Maika 7 - Nobonob Baibel

Maika nug danab ah dilagnu hipunin haknu uug doyaya maditte

¹ Da oolppa uug naunab, guittak bia, doottem! Aɗinu? Da am danab aam haenppan ad fig meu aotte bia daattem. Da ad fig meu tatam oɗutte laa awatte lalomnu ool okkai daatte, amge gemu meu amu laa ii daatte amunu, da ii lattem. Ao, da am uɗat nid grep meu laippu laippu uuppig daaegeg aotte bia daattem. Da grep meu aɗa auta awak laa awe lalomnu ool daatte, amge meu amu laa ii daatte amunu, da ii lattem.

² ⌊Da amubia doottemnu diig am,⌋ laa ag heeg, genab tutukku hak danab ag wan imuppa laa iinab daatte. Ge, genab tutukku hak danab laippu laa wan imuppa ii daatte. Danab oh ag lailkad aqappeg mauhkkulagnu ib mattin oitteb. Ao, ag danab nug ai uhuippa awa aqakkunu hette, ag amubia ag lailkad duulag okkulagnu hetteb.

³ Wan imuppan danab ag eppelag laih laih ohppa eheɗ hekkulagnu doon autna aotteb. Danab okkai ag laa ag ag lokkumakppa eheɗ haknu ehanittak madappeg, ib amuppaib ag ehanadkkulagnu atteb. Ao, epeɗiak danab ag lokkumakppa eheɗ haknu ehanittak aon, ag laa ehanittak amu mettom amegppa, “Na am tutukku heme; na eheɗ laa ii heme,” hambuppun atteb. Genab, danab ag ɠagattag okkai ele ag aɗi keeke aoglagnu oolag hette, ag aoglagnu anan heeg ukke, aakku aotteb. Danab okkai amu oh ag eheɗ anam hekkulagnu nai qakkan oitteb.

⁴ Danab amu oolagppanu laa, nug laa oh naunab hetteb bia ii hette, nug nakok ena hette; nug anam daatte, amge nug ele am nau, uud keeke qaun ele bia. Ao, danab amu oolagppanu laa nug danab nakok ena bia daatte, amge nug ele am nau, aɗ keeke qaun ele eppak, amubia daatte. Amu ahilag bu awaknu deɗ, ahilag gumak danab tutukku, ag appig bia, deɗ amu aakku paha uɗitte. Ao, deɗ Kayak Nug ag bu madakku amu, deɗ amu aakku uɗiom daatte. Gemu am ahilag kaaka aqeb oiyak haen.

^5-6 Nid danab nug mameg awa awa qedatte. Ah aɗeg nug anig ele dabmak laippu iitta, aɗeg nug anig ele aa oolah laippu iitta daattep. Ahipa bau nug ahipa kaino ele dabmak laippu iitta, ahipa bau nug ahipa kaino ele aa oolah laippu iitta daattep. Danabnu kekeɗ ag nug baekkudppan danab ah daatteb amunu, ag ahilag mudippan laippu laanu aib oolagppa genab doon, “Nug dahilppanu eheɗ laa ii hema,” aib dabmeppig. Ao, laa nug layagnu, “Nug am da layal, nug da ehaniɗkku,” aib dabmeum. Na waat ele nai mattiglah dayeb, o na gamut ele nai mattiglah dayeb amu, na tutukku dabmenana madikkut; hamu hamu dabmak iitta eleppa aib mattime.

⁷ Amge da amu, da Yawe Nug da ehaniɗkkunu dabmak aɗe oittem. Da Kayak, Nug padal mepanu ehanittak dahil daatte, da Nug ameg mettem. Dahil Kayak Nug dahil unuqittak dookku.

Israel na qeum, amge eɗua ahakku

⁸ ⌊Israel danab ah ag dimppa inam akkulag.⌋ “O ihinkad kekeɗ, ag ig neta qemutnu aib oolag gamag aheb, aon aon iqappig. Aɗinu? Ig neta qemut, amge ig eɗut ahagnig. Ao, ig gemu gatatu ooppa uug ele daattem, amge Yawe Nug amahlak mekkeb, ig amahlakppa eɗut daagnig,” aon akkulag.

⁹ Ig Yawe noobppa hipunin hemut amunu, ig nuhig bu mekkak aottem. Ig bu mekkak amu aopput ukkeb, Yawe Nug eɗua ehanikkebeb, haen amuppa iitta mekku. Iitta meeb, ig eɗut, ena daagnig. Ao, haen amuppa Nug heeb, ig eɗut amahlakppa daagnig. Haen amuppa amu ig eɗut, Yawe Nug genab tutukku daatte, anam ele hette amu, ig amu anidkkunig.

