Luk 9 - Nobonob Baibel

Jesus ippunittak awak danab 12 uɗat mattom

¹ Jesus Nug ippunittak awak danab 12 onilagppa e uɗieg, Nug ag ouɗi nau oh lamadna, oɗe digdignu ele heppeg iitta mekkulagnu ɠagattag matta,

² ag gona, Kayaknu ɗo maɗoɗnu nai mehuqnana, danab oɗe ele heppeg ena daaglagnu maatte goppig.

³ Ag amu hekkulagnu Nug ag amelagppa aum. “Ag oiyaknu keeke, amuam dudqak hokkat, oiyaknu battam, ee, men doɗo ele, aon aib oippig. Aria, ag lamen nakok elab aɗit ele aib aon goppig.

⁴ Ag gona, aab laappa ⌊teppeg, appan danab ag diiadna, laa laugppa maadppeg,⌋ ag lag amuppaib daanna, ukkaknu haen beeb, ag aab amuppanu ahan ukkeg!

⁵ Amu danab ag ag ele laippu dayaknu oolagppa eleleib ii dootteb dayeb, haen ag aab amu uunna, aab amuppan danab ag eheɗ heppig dooglagnu ag baelkadppanu gappud heppeg naɗ!” awa aum.

⁶ Anam a amu ippunittak awak danab ag ahan, aabaab gona, Nai Ena mehuqnana, oɗe danab atu ohppanu ele heeg, ena daappig.

⁷ Aria, Herot Antipas nug Galili wan guma dayeye, Jesus Nug nuhig uɗat heehe, Herot nug uɗat oh Jesus heumnu doya, nug dabmak kuɗum awom. Aɗinu? Danab laala ag, “Herot nug Layattak Jon baag otaɗom, amge Layattak Jon nug eɗua hibaitta oitte,” aegeg doyom.

⁸ Ag anam aegeg am laala ag, “Nug am Elaiya eɗua ihinigppa uɗiom,” aegeg, laala ag, “Nug propet anukkanu laa eɗua hibaittom,” aon appig.

⁹ Ag anam aeg am Herot anam doya, nug aum. “Genab da Layattak Jon baag otaɗmi, amge danab umu Nug am aun, ag nuhignu nai amu anam atteb?” awa aum. Awa anana nug Jesus anidkkunu heum.

Jesus danab 5,000 ee mattom

¹⁰ Aria, deɗ laa totol danab 12 ag eɗun uɗin, Jesus amegppa, ag gona keeke oh heppig amunu aeg doya, Nug aha omalatte, aab laa Betsaida, amuppa akka goppig.

¹¹ Ukkaeg dimppa, danab ah kuɗumnab ag amu doon, ag dim lamidna gona, gumidna waeg, Jesus Nug ag ele laippu dayaknu ooppa eleleib doya, Nug Kayaknu ɗo maɗoɗnu nai amelagppa mehuqaqa, oɗe danab amu he ena daappig.

¹² Deɗ amu tueb, aam noono, nuhikkud ippunittak awak danab 12 ag Jesus gumidna dona appig. “Na appe, danab ah ag ee, niiak aben ele anidna aon daaglagnu ag aab nakok, danab laulkadppa ele aben imu taliliadna daatteb, ag amuppa ukkeg! Aɗinu? Aben ig daattem imuppa amu danab ag ii daatteb,” aon appig.

¹³ Aon appig amge Jesus Nug amelagppa aum. “Ag ee madappeg laig!” awa aum. A amu ag appig. “Ig ee kuɗum iitta. Bret kunum tanig ele, kakai aɗit eleib daatteb. Am na oot attem daatte? Ig gota, danab ah ameg imu oh dilag ee daden mekkunigte?” aon appig.

¹⁴ Ag anam aeg amu Jesus Nug nuhikkud ippunittak awak danab 12 amelagppa aum. “Ag danab ah heppeg, ameg ameg ebqak anen anen 50 keeke, anam dayeg!” awa aum. Danab ag appa daappig am 5,000 anam.

¹⁵ Amu Jesus aum bia ippunittak awak danab ag anam heegeg, danab ah ag daappig.

