Mak 11 - Nobonob Baibel

Jesus donki attan ta Jerusalem ukkom

¹ Aria ag gona, Jerusalem gukkuidna, aab aɗit Betani, Betpasi ele, aa Olipnu Qaukoppa daapiɗ, ag aab amuppa tekkulagnu tenana, appa Jesus Nug ippunittak awak danab aɗit laa maate gokkulahnu a daaeheh,

² Nug aa amelahppa aum. “Aa goya, aab nakok miag amuppa teya, appa aab daugppa aa donki nag laa ⌊nakok okkai meum⌋ qakkak daatte ana anidkkulah. Donki amuam bau, danab laa nug attan dayaya ii oiyom. Aa anidya, aa uhuqya, aoya uɗieɗ!

³ Aa anam hebepeɗ, danab laa nug, ‘Aɗinu aa anam hettep?’ awa oɗ mateb amu, aa inam aiɗ! ‘Naɗi Nug nuhignu uɗat ele. Haen elabnu iitta. Nug paha eɗua meeb uɗikku.’ Aa anam aiɗ!” awa aum.

⁴ Jesus Nug anam a amu, aa goya, donki nag ⌊nakok okkai meum⌋ amu aab ooppanu ibppa lag odppa qakkak dayeye anidpiɗ. Anidya amu, aa uhuqeheh,

⁵ danab laala ag guguittak daanna, ag oɗ matappig. “Aɗinu aa donki nag ⌊nakok okkai meum⌋ amu uhuqttep?”

⁶ Ag anam oɗ mataeg amu, aa Jesus aum, Nug oɗe bia aeh amu ag, “Ena,” aon appig.

⁷ Ag anam aeg, ippunittak awak danab aɗit aa donki nag ⌊nakok okkai meum⌋ amu aoya, Jesus gumidya ukkaeh, ag lamen ulahnu donki gomeppa duqeg, Jesus Nug donki attan ta dayom.

⁸ Ta dayeye amu, danab kuɗum ag ahilag lamen ulahnu ib manppa duqaegeg, laala ag ad eppeg dad okkaippa okkulna, ibppa duqadppig.

⁹ Anam duqegeg, Jesus ugekke, danab laala ag anuqna ukkaegeg, laala ag Jesus dim lamittegeg gona, ag oh enan appig. “Ig Kayak onig humatu! Laa nug Naɗi onigppa uɗitte amu, ig Naɗi Nug Nug itidkkunu oonig daatte.

¹⁰ Danab imu Nug ig alanig Dawit king dayom, Nug amubia daakkunu uɗitte, Kayak Nug itidkkunu oonig daatte. Kayak, Nug attannab daatte ele amu, ig Nug onig humatu!” aon appig.

¹¹ Ag gona, Jerusalem tena nona amu, Jesus Nug Kayaknu mettid lag ooppa noa, keeke oh anatta malowa, tueb meum amunu, Nug nuhikkud ippunittak awak danab ele ag eɗun, Betani goppig.

Jesus Nug danab Kayaknu mettid lakka eheɗ heppig amu lamattom

¹² Aria wagɗe deɗ amuppa ag Jerusalem gokkulagnu Betaninu ahan ukkaegeg, Jesus Nug enug qeum.

¹³ Ag gonana amu Jesus Nug neekke, nakok uma ukke, ad fig anttom. Haen amuam ad fig meu awaknu haen iitta, amge uɗug kuɗum ad amuppa daappig ⌊amunu ad amu kobolppa meu ele daakkunu dayom⌋ amunu, Jesus Nug meu aokkunu gukkuitta ukka, Nug meunu neekka, Nug meu laa ii anttom, uɗugib.

¹⁴ Anam antta amu, Nug aum. “Na danab laa meu lakkunu na baula meut iinab omana!” awa aum. Awa a amu nuhikkud ippunittak awak danab ag nai amu dooppig.

¹⁵ Anam amu ag gona Jerusalem tena amu, Jesus Nug Kayaknu mettid lag nuhig tomppan keeke oh ele ooppa noa, Nug danab appa mana mettaknu keeke dadennu maadppig, laala daden meppig ele amu, Nug ag lamattom. Appan danab laala ag men doɗo baolippig ele amu, Nug ahilag balal huma awe ukka na qe, am laala ag uppuɗil beɗulag nakok maatteg daden maadppig ele, Nug ahilag dayak aben ele huma awe, ukka na qeum.

