Mak 10 - Nobonob Baibel

Ewau matulak otaɗaknu nai

¹ Jesus anam ana mala amu Nug Kaperneamnu aha ukka, Juda ukka, Nug Judanu wan atu laa Jodan le laih dayom ele, appa ukkom. Ukka appa dayeye amu danab ah kuɗumnab ag Nug gumidna ukkaeg, Nug kobol hanhan hettom amubia ag amelagppa Kayak nai ippuanattom.

² Haen amuppa amu ɗo gumak danab-Parasia laala ag Jesus gumidna gona, Nug inam oɗ medappig. “Ihinig ɗoppa amu danab laa nug ah nuhig lamitteb gokku am enate o ena iittate?” aon appig. Ag Jesus ma anttak mettaglagnu anam oɗ medappig.

³ Ag anam oɗ mettaeg amu Jesus Nug oɗelagppa awa, oɗ mattom. “Keeke amunu amu Moses nug ɗo attem meum?” awa aum.

⁴ Nug anam a amu ag appig. “Moses nug inam aum. ‘Danab laa nug wau lamidkkunu oo dayeb amu, nug uɗug laa ewau okkulaknu ya, wau mettowa lamitteb gokku,’ ” aon appig.

⁵ Ag anam aeg amu Jesus Nug aum. “Ao, amge ag Kayak oɗe dim lamidkkulagnu uuppig amunu, Moses nug ɗo anam meum.

⁶ Amge tatam keeke oh heum haenppa am anam iitta. Haen amuppa Kayak Nug danab ah haatom amu, Nug laa am danab, laa am ah haatom, amu

⁷ ‘diig amunu, ewau matulak haenppa danab nug anig mameg ele uuata, nug wau ele matulak daaya,

⁸ aɗit amu aa ouqak laippu daaglah.’ Aa anam heya, aa baula aɗit iitta. Aa am laippu.

⁹ Aa laippu amunu, keeke Kayak nukka matulatom amu, danab laa nug aib otaɗom,” awa aum.

¹⁰ Nug anam a amu Nug nuhikkud ippunittak awak danab ele ag ahan, lakka gona, ag Jesus nai amunu oɗ medappig.

¹¹ Oɗ mettaeg amu Nug ag amelagppa aum. “Danab laa nug ah nuhig lamittowa, ah bau aotte amu, danab amu nug ewau pakkua gappai hak kobol ha, wau tatamnu, nuhigppa ewau pakkua gappai hak kobol hette.

¹² O ah laa nug danab nuhig lamittowa, nug danab bau aotte amu, ah amu nug ewau pakkua gappai hak kobol hette,” awa aum.

Jesus nid naunau ele

¹³ Aria, danab ah ag nid naunau omaladna, Jesus Nug eppeg qaɗelagppa ma, itittak ena madakkunu gumidna goppig, amge ippunittak awak danab ag amu anidna, ag laa nid diin goppig ele nakok aladppig.

¹⁴ Ag nakok alatteg, Jesus Nug anatta, kobol heppig ele amunu nug oo nauhe, amelagppa aum. “Danab ag nid naunau bia daatteb, ag am Kayaknu ɗo maɗoɗ ooppa daatteb amunu, ag nid uuadppeg, dahilppa doig! Ag ib ahilag aib oo neppig.

¹⁵ Da genab ag amelagppa attem. Danab nug Kayaknu ɗo maɗoɗ nid nakok aotte amubia ii aokku amu, nug Kayaknu ɗo maɗoɗ iinab noma,” awa aum.

¹⁶ Nug anam ana, nug nid naunau oɗakkiatta, eppeg qaɗelagppa ma, itittak ena mattom.

Danab bau enub okkai ele Jesus gumitta ukkom

¹⁷ Jesus Nug anam ha mala amu Nug ibppa ugekke, danab laa nug qaiqaɗ Jesus gumitta ukka, Jesus baegppa laippun gateg qaun o, nug aum. “Ippunittak danab ena, da attem heina da bauklel hanhannu aokkul?” awa aum.

¹⁸ Nug anam a, Jesus Nug eɗua amegppa aum. “Kayak Nug nukka am ena amunu, na dahilnu, ‘Danab ena,’ ame amu, na nai amu tatam dabmewonate ame, o iitta na hamute ame?

¹⁹ Amge nahip oɗmaknu amu, na ɗo oh doottem. Na ewau aib pakkuna gappai heme. Na danab aib qeppe mauhom. Na yabhok aib heme. Na hettoɗiakppa, aben laa oh eleppa, na layapnu nai hambuppuak aib mattime. Na kobol hambuppuakppa keeke aib aome. Na mamen, anin ele binalah mate!” awa aum.

