Mak 2 - Nobonob Baibel

Jesus danab eppeg baeg ele oh mauhom babaittom

¹ Aria, deɗ laala dimppa Jesus Nug aha, eɗua Kaperneam ukke, appan danab ag Jesus lakka uɗiom daatte amu doona,

² ag ahan, lag Nug dayom ele amuppa gona qagmeppig. Kuɗumnab goppig amunu, lag ooppa dimittim ele ag aben oh ituppig. Itun daaegeg, Nug Kayak nai mehuqom.

³ Nug nai mehuqeqe, danab laala ag lailag oɗe ele, nug baeg eppeg mauhak ele, ag oolagppanu danab waɗele ag nug qaɗaqaɗppa maon uɗippig.

⁴ Uɗieg, ag lag Jesus dayom ele, amuppa danab ah kuɗum ituak daaegeg, Jesus gumidna gokkulagnu elele iitta amunu, ag lag attan tena, lag amu koɗokko uɗem ukkak ele amunu ag tena, lag koɗokko Jesus waappa dayomppa loppaɗna, oɗe danab qaɗaqaɗ ele muɗippa qakkan, Jesus noobppa paɗaeg noum.

⁵ Paɗaeg noum amu, Jesus Nug ooppa genab doyak ahilag antta, Nug oɗe danab amegppa aum. “O nan, nahip hipunin oh da uhuqe medattem,” awa aum.

⁶ Nug anam a amu, ɗo mehuqak danab appa daanna, ag akka akka dabmakppa inam appig.

⁷ “Danab imu Nug aɗinu anam atte? Nug Kayaknu dabittak nai maditte. Kayak Nug nukka hipunin uhuqa megakkunu elele,” aon appig.

⁸ Ag dabmak amu aoegeg, Jesus Nug nuhig dabmakppa amu doya, Nug ag amelagppa aum. “Ag aɗinu dabmak anam aotteb?

^9-10 Aɗi nai am oɗe danab imu anaknu uug iitta? Hipunin uhuqa mettaknu nai amute am uug iitta, o iitta aha, qaɗaqaɗ huma, tappa ukkaknu nai, amutai am uug iitta? ⌊Amu oh iitta. Danabib am aɗit oh hekkunu elele iitta⌋ amunu, ag Danab Bekkalag da, da wan imuppa hipunin uhuqen madakkulnu ɠagattag ele, ag amu dooglagnu amu da heppi, aha gokku,” awa aum.

¹¹ Jesus Nug anam ana amu Nug eɗua, oɗe danab amegppa aum. “Na ahan, qaɗaqaɗ nahip aon, lakka ukke!” awa aum.

¹² Nug anam a amu, oɗe danab nug aha, qaɗaqaɗ nuhig awa, ag noolagppa dimittim ukkom. Ugekke amu ag dabmak kuɗum aona, Kayak binag mena appig. “Ig deɗ laa keeke amubia ii anidmut,” aon appig.

Jesus Lewi onigppa eum

¹³ Aria, Jesus baula eɗua, le ameg Galili ihippa dayeye, danab ah kuɗumnab ag gumidna ukkaeg, Jesus Nug Nai Ena ippuanattom.

¹⁴ Ippuanattowa amu Nug aha, wana oiyaya, Nug Alpius bekka Lewi, nug takis awak lakka dayeye anttom. Antta, Jesus Nug amegppa aum. “Na dona, da dim lamiɗe!” awa aum. Anam a amu, nug aha Jesus dim lamittom.

¹⁵ Dimppa Jesus Nug nuhikkud ippunittak awak danab ele ag Lewi laugppa ee laegeg, takis awak danab kuɗum, danab kuɗum ag Juda dilag ɗo oh ii dim lamidppig, ag ele uɗieg, Jesus, nuhikkud ippunittak awak danab ele ee lappig. Aɗinu? Ag kuɗum ag Jesus dim lamidppig.

¹⁶ Aria, ag ee lanan daaegeg, ɗo mehuqak danab amu ɗo gumak danab-Parasia ele ag anadna, Jesusnu ippunittak awak danab oɗ madappig. “Aɗinu Jesus Nug takis awak danab, danab ag ihinig ɗo oh ii dim lamidtteb ele, Nug ag ele oh daanna ee latteb?” aon appig.

¹⁷ Aon aeg amu Jesus Nug doya, amelagppa aum. “Danab oɗe iitta, nug dokta toppa ii gotte. Iitta. Danab nug oɗe ele nug gotte. Amubia amu, da heppi, genab tutukku hak danab ag oolag eɗukkunu ii uɗimi. Iitta. Da heppi, hipunin danab ag oolag eɗukkunu uɗimi,” awa aum.

