Maika 6 - Nobonob Baibel

Yawe Nug Israel dilagnu nai ele

¹ Ag Yawenu nai imu ⌊Nug da, Maika, da amelppa aum⌋ amu, ag doyeg! Nug atte. “Na ahan, da Israel danab ah naippa yaaladttem amu, na nai amu appe, qauko ag doyeg! Ao, na appe, qauko nakok da Israel danab ah naippa yaaladttem amu, na nai amu appe, ag doyeg!

² Qauko, ag Yawenu nai, Israel dilagnu doyeg! Ao, wan ukku, ag daulag human, ag Yawenu nai, Israel dilagnu ele doyeg! Aɗinu ag nai amu dooglag? Yawe Nug nuhikkud danab ah dilagnu nai ele. Ao, Nug nuhikkud danab ah dilagnu nai ele amu, Nug nai amu hettoɗiakppa mette.” Yawe Nug da Israel amelagppa anam akkulnu aum.

³ ⌊Amu Yawe Nug atte.⌋ “O danab ah dahilad, da ahilagnu aɗi eheɗ laa hemi? Da kobol eheɗ laa aɗi hei, ag bahilag yom? Ag oɗmak amunu nob mena meɗeg!

⁴ Aɗinu? Da Isipnu omalatti uɗippig. Ao, da Isip wanppanu, ag appa begbeg maɗi nid daappig amu, da appanu begbeg maɗi nid dayaknu qagaiettakppanu eɗua uhuqak hemi. Da amu heinne, da Moses ag noolag awa gokkunu mattami; Aron, Miriam ele.

⁵ O danab ah dahilad, ag da, da Yawe, ag da kobol genab tutukku ele hanhan hettem dooglagnu, ag Moap dilag king Balak, nug ag Israel eheɗ hadakkunu dabmeum ele amu, ag nuhig nai nau amu dabmenana, ag Beor bekka Balam nug aɗi nai eɗua, Balak amegppa aum amu, ag amu oh dabmenan dayeg! Laa amu, ag Israel, ag Sitim daanna, ag ahan, Jodan le mataɗna, Gilgal goppig amu, ag amu ele dabmenan dayeg!” Yawe Nug anam awa atte.

Yawe Nug danab ah attem hekkulagnu ippuanattom

⁶ Amge da Yawe noobppa ukken daakkulnu amu, da aɗi keeke awe wain medakkul? Ge, da Kayak, Nug am keeke oh ikkilag, da ukken Nug noobppa daakkulnu amu, da aɗi keeke ena awe wain, Nug noobppa gatel qaun oin, gomelen medakkul? Da Nug noobppa wakkulnu amu, da nuhig qaɗabppa manaknu ofa kuɗum manen medakkulte? Ge, da Nug noobppa wakkulnu amu, da makau gaiɗ maɗ laippu awak ele kuɗum nuhig qaɗabppa manen medakkulte?

⁷ Da sipsip dawai tausen gane awe wakkul amu, Yawe Nug amunu oo ena daakkute? O iitta, da goɗen huanaknab, le 10,000 nonana gotteb bia, da amu awe wakkul am, Nug amunu ena dookkute? O da nid ⌊danab⌋ naanaeg dahil qaɗab qakppa hipunin uhuqaknu mane, Yawe medakkul amu, Nug amunu oo ena daakkute? Ge, da beɗulppan nid awen, Yawe Nug eheɗ hak dahil heeb iitta mekkunu nid amu mane, Nug medakkulte?

⁸ Amu oh am iitta. Yawe Nug na aun daattem, Nug na kobol ena oh ippunitta malom. Nug na attem hekkutnu ippunittom? Amu inam; na nai doya mala hettoɗia epeɗia elele mettak kobol tutukku dim lamidna, na laa dilagnu oo gai-iitta doya oo metta ehanittak kobol ele hena, na nakka na onin qeppe neeb, na nahip Kayak, na Nug ele oiyeɗ! Nug na amu hekkutnu oo daatte.

Israel ag hipunin heppig amunu, Yawe Nug bu madakku

⁹ Danab nug Yawenu ebehi oh bodoetta le mette ele amu, danab amu nug am doyak dabmak ena ele amunu, ag Juda danab ah ag daulag human, Yawenu nai doyeg! Nug atte. “Ag dahil bu mettaknu dabmenan oinna, da ag bu madattem ele amu, ag dahilnu ele dabmettan dayeg!

¹⁰ Ag Juda danab ah ag nau hetteb ele, ag danab laa dilag keeke ib tutukku iittappa aon, ahilkad en daatte amu, da kobol ahilag amu hamu daul atikkunu dabmettebte? Ag melemel tutukku iitta, melemel amubianu da naunab nau doottem amu, ag melemel amuppa keeke meegeg daden metteb, am da kobol eheɗ amu ele hamu daul atikkunu dabmettebte?

¹¹ Danab nug skel tutukku iittappa daden mekkunu uɗat nuhig hette ele amu, da danab amu hettoɗiakppa, ‘Na eheɗ laa ii heme,’ akkulte? Ao, danab nug daden mak abenppa keeke laanu uug doyaknu keeke tutukku iittappa daden mekkunu uɗat nuhig hette ele amu, da danab amu hettoɗien, ‘Na nau ii heme,’ akkulte? ⌊Iittanab!⌋

¹² Juda danab enub ele, ag amu, ag am laa guittak nau, mauhnoak mettak tiigppa dayak danab. Juda danab ah laa ag am nai hambuppuak mattiak danab. Ge, ag oɗelagppa mattiak hambuppuak hetteb.

¹³ Diig amunu amu, da digmein hei, ag Juda, ag padal mekkulagnu oitteb. Ao, ag hipunin henan daatteb amunu, da hei, ag nauhkkulagnu oitteb.

¹⁴ Ag ee lakkulag, amge ag oolag ii aɗama. Ao, ag ee lakkulag, amge ag oolag ii dittima. Ag ee keeke qagmekkulag, amge da keeke amu ahilkad kekeɗ madakkul amunu, ag keeke amu ma lakka appa ana mekkulag, amge ag appanu eɗun ii aon lamana. Iitta. Kekeɗ ag aoglag.

¹⁵ Ag keeke eppaglag, amge ag meu ii aomna. Ag olip meu tappaglag, amge ag goɗen laa aon, beɗulagppa ii laidmana. Ag grep meu titiglag, amge ag wain aon, ii lamana.

¹⁶ Uug amu bekkunu diig am, ag Juda, ag Israel dilag king nau, Omri, ag nuhig ɗo dim lamidna, hipunin hetteb. Ao, ag Israel dilag king nau, Ahap, nug baekkudppa ele kobol ag aɗi aɗi heppig bia henana, Ahap aɗi ag kobol atten atten heppig amu, ag amu dim lamidna oitteb. Ag ahilag nai dim lamidtteb amunu, da laa ag heppeg nauhkkulagnu ippulag ii oo nepa. Da amu ii hepa amunu, wan laappan danab ah ag eheɗnab imadkkulag. Ao, wanppan wan oh dilag danab ah ag ahilagnu, ‘Keeke hamunab,’ dooglag,” awa atte.