Luk 24 - Nobonob Baibel

Jesus eɗua hibaittom

¹ Aria Sabat ukka male, mettidnu deɗ digmakppa buttuanab ah ag ahan moɗppa goppig. Ag goɗen muttuɗig ena ele babaitteg dayom, amu ele akkan goppig.

² Ag gona, men naɗi moɗ ameg qehakkom amu laa nug buɗibɗib mette ukka, moɗ amegppa ii daye anidna,

³ ag moɗ ooppa noppig, amge Naɗi Jesus gaɗa amu ag ii anidppig.

⁴ Ii anidna, ag amunu dabmak kuɗum aona, ootot aqe henana amu, antte! Ag danab aɗit miag hippaidya daaeheh anatppig; ahilah lamen am hakkabnab, amemɗiag awak ele.

⁵ Anatna, ah ag baɗan, gatelag qaun ona, gomelna, iɗulah wanppa meppig, amge danab aɗit aa ag amelagppa apiɗ. “Aɗinu ag danab bau, mauhak gaɗalag maadtteb abenppa mattin oitteb?

⁶ Nug ippa iitta. Nug eɗua hibaittom,” aoya apiɗ. Aa anam aya amu amelagppa nai tuɗidya apiɗ. “Nai imu haen Nug Galili dayaya, ag amelagppa mattiom amu, ag daulagppa doaɗ!

⁷ Nug ag amelagppa inam awa aum. ‘Ag Danab Bekkalag da, da aɗailna, hipunin danab eppelagppa meiɗppeg, ag da ad emaitakppa atuliɗppeg, geha deɗ ewamppa Kayak Nug heeb, da eɗue hippaidkkul,’ awa aum,” aoya apiɗ.

⁸ Aria, ag Jesus Nug nai amu anukka amelagppa aum amunu dabmeppig.

⁹ Aakku moɗppa daappig amu ag appanu eɗun gona, ippunittak awak danab 11 amelagppa, aria danab laa Jesus dim lamidppig ele, ag ag amelagppa ele keeke oh anidppignu madippig.

¹⁰ Maria, Makdala ted, Joana amu Maria, Jems anig, aria ah laala ag ele ag, laa iitta, ag nai amu totol danab amelagppa madippig.

¹¹ Ah ag nai amu amelagppa madippig, amge ippunittak awak danab ag ahilag dabmakppa, “Ah ag nai ulah hamu maditteb,” aon anana, ag nai mattieg dooppig amunu oolagppa genab ii dooppig.

¹² Oolagppa genab ii dooppig amge Pita nug aha, qaiqaɗ moɗppa ukka gomela, moɗ ooppa neekke no, nug linen lamen qatti elab, ag amuppa Jesus gaɗa itappig ele, nug amuib daaegeg anttowa, nug eɗua ugakka, aɗi keeke beumnu dabmak kuɗum awom.

Danab aɗit Emaus ibppa Jesus anidpiɗ

¹³ Amu deɗ amuppaib ag oolagppa danab aɗit aa aab nakok onig Emaus appa gokkulahnu gopiɗ. Ib Jerusalemnu aha Emaus ukkak am 11 kilomita anam.

¹⁴ Aa goyaya amu, aa keeke oh Jerusalem appa heppig, aa amunu madipiɗ.

¹⁵ Aa amu mattiyya, nug oɗ mettayya ukkaeheh, Jesus nukka Nug uɗie, aa ele oh goppig.

¹⁶ Ag oh goppig, amge aa Nug am Jesus, aa ii doopiɗ. Aɗinu? Aa amelah ii oppatom.

¹⁷ Anam amunu, Nug aa oɗ mata amelahppa aum. “Aa aɗi keekenu nai mattiya gottep?” awa oɗ matom. Nug anam awa oɗ mate, danab aɗit amu baelah yaaya, oolahppa uug dayom iɗulahppa miag atiak dayeye, aa hippaidya daapiɗ.

¹⁸ Aa anam daayya, danab onig Kliopas nug aha amegppa aum. “Amu danab aab laih laihnu oh ag gemu Jerusalem daatteb amu, ag oolagppa na nakka aakkuibtai keeke oh haen imuppa Jerusalem beum am iite doottem?” awa aum.

¹⁹ Nug anam awa a amu, Jesus Nug aa oɗ matom. “Aɗi keeke?” Awa a amu, aria aa Nug amegppa kobol oh Jesusnu heppig, aa amunu mattiya, inam apiɗ. “Jesus, Nasaret ted, