Maika 2 - Nobonob Baibel

Danab dilag maittak, amu Kayaknu maittak ele

¹ Danab ag hipunin hekkulagnu maittak aotteb, ahilagnu am gadonnab gadon. Ao, ag abenppa niina, ag eheɗ hekkulagnu dabmakppa ib maditteb, ahilagnu am gadonnab gadon. Ag keeke hekkulagnu ɠagattag ele amunu, ag tuqan eheɗ hekkulagnu dabmenana, wagɗe buttua ag ahan, eheɗ amu hetteb.

² Danab amu, ag laa dilag wan amelag qe aolobnab dabmak eheɗ aon, ag wagai menan aotteb. Ao, danab amu, ag laanu lag amelag qe, wagai menan aotteb. Ag hambuppuak kobol, ib eheɗ amuppa danab laanu lag hamu aotteb. Ao, ag lailkad dilag aulkad, ag keeke amu ib eheɗppaib hamu aotteb.

³ Ag amu hetteb amunu, Yawe Nug inam atte. “Da heppi, ag amu hetteb ele, ahilagppa uug naunab ag qaɗelagppa nekkunu, da dabmettem. Uug amu ag eɗidkkulagnu ib iinab anidmana; iitta. Uug amuam keeke oh he nauhaknu uug amunu, uug amu beeb, ag danab ah amu hetteb ele, ag baula dada danab ah daanna, ii oimna.

⁴ Da hekkul, deɗ amuppa danab laala ⌊ag Israel danab ah daatteb bia ippu hak hena⌋, ag ag aon aon aqaglag. Ao, ag ag aon aon aqana, ag ahi oo doyak naunab ele inam ettaglag. ‘Ig Israel, ig padal meta autta auttanab aomut. Kekeɗ ag ihinkad keeke oppatna aon, ahilag aɗatteb. Yawe Nug he, ihinig keeke ig eppenigppa ii daatte. Nug wan ihinkad, kekeɗ ihinkad eppelagppa meum.’ Ag ahi ettan, anam akkulag.” Yawe Nug anam atte.

⁵ Uug anam bekku amunu, ag eheɗ hak danab, ag Yawenu danab ah oolagppa daatteb amu, Yawe heeb, wan maha laa ag eppelagppa baula ii daama. Iitta.

Laa Maikanu nai doon, ag aidppig

⁶ Laa da, Maika, ag dahilnu atteb. “Na propet nai aib mattime! Na dimppa aɗi bekkunu nai aib mattime! Uug amu bekku am, uɗa nak nau guittak ele megakku, amge uug amuam ii bema,” aon atteb.

⁷ ⌊Amge,⌋ O Israel danab ah, danab laa nug inam akkutai. “Yawenu Ouɗi Nug ihinignu oo nauhom daattete? ⌊Iitta!⌋ Genab, nai uug ele ihinignu amu, Nug anam he anidttemte? ⌊Iitta!⌋” Laa anam akkutai, amge nug anam akku dayeb am, nug ena akkute? Iitta! Am ena iitta. Amu Yawe Nug inam atte. “Danab genab tutukku hak kobol dim lamidtte ele, nuhignu amu, nai dahil nug ehanidtte,

⁸ ⌊amge⌋ dahilad danab ag tumai bia digmen ahan, dahil kekeɗ bia daan hetteb. Ag hak ahilag am inam. Ban danab ag banppanu eɗun uɗin, ibppa danab ah ag uug laa bekkunu ii dabmena oiyegeg, amu dilag keeke wagai mena, yab aotteb amu, ag amubia hetteb.

⁹ Ag eheɗ hetteb ele amu, ag danab ag doɗ lamittak bia heeg, danab ah dahilad oolagppan ah ag laulkad enappa ii daatteb. Ao, ag heeg, ah amu dilag nid naunau ag ena daalobnu keeke, ag aulag, ag amu ag anilkad eppelagppanu aolob amu, nid naunau ag keeke amu gemu, butti aɗi ele ii aomna.

¹⁰ Ag nau amu hetteb amunu, ag ahan, wan imu uun ukkeg! Wan imuam ag ahilag aben hik aon daaglagnu iitta. Aɗinu? Ag heeg, wan ag daattebppa imu, am Kayaknu neekkakppa dubuttid tak ele daatte. Ao, ag heeg, wan ag daattebppa imuam nauha autanab awom daatte; babaittaknu elele iitta.

¹¹ Propet danab nau laa, nug hambuppuak danab nug uɗia, ‘Da dimppa aɗi bekkunu nai ainne, ag le ɠagattag aon lanan, oo gamag ahakib dooglagnu ippu ippunadppi doon dim lamidkkulagnu uɗie hettem,’ akku dayeb amu, nug am propet danab ahilagnu elelenab.” Yawe Nug anam atte.

Yawe Nug Juda danab ah ehanadkku

¹² Yawe Nug tuɗitta atte. “O Jakop buɗub, genab da ⌊ag bu madakkul, amge dimppa da⌋ ag oh qagmaadppi, ag eɗun daaglag. Ao, da genab heppi, Israel danab ah ag oɗo yaak daaglag amu, ag eɗun laippu daaglag. Da am sipsip gumak danab sipsip aɗ ooppa qagmaadtte bia, da Israel danab ah qagmaadkkul. Ao, sipsip gumak danab nug gikkiɗah dad okkai sipsip gikkiɗah lattebppa, nug appa qagmaadtte bia, da Israel danab ah qagmaadkkul. Da anam heppi, ⌊dahilad⌋ danab ah ag appatppeg, wan imu ambak daakku.

¹³ Amu laa nug he, aabnu aɗppa ib matulak daatte amu, nug heeb, giɗo dayeb, Nug noa anuqa ukkebeb, dahilad danab ah ag heppeg, giɗo okkainab, aɗnu od bia, aɗppa dayebeb, ag oh dimittim uɗiglag. Ahilag king nug ag noolagppa anuqa gokku. Ao, da Yawe, da ag noolag awe gokkul,” Yawe Nug anam awa atte.