Mak 13 - Nobonob Baibel

Haen malakkunu epponak keeke digdig

¹ Amu Jesus Nug Kayaknu mettid lag uua noono, nuhig ippunittak awak danab laa nug Jesus amegppa aum. “Ippunittak danab, antte! Ag men enappaib lag imu oh enanag hadppig!” awa aum.

² Nug anam a amu Jesus Nug aum. “Ag lag okkai imu anadtteb, amge dimppa laa ag men imu loppaɗppeg nena qena, laa nug laa qaɗeppa iinab daama. Ohnab loppaɗppeg, honap nena qekkulag,” awa aum.

³ Aria, Jesus Nug aakku Kayaknu mettid lakkanu aha noa, Olipnu qaukoppa ta, heɗep na dayeye amu Pita, Jems, Jon amu Andru ele ag akka gumidna gona,

⁴ Nug oɗ medappig. “Na ig amenigppa ame amu, kobol amu haen ganeb bekku? Ele amu, epponak keeke aɗi tatam beeb, ig keeke amu oh bekkunu miag daatte doognig?” aon appig.

⁵ Ag anam aeg amu Jesus Nug aum. “Danab laa ag hambuppualadmanu dabmeig!

⁶ Aɗinu? Danab kuɗum ag da onilppa uɗin, ‘Da am Kristus,’ anana, kuɗum laa buppualadkkulag.

⁷ Amu ag bannu doonna, bannu ulah nai ele dooglag. Keeke amu genab bekkulagnab, amge doyeg! Ag aib ottaippig. Wan haen malak iitta.

⁸ Wan laa ag wan laa ele nug qekkulag. Ɗo maɗoɗ laa ag ɗo maɗoɗ laa ele nug qekkulag. Aben laalappa amu mim nebeppeg, enug haen okkai ele nekkulag. Kobol amu oh am nid dokkunu ah ag guittak tatam dootteb, amubia aakkuib.

⁹ Ag dahilad amu, ag wan imuppan oiyak ahilag dabmeig! Laa ag ag hettoɗiakppa maadna, nai doyak lag ooppa bu qaun eleppa eheɗ mataɗadkkulag. Da onil ahilagppa daatte amunu, ag diiadna king, gabman ele eppelagppa maadppeg, ag hettoɗiadkkulag. Amu ag haen amuppa dahilnu ag amelagppa mehuqkkulag.

¹⁰ Dahilnu Nai Ena wan atu ohppanu danab ah amelagppa mehuqppeg amu, malaknu haen miag daakku.

¹¹ Amu ag dahilnu Nai Ena mehuqkkulag amunu, ag aɗualadna hettoɗiakppa maadppeg, hettoɗiakppa mattiak haen ahilag ii nak, ag haen amuppa aɗi akkulagnu dabmak huan aib aoppig. Iitta. Haen amuppaib Kayak Nug nai akkulagnu ippuanatteb, ag nai amuib mehuqeg! Amuppa ag nai ii mehuqmana. Iitta. Kayak Ouɗi Nug nai mehuqkku.

¹² Haen amuppa danab laa nug awag o nug amag mauhkkunu kekeɗ eppelagppa mekku. O danab laa nug bekka, nuhigppa anam hekku. Nid naunau ag ele eɗun anilkad mamelkad mauhkkulagnu geɗadna, kekeɗ eppelagppa maadkkulag.

¹³ Da onil ahilagppa daatte amunu, danab oh ag oolagppa ahilagnu nau ninig ele dooglag, amge laa nug ɠagattag dayebeb ukkeb, keeke oh ba maleb, haen amuppa ele nug ɠagattag daakku amu, nug padal ii mema.

¹⁴ Anam amge, danab aun nug nai imu ebqette amu, nug meu nuhig tutukku aokkunu dabmaɗ! Ag keeke naunab laa, nug aab he nauhtte ele, ag keeke amu ii daalo, amuppa daatte anidkkulag amu, laa ag Juda wanppa daatteb, ag oolna qaukoppa ukkeg!

¹⁵ Danab nug lag koɗokko uɗem ukkakppa daatte, nug aguppa dayaya, nug oolkkunuib dabmaama, nug lag ooppa noa, keeke aib awom. Iitta! Nug oola ukkaɗ!

