Mak 14 - Nobonob Baibel

Betani aabppa ah laa goɗen awa ukka Jesus laaittom

¹ Jesus Nug nai amu oh mattia male amu dimppa Pasowa Hobulnu deɗ ii nak, nekkunu deɗ aɗit dayeye, hobul amunu ag Bret Yis Iitta Lanaknu Hobul Nakok ele adappig amu, mana mettak danab okkai, ɗo mehuqak danab ele amu ag lokkumakppa Jesus aɗan, qeppeg mauhkkunu ib madippig.

² Amu ag keeke amu hekkulagnu inam appig. “Danab ah nug qemana, muttub ele qemananu amu, ig Pasowanu Hobul haenppa Jesus ii aɗamta,” aon appig.

³ Aria, Jesus Nug Betani appa danab onig Saimon, nug ⌊matu⌋ gaɗa oɗe nau ele ⌊gemu iitta meum⌋ amu, nug laugppa balalppa ee lanan dayeye, ah laa nug men id enanag, leppu muttuɗig enanag, nob okkainab ele inak, amu awa, Jesus gumitta uɗiom. Ag leppu amu bala laa onig nad, amuppaib heppig. Aria, ah amu nug id amu awa uɗia baag qe aoɗe, leppu amu Jesus igippa gokkaɗom.

⁴ Nug anam he amu danab laala appa daappig ele ag oolag nauhe, akka akka kobol amunu mattin appig. “Aɗinu nug leppu muttuɗig enanag amu hamu kakittom?

⁵ Nug leppu amu meeb, danab laa nug maɗ laippunu uɗat nob eɗittak daden meeb, men doɗo amu daɗek danab mattalo am ena,” aon appig. Ag anam anana amu, ag ah amu eheɗ aidppig.

⁶ Ag anam aitteg amu Jesus Nug ag amelagppa aum. “Ag uueg! Ag aɗinu ah imu oo uug medatteb? Nug dahilppa kobol enanag heum.

⁷ Daɗek danab ag oolagppa hanhan daaglag amunu, ag ehanadkkulagnu oolag dayeb, ag ehanadkkulag. Amge da ag ele haen oh ii daamta.

⁸ Ah imu nug dahilppa kobol ena hekkunu elele antta, nug heum. Nug da beɗulppa leppu muttuɗig enanag imu gokkaɗom amu, nug da ii mauhmi haenppa, da mauhe moɗppa niikkulnu beɗul babaittom.

⁹ Da genab ag amelagppa attem. Dimppa danab ag wan atu ohppa dahilnu Nai Ena adeppa adeppa mehuqnana, ag ah imu keeke heum amu, ag amunu madippeg doon, ag nuhignu dabmekkulag,” awa aum.

¹⁰ Aria, haen amuppa ippunittak awak danab 12, ag oolagppan laa, nug onig Judas Iskariot, nug mana mettak danab okkai gumatta ukka, Jesus ag eppelagppa mekkunu aum.

¹¹ Nug anam a amu ag enanagnab doon, nug anam heeb, ag men doɗo mettaglagnu nai qakkan appig. Ag anam aeg amunu, Judas nug haen ena adekku Jesus aɗa, ag eppelagppa mekkunu ib mattiom.

Jesus Pasowa heum

¹² Aria, Bret Yis Iitta Lanaknu Hobul Nakok deɗ tatamnu ne, deɗ amu Juda danab ag Pasowa Hobulnu sipsip nakkud aqadttappig ele, deɗ amuppa Jesusnu ippunittak awak danab ag dona, Jesus oɗ medappig. “Na Pasowanu ee lakkutnu amu, ig amunu adeppa bappaidkkunignu oot daatte,” aon appig.

¹³ Ag anam aeg amu Jesus Nug ippunittak awak danab aɗit amelahppa aum. “Aa ahaya goya, aab okkaippa noya, appa amu aa danab nug nippud le ambak ele mawa doa, aa uɗalah teeb amu, aa nug dim lamidya ukkeɗ!

¹⁴ Dim lamidya gopeɗ, nug lag attenppa teeb, aa lag amu mameg amegppa inam aiɗ! ‘Ippunittak danab ihinih Nug inam aum. “Da dahilad ippunittak awak danab ele ig na lautppa oo attenppa Pasowanu ee lakkunignu elele?” ’ aoya akkulah.

¹⁵ Aa anam apeɗ, geha nug lag oo okkai attan, balal, dayak aben ele oh babaittak ele ippuanateb, aa lag oo amuppa Pasowa ee babaitteɗ!” awa aum.

¹⁶ Jesus Nug anam a amu aa goya, aab okkaippa noya, Jesus Nug aum amubiaib anidpiɗ. Anidya amu, aa Pasowa ee bappaidpiɗ.

¹⁷ Bappaidya malapiɗ amu, tueb meeme, Jesus Nug nuhikkud ippunittak awak danab 12 ele, ag oh appa goppig.

¹⁸ Aria, ag gona tena, balalppa ee lanana, Jesus Nug aum. “Da genab ag amelagppa attem. Ag oolagppanu laippu laa, nug da ele geha iikku ee lattep amu, nug da kekeɗ eppelagppa meiɗkku,” awa aum.

¹⁹ Nug anam a amu ippunittak awak danab ag oolagppa uugnab doonna, ag anen anen Jesus oɗ medappig, “Na ame am date?”

²⁰ Ag anam oɗ mettaeg amu, Jesus Nug nai nob meum. “Ag danab 12 amu, ag oolagppanu laa nug da ele geha iikku tappiɗ imuppanu ee lattep amu, nug ana hekku.

²¹ Danab Bekkalag da, Kayak nai atte amubianab, da mauhkkul, amge danab nug da kekeɗ eppelagppa meiɗkku amu, nuhignu gadonnab gadon. Nug anig nug ii menulo am ena,” awa aum.

²² Jesus Nug anam a, ag ee lanana daanna, Jesus Nug bret awa, Mameg amegppa, “Ena heme” awowa, pane ne, pania nuhikkud ippunittak awak danab madatta, Nug aum. “Ag imu aweg! Imuam da beɗul,” awa aum

²³ Nug anam awowa amu, Nug kap wain awa, unuqittowa matte, ag oh lappig.

²⁴ Ag laegeg amu Jesus Nug ag amelagppa aum. “Imu da tiil, amuppa da nug tituana nai qakkak bau hettem. Da danab ah kuɗum dilag hipunin uhuqen madakkulnu gokkaɗttem.

²⁵ Da genab ag amelagppa attem. Da wain geha iikku lattem imubia baula paha ii lapa. Iitta. Dimppa da Kayaknu ɗo maɗoɗ ooppa dayeye da baula lakkul,” awa aum.

²⁶ Nug anam a amu ag ahi laa ettona, ag ahan, dimittim wana, Olipnu Qaukoppa goppig.

Jesus Nug Pita, “Da nug ii doottem,” haen ewam akkunu aum

²⁷ Ag gona tena, Jesus Nug aum. “Kayak naippa yaak laa niitte am inam. ‘Da sipsip gumak danab qeppi mauheb, sipsip ag oh oolna matatun gokkulag,’ amunu, yaak amubia, gemu tuqan imu ag oh uuiɗna oolna gokkulag.

²⁸ Amge dimppa da eɗuen hibaitten, da anuqen Galili goppi, ag da dim lamiɗna gokkulag,” awa aum.

²⁹ Nug anam a amu Pita nug Jesus amegppa aum. “Danab laa oh ag nahipnu uug doon, uuidna oolna gokkulagtai, amge da am anam ii hepa!” awa aum.

³⁰ Pita nug anam a amu Jesus Nug oɗeppa awa aum. “Da genab na amenppa attem. Gemu tuqan imuppanab, matuk dawai haen ebqak aɗit ii gayeb, na dahilnu, ‘Da Nug ii doottem,’ aon, haen ewam batak akkut,” awa aum.

³¹ Awa a amu Pita nug ɠagattag aum. “Iitta! Da na ele mauhkkunih dayeb amu, da amunu uug ii doottem, amge da nahipnu, ‘Da Nug ii doottem,’ ii apa! Iittanab iitta,” awa aum. Awa a amu ippunittak awak danab laa oh ag anamib appig.

Jesus Getsemani unuqittom

³² Ag gona, aben laa onig Getsemani tena, Jesus Nug ippunittak awak danab amelagppa aum. “Ag ippa daappeg, da ukken unuqidkkul,” awa aum.

³³ Nug anam ana amu Nug Pita, Jems, Jon ele aakkuib diiatte, Nug ele goppig. Gona amu Nug ooppa uugnab doyom.

³⁴ Nug anam doya, Nug ag amelagppa aum. “Da oolppa kahipan toɗe mauhak bianab doottem amunu ag iguppa daanna, dabmenan dayeg!” awa aum.

³⁵ Nug anam awona amu Nug nakok laa ele wana ukka, appa Nug laippun gateg qaun o, gomela, iɗu wanppa ma, haen nau amu ii anidkkunu inam unuqittom.

