Luk 8 - Nobonob Baibel

Ah laala ag Jesus dim lamidna, ehanidppig

¹ Haen laa dimppa Jesus Nug ukka, aab nakok okkai, aab nakok ele laalappa oiyaya, Kayaknu ɗo maɗoɗnu Nai Ena mehuqa, danab ah ippuanattom. Nuhikkud ippunittak awak danab 12 ag Nug ele oiyegeg,

² amu ah laala ag ele oh goppig. Anukka ah amu ag ena ii daappig. Laa am oɗe ele, laa am ouɗi nau ele, amu Jesus Nug he, ena daappig. Ah amunu laa am Makdala ted Maria, nug anukka ouɗi nau eblaih aɗit ele beɗuppa daaegeg Jesus lamattom.

³ Laa Joana, nug amu Herot laug gumappig ele dilag okkai onig Susa, nug wau. Aria, laa am Susana, am kuɗum laa ele. Ah amu ag ahilag keekeppa Jesus, amu nuhikkud ippunittak awak danab ele ehanadppig.

Danab ee aeg datta tauɗomnu nai

⁴ Jesus Nug anam oiyeye, danab ah kuɗumnab ag aab kuɗumnu uɗin, Jesus toppa qagmeeg, Nug keeke danab ag dootteb ii dootteb ele ouaqata, ippuanatta inam mattia aum.

⁵ “Ee eppak danab nug ee aeg ebakkunu aha, dad okkaippa ukka ee eppaknu abenppa oiyaya, ee aeg tauɗom. Nug tauɗa ugekke, ee aeg laala danab ib oittebppa nena qena niiegeg, danab ag tappaeg, ai ag uɗin, ee aeg amu lappig.

⁶ Ee aeg laala ag wan men duqe ukkak ele amuppa nena qena beppig, amge wan teppu iitta amunu, ag diɗilag bau dayak elele iittanu qaɗaiettaeg bunaɗppig.

⁷ Aria ee aeg laala ag wan uud keeke qaun ele beppigppa nena qeeg, keeke qaun ele bena, naɗi ma teguattom.

⁸ Ee aeg laala ag wan enappa nena qena, ena bena, meulkad kuɗumnab oppig; ee aeg laippu anen anen am ee aeg 100 oppig.” Jesus Nug anam ana, Nug ewa, “Danab nug daug ele dayeb, nug doyaɗ!” awa aum.

⁹ Aria dimppa nuhikkud ippunittak awak danab ag Jesusnu keeke danab ag dootteb ii dootteb ele ouaqata ippuanittak nai amu, ag nai amunu meunu Nug oɗ medappig.

¹⁰ Oɗ mettaeg amu Jesus Nug aum. “Ag dahilad amu, Kayak Nug ag Kayaknu ɗo maɗoɗnu keeke diig lokkumak amu dooglagnu doyak mattom amunu ag dootteb, amge da danab laa amelagppa keeke danab ag dootteb ii dootteb ele ouaqata ippuanattak naippaib madittem. Amunu diig am, ‘Ag neegkkulag, amge ag diig tutukku anidkkulagtai, o tutukku iitai anidkkulag. Ag nai daulagppa dooglag, amge ag nai meu am tutukku dooglagtai, o tutukku iitai dooglag,’ ” awa aum.

¹¹ Jesus Nug anam ana amu, Nug nai baula tuɗitta aum. “Keeke danab ag dootteb ii dootteb ele ouaqaten ippuanatten mattimi amu, nuhig meu am inam. Ee aeg amu Kayaknu nai.

¹² Amu ee aeg laala ibppa nena qeppig ele, nai amu inam ippunigtte. Danab laala ag nai dootteb, amge dimppa Satan nug uɗia he, Kayak nai ag oolagppa dayom iitta mette. Satan nug nuhig dabmakppa, ‘Ag nai amu oolagppa genab dooppeg, Kayak Nug ag eɗua diima,’ anana hette.

