Maika 4 - Nobonob Baibel

Yawenu qaukonu nai

¹ Qauko laa, Yawenu mettid lag qauko amuppa daatte amu, deɗ laa dimppa, Yawe Nug heeb, qauko amuam qauko laa oh eɗattak daakku. Ao, Yawe Nug heeb, qauko amuam qauko nakok laa oh eɗadkku. Eɗatteb amu, geha danab ah kuɗumnab huu anen anenppanu geha ag appa ⌊qagmekkulagnu⌋ uɗiglag.

² Danab ah wanppan wan kuɗumppanu ag ahan uɗin, akka akka mattin akkulag. “Yawe Nug nuhig ib ig ippunigkkunu, ig nuhig ib dim lamidkkunignu amu, doppeg, ig Yawenu qaukoppa tetu! Ao, ig Jakopnu Kayaknu mettid lag, ig amuppa gotu!” Ag anam aon akkulag. Aɗinu ag anam akkulag? Yawenu ɗo nai am Sion appanu aha, tuala gokku. Yo, Yawenu nai Jerusalem appanu aha gokku.

³ Nug geha huu digdignu danab ah dilag nai doya mala hettoɗia epeɗia elele medakku. Ao, Nug wanppan wan ɠagattag adeppa adeppa daatteb dilag nai bappaidkku. Nug anam hekku amu, wan ohppanu danab ag ahilkad qep elab aon heppeg, wan buuaknu aen laa daaglag. Ao, ag ahilkad ban lat amu heppeg, ad eppeg babaittaknu aen daaglag. Wan laappan danab ag ahappeg, wan laappan danab ele baula ban ii hemana. Ag ban hak sul ele baula ii hemana.

⁴ Danab anen anen oh ag maɗoɗ ele muɗi grep ahilkad logoppa daaglag. Ao, ag maɗoɗ ele, ahilkad ad fig waappa, logoppa daaglag. Ag anam maɗoɗ ele daappeg, laa heeb, ii baɗamna. Keeke amu oh anam daakkunu diig am, Yawe Nukka Ɠagattag Oh Ele Nug amu bekkunu ana malom.

⁵ Anam amunu, danab ah wan atu laih ohnu, ag ahilkad kayak hambuppuak onigppa oiglagnu oolag heeb, anam oiglag, amge ig Yawe, ihinig Kayak, ig Nug onigppa hanhan oignig.

Yawe Nug heeb, Israel danab ah ag wan laappanu ahan, ahilag wanppa eɗun uɗiglag

⁶ Yawe Nug atte. “Dimppa, deɗ laappa da danab bu mattami, ag danab autaut oitte bia, da ag qagmatten ⌊heppi, ag eɗun ahilag wanppa daaglag⌋. Ao, da danab ah kekeɗ ag diin gona, wan laappa diia ukka laih me dayak danab ah daaglagnu maatteg daatteb amu, da ag qagmaatten heppi, ag uɗin daaglag. Ge, da danab ah uug mattami ele, da ag qagmaadppi, ⌊ag eɗun wanelagppa daaglag⌋.

⁷ Da, Yawe, da heppi, danab ah da bu mattami ele, ag eɗun, huu digmen daaglagnu oɗo yaak danab ah daaglag. Ao, da heppi, danab ah kekeɗ ag diin gona, wan laappa diia ukka laih me dayak danab ah daaglagnu maatteg daatteb ele amu, ag eɗun, wan ahilagppa ɠagattag ele daaglag,” awa atte. Ag anam uɗin daappeg, Yawe Nug qauko Sion appa dayaya, hanhan danab ah amu gumadkku

⁸ Amu aab okkai Jerusalemnu amu, aab amuam lag attan ta ukkak menppa hak sipsip gumak danab nug aguppa ta, sipsip ena daaglagnu neegtte ele amubia daakku. Ao, Sion am ban haknu aben ɠagattag, Israel ag aguppa ena daaglagnu bia daakku. Aab am anambia daakku amu, Yawe Nug heeb, danab ah gumattaknu ehah Jerusalem appa king beɗuppa daakku. Ao, king Jerusalem appa ana daakku.

⁹ ⌊Israel danab ah⌋ aɗinu ag huan gaatteb? Ag king laa iitta amunute? ⌊Yo, diig amunu ag gaatteb.⌋ ⌊Israel danab ah⌋ aɗinu ag ah nid aokkun guittak dootte bia guittak dootteb? Ag ahilag ulum mettak danab ag oh mauhppig amunute ag anam dootteb? ⌊Yo, ag oh mauhppig.⌋

¹⁰ O Israel danab ah, kekeɗ ag heppeg, ag aab okkai ahilag uun, laih gona daaglagnu gonana, ag ib daugppa dad okkaippa haen tutu dayaknu aab nakok kalan daan, ahan gona, baula anamib henana gokkulag amunu, ag ah nid aokkun guittak nau doyaya, beɗu itoɗitte, ag amubia guittak doyeg! Kekeɗ ag heppeg, ag Babilon appa diia ukka laih me dayak danab ah daaglagnu gokkulag, amge Yawe Nug amunu qagaiettakppanu eɗua uhuqak ha madakku. Ao, Nug qagaiettakppanu ehanittak okkaippa uhuqatteb, ag ahilkad kekeɗ eppelkadppa ii daamna.

¹¹ Yawe Nug appanu eɗua diiadkku, amge gemu wanppan wan kuɗum dilag daup ag, ag Israel ele ban hekkulagnu qagmeppig daatteb. Ag atteb. “Ig ag eɗadta, ig ahilag na qaknu amu, ig oonig gamag ahak okkainab doognig,” aon atteb.

¹² Ag anam atteb amge, ag Yawenu dabmak ii dootteb. Ao, ag nuhig dabmaknu diignu doyak tutukku ii aɗatteb. Yawenu maittak am, Nug danab ee aeg mumuɗkkunu wit, bali keeke, gumu, ikki ele ehakka, ee aeg mumuɗaknu abenppa qagmette, amubia Yawe Nug ag Israel, ahilag kekeɗ mumuɗadkkunu aakku qagmeeb daaglag.

¹³ Amunu Yawe Nug atte. “O Juda danab ah, ag ahan, danab nug ee aeg mumuɗtte, amubia ag kekeɗ ahilkad mumuɗatteg! Aɗinu? Ag amu hekkulagnu amu, da heppi, ag makau dawai qeqeɗi aenppa hak, baeg brasppa hak ele bia daan, ag wanppan wan kuɗum dilag daup eɗadna heppeg, mumuɗak haenppa wit keeke gumu heeg, huppu huppu nette, amubia ahilag kekeɗ ag nauhna autna aoglag.” Yawe Nug anam atte. Ag amu hewona amu, ag wan amu dilag danab ah dilag keeke, ag keeke amu ib pehettak iittappa aoppig ele amu, ag keeke amu aon, Yawe eppegppa mekkulag. Ao, wan amu dilag en amu, ag aon, Yawe, Nug am Naɗi, wan atu oh gumadtte ele, ag en amu aon, Nug mettaglag.