¹⁶ Laa ele amu Jesus Nug, “Ag daden maknu keeke aon laih gokkulagnu amu, ag Kayaknu mettid lag haɗap-ppa nona gokkulagnu am aib heppig,” awa aum.

¹⁷ Jesus Nug anam hewowa amu, Nug ag amelagppa aum. “Kayak naippa yaak inam daatte. ‘Danab ag da laul am wanppan wan ohppanu danab ah dilag unuqiɗak lag dooglag,’ amge ag heeg, nug yab danab naunab dilag lokkumak aben bia daatte!” awa aum.

¹⁸ Jesus Nug anam a amu, mana mettak danab okkai amu ɗo mehuqak danab ele ag danab ah laa kuɗum amu oh ag Jesusnu nainu oolag okkai dayom anidppig amunu, ag Jesusnu baɗan, qeppeg mauhkkunu ib madippig.

¹⁹ Jesus Nug anam he, tueb meeme, Nug nuhikkud ippunittak awak danab ele ag Jerusalem uuna, aab okkai amu dimittim goppig.

Ad fig bunaɗom

²⁰ Aria, buttua amu ag eɗun, Jerusalem gokkulagnu ahan gonana, ibppa ag ad fig, Jesus ad amunu meu baula ii omanu aum ele amu, nug eppeg diɗi oh bunaɗom anidna,

²¹ Jesus ad amu amegppa aɗi aum, nai amu eɗua Pita daugppa do, nug Jesus amegppa aum. “Ippunittak danab, antte! Tumai na ad fig eheɗ laa awaknu waappa daakkunu ame amu, am aakku bunaɗom!” awa aum.

²² Pita nug anam a amu Jesus Nug aum. “Ag Kayaknu oolagppa genab doyeg!

²³ Da genab ag amelagppa attem! Danab laa nug Kayaknu ooppa genab doyak ele, nuhig dabmak aɗit iitta amu, nug qauko imu amegppa, ‘Na ahan yuppa ukke!’ ab amu, nug anam hekku.

²⁴ Amunu ag keeke laa bekkunu unuqidnana, ag aottebnu oolagppa genab doonna, ag unuqidppig amubia ag aoglag.

²⁵ Laa ele amu, haen ag ⌊anen anen, ag⌋ unuqidnana, ag Mamelag, hab aabppa daatte, Nug ahilag hipunin uhuqa madakkunu amu, danab laa nug ahilagnu eheɗ heum dayeb, ag hipunin amu uhuqna metteg!

²⁶ ((Amge ag danab laanu hipunin uhuqna ii medappeg, ag Mamelag, hab aabppa daatte, Nug ele ahilag hipunin uhuqa ii mattama.”))

Juda dilag okkai ag Jesus nuhig uɗatnu oɗ medappig

²⁷ Aria, ag gona Jerusalem tena amu, Jesus Nug Kayaknu mettid lag ooppa noa oiyeye, mana mettak danab okkai amu ɗo mehuqak danab amu Juda dilag ikki danab ele ag Jesus gumidna gona,

²⁸ Nug oɗ mettan appig. “Na ɠagattag aɗippa uɗat imu hettem? Aun ɠagattag amu mette, na uɗat imu hettem?” aon appig.

²⁹ Ag anam aeg amu Jesus Nug aum. “Da ele ag keeke laippunu oɗ madappi, ag nob mekkulag dayeb amu, da ɠagattag aɗippa uɗat imu hettem, da diig amu appi dooglag.

³⁰ Oɗmak dahil am inam. Jonnu layattak, keeke amuam hab aabppanu keeke, o iitta amuam danabnu keekeib? Ag amu appeg dookkul,” awa aum.

³¹ Jesus anam a amu, ag akka akka mattin appig. “Ig, ‘Habnu keeke,’ apput amu Nug, ‘Anam dayom dayeb amu, ag aɗinu nug oolagppa genab ii dooppig?’ akku.

³² Amge ig, ‘Danabnu keeke,’ apput amu, ig danab ah baɗadttem. Aɗinu? Ag oh ag Jonnu, nug am propet oolagppa genab dootteb,” akka akka aon appig.

³³ Ag akka akka anam ana amu, ag Jesus amegppa appig. “Ig ii doottem,” aon appig. Aon aeg amu Jesus Nug aum. “Aakku amunu da ele ɠagattag aɗippa uɗat hettem amu, da appi ii doomna,” awa aum.