Danab ag Jesus ee ohnu kud ma dayaknu oɗ medappig

¹⁸ Aria, Layattak Jonnu ippunittak awak danab, amu ɗo gumak danab-Parasia ele ag deɗ kuɗum ee ohnu kud mena daadttappig. Anam amu, deɗ laa danab laala ag Jesus toppa gona, Nug oɗ medappig. “Aɗinu Jonnu ippunittak awak danab amu ɗo gumak danab-Parasia, ahilag ippunittak awak danab ele ag hanhan ee oh lanaknu amu kud men daatteb, amge nahipad ippunittak awak danab ag anam ii hetteb?” aon appig.

¹⁹ Ag Jesus amegppa anam appig amu, Jesus Nug aum. “Da am danab nug ah aotte bia. Aria, dahil ippunittak awak danab ag am da lailad. Amu ig doottem, ewau matulak haen am oo gamag ahak ele amunu, danab nug ah aotte, nug daatte haenppa, nug laikkud ag uug doonna, ee ohnu kud mena daaglagnu am iitta. Ag lailag daatte haenppa ag ee ohnu kud mena daaglagnu elele iitta. Ag oolag gamag ahak ele amunu, ag ee ii uumna, ag lakkulag.

²⁰ Anam aakku daatte, amge deɗ laa dimppa ag lailag ah awom ele, nug laih ukkeb, haen amuppa ag oolag uug ele amunu, haen amuppa ag ee ohnu kud mena daaglag. Amu da ami, amubia. Da am danab ah aotte bia. Dahil ippunittak awak danab ag am da lailad bia. Da gemu ag ele daattem amunu, ag ee ohnu kud mena daaglagnu elele iitta. Dimppa da goppi, ag anam hekkulag,” awa aum.

²¹ Jesus Nug anam ana, Nug nai tuɗitta ippuanatta aum. “Danab nug lamen qatti bau awa, lamen alagnu giɗo amuppa tona ii koit-tte. Iitta! Nug anam helo amu, nug lamen iheb, lamen qatti bau ii ihak ele am nakok ma, lamen qatti amu aakku lamen alag eɗeb, lamen alag kattiɗa giɗo okkai ele daakku,” awa aum.

²² Anam ana amu, Nug nai keeke amunu baula inam aum. “Laa ele amu, danab nug grep leppu bau doɗ gaɗa nippud alagppa ii inatte. Nug anam helo amu, grep leppu nug eɗua, wain baaba, titiɗa heebeb, doɗ gaɗa nippud alag nug ɠagattag eppom, okkai mekkunu elele iitta amunu nug aoɗeb, wain amu doɗ gaɗa nippud ele oh iitta mekkulah. Ag anam ii hetteb. Grep leppu bau am doɗ gaɗa nippud bauppa inaglagnuib daatte,” awa aum.

Jesus Nug Sabat deɗnu okkai daatte

²³ Aria, deɗ laa Sabat deɗppa Jesus nuhikkud ippunittak awak danab ele ag ibppa wit keekenu dad laala ooppa gonana, ippunittak awak danab ag wit aeg laala aon lappig.

²⁴ Anam heegeg amu ɗo gumak danab-Parasia ag Jesus oɗ medappig. “Antte! Ɗo nug danab laa Sabat deɗppa ee dattanu ii aoma ippunigtte amunu, aɗinu nahipad ippunittak awak danab ag Sabatnu ɗo amu tippalna, ee aon latteb?” aon oɗ medappig.

²⁵ Ag anam oɗ mettaeg amu Jesus Nug amelagppa aum. “Ag Dawit nug nuhikkud danab ele ag enug aqe, tutu mena daanna, Dawit aɗi heum amu, ag amu iite ebqeppig?

²⁶ Amuam Abiatar nug mana mettak ikki danab dayom haenppa beum, amu haen amuppa Dawit nug Kayak laug ooppa noa, bret Kayaknu tituana mettak daatte, mana mettak danab agib lakkulagnu elele, nug amu awa lana, nuhikkud danab ele mattom,” awa aum.

²⁷ Jesus Nug anam ana, Nug nai tuɗitta aum. “Sabat deɗ am danab ehanittak aokkunu daatte; danab nug heeb, deɗ amu anuqak daakkun ii daatte

²⁸ amunu, Danab Bekkalag da, da Sabat deɗ elenu ikki daattem,” awa aum.