¹³ Amu ee aeg men duqe ukkakppa nena qeppig ele, nai amu inam ippunigtte. Danab laa ag nai doon, oolag gamag ahehe, pahanab aotteb, amge ahilag ooppa genab doyak am ɠagattag iitta, haen tutuib daatte amunu, deɗ laa ahilag ooppa genab doyak iitta mekkunu uug laa be, ag paha ahilag ooppa genab doyak paɗatteb.

¹⁴ Amu ee aeg wan uud keeke qaun ele beppigppa nena qeppig ele, nai amu inam ippunigtte. Danab amu ag nai dootteb, amge ag gona oiyegeg, wan imuppa uug laala, enub awaknu uɗat, amu ameg qak kobol ele, keeke amu oh ag oolagppa he, Kayak nai iitta ma, meu ii otte.

¹⁵ Amge ee aeg wan enappa nena qeppig ele, nai amu inam ippunigtte. Danab laa ag nai doon, ag aona oolagppa meeg, tutukku oolagppa ena dayeye, ag ɠagattag daanna meu otteb,” awa aum.

Danab ag lam tappiɗ waappa ii metteb

¹⁶ Aria Jesus Nug nai imu ele mattiom. “Danab laa nug lam amota, tappiɗ waappa o balal waappa ii mette. Iitta. Nug danab ag lag amu ooppa nona, amahlak anidkkulagnu amota, lam maknu balal attan me eotte.

¹⁷ Amubia gemu keeke laa lokkumak daatteb ele, Kayak Nug heeb, danab ag anidkkulag. Ge, keeke oh laa anidmanu tonak daatte amu, Kayak Nug heeb, miag atieb, laa ag anidkkulag.

¹⁸ Ag nai dahil dootteb ele, ag nai amu dabmenan dayeg! Danab nug Kayaknu keeke awa, uɗat pehettak medatte amu, Kayak Nug amu laa ele medakku. Metteb, nug happiak ele daakku, amge danab nug Kayaknu keeke awa, uɗat pehettak ii medatte, nug ‘Da iikku aomi, dahilib daakku,’ atte amu, Kayak nug nuhig keeke awom amu eɗua aɗidkku,” awa aum.

Jesus anig amu amakkud ele

¹⁹ Aria, Jesus anig, amakkud ele anidkkulagnu uɗippig, amge danab kuɗum ag itun daappig amunu ag Jesus gumidna wakkulagnu ib iitta.

²⁰ Ag uɗin daaegeg, danab laa nug Jesus amegppa aum. “Na anin, amapad ele ag na anidkkulagnu uɗin, dimittim daatteb,” awa aum.

²¹ Awa a amu, Jesus Nug aum. “Danab ah ag Kayaknu nai doon dim lamidtteb ele, ag am da anil, amalad ele,” awa aum.

Jesus ulah naɗi amegppa a toettom

²² Deɗ laa Jesus Nug nuhikkud ippunittak awak danab amelagppa aum. “Ig le ameg mataɗta, laih uppa gotu!” awa aum. Nug anam a amunu, ag uub attan tena goppig.

²³ Uub ugekke amu Jesus Nug niiom. Niieye, ulah naɗi laa laippun na, le amegppa he, le ite, uub ooppa noa ambekkunu he, ag mauhkkulagnu hena,

²⁴ nuhikkud ippunittak awak danab ag wana, Jesus maɗettan appig. “Naɗi, Naɗi, ig mauhkkunignu hettem!” aon appig. Aon aeg am Jesus Nug aha, ulah, le koɗkoɗ qeum ele amu, Nug aa amelahppa aa anam hemayanu a, ulah nug iitta me, le ele toetta, manin dayom; baula ii uɗalom.

²⁵ Aria Jesus Nug ippunittak awak danab amelagppa aum. “Ag ahilag ooppa genab doyak amu adeppa daatte?” awa aum. Nug amu he, ag nuhignu ebehilkad oh bodoetta le me, dabmak ele kuɗum aona, ag akka akka mattin appig. “Danab imu am aun? Nug haknunab nai a, ulah, le ele aa ele danab imunu nai dim lamidttep!” aon appig.

