Mak 3 - Nobonob Baibel

¹ Deɗ laa Sabat deɗppa Jesus Nug Juda dilag nai doyak lakka noa, danab laa nug eppeg mauhak ele, appa dayeye anttom.

² Ɗo gumak danab-Parasia ag ele appa daanna, Jesus Nug aɗi heeb anidkkulagnu meidppig. Nug Sabat deɗppa danab eppeg nau ele ehanitteb elele dayeb amu, ag Jesus hettoɗiak abenppa mekkulagnu oolag dayom.

³ Anam daaegeg, Jesus Nug danab eppeg nau ele amegppa aum. “Na ahan, danab ah noolagppa hippaidna daye!” awa aum.

⁴ Nug anam a, danab nug hibaitta dayeye, Jesus Nug ɗo gumak danab-Parasia oɗ mattom. “Ɗo ihinig aɗi atte? Ig Sabat deɗppa ena hekkunig am enatai o iitta ig Sabat deɗppa eheɗ hekkunig am enatai? Ig hepput danab mauhkku amuam enatai o iitta ig hepput, danab laa nug mauhkkunu hette ele amu nug elele daakku amuam enatai?” awa aum. Nug anam oɗ matte amu, ɗo gumak danab-Parasia ag Jesusnu oɗmak amunu nob mekkulagnu oolag ii dayom amunu ag toettan, bakkum daappig.

⁵ Ag toettan daaegeg, Jesus Nug neekka anatta, Nug oo nauhak doya, ag ahilag dabmak ɠagattag eppom ele antta, Nug amunu oo uugnab doya, Nug danab eppeg mauhak ele amegppa aum. “Na eppen taiette!” awa aum. Jesus Nug anam a amu, danab amu nug eppeg taiette, eɗua laih bia, ena dayom.

⁶ Jesus anam heum amunu, ɗo gumak danab-Parasia ag ahan ukkaeg, Herotnu ehanittak danab ele qagmena, Jesus qekkulagnu ib madippig.

Danab kuɗumnab Jesus dim lamidppig

⁷ Jesus Nug anam he amu, Nug nuhikkud ippunittak awak danab ele ag ahan, aab amu uun, Galili le amegppa ukkaegeg, danab ah kuɗumnab Nug dim lamidna uɗippig. Ag Galilinu,

⁸ Judanu, Jerusalemnu, Idumeanu, Jodan le laihnu wan atuppanu, aria Tair, Saidon ele dilah wan atu eleppanu, ag oh Jesus kobol hettom dooppig amunu, ag Nug anidkkulagnu dim lamidna goppig.

⁹ Ag kuɗum goppig amunu, Jesus Nug nuhikkud ippunittak awak danab amelagppa aum. “Danab kuɗum daana, hautiɗmananu ag dahilad, ag uub nakok aon dona aɗappeg, kobol anam beeb, da uubppa tekkul,” awa aum.

¹⁰ Diig aɗinu danab ag Jesus hautkkulagnu heppig? Jesus Nug oɗe danab kuɗum bappalattom amunu, deɗ amuppa ele oɗe danab kuɗum danab ah oolagppa daanna, Jesus gumidna wana, Nug beɗu aɗaglagnu wagai meppig.

¹¹ Amu danab laala ag ouɗi nau ele ag Nug anitteg, ouɗi nau ag heegeg, danab amu ag Jesus noobppa nena qena, wanppa niiegeg, ouɗi nau danab beɗulagppa daappig ele, ag eppig. “Na Kayak Bekka,” aon appig.

¹² Anam aeg, Jesus, Nug am Kayak Bekka amu, ag amunu miag atiak ii amananu ɗo ɠagattag mattom.

Jesus Nug ippunittak awak danab 12 tituanattom

¹³ Deɗ laa Jesus Nug qaukoppa nakok ta, nuhikkud ippunittak awak danab diikkunu oo dayom ele amu, Nug ag onilagppa e, ag Nug gumidna goppig.

¹⁴ Nug danab 12, ahilagnu Nug totol danab aum amu, Nug ag Nug ele daaglagnu, ag Nai Ena mehuqkkulagnu,

¹⁵ ouɗi nau ele lamadkkulagnu ɠagattag ele daaglagnu maatteb gokkulagnu tituanattom.

