Luk 4 - Nobonob Baibel

Satan Jesus oo eeɗom

¹ Aria, Kayak Ouɗi Nug Jesus ooppa noa am be, Jesus Nug Jodan leppanu ahe, Kayak Ouɗi Nug Jesus omala, atu taɗakppa ukkom.

² Ukka dayeye, Satan nug Jesus deɗ 40 eheɗ hekkunu oo eeɗom. Amu haen amu ohppa Jesus Nug ee laa ii la, haen amu male, Nug enug qeum.

³ Enug qe, Satan nug Jesus amegppa aum. “Na Kayak Bekka daattem dayeb amu, na appe, men imu eɗua bret maɗ!” awa aum.

⁴ Awa a amu Jesus Nug Satan oɗeppa awa aum. “Kayak naippa yaak inam daatte, ‘Danab ah eeppaib bau daanna ii oitteb,’ ” awa aum.

⁵ Awa a amu Satan nug Jesus omala ⌊qauko okkaippa⌋ ta, pahanab wanppan wan oh ippunattowa,

⁶ nug aum. “Keeke amu oh gumaknu ɠagattag, amu onig ele laa da meɗom, amu da aun laa medakkulnu ool dayeb amu, da medakkul, amunu ⌊na da oɗel dim lamidkkut dayeb,⌋ da na medakkul.

⁷ Anam amunu, na da noolppa dup nona da binal meppe amu, keeke umu oh am nahipad daakku” awa aum.

⁸ A amu Jesus Nug Satannu nai nob ma aum. “Kayak naippa yaak inam daatte. ‘Naɗi, nahip Kayak, na Nug noobppa dup nona binag me! Na Nugib waappa daanna, Nug oɗe dim lamitte!’ ” awa aum.

⁹ Anam a amu Satan nug Jesus omala, Jerusalem ukka, Kayaknu mettid lag attan tak batakppa ta he dayeye, amegppa aum. “Na Kayak Bekka daattem dayeb, na ippanu oolna honap no!

^10-11 Aɗinu? Kayak naippa yaak inam daatte. ‘Nug engel nuhikkud amelagppa nahipnu haknunab ab, ag na pehettak atognoidkkulag; na baen men yaamanu, ag geha ag eppelagppa aɗaidna ehanidkkulag,’ ” awa aum.

¹² A amu Jesus Nug Satannu nai nob ma aum. “Kayak naippa yaak inam daatte. ‘Na Naɗi, nahip Kayak, na Nug ma anttak aib mettame,’ ” awa aum.

¹³ Satan nug Jesus ib amu ohppa eheɗ hekkunu oo eeɗowa, nug uuitta ukkom. Deɗ ena laa baula hekkunu ameg meum.

Jesus Galili uɗat digmeum

¹⁴ Aria, Satan nug Jesus oo eeɗa male, Kayak Ouɗinu ɠagattag Jesus nuhigppa ambak dayeye, Jesus eɗua, Galili ukke, nuhignu nai amu ukke, appanu oh dooppig.

¹⁵ Hanhan Nug Juda dilag nai doyak lakka nai mehuqaqa, danab ah ippuanattette, danab ah oh ag Nug binag meppig.

¹⁶ Anam dayeye, deɗ laa Jesus Nug Nasaret ukkom. Nug appa nid nakok dayeye, anig mameg ele aa atognoeheh, ena meum. Nug Nasaret ukka, Nug Sabat deɗppa Juda dilag nai doyak lakka, Nug haen oh hettom bia ha noum. Noa amu, Nug Kayak nai ebqekkunu hibaittette,

¹⁷ ag Kayaknu propet Aisaianu buk itoɗiak medappig. Nug buk awa kola, Nug Kayak naippa nai inam daatte, amu antta ebqeum.

¹⁸ “Naɗi Nug da daɗek dilagppa nai ena mehuqkkulnu goɗen gokkaɗakppa tituaniɗom, diig amunu Naɗi, Nug nuhig Ouɗi dahilppa daatte. Nug da appi, laa ag maniguittakppa daatteb, ag uhuqak aoglagnu, da heppi, laa ag ameg gaɗuak ele daatteb, ag eɗun neegkkulagnu, da appi, laa ag laa aɗalatteg ag eppelagppa daatteb amu, ag uhuqak aoglagnu,

¹⁹ Nug ii helo bia me, Nug danab ah ehanatta, oo mak haen madakku amu, Nug da ag amelagppa amunu akkulnu meiɗe uɗimi.”

²⁰ Jesus Nug buk ebqewowa, eɗua gumak danab mettowa, Nug heɗep na dayom. Dayeye, danab ah oh nai doyak lag ooppa daappig amu ag neegna, Jesusib anidppig.

²¹ Anttegeg amu Nug digma amelagppa aum. “Gemu da Kayak nai imu ebqeiyi, nai amu aakku meu oum,” awa aum.

²² Nug a, ag doonna, ag Nug binag menana, ag nai genab ittag ele Nug mattiom amu, ag amunu dabmak kuɗum ele aoppig. Amu ag appig, “Adekkutai? Danab umu Nug am Josep bekka iittatai?” aon appig.

²³ Aon aeg, aria Nug ag amelagppa aum. “Genabnab genab ag oiyak ehanittaknu nai tutu dahilnu inam akkulag, ‘Dokta, na nakka na beɗun babaitte! Kobol na Kaperneam aabppa he, ig nai doomut ele amu, amubia ippa, imuam na appan diig, ippa ele he!’ aon akkulag.”