Jesus ouɗi nau danab laa beɗuppanu lamittom

²⁶ Dimppa ag el qena gona, Gerasa danab dilag wan atu, amuppa eeɗppig. Aben amuam Galili le ameg laih daatte.

²⁷ Amu Jesus Nug uubppanu aha, honap le ihippa no, danab laa aab amuppanu Nug gumitta doum. Danab amu nug ouɗi nau qalittak ele. Haen elab nug bam iitta oiyaya, lakka ii daattom. Iitta. Nug matmatppa daattom.

^28-29 Danab amu nug Jesus antta ewa, wanppa Jesus baegppa na qe, Jesus Nug ouɗi nau danab amuppa dayom ele, Nug nug amegppa, “Danab amu uuidna ukke!” awa aum. Nug anam aum amunu danab amu nug baag okkainab ele ewa aum. “Jesus, na Kayak Attannab Laa Oh Eɗattak bekka. Na da attem heiɗkkutnu hettem? Na da guittak nau ii meɗamnanu oo doyak ele oɗ medattem!” awa eum. Haen kuɗum ouɗi nau nug danab amu aɗeɗe, danab ag nug gumanna, eppeg, baeg ele senppa qagttappig, amge nug sen pakkua awe, ouɗi nau nug nug awa aɗe, laih atu taɗakppa gottom.

³⁰ Aria, Jesus Nug oɗ mettom. “Na onin aun?” Awa oɗ mette amu, nug aum. “Da onil am, ‘Daup kuɗum,’ ” awa aum. Aɗinu? Ouɗi nau kuɗumnab nug ooppa nona daappig.

³¹ Ouɗi nau ag Jesus amegppa, “Na aib ig lamigppe, ig moɗ batak iittappa gomut,” aon ii daye daye unuqppig.

³² Amu bo ameg naɗi laa nakok uma qauko nakok daugppa ee lanan daaegeg, ouɗi nau ag Jesus unuqna appig. “Na heppe, ig gota, bo oolagppa notu!” aon appig. Ag anam aeg Jesus Nug, “Anam heig!” awa aum.

³³ Awa a amu, ouɗi nau ag danab amu uuidna, ag gona bo oolkadppa noppig. Noeg amu bo ag oolna, huana gona, aben oola noakppa le amegppa nona, le lanan mauhadna malappig.

³⁴ Amu haen bo gumak danab ag keeke beum, amu anidna, ag oolna gona, ag keeke amunu aab miag dayom, amu nuhig wan taliliak ele, amuppa ag keeke aɗi anidppig amu aeg dooppig.

³⁵ Mattieg doona amu, danab ah ag keeke amu anidkkulagnu Jesus gumidna gona, ag danab ouɗi nau uuidppig amu anidppig. Nug lamen takka, dabmak ena ele Jesus baegppa heɗep na dayeye anidppig. Danab ah ag anam anidna, ag baɗappig.

³⁶ Danab ag anidppig ele amu, ag Jesus Nug danab ouɗi nau ele amu he ena dayom, ag keeke amu ohnu madippig.

³⁷ Mattieg, Gerasanu wan atu, appan danab oh ag Jesus uuatta gokkunu unuqppig. Aɗinu? Ag huan baɗappig. Aeg aakku Jesus Nug uub attan ta, Nug eɗua ukkom.

³⁸ Danab ouɗi nau uuidppig ele nug Jesus ele gokkulahnu unuqom. Nug anam heum amge Jesus Nug he, eɗua ugekke amegppa aum.

³⁹ “Na eɗun, na appanppa gona, Kayak nahip-ppa aɗi heum ohnu appe doyeg!” awa aum. A amu danab amu ukka, aab amuppa ta, danab ah amelagppa Jesus keeke oh nuhigppa heumnu mattieye dooppig.

Ikki danab aɗeg am ah Jesusnu lamen lauɗittom ele

⁴⁰ Haen Jesus Nug Galili le ameg heqo laihnu eɗua uɗie amu, danab ah kuɗum ag Nug ele laippu dayaknu oolagppa eleleib dooppig. Aɗinu? Ag oh Nug ameg mena daappig.

