dabmak kuɗum awa, Nug aab amuppanu aha, aab laalappa ukka, Kayak nai mehuqom.

Jesus he, ippunittak awak danab 12 ag uɗatppa goppig

⁷ Nug anam oiyaya amu, Nug nuhikkud ippunittak awak danab 12 onilagppa e uɗieg, Nug aɗit aɗit maatte, ag aab laalappa gokkulagnu daaegeg, Jesus Nug ag ouɗi nau lamadkkulagnu ɠagattag matta,

⁸ Nug ag amelagppa aum. “Ag dudqak hokkat aɗaglagnu elele, amge bret, oiyaknu battam, men doɗo ele amuam aib aoppig.

⁹ Ag baelag gaɗa, lamen nakok elab ele mekkulag, amge lamen nakok elab aɗit amu aib meppig,” awa aum.

¹⁰ Nug anam ana amu Nug nai baula tuɗitta aum. “Haen ag gona, aab laappa danab laa laugppa tena amu, ag lag amuppaib daanna, ukkaknu haen beeb, aab amuppanu ahan ukkeg!

¹¹ Amge deɗ laa ag aab laappa teppeg, aab amuppan danab ag ag ele laippu dayaknu oolagppa eleleib ii dootteb dayeb, nai ahilag ele ii dooppeg, haen ag ahan, aab amu uunna, ag aab amuppan danab ag eheɗ heppig dooglagnu, ag baelkadppanu gappud heppeg naɗ!” awa aum.

¹² Nug anam aum amunu ag ahan gona, nai mehuqnana, danab ah oh ag hipuninnu oolag eɗukkunu appig.

¹³ Anam henana amu, ag oɗe danab kuɗum olip goɗenppa layadna ⌊unuqitteg, Kayak he,⌋ ag beɗulag ena daye, ag ouɗi nau kuɗum ele lamadppig.

Herot Antipas nug Layattak Jon baag otaɗom

¹⁴ Amu Jesus Nug nuhig uɗat heehe, uɗatnu nai wan amu oh tone, King Herot Antipas doyom. Doyeye, danab laala ag Jesusnu uɗat amu anidna doona ag, “Danab amuam Layattak Jon mauhe, Kayak he, nug eɗua hibaittom amunu, kobol danab hekkunu elele iittanu ɠagattag okkai okkai amu nuhigppa bette,,” appig.

¹⁵ Ag anam appig amge laala ag, “Nug am Elaiya,” aegeg, laala ag, “Nug am propet, anukka propet daappig, amubia,” aon appig.

¹⁶ Laa ag anam appig, amge haen Herot nug anam doya amu, nug aum. “Imuam genab Layattak Jon. Da nug baag otaɗmi amge Kayak Nug he, nug eɗua hibaittom,” awa aum.

^17-18 Amu Jon nug maniguittakppa ii dayom haenppa amu, Herot nug Pilip, aa eamag amu, nug Pilip wau Herodias aɗitta awom. Awe amu Jon nug Herot amegppa, “Na nug wau aome, amuppa na ɗo tippalme, kobol amuam ena iitta,” awa attom amunu, Herot nug a, nuhikkud daup danab ag gona, Jon aɗan, aon gona, maniguittakppa meppig.

¹⁹ Jon aum, diig amunu ele Herot wau Herodias nug oo aeg be, nug Jon qeeb mauhkkunu heum, amge elele iitta.

²⁰ Aɗinu? Herot nug doyom, Jon am genab tutukku hak danab, Kayaknu danab oppiaawak ele amunu, Herot nug heeb mauhmanu baɗa atognoum. Amu deɗ laala Herot nug Jon nai madikkunu onigppa e uɗia, nai mattie amu Herot nug Jonnu nai amunu dabmak kuɗum awom, amge nug nai amu dookkunu oo ele dayom.

²¹ Aria, ag anam daanna, deɗ laa Herodias nug Jon qekkunu ib anttom. Deɗ amuppa Herot nug nuhig menuak deɗ be, nug gabmannu ikki danab, ban daup ikki danab, amu Galilinu danab okkai laala ele, ag nuhig menuak deɗ amunu gamag ahak hekkulagnu hobul heum.