²⁰ Jesus Nug anam a amu danab amu Nug aum. “Ippunittak danab, da nid nakokppanu ɗo amu oh dim lamitti uɗie, gemu ele anamib hettem,” awa aum.

²¹ Awa a amu Jesus Nug danab amunu dabmak awa, nuhignu oo mauhe amu nug amegppa aum. “Keeke laippunu amuppaib na elele iitta. Na gona, na enun oh meppe, danab laala daden meppeg, na men doɗo amu oh aon, daɗek danab mattona, na hab attan enun okkai ele daakkut. Na anam hewona amu, na eɗun dona, da dim lamiɗe!” awa aum.

²² Jesus Nug anam a amu danab amu nug nai amunu iɗu tiguguɗe, nug eɗua, oo uug ele ukkom. Aɗinu? Nug enub kuɗum ele.

²³ Nug ugekke amu Jesus Nug ippunittak awak danab nuhikkud neekkatta, Nug ag amelagppa aum. “Danab ag enulag kuɗum ele amu ag Kayaknu ɗo maɗoɗ ooppa noaknu am uug okkai ele,” awa aum.

²⁴ Jesus Nug anam a amu nuhikkud ippunittak awak danab ag nai amu doon, dabmak kuɗum aoeg anatta amu Nug baula ag amelagppa aum. “O nid nakkud, Kayaknu ɗo maɗoɗ ooppa noaknu am uug okkai ele.

²⁵ Doɗ kamel nug koitaknu tutui giɗoppa noa laih gokkunu am uug ele, amge danab enub kuɗum ele, nug Kayaknu ɗo maɗoɗ ooppa gokkunu, amuam uug okkainab ele,” awa aum.

²⁶ Jesus anam a amu nuhikkud ippunittak awak danab ag dabmak kuɗum aona, ag akka akka appig. “Anam dayeb amu aun nug padal memanu ehanittak aokkunu elele?” aon appig.

²⁷ Aon aeg amu Jesus Nug tutukku neekkatta aum. “Danab ag akka elele iitta, amge Kayak Nug anam bia ii daatte. Kayak Nug keeke oh hekkunu elele,” awa aum.

²⁸ Jesus Nug anam a amu Pita nug aum. “Ig ihinig keeke oh uuta, na dim lamidttem,” awa aum.

²⁹ Awa a amu Jesus Nug ag amelagppa aum. “Da genab ag amelagppa attem. Danab laa nug dahilnu amu dahil Nai Enanu ele ha, nug anig, mameg, awakkud, amakkud, apakkud, appinkkud, nug wau, bekkod, aɗekkud, nug laug amu nuhig dad okkai ele uuatta, da dim lamiɗtte,

³⁰ nug wannu haen imuppa hamu ii daama. Iitta! Nug lag, awakkud, amakkud, apakkud, appinkkud, anikkud, nid naunau amu dad okkai ele tuɗitta, 100 baula aokku. Nug amu awebeb, laa ag ele nug eheɗ hettaglag. Laa ele amu, butti aɗi haen amu uɗieb, nug bauklel hanhannu aokku.

³¹ Amge danab kuɗum anuqak daatteb amu, ag dim daaglag. Am kuɗum laa ag dim daatteb amu, ag anuqkkulag,” awa aum.

Jesus Nug baula attem mauhkkunu aum

³² Amu ag Jerusalem gokkulagnu ibppa gonana, Jesus Nug anuqa ugekke, ippunittak awak danab ag ottaina dabmak kuɗum aonna, dim lamidppig. Danab laala Jesus dim lamidppig ele amu, ag ahilagppa aɗi bekkunu baɗanna, dim lamidna goppig. Anam gonana amu Jesus Nug nuhikkud ippunittak awak danab 12 diia, piɗe wana, nuhigppa keeke aɗi bekku amunu amelagppa inam aum.

³³ “Doyeg! Ig gemu iikku Jerusalem gottem. Gopput, laa nug Danab Bekkalag da, mana mettak danab okkai amu ɗo mehuqak danab ele ag eppelagppa meiɗeb, ag da hettoɗiakppa meiɗna, iuppeg mauhkkulnu nai qakkana, ag da iitta aɗi eppelagppa meiɗkkulag.

³⁴ Meiɗppeg, iitta aɗi ag aon aon iuna, hunu iuna, bu qaun eleppa eheɗ mataɗilna, iuppeg mauhppi, deɗ ewam uueb amu da eɗuen hippaidkkul,” awa aum.

Jems, Jon ele okkai daaglahnu Jesus oɗ medapiɗ

³⁵ Amu dimppa Sebedi bekoɗ Jems, Jon ele, aa Jesus gumidya goya apiɗ. “Ippunittak danab, na ihinihnu keeke laa hekkutnu oonih daatte,” aoya apiɗ.