¹⁰ Yawe Nug anam heeb, ihinkad kekeɗ ag anidna, ag uɗa nak naunab nau dooglag. Ao, laa ag ig amenigppa, “Yawe, Nug am ahilag Kayak, Nug adeppa daatte?” appig ele amu, ag uɗa nak anam dooglag. Ag anam nena qekkulag, ig amenigppanab ahilag na qak anidkkunig. Ao, haen amuppa Yawe Nug heeb, danab lekkoh tappa gotte, amubia danab ag ihinkad kekeɗ baelagppa tappaladna oiglag.

¹¹ ⌊Uug okkai ag Israel, ahilkad kekeɗ dilagppa anam bekku, amge⌋ ag Israel danab ah ag aab okkainu aɗ hekkulagnu haen uɗitte. Ao, ag heppeg, wan ahilag okkai mekkunu haen aakku uɗikku.

¹² Haen amuppa amu, Asiria danab, Isip aab okkaippan danab ele ag ⌊binalag mattaglagnu⌋ ag Israel, ahilagppa uɗiglag. Ge ag Isipnu ukka, le onig Yupretis batak, laih amu oh, appanu uɗiglag. Ag le naɗi laih daatte ukka, le okkai laih daatte amu, ag wan laih amu ohppanu uɗiglag. Ag qauko okkai ukka, qauko okkai laa ele gamagppanu uɗiglag.

¹³ Anam amge, wan laa oh hele-ettak daaglag. Aɗinu? Danab ah appa ana daatteb ele amu, ag ahilag hak am nau.

Yawe Nug Israel dilagnu oo bodoetta le mette

¹⁴ O Yawe, sipsip gumak danab nug dudqak hokkat nuhigppa nuhikkud sipsip gumadtte, amubia na nahipad danab ah gumadkkutnu ool daatte. Nahipad danab ah ag am sipsip nahipad, na aut bia daatteb. Ag sipsip piɗe atuppa daattebbia daatteb, amge atu amu oh daug daug amu, wan gikkiɗah enanag ele daatte amunu, na heppe, ag wan ena Basan, am wan ena laa Gileat, ag aguppa, anukka daan oittappig bia hekkulagnu oɗ medattem.

¹⁵ Am Yawe Nug atte. “Haen ag alalkad ag Isip wanppanu ahan, Kanan wanppa uɗiegeg, da hei, ag kobol danab haknu elele iitta kuɗum anadppig, amubia da heppi, ag gemu daatteb, ag baula dahil hak amubia anadkkulag.”

¹⁶ Yawe Nug wanppanu wan ohppan danab hatteb, ahilag ɠagattag iitta meeb, ag Yawenu hak ɠagattag ele anidna, ag uɗa nak nau dooglag. Ag nai baula mattimnanu ag oɗelkad qamutna, ag dabmak huanak aoglag.

¹⁷ Ag uɗa nak doon, ag mat gappud hoɗutte bia hekkulag. Ao, ag doɗ digdig ag oolagppa wanppa oinna, gappud latteb, ag uɗa nak doon, ag amubia hekkulag. Ag eheɗ baɗan, hahaɗna, ag ahilag teɗppanu dimittim uɗiglag. Ag baɗan, ag Yawe, Nug am ihinig Kayak, ag Nug dim lamidkkulagnu nuhigppa gokkulag. Ag ag Juda, ag ahilagnu ele baɗaglag.

¹⁸ O Yawe, aun am Kayak na bia laa daatte? Kayak aun laa nug nuhikkudnab oɗo yaak danab ah dilag hipunin uhuqa madatte; eheɗ hak ahilkad ele uhuqa madatte? Na haen oh oo nauhak nahip ii aɗattem. Iitta. Na oot gai-iitta doon oot mattan ehanadkkutnu enanagnab doottem.

¹⁹ Na am Kayak anam amunu, na baula ihinignu oot bodoetta, le mekku. Na ihinig hipunin tabappe nekkulag. Ao, na eheɗ hak ihinkad buɗiadppe, yu gamag unuqagnab ele, appa nokkulag.

²⁰ Na anukkanab ig mamenkad aɗi amelagppa ihinigppa aɗi hekkutnu nahip nai ɠagattag qena mattime amu, na Jakop buɗubppa aɗi hekkutnu ame amu, na anamib hekkut. Ao, na Abraham buɗub dilagnu oot gai-iitta doon oot mattan ehanadkkutnu ame amu, na anamib hekkut.