²² Haen amuppa ag Herotnu hobulppa daaegeg, Herodias aɗeg, lag oo amu ooppa noa, ahi goɗeɗe, Herot aɗi ag nug anidna, ag ittag aqe, King Herot nug aha, nug nid ahin amu amegppa aum. “Na aɗin oot hette? Na keeke laa aokkutnu oot dayeb am da na medakkul,” awa aum.

²³ Awona, nug nai tuɗitta, nuhig nai ɠagattag qetta ana, nug aum. “Na ɗo maɗoɗ dahil imu laih aokkutnu oot dayeb amu, da gamagppa batak oppatppi, laih na aokkut,” awa aum.

²⁴ Nug anam a, nid ahin nug aha dimittim ukka, nug keeke aɗi aokkunu Herot amegppa akkunu anig oɗ mettom. Oɗ mette amu anig nug aum. “Na Layattak Jon ikki medakkunu appe doyaɗ!” awa aum.

²⁵ Nug anam a amu, nid ahin nug paha eɗua ukka, King Herot amegppa aum. “Na geha iikkunab Layattak Jon baag otaɗna, ikki tappiɗppa mena, meɗakkutnu ool daatte,” awa aum.

²⁶ Nid ahin nug anam a amu King Herot nug oo uug naunab dayom, amge nug tatam nai ɠagattag qetta aawo, ɗo danab ag nug ele ee lappig amu, ag ele nai amu doyeg, “Amu iitta,” akkunu uua,

²⁷ amunu, nug paha nuhig daup laa amegppa, “Na gona, Jon baag otaɗna, na nug ikki aon do!” awa aum. Nug anam a, nuhig daup danab maniguittakppa ukka, Jon baag otaɗa,

²⁸ nug ikki tappiɗppa ma, awa uɗia, nid ahin mette, nug anig mettom.

²⁹ Ag anam heeg amu Jonnu ippunittak awak danab ag doon gona, Jon gaɗa aon gona boumppig.

Jesus Nug danab 5,000 ee mattom

³⁰ Aria totol danab 12 ag eɗun uɗieg, ag Jesus ele qagmena, ag keeke oh heppignu, nai oh ippunadppignu ele Jesus amegppa appig.

³¹ Appa daaegeg, danab ah kuɗum ag ukkak uɗiak heegeg, Jesus amu nuhikkud ippunittak awak danab ele ag ee lanaknu haen laa ii anidppig amunu, Jesus Nug nuhikkud ippunittak awak danab amelagppa aum. “Ahappeg gota, aben danab ii daattebppa amu, ag appa hik nakok aweg!” awa aum.

³² Jesus anam a amu ag uub awa, atu laih danab ii daattebppa goppig.

³³ Ag anam goppig, amge ag gokkulagnu ahan ukkaegeg, appan danab ag Jesus nuhikkud ippunittak awak danab ele anadna doyadna, ag aab ohppanu ahan, baelagppa tatam qaiettan anuqna gona, aben Jesus aɗi gokkulagnu goppig, amuppa ag tatam teppig.

³⁴ Tena daaegeg amu, haen Jesus ukka eeɗa, danab ah kuɗumnab gona daaegeg anatta, Nug ahilagnu oo bodoetta le meum. Aɗinu? Ag am doɗ sipsip ag gumak danab iitta, ag amubia daappig. Anam amunu, Nug ag keeke kuɗum ippuanattom.

³⁵ Ippuanattette aam noono, nuhikkud ippunittak awak danab ag Jesus gumidna dona, amegppa appig. “Laih imuam aben danab ii daatteb ele. Aam ele nokkun hette.

³⁶ Amu danab ah imu ag ee laa iitta amunu na appe, ag ahan, danab laulkadppa, aab nakok ele aben imu taliliadna daattebppa gona, ee daden mena laig!” aon appig.

³⁷ Ag anam aeg amu Jesus Nug aum. “Ag ee madappeg laig!” awa aum. Awa a amu ippunittak awak danab ag appig. “Ehe! Ig gota, bret silwa men doɗo 1,000 keeke anamppa daden mekkunigte? Ig men doɗo amubia iittanab iitta,” aon appig.