³⁶ “O Mame, Mame, aɗi keeke haknu daatte amu, na hekkutnu elele. Amu uug oh da maokkul ele, amuam leppu mua eheɗ nau kap-ppa daatte bia, amu na ib laa anidna appe, da le kap amuppanu amu da ii lapa, amge na dahil dabmaknab aottem ii dim lamidmana, na nahip dabmaknab aottem, amuib dim lamidkkutnu ool daatte!” awa aum.

³⁷ Nug anam awona amu Nug eɗua, ippunittak awak danab ewam niiegeg anatta, Nug Pita amegppa aum. “Saimon, na niittemte? Na aua laippuib dabmenan daakkutnu elele iittate?

³⁸ Satan ag eeɗatteb eheɗppa gomananu ag dabmenan daanna, unuqitteg! Ag tutukku hekkulagnu dabmetteb, amge ag beɗulag am ɠagattag iitta,” awa aum.

³⁹ Nug anam ana, nug eɗua ukka tatam unuqittom anamib baula unuqittom.

⁴⁰ Unuqittowa amu Nug eɗua ukka, ippunittak awak danab ag amelag eheɗ neum amunu ag niiegeg anatte, ag Nug amegppa nai laa akkulagnu ii dooppig.

⁴¹ Aria, haen ewam batak nug eɗua ukka, ag niiegeg anatta amu Nug ag amelagppa aum. “Ag iite ahappig? Ag tuɗidna niin, hik ele aottebte? Aakku elele! Haen aakku doum. Danab nug Danab Bekkalag da, hipunin danab eppelagppa meiɗkkunu haen aakku doum.

⁴² Ahappeg gotu! Ag aakkud antteg! Danab nug da kekeɗ eppelagppa meiɗkku ele amu, nug aakku uɗitte,” awa aum.

⁴³ Jesus Nug nai amu mattieye amu, ippunittak awak danab 12 oolagppanu laa onig Judas, amu danab kuɗum ele, danab amu ag qep elab, daɗib ele aɗappig amu, ag uɗippig. Mana mettak danab okkai, ɗo mehuqak danab, amu Juda dilag ikki danab ele ag heeg, danab amu, Judas ele uɗippig.

⁴⁴ Amu Judas, nug Jesus dimug meum amu, nug tatam ag Jesus aɗaglagnu epponak keeke laa hekkunu amelagppa inam aum. “Da geha laa ootuqidkkul amu, danab amu aakkuib. Ag Nug aakkude aɗan, atognona, aon ukkeg!” awa aum.

⁴⁵ Aria, ag uɗina, Judas nug pahanab Jesus gumitta ukka, “Ippunittak Danab,” awowa, nug ootuqittom.

⁴⁶ Ootuqitte amu, danab ag Jesus aɗappig.

⁴⁷ Aɗaegeg amu laa appa dayom ele amu nug qep elab nuhig eeɗa awa, mana mettak ikki danabnu maɗi nid laa daug hoiyom.

⁴⁸ Anam he amu Jesus Nug amelagppa aum. “Da nai tappe nak danab naute daattem amunu ag qep elab, daɗib ele aon aɗailkkulagnu uɗippig?

⁴⁹ Haen da deɗ oh Kayaknu mettid lagnu haɗap-ppa danab ah ippunittak madattami, amge ag da ii aɗailppig. Amge Kayak nai daatte amuib bekkuoitte,” awa aum.

⁵⁰ Nug anam a amu nuhikkud ippunittak awak danab oh ag Nug uuidna oolna goppig.

⁵¹ Amu nid bau laippu laa nug Jesus Getsemani ugekke, haen amu nug ele Jesus dim lamittom. Nug linen lamen laa aakkuib takka ukkom. Ukka dayeye amu, ⌊ag Jesus aɗana,⌋ ag nug ele aɗaglagnu heegeg,

⁵² nug lamen uua, lamen iitta hamu oola ukkom.

Jesus Nug Juda dilag hettoɗiak okkai onig Sanhidren, ag noolagppa dayom

⁵³ Ag Jesus aɗana, ag Nug aon gona, mana mettak ikki danab toppa goppig. Mana mettak danab okkai, Juda dilag ikki danab, amu ɗo mehuqak danab ele ag oh appa qagmeppig.

⁵⁴ Ag Jesus aɗan omalna teegeg amu, Pita nug dim lamattom, amge nakok piɗe dim lamattom. Dim lamattatta, nug mana mettak ikki danab laugnu haɗap-ppa noum. Nug appa no, lag mamegnu daup ele daanna, nug aab uɗikka dayom.

⁵⁵ Pita nug appa dayeye amu, lag ooppa mana mettak danab okkai, amu Juda dilag hettoɗiak okkai onig Sanhidren, amunu danab ele, ag oh Jesus qeppeg mauhkkunu nai laa nuhigppa yaaglagnu madippig, amge ag laa ii anidppig.

⁵⁶ Anam mattiegeg amu danab laala ag ahan, hambuppuna, Jesus Nug aɗi eheɗ heum appig, amge ahilag nai am iɗu laippu iitta, piɗe piɗe.

⁵⁷ Anam heegeg amu, laa aa ahaya hambuppuya, Jesus geɗidya, inam apiɗ.

⁵⁸ “Danab imu Nug inam a doomuɗ. ‘Da Kayaknu mettid lag imu, danab eppelagppa heppig ele amu, da heppi nauheb, da deɗ ewam ooppa, da bau hekkul, amge da eppelppa ii hepa.’ Nug anam aum,” aoya apiɗ.

⁵⁹ Aa anam apiɗ, amge ahilah nai amu ele iɗu laippu iitta, piɗe piɗe.

⁶⁰ Anam amu, mana mettak ikki danab nug ag noolagppa hibaitta, Jesus oɗ mettom. “Nai amunu amu, na nob iite memana? Nai anak amuam genab o genab iitta?” awa aum.

⁶¹ Nug anam aum, amge Jesus Nug nai nakok laa ii mattiom. Aria, mana mettak ikki danab nug eɗua, bau oɗ mettom. “Na am Kristus, Kayak Bekkate o iitta?” awa aum.

⁶² Nug anam oɗ mette amu Jesus Nug aum. “Yo, da iikku, amu dimppa ag Danab Bekkalag da, da Kayak Ɠagattag Oh Ele eppeg naɗiap-ppa daabppi aniɗna, amu ele ag lombig hab waappa daatteb, da lombig amuppa dayeye uɗippippi aniɗkkulag,” awa aum.

⁶³ Jesus Nug anam a amu mana mettak ikki danab nug lamen nuhig aɗa pattiɗa, nug aum. “Ig aɗi heehe anttomnu mattiak danab laala danab imu eheɗ heumnu mattiglagnu ii mattimta. Iikku elele!

⁶⁴ Nug nukka nuhignu, ‘Da am Kayak,’ aum amunu, Nug Kayaknu dabittak nai aakku aum. Ag nai amu dooppig amu ag nuhignu aɗi atteb?” awa aum. Nug anam a amu ag oh, “Nug eheɗ heum, Nug mauhkkun daatte,” appig.

⁶⁵ Ag anam ana amu laa ag digmen hunu qena, lamenppa ameg qakkona, eppelag bitakkan makkuɗnana appig. “Kayak ehanitteb, na aun na oittom appe dootu!” aon appig. Aria, mana mettak ikki danab, nuhikkud daup, ag ele nug makkuɗppig.

Pita Jesusnu, “Da nug ii doottem,” aum

⁶⁶ Amu Pita nug lagnu haɗap-ppa dayeye, mana mettak ikki danab, nuhig maɗi nid ahin laa nug doa,

⁶⁷ Pita nug aab uɗikka dayeye antta, nug pehettak neekkittatta nug aum. “Na ele Nasaret ted Jesus, Nug ele oipiɗ!” awa aum.

⁶⁸ Nug anam a amu Pita nug aum. “Iitta! Nai na madittem amu, da ootot iutte!” awa aum. Anam ana amu nug aha, lagnu haɗap odppa ukka dayom.

⁶⁹ Dayeye, dimppa maɗi nid ahin amu nug Pita baula antta, nug laala appa hippaidna daappig ele amelagppa aum. “Danab imu nug Jesus aɗi lailag!” awa aum.

⁷⁰ Nug anam a amu Pita nug baula, “Iitta!” awa aum. Nug a amu nakok dimppa danab appa hippaidna daappig ele ag Pita amegppa appig. “Na am genab danab umu layag laa aakku. Aɗinu? Na Galili danab laa,” aon appig.

⁷¹ Ag anam aeg amu Pita nug nai ɠagattag qeta, inam aum. “Da nai genab ii appi amu, Kayak Nug da nob nau meɗaɗ! Da genab iikku attem! Danab amu ag nuhignu atteb ele amu, da Nug iinab doottem!” awa aum.

⁷² Pita nug anam a amu, matuk dawai nug paha haen ebqak aɗit gayom. Gaye amu Jesusnu nai, “Tuqan imuppa matuk dawai haen ebqak aɗit ii gayeb, na dahilnu, ‘Da Nug ii doottem,’ haen ewam batak akkut,” nai amu Pita daugppa doum. Nai amu Pita daugppa do, nug dabmaama gayom.