¹⁶ Daaegeg, Jesus Nug bret tanig ele, kakai aɗit amu ele diia aɗa, Nug hab attan neekkakka, Kayak amegppa, “Ena hen mekkame,” awa aum. Anam hewowa amu, Nug pane ne, ippunittak awak danab ag aon panin, danab ah mattaglagnu matte, ag danab ah madappig.

¹⁷ Mattaeg, danab ah oh ag laeg, oolag dittie, ee big dayom amu ippunittak awak danab ag aon, kaleg 12 inaeg ambeum.

Pita nug Jesus am Kristus miag atia aum

¹⁸ Deɗ laa Jesus Nug nukka dayaya unuqittatta dayeye, nuhikkud ippunittak awak danab ag gumidna ukkaeg, Nug oɗ matta aum. “Danab ag dahilnu, ‘Da am aun,’ ag amunu aɗi atteb?” awa aum?

¹⁹ A amu ag appig. “Laa ag nahipnu, ‘Layattak Jon,’ atteb amge laa ag, ‘Nug am Elaiya,’ atteb. Aria, laa ag nahipnu, ‘Nug am Kayaknu propet anukkanu laa eɗua hibaittom,’ aon atteb,” appig.

²⁰ Nuhig ippunittak awak danab ag anam aeg amu, Jesus eɗua ag oɗ mattom. “Anam aakku amge ag akka, ag dahilnu aɗi atteb?” awa aum. A amu Pita nug aum. “Na am Kristus; Kayak meitte uɗime!” awa aum.

²¹ Pita nug anam a amu, Jesus Nug ag danab laa amelagppa nai amu mattimnanu ɗo ɠagattag meum.

²² Anam amu, Jesus Nug aum. “Da, Danab Bekkalag, da ib laa iitta, da guittak kuɗum dookkul, Juda dilag ikki danab, mana mettak danab okkai amu ɗo mehuqak danab ele ag geɗilna, ag ⌊heppeg, laa ag⌋ iuppeg mauhkkul, deɗ ewam uueb Kayak heeb, da eɗua hippaidkkul,” awa aum.

²³ Anam ana amu Nug nuhikkud ippunittak awak danab oh amelagppa aum. “Laa nug da dim lamiɗkkunu oo dayeb amu, nug nuhig dabmak dim lamidkkunu dab-iinab-mema, nug nuhig ad emaitak deɗ oh mawa, da dim lamiɗaɗ!

²⁴ Aɗinu? Danab laa nug wanppanu bau daakkunu dabmak anuqak aotte amu, dimppa nug bauklel hanhannu ii aoma, amge laa nug dahilnu anuqak dootte, nug wanppan bau dayaknu anuqak ii dootte amu, nug am bauklel hanhannu aokku.

²⁵ Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku?

²⁶ Amu danab nug dahilnu, dahil nainu ele uɗa neeb, dimppa Danab Bekkalag da, da dahil binag amahlak oppiaawak ele, Kayaknu binag amahlak oppiaawak ele, amu nuhikkud engel oppiaawak ele dilag binag amahlak oppiaawak eleppa eɗue uɗikkul, haen amuppa danab amunu da ele uɗal nekku,” awa aum.

²⁷ Jesus Nug anam ana, Nug nai baula tuɗitta aum. “Da genab ag amelagppa attem. Danab laala gemu ippa hippaidna daatteb ele, ag paha ii mauhmana. Iitta. Tatam ag Kayaknu ɗo maɗoɗ beeb anidna mauhkkulag,” awa aum.

Jesus beɗu eɗuom

²⁸ Amu Jesus Nug nai amu mattie, dimppa deɗ eblaih ewam keeke anam uue amu Jesus Nug unuqidkkunu, Pita, Jon amu Jems ele omalatte, qaukoppa teppig.

²⁹ Tena unuqittatta dayeye amu, Nug iɗu eɗuom. Nuhig lamen amu eɗua, hakkabnab dittiag apinak bia dayom.

³⁰ Jesus Nug anam dayeye, danab aɗit laa, Moses Elaiya ele,

³¹ aa tulai doeh, Nug ele nai madippig. Danab aɗit aa Kayaknu binag amahlak oppiaawak ele beeh, Jesus Nug Jerusalem appa Kayak uɗat mettom amu hewowa, wan imu uua gokku, ag amunu nai madippig.