³⁸ Ag anam aeg amu Jesus Nug aum. “Ag bret kunum gane ele? Gona antteg!” awa aum. Awa a amu ag gona, mattin anidna, ag eɗun dona, amegppa appig. “Bret kunum tanig ele amu kakai aɗit ele daatteb,” aon appig.

³⁹ Ag anam aeg amu, Jesus Nug ippunittak awak danab amelagppa aum. “Danab ah oh appeg doona, ag ameg ameg gikkiɗah enappa dayeg!” awa aum.

⁴⁰ Nug anam a amu ippunittak awak danab ag aeg, danab ah anam daappig. Ameg laala ebqak 100, ameg laala ebqak 50. Ag anam daaeg ukkom.

⁴¹ Ag anam daaegeg amu Jesus Nug bret tanig ele, kakai aɗit ele diia aɗa, Nug hab attan neekkakka, Kayak amegppa, “Ena hen mekkame,” awa aum. Anam hewowa amu, Nug bret, kakai ele pane ne, nuhikkud ippunittak awak danab ag aon panin mattaglagnu matte, ag danab ah madappig.

⁴² Mattaeg, danab ah oh ag laeg, oolag dittie,

⁴³ bret kakai ele big dayom amu ippunittak awak danab ag aon, kaleg 12 inaeg ambeum.

⁴⁴ Danab ee lappig ele amu ahilag ebqak am 5,000.

Jesus le qaɗeppa oiyom

⁴⁵ Ag ee lana malaeg amu, Jesus Nug nuhikkud ippunittak awak danab amelagppa aum. “Da danab ah kuɗum imu oh qatiglagnu abippi, ag ahan, uubppa tena, Galili le ameg mataɗna, laih Betsaida ukkeg!” awa aum.

⁴⁶ Nug anam a amu, ag ahan ukkaegeg, Jesus Nug danab ah amelagppa, “Enad ukkeg,” awowa, Nug unuqidkkunu qaukoppa nakok ta dayom.

⁴⁷ Ta dayeye, aam no, ippunittak awak danab ag uubppa, le ameg gamagppa ukkaegeg, Jesus Nug nukka wanppa dayom.

⁴⁸ Anam dayeye amu, ulah okkai uub nob awe, eɗua laih gokkunu heehe amu ippunittak awak danab ag el qak uɗat okkai heegeg, Jesus anattom. Anatte, buttuanab 3 kilok keeke Jesus le qaɗeppa tappa, gumatta ukka, qe-eɗatta gokkunu ukkom, amge haen ippunittak awak danab ag

⁴⁹ Nug anam le qaɗeppa uɗieye anidna, “Umuam dottog,” appig.

⁵⁰ Ag oh anidna, eheɗ nau baɗappig amunu, ag eeg, Jesus Nug paha ag amelagppa aum. “Ag ɠagattag dayeg! Imu daib, aib baɗappig,” awa aum.

⁵¹ Nug anam ana amu, Nug uub attan oola te, ulah toettom. Toette amu, ippunittak awak danab ag dabmak kuɗumnab aoppig.

⁵² Aɗinu? Ag Jesus bretppa kobol heum amu ag oolag ii maittom. Ag ahilag dabmak ituak dayom.

⁵³ Aria, ag le ameg mataɗona, Genesaret ihippa eeɗna, ag uubnu anka appa buɗieg noum.

⁵⁴ Ag appa eeɗna teeg, haen amuppanab appan danab ag Jesus anidna, ag Nug dooppig.

⁵⁵ Ag Nug doon, ag paha wan atu amu ohppa gona, oɗe danab qaɗaqaɗppa diin, Jesus dayomppa uɗippig.

⁵⁶ Amu Jesus Nug aabaab oiyeye, ag oɗe danab aabppanu, aab dimittimnu ele diin, ee oɗiak abenalkadppa maadna, ag oɗe danab Jesusnu lamen elab daugib aɗaglagnu unuqppig. Unuqeg, danab ag anam heppig ele, amu oh ag beɗulag ena dayom.