Maika 1 - Nobonob Baibel

¹ Juda wanppa, haen Jotam, Ahas, Hesekaia ele ag king daappig, haen ag king daappigppa Yawe Nug Maika, Moreset ted, Nug nug nai imu mettom. Maika nug Samaria, Jerusalem ele dilahnu tulegleg imu anttom.

Yawe Nug Samaria, Jerusalem ele uug matakku

² Naɗi Yawe, Nug ⌊Israel⌋ ag eheɗ heppignu ab dooglagnu, Naɗi Nug nuhig mettid lag nuhignu tituanak daatte, Nug appanu ⌊Israel ag eheɗ heppig⌋ ab ag dooglagnu, ag danab ah wan ohppa daatteb, ag doyeg! Ao, ag danab ah ag laih laih ohppa daatteb amu, ag oh daulag humeg!

³ Aɗinu? Antteg! Yawe Nug nuhig dayak abenppanu uɗitte. Ao, Nug nuhig aben uua, wanppa na, qauko igippa tappa oitte.

⁴ Le qaukoppanu huan nette, amubia Yawe Nug qauko igippa oiyeye, qauko ag le mena netteb. Ao, danab uppuh biig aab aɗu guguittak me, laih le me, laih amuam oolnu noak bia daatte, amubia oolnu noak Nug noobppa betteb.

⁵ Yawe Nug oo nauhe uɗittenu diig am, Jakop buɗub ag hipunin henan heeg uɗie, gemu ele hetteb. Ao, Israel danab ah ag hipunin henan ii uuppig daatteb. Amu aun beɗuppa Jakop buɗub ag Yawe uuidna, kayak hambuppuak dim lamadtteb? Amuam ag ahilag aab okkai Samaria aakku. Amu Juda danab ah kayak hambuppuak noolagppa dup nona binalag metteb ele amu, amu hak naunu aab diig am adekku? Amuam ag ahilag aab okkai Jerusalem aakku.

⁶ Am Yawe Nug inam atte. “Eheɗ hak am anam daatte amunu, da heppi, ⌊kekeɗ⌋ laa ag heppeg, Samaria am kinipan ameg okkai hume tak daakku. Ao, aab dayom abenppa am muɗi grep eppaknu aben daakku. Da heppi, ag aabnu men amu oh ehalppeg, oolnu noakppa gokku. Ao, da heppi, aab okkai Samaria, nuhig men ukku ele miagib daakku.

⁷ Da heppi, ⌊kekeɗ ag⌋ kayak hambuppuak dottolkad Samaria daatteb oh ag aoɗadppeg nauhkkulag. Ao, keeke ena ena danab ah ag aon, kayak hambuppuak laulkad gumak danab ah mattaegeg, ag keeke amuppa kayak hambuppuak laulkad bala madatteb amu, da heppi, kekeɗ ag keeke amu oh aab aɗuppa maiglag Da heppi, kayak hambuppuak dottolkad oh heppeg nauhna autna aoglag. Ib baag ah nug kobol eheɗ nuhig haaha, men doɗo awe, yab danab uɗia, nuhig keeke oh yab awa ukka, ib baag ah laa antta, men doɗo amuppa he, ib baag ah amu ele niittep, amubia Israel dilagppa bekku. Israel ag eheɗ henana, kayak hambuppuak dim lamadna, keeke ena aon daan, kayak hambuppuak laulkad danab ah madatteb amunu, kekeɗ ag uɗin, keeke ena ⌊mana, ii iitta meum ele⌋ amu, ag diin gona, ag ahilkad kayak hambuppuak keeke ena amuppa ehanadkkulag,” awa atte.

Maika nug uug doyom

⁸ ⌊Samaria uug amu aweb, Jerusalem ele uug amuib aokku,⌋ diig amunu da gayeye, mahiak okkainab ele hekkul. Ao, da baeg gaɗa ii mepa, dimittimnu lamen ele ii tagapa, amge da anam oikkul. Doɗ jakal, nug eheɗ gaatte bia, da gaakkul. Ao, hipunai, nug gayak aiqakkak bia gaatte, amubia da gaakkul.

⁹ Aɗinu da anam gaakkul? Samaria nug guittak okkai awom; eɗua ena daakkunu elele iitta. Ao, guittak amu Juda ele aokkunu miag doum daatte. Dahilad danab ah dilag wannu odppanab uɗiom daatte. Am Jerusalem aabppanab beum, aakku daatte.

¹⁰ Anam, amge ⌊ihinig kekeɗ doon imigmananu ag Pilistia dilag aab okkai onig⌋ Gat, ag appa aib appeg dooppig. Gat danab ag ag Israel ag uug aqeb gaaglag aib anadppig. Amge Bet Leapra appa ag uug doon, wan gappudppa daan, beɗulag itoɗieg!

¹¹ Danab ah Sapir daatteb ele ag amu, ag lamen iitta, uɗa nak ele wan laappa ⌊appa diia ukka laih me dayak danab ah daaglagnu⌋ ukkeg! Danab ah Sanan daatteb ele amu, ag ⌊lailkad ehanadkkulagnu⌋ aab dimittim uɗiglagnu elele ii doon, aab ooppaib daatteb. Danab ah Betesel daatteb ele, kekeɗ ag heeg, ahilag aab am nauha autanab awom amunu, ag uug naunab nau aon, gaanna daatteb.

¹² Danab ah Marot daatteb, ag uug naunab nau Yawe eppegppanu Jerusalem aɗnu odppanab uɗiom daatte anidtteb amunu, ehanittak aoglagnu dabmenana, tappaɗidnan daanna, ii anidna, ag guittak okkainab doon, beɗulag itoɗitte.

¹³ Israel danab ah ag hipunin heppig, hipunin amuib ag Lakis daatteb, ag beɗulagppa ba dayom amunu, ag heeg, Juda danab ah laa ag digmena, hipunin heppig. Anam amunu, ag Lakis danab, ag karis diiadna, hos amu eeɗadkkulagnu qakkalatteg!

¹⁴ Ag heppig amunu, ag ⌊wan laappa diia ukka laih me dayak danab ah daaglagnu⌋ gonana, danab ah Moreset Get daatteb, ag keeke ahilag daaglagnu hamu mattaglag. Israel dilag king ag aab Aksipnu, “Ag heppeg, kekeɗ ag ii eɗadmana,” atteb, amge iitta, ag eɗadna uɗiglag.

¹⁵ Yawe atte. “Da heppi, ban danab laa, nuhikkud daup ele uɗin, ag danab ah Maresa daatteb, ag ag eɗadkkulag. Eɗadppeg, Israel dilag king nug oola ukka, moɗ okkai laa onig Adulam, appa lokkumkkunu hekku.

¹⁶ ⌊O gadon,⌋ ag Israel, ag ahilkad nid naunau, ahilagnu ag enanagnab dootteb, amge ag nid ahilkad dilagnu oolagppa uug naunab nau doon, ag mahina, aakku ikkilag uɗug ohnab otaɗatteg! Ao, ag uug naunab doon, ag mahin, ikkilkad uɗug oh otaɗna aon, ag ai walsa igippa uɗig laa iitta, ag amubia dayeg! Aɗinu? Kekeɗ ag nid naunau ahilkad diin gona, ag wan laappa diia ukka laih me dayak danab ah daaglagnu maadppeg daaglag,” awa atte.