²⁴ Anam awowa amu Nug tuɗitta aum. “Da genab ag amelagppa attem. Propet appag diigppan danab amu, ag nug ii aomna.

²⁵ Ag doyeg! Genab, Elaiyanu haenppa Israel oolagppa ah qab kuɗum daaegeg, haen amuppa maɗ ewam, kalam 6 ele gu ii ne, wan amu ohppa enug haen naɗi dayom,

²⁶ amge Kayak he, Elaiya nug Israel dilagppa ah qab gumatta ii ukkom. Iitta. Nug he, Saidon guguittak aab laa onig Sarepat, appa ah qab laa dayeye, nug gumitta ukkom.

²⁷ Am laa ele, Kayaknu propet Elisanu haenppa, danab kuɗum ag gaɗa oɗe nau ele Israel oolagppa daappig, amge ag oolagppanu danab laippu laa nuhig oɗe amu iitta meumte? Iitta. Siria ted Naman nukkaib,” awa aum.

²⁸ Jesus Nug anam a amu danab oh, Juda dilag nai doyak lakka daappig ele, ⌊ag am Juda danab, amu ag hambuppun, “Ig Judaib ig ooppa genab doyak ena ele,” dabmedattappig amunu,⌋ ag Jesusnu nai amu doona, oppoɗilag huana be,

²⁹ ag ahan, Jesus aona, aab okkai dimittim goppig. Aab okkai ahilag amu qauko attan appa dayom amunu, ag Jesus aona, qauko amuppa tena, aon aab giginppa wana, buɗippeg baippa nokkunu heppig

³⁰ amge Jesus Nug ag oolagppanu aha, uuatta ukkom.

Jesus Nug ouɗi nau lamittom

³¹ Amu Jesus Nug aha, Galilinu aab Kaperneam appa ukka, amuppa nug Sabat deɗppa nai ippuanattom.

³² Nug nai danab nug anam hekkunu ehah ele, Nug amubia nai ippuanattom anidna, ag dabmak kuɗum aoppig.

³³ Aria, Juda dilag nai doyak lakka appa danab laa dayaya, nug beɗuppa ouɗi nau ele, amu danab amu nug Jesus antta, nug baag okkaippa ewa aum.

³⁴ “Jesus, Nasaret ted, na ig attem heigkkutnu uɗime? Na heppe, ig nauhkkunignu uɗimete? Da na dooidttem; Laa Kayaknu Oppiaawak Ele, amuam na aakkuib” awa aum.

³⁵ Nug anam aum, amge Jesus Nug ouɗi nau amegppa baag ɠagattagppa aum. “Na oɗen qamutna, danab amu uuidna ukke!” awa aum. Jesus Nug anam a amu ouɗi nau nug ag oolagppanu he, danab amu wanppa na qe, nug uuitta ugakka, danab amu nug beɗuppa eheɗ laa ii heum.

³⁶ Anam amu, danab oh ag dabmak kuɗum aona, akka akka Jesusnu appig. “Nai amuam ippunittak baute? Danab amu Nug ehah ena, ɠagattag ena ele amunu, Nug ouɗi nau amelagppa, ‘Ag ukkeg!’ atte amu, ag uuadna gotteb,” aon appig.

³⁷ Anana, ag Jesus keeke heum, nai amu tuɗitteg, wan oh Kaperneam talilittak dayom, wan amuppan aab ohppa ukke dooppig.

Jesus oɗe danab kuɗum bappalattom

³⁸ Aria, Jesus Nug Juda dilag nai doyak lakkanu aha, Saimon laugppa ukkom. Saimon nome nug oɗe, beɗu gakkaɗak huanaknab ele amunu, ag Jesus ehanidkkunu oɗ medappig.

³⁹ Oɗ mettaeg amu, Jesus Nug noa, gumitta hibaitta dayaya he, beɗu gakkaɗak uuitte, nug paha aha digma, ehanittak keeke babaitta ehanattom.

⁴⁰ Babaitte, aria deɗ amu aam noono, appan danab ag ahan, oɗe danab, oɗe digdig ele omaladna, Jesus toppa ukkaeg, Nug danab amu eppegppa aɗalatte, ena daappig.

⁴¹ Ele amu Jesus Nug he, ouɗi nau ag danab ah uuadna, “Na amu Kayak Bekka,” ana enan goppig. Amge ag Nug dooppig, Nug am Kristus amunu, Nug ag baula mattimnanu ag amelagppa, “Aib!” a, ag oɗelag qamutppig.

⁴² Aria, wakkaɗeɗe buttuanab Nug aab amu uua aha, aben laih danab haen oh ii daattebppa ukke, danab ag Nug mattin oin oin, gumidna ukkan, Nug ag uuatta ii gomanu hagakka aoglagnu heppig,

⁴³ amge Nug ag amelagppa aum. “Da Kayaknu ɗo maɗoɗnu Nai Ena aab laalappa ele mehuqkkuloitte. Aɗinu? Kayak Nug da anam hekkulnu meiɗe uɗimi,” awa aum.

⁴⁴ Nug anam ana amu, Nug tuɗitta, Juda dilag nai doyak lakka laalappa nai mehuqom.