³² Jesus Nug Moses Elaiya ele nai mattiegeg am Pita nug laikuɗ ele ag amelag uug mette, niiglagnu heppig amge ag niin autna ii aoppig. Iitta. Ag anam daaeg ukke, amelag eɗua obate, ag Jesus binag amahlak oppiaawak ele, amu danab aɗit aa Jesus ele hippaidna daaegeg am anadppig.

³³ Moses Elaiya ele aa Jesus uuitteheh, Pita nug Jesus amegppa aum. “Ippunittak danab, ig aben imuppa daagnignu am enanag amunu na appe, ig peh ewam buugnig; nahip laippu, Mosesnu laippu, Elaiyanu laippu ele,” awa aum. Pita nug nai aum amu, nug diig tutukku ii doyaya aum.

³⁴ Pita nug anam aawo amu, lombig laa tonattette, ag baɗappig.

³⁵ Baɗaegeg, lombig ooppanu baag laa inam a dooppig. “Imuam da Bekkal, da Nug tituanmi. Ag nuhig nai doyeg!” awa aum.

³⁶ Baag anam a doyona, ag Jesus nukka dayeye anidna, ag akka akka dabmeppig. Ag keeke anidppig amu ag amunu danab laala amelagppa haen amuppa ii appig.

Jesus nid laa beɗuppanu ouɗi nau lamittom

³⁷ Amu deɗ ag amu anidppig, deɗ amu uue, wagɗe deɗ amuppa ag qaukoppanu noeg, danab ah kuɗumnab ag uɗin Jesus uɗa teppig.

³⁸ Amu danab ah kuɗumnab amu oolagppa danab laa nug ewa aum. “Ippunittak danab, da na unuqttem. Dahil nid imu antte, da nid dahil laippu iikkuib,

³⁹ amu ouɗi nau laa nug haen kuɗumnab aɗeɗe, eheɗ eewo, ouɗi nau nug he, huana hahaɗeɗe, hipaɗu neene, ouɗi nau nug haen ohbia anam heehe, nid beɗu nauha auta aotte.

⁴⁰ Am da nahipad ippunittak awak danab ag ouɗi nau lamidkkulagnu unuqadmi amge ag elele iitta!” awa aum.

⁴¹ Anam a amu Jesus oɗeppa awa aum. “Ag oolagppa genab doyak iitta. Ag eheɗ haknu ag tiilagppa daatte. Da ag ele haen elab daamut, amge ag dahilnu oolagppa genab ii dootteb amunu, da ool uug ele. Ag haen ganeb ag dahilnu oolagppa genab dooglag? Na nid nahip omalna do!” awa aum.

⁴² Nug anam a amu nug nid amu awa, Jesus toppa doodo, ouɗi nau am nid buɗie, na qa, wanppa hahaɗom. Nug anam heum, amge Jesus Nug ouɗi nau nid amu uua gokkunu haknunab ana he, nid ena daye, awa eɗua, mameg mettom.

⁴³ Jesus Nug anam he, danab ah ag Kayaknu ɠagattag anidna ottaina dabmak kuɗum aoppig. Keeke oh Jesus heum amu, ag amunu dabmak kuɗum aoegeg, Jesus Nug nuhikkud ippunittak awak danab amelagppa aum.

⁴⁴ “Ag nai imu daulagppa tutukkunab doyeg! Dimppa haen elab iitta, laa nug Danab Bekkalag da, nug da awiɗa, danab eppelagppa meiɗkku,” awa aum.

⁴⁵ Nug anam aum, amge ag nai amunu oolag tutukku ii maittom, nai amunu diig am ag oolagppa lokkumak dayom amunu, ag tutukku ii dooppig. Ag ii dooppig amge ag Jesus Nug nai amu mehuqkkunu oɗ mettaglagnu baɗappig.

Kayaknu ɗo maɗoɗ ooppa amu, aun nug am okkai

⁴⁶ Am haen laa ippunittak awak danab ag oolagppa aun nug okkai daatte, dabmak amu be, ag amunu aeg ona aeg doum.