⁴¹ Jesus uɗie amu, danab laa onig Jairus, nug Juda dilag nai doyak lagnu ikki danab laa, nug uɗia Jesus baegppa laippun gateg qaun o, gomela, iɗu wanppa ma, Jesus Nug laugppa gokkunu unuqom.

⁴² Aɗinu? Nug aɗeg laippuib, maɗ 12 ele, nug mauhkkunu heum. A amu Jesus Nug ugekke, danab ah kuɗumnab ag talilidna daaegeg goppig.

⁴³ Ukkaegeg, ah laa ele appa dayom amu, nug tiig nak oɗe maɗ 12 nuhigppa dayom. Iitta ii mettom. Nug dokta gumatta ukke bappaidnana, ehanidkkulagnu elele iitta, nug men doɗo nuhig iitta meum, amge nug eɗua ena ii dayom.

⁴⁴ Aria, ah amu nug Jesus dimugppa doa, eppeg bahia, Jesusnu lamen elab daug lauɗittom. Lauɗitte amu, nuhig tiig nak oɗe laippun iitta meum.

⁴⁵ Iitta me amu Jesus Nug dayaya, oɗ meum. “Aun da aɗailom?” awa aum. Oɗ me amu ag appig. “Da iitta, da iitta,” aon appig. Aon aeg, Pita nug aum. “Danab Okkai, danab ah kuɗum gukkuidnanab talilidna daatteb amunu aɗinu na, ‘Aun da aɗailom?’ aon attem?” awa aum.

⁴⁶ Amge Jesus Nug aum. “Da doottem, laippu laa eppegppa da aɗaele, ɠagattag laa uuiɗa ukkom,” awa aum.

⁴⁷ Aria ah amu nug doya, lokkumkkunu elele iitta amunu nug baɗa hahaɗaɗa, danab ah oh noolagppa Jesus baegppa laippun gateg qaun o, gomela, iɗu wanppa ma, nug aɗinu eppeg bahia Jesus aɗe, laippun oɗe nuhig iitta meum ele, nug amunu aum.

⁴⁸ Amu Jesus Nug ah amu amegppa aum. “O aɗel, na ootppa genab doome amunu na ena daattem. Na maɗoɗ ele ukke!” awa aum.

⁴⁹ Jesus Nug nai amu mattiaya dayeye, danab laa nug Juda dilag nai doyak lagnu ikki danab Jairus, amu nug laugppanu uɗia, Jairus amegppa aum. “Na aɗen mauhom amunu, na ippunittak danab imu uɗat baula aib mettame,” awa aum.

⁵⁰ A amu Jesus Nug nai amu doya, Nug Jairus amegppa aum. “Na aib baɗame. Na ootppa genab doye! Na anam heppe amu, na aɗen nug eɗua ena daakku,” awa aum.

^51-53 Aria, haen Jesus Nug ikki danab Jarius laugppa ukka, Nug Pita, Jon, Jems, nid mameg anig ele aakkuib diiatte, Nug ele lag ooppa noppig. Laa oh ag lag ooppa nokkulagnu aib aum. Nug lag ooppa noa, Nug danab ah ag nid amunu oolag doye, mahinna, qanak ele henan daaegeg anatta, Jesus Nug ag amelagppa aum. “Ag aib gaappig! Nug ii mauhom, nug niitte,” awa aum. Jesus Nug anam a amu ag imidppig. Aɗinu? Ag dooppig, nid ahin nug mauhom.

⁵⁴ Amge Nug nid ahin amu eppegppa aɗa aum. “Nid ahin dahil, na ahe!” awa aum.

⁵⁵ A amu nid ahin amu nug eɗua bau daya, laippun hibaittom. Hibaitte, Jesus Nug ag ee medappeg lakkunu amelagppa aum.

⁵⁶ Nid ahin mameg anig ele aa anam anidya, aa ottaiya, dabmak kuɗum aopiɗ, amu Jesus Nug ɠagattag amelahppa aum. “Aa keeke imunu danab laa amegppa aib apiɗ,” awa aum.