¹⁶ Nug danab 12 tituanattom, amu ag onilag am inam. Saimon, amu Jesus nug onig laa Pita ataɗom.

¹⁷ Aɗit laa amu Sebedi bekoɗ Jems, Jon ele. Jesus Nug aa onilah laa Boanerges ataɗom. Onig amu, nuhig meu am “Hakkaɗ bekoɗ.”

¹⁸ ⌊Laa oh am⌋ Andru, Pilip, Bartolomyu, Matyu, Tomas, Alpius bekka Jems, Tadius, Saimon, nug am Selot,

¹⁹ amu Judas Iskariot ele. Nug am Jesus kekeɗ eppelagppa meum.

Jesus amu Belsebubnu nai ele

²⁰ Aakku Jesus Nug eɗua lakka ukka dayeye, danab ah kuɗum ele qagmeppig. Qagmena daaegeg amu, Jesus Nug uɗat nuhig heehe, Nug, nuhikkud ippunittak awak danab ele ag ee nakok laa awa lakkunu haen elele iitta.

²¹ Anam dayeye, Nug anig amakkud ele ag amu doona, ag ahan, Nug omalna gokkulagnu uɗippig. Aɗinu? “Nug kaaka qeum,” aon appig.

²² Anam appig amge, ɗo mehuqak danab ag matu Jerusalemnu neppig, ag Nug heumnu inam appig. “Ouɗi nau ikkilag Belsebub nug danab imu beɗuppa daatte amunu, Nug ɠagattag amuppa ouɗi nau lamadtte,” aon appig.

²³ Ag anam aeg amu Jesus Nug he, ag gumidna doeg, Nug keeke danab ag dootteb ii dootteb ele ouaqata, ippuanatta nai amuppa amelagppa inam aum. “Satan nug attemu Satan lamidkkunu elele?

²⁴ Ɗo maɗoɗ laippuppan danab ag ahan oppatna, ameg aɗit bena, nug qekkulag amu, wan amu nug ena ii daama.

²⁵ Baekkudppa laa ele anamib. Ag oppatna, ameg aɗit bena, nug qekkulag amu, baekkudppa amu nug na qekku.

²⁶ Aria, Satan ele anam. Nug laikkud ele ag oppatna, ameg aɗit bena, akka akka nug qetteb dayeb, ag daaglagnu elele iitta. Ag iitta mekkulagnu daatteb.

²⁷ Danab nug danab ɠagattag laa laugppa hamu noa keeke laa ii aotte. Am elele iitta amunu, tatam nug danab ɠagattag amu muɗippa hippalowa, nug danab amu laugppa noa, keeke yab aokku. Amubia da Satan eɗittak daattem amunu, da nuhikkud daup lamadkkulnu elele daattem,” awa aum.

²⁸ Jesus Nug anam ana amu, Nug nai baula tuɗitta aum. “Da genab ag amelagppa attem. Kayak Nug danab ah dilag hipunin oh, nuhignu amu nuhig keekenu dabittak nai ahilag oh ele uhuqa madakku,

²⁹ amge laa nug Kayak Ouɗinu dabittak nai madikku amu, nug hipunin uhuqa mettak ii aoma. Hipunin amu iitta ii mema, hanhan daakku,” awa aum.

³⁰ Ag, “Jesus Nug ouɗi nau ele,” anan daappig amunu, Jesus Nug anam amelagppa aum.

Jesus baekkudppa Nug anidkkulagnu uɗippig

³¹ Aria, Jesus Nug anig, amakkud ele uɗina, dimittim daana, Jesus gumatta dokkunu danab laa amegppa aeg, nug danab daappig ele amu, ag amelagppa aum.

³² Danab ah kuɗum ag Jesus talilidna daanna, nai amu doona, Jesus amegppa appig. “Na anin, amapad ele na anidkkulagnu uɗin, dimittim daatteb,” aon appig.

³³ Aon aeg amu Nug aum. “Da anil, amalad ele am aun aɗi?” awa aum.

³⁴ Nug anam ana amu, Nug neekka oiyaya, ag Nug talilidna daappig amu anatta, Nug aum. “Antteg! Imuam da anil amalad ele.

³⁵ Danab laa nug Kayaknu dabmak dim lamidtte, nug am da anil, da amal, da appinal ele,” awa aum.