⁴⁷ Amu Jesus Nug dabmak amu ag oolagppa dayeye doyom amunu, Nug nid nakok laa awa do, Nug guguitta heqo laih me, hippaidya daayya,

⁴⁸ Nug ag amelagppa aum. “Danab nug da onilnu nid nakok laa imubia laippu dayaknu ooppa eleleib dootte, nug da ele laippu dayaknu ooppa eleleib dootte. Danab nug da ele laippu dayaknu ooppa eleleib dootte amu nug Laa, Nug he da uɗimi ele, nug Nug ele laippu dayaknu ooppa eleleib dootte. Ag oh oolagppanu danab nug nakoknab daatte amu, nug am anuqak,” awa aum.

⁴⁹ Jesus Nug anam a amu Jon nug aum. “Ippunittak danab, ig danab laa nug na oninppa ouɗi nau lamatte anidmut, amge nug ig dim lamikke ii oittem amunu, ig nug ouɗi nau lamadmanu ɗo memut,” awa aum.

⁵⁰ Nug anam aum amge Jesus Nug amegppa aum. “Aun nug ahilag kekeɗ iitta, nug am ag lailag amunu, ag nuhig uɗat amu aib okkulppig,” awa aum.

Samaria danab laa ag Jesus awak uuppig

⁵¹ Amu Jesus Nug eɗua Mameg toppa gokkunu haen miag do doyaya, Nug Jerusalem gokkunu dabmak ɠagattag awom.

⁵² Dabmak amu awom amunu Nug danab laala he, ag nai aon, anuqna gona, ag Samaria dilag aab nakok laappa tena, appa ag nuhig keeke bappaidkkulagnu heppig.

⁵³ Amge danab aab amuppanu ag Jesus ele laippu dayaknu oolagppa eleleib ii dooppig. Aɗinu? Ag dooppig, Nug Jerusalem tekkunu ɠagattag dabmeum.

⁵⁴ Ag anam heeg, haen ippunittak awak danab aɗit Jems, Jon ele, aa anam anidya amu, aa apiɗ. “Naɗi, i apuɗ hab aabppanu aab aɗu na, danab amu ewadkkunu oot daattete?” aoya apiɗ.

⁵⁵ Anam apiɗ amge Jesus Nug eɗua ⌊neekkata⌋, aa daulah batom.

⁵⁶ Daulah bate amu, ag ahan aab nakok laappa goppig.

Danab nug Jesus dim lamidkkunu nai

⁵⁷ Ag gona ibppa ukkaegeg, danab laa Jesus amegppa aum. “Na adep adep gokkut amu da na dim lamidkkul,” awa aum.

⁵⁸ Anam a amu Jesus Nug amegppa aum. “Doɗ laa onig foks, biun bia, ag wan oɗeppa niiaknu aben ele, ai ag ele teɗ ele, amge Danab Bekkalag da amu, da niiaknu aben laa iitta,” awa aum.

⁵⁹ Anam ana, Nug danab laa amegppa aum. “Na dona, da dim lamiɗe!” awa aum, amge danab amu nug aum. “Naɗi na appe, da tatam ukken, mama boumoya da eɗuen na dim lamidkkul,” awa aum.

⁶⁰ Anam a amu Jesus Nug oɗeppa awa aum. “Uuppe! Mauhak aɗi, ⌊ag danab dahil uɗat haknu dab-ii-metteb ele amu,⌋ ag mauhak lailkad boumatteg! Amge na gona, Kayaknu ɗo maɗoɗnu nai mehuqe!” awa aum.

⁶¹ Anam a amu danab laa nug aum. “O Naɗi, da na dim lamidkkul, amge na appe, da tatam goppi, baeladppa amelagppa, ‘Ena dayeg,’ awoya, da eɗuen uɗien dim lamidkkul,” awa aum.

⁶² Nug anam aum, amge Jesus Nug amegppa aum. “Aun nug dahilnu oo aɗit ele amu, nug Kayaknu ɗo maɗoɗ ooppa daakkunu elele iitta,” awa aum.