¹⁶ O laa nug dad okkaippa dayaya, nug oolkkunuib dabmaama, nug eɗua ulahnu lamen nuhig aokkunu lakka aib ukkom.

¹⁷ Haen amuppa ah oolkad ele, ah ag nid yuɗ huh madatteb ele amu, ahilagnu gadonnab gadon.

¹⁸ Ag keeke amu oug haenppa bemanu unuqitteg!

¹⁹ Aɗinu? Haen amuppa amu uug nau bekku. Uug nau amubia deɗ laa Kayak digma keeke oh heum uɗiak gemu ele, dimppa ele amubia ii daama.

²⁰ Anam daatte amunu, Naɗi Nug haen amu tutuib daakkunu, haen amu ii okkullo, danab ah oh padal melob, amge Kayak Nug danab ah nuhikkud tituanattom ele, Nug amu dilag dabma, haen tutu okkulkku.

²¹ Aria, haen amuppa laa nug ag amelagppa, ‘Antteg! Kristus Nug ippa ina daatte,’ o iitta, ‘Antteg! Kristus uppa uma daatte,’ ab amu ag oolagppa genab aib dooppig.

²² Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag ag hambuppualadkkulagnu hekkulag, amge elele iitta.

²³ Amunu ag dabmeig! Da keeke amu ii neumppa, keeke amu ohnu ag amelagppa ain malami,” awa aum.

²⁴ Jesus Nug anam ana, Nug nai baula aum. “Aria, haen amunu uug nau iitta meeb, aam ii amahalma, kalam ele ii amahalma,

²⁵ hoɗoppai laa ag habppanu nena qebeppeg, laa ag uɗalnana, ag ippulag tutukku ii dim lamidmana.

²⁶ Keeke amu oh ba maleb, Danab Bekkalag da, da lombig ooppa ɠagattag okkai, amu binag amahlak oppiaawak ele uɗippippi danab ag da aniɗkkulag.

²⁷ Da uɗien, da dahilad engel heppi, ag gona, danab ah dahilad da tituanadmi amu aben oh wanppanu, habppanu ele qagmaadna, diin uɗiglag.

²⁸ Nai amunu amu ag ad fignu kobol dabmena dabmak aweg! Ag ad fig nug uɗug bau bekkunu digma haultte anidna amu, ag haen amuppa, ‘Aam haen aakku digmette,’ aon atteb.

²⁹ Anam amu, amubia ag kobol digdig, da amunu ami ele amu bebeppeg anidna, ag dahilnu, ‘Nug eɗua uɗikkunu haen miag, odppa daatte,’ dooglag.

³⁰ Da genab ag amelagppa attem. Danab ah haen imunu oh iinab mauhadppeg, geha keeke amu oh bekku.

³¹ Hab wan ele am iitta mekkulah, amge nai dahil am iitta iinab mema,” awa aum.

Jesus eɗua uɗikkunu haen amu, danab laa ii dootte

³² Anam amge laippu laa nug amunu haen, deɗ ele ii dootte. Engel hab aabppa daatteb ele ii dootteb. Da ele ii doottem, Mama nukka keeke amu dootte.

³³ Ag haen amu ii dootteb amunu, ag dabmenan dayeg!

³⁴ Haen amu inam bia bekku. Danab laa nug atu laih gokkunu aha, nug laugppanu uɗat oh otia, nuhikkud maɗi nid eppelagppa mewowa, laa nug od gumom ele, nug nuhig okkai eɗua uɗikkunu dabmaama daakkunu awowa, aha ukkom.

³⁵ Amunu ag danab, nug nuhig okkai eɗua uɗikkunu dabmaama daakkunu aum amu, ag amubia dabmenana dayeg! Aɗinu? Ag lag mameg nug eɗua uɗikkunu haen ii dootteb; tuebtai, o tugmagtai, o buttua wagɗebtai.

³⁶ Nug laippun eɗua uɗia, tula bekkutai amunu, ag niimnanu dabmeig!

³⁷ Nai imuam ahilagib iitta. Da danab ah oh dilagnu ele attem. “Ag dabmenan dayeg!” awa aum.