³⁶ Anam aeh amu Jesus Nug oɗ matom. “Da ahilahnu aɗi hekkulnu oolah daatte?” awa aum.

³⁷ Awa a amu aa apiɗ. “I oonih inam daatte. Dimppa na okkai daanna, wan imu oh gumanna, na appe, i amu na heqon laih laih daagnih. Laa na heqon naɗiap-ppa dayebeb, laa na heqon nanehppa daakku,” aoya apiɗ.

³⁸ Aa anam aeh amu Jesus Nug aa amelahppa aum. “Aa attep amu, aa keeke amunu tutukku ii doottep. Keeke laa le mua ele bia da lakkul amu, aa amubia lakkulahnu elelete? Layattak uug nau ele da aokkul amu, aa layattak amu aoglahnu elelete?” awa aum.

³⁹ Nug anam a amu, aa Nug amegppa apiɗ. “I am elele,” aoya apiɗ. Aa anam aeh amu Jesus Nug aum. “Genab, le mua ele da lakkul amu, aa lakkulah. Layattak uug nau ele da aokkul amu, aa layattak amu ele aoglah,

⁴⁰ amge aun nug da heqol naɗiap-ppa daakku, aun nug da heqol nanehppa daakku amu, da akkulnu elele iitta. Da Mamel Nug aben aɗit amu aunnu babaittom amu, aa aakkuib amuppa daaglah,” awa aum.

⁴¹ Jesus, Jems, Jon ele ag anam mattiegeg amu, ippunittak awak danab eblaih tanig ele laa ag doona, ag Jems, Jon ele, ahilahnu oolag nauhom.

⁴² Oolag nauhe amu Jesus Nug ag oh onilagppa e, gumidna doeg, Nug ag amelagppa aum. “Ag dootteb, wan imuppan iitta aɗi danab ah ag danab okkai waalagppanab daatteb, amu okkai danab ag ɗo aɗi metteb, danab ah ag amuib dim lamidtteb.

⁴³ Amge kobol amu ag oolagppa aib dayom. Iitta. Danab nug ag oolagppa okkai daakkunu oo dayeb, nug ahilag maɗi nid dayaɗ!

⁴⁴ Amu ele danab laa nug ag oolagppa anuqak daakkunu oo dayeb, nug ag oh, ahilag begbeg maɗi nid dayaɗ!

⁴⁵ Ag anam hekkulagnu diig amu Danab Bekkalag da, da wan imuppanu danab ah ag da ehaniɗkkulagnu ii uɗimi. Iitta! Da ag ehanadkkulnu uɗimi, amu da dahil mauhakppa danab ah kuɗum eɗue diiadkkulnu ele uɗimi,” awa aum.

Jesus he, Batimias eɗua neegkkunu elele dayom

⁴⁶ Ag ibppa gona, Jeriko appa tena, Jesus Nug nuhikkud ippunittak awak danab amu danab ah laala kuɗumnab ele ag Jeriko eɗidna ukkaegeg, Timeus bekka Bartimeus, nug ameg gaɗuak amu, nug appa ib daugppa heɗep na dayaya, danab men doɗo keeke mettaglagnu unuqadttom.

⁴⁷ Nug unuqatta dayaya, haen nug, “Nasaret ted Jesus uɗitte,” doya, nug huanak ewa aum. “Dawit bekka Jesus, na dahilnu oot gai-iitta doon oot meɗan ehaniɗe!” ewa aum.

⁴⁸ Nug anam eewo amu danab laala kuɗum ag aidna appig. “Na oɗen qamute!” aon appig, amge nug nai amu ii doya, baula huanaknab ewa aum. “Dawit bekka, na dahilnu oot gai-iitta doon oot meɗan ehaniɗe!” ewa aum.

⁴⁹ Nug anam eewo, Jesus Nug doya amu Nug baeg ya, hibaitta dayaya, danab ah amelagppa aum. “Ag onigppa eppeg doaɗ!” awa aum. Nug anam a amu ag danab ameg gaɗuak ele amegppa appig. “Na oot gamag ahaɗ! Na Nug gumidna gokkutnu aum amunu na ahan wa!” aon appig.

⁵⁰ Ag anam aeg, nug doya, nug lamen ulahnu uɗa buɗie ukke, nug paha aha, Jesus gumitta waum.

⁵¹ Nug gumitta wa amu, Jesus nug oɗ mettom. “Da nahipnu aɗi hekkulnu oot daatte?” awa aum. Awa a amu nug aum. “Ippunittak danab, na heppe, da neegkkulnu ool daatte,” awa aum.

⁵² Danab nug anam a amu Jesus Nug aum. “Na dahilnu ootppa genab doome amunu, na ena daattem,” awa aum. Nug anam a amu, geha aakkunab danab amu ameg obate, neekka aha, ibppa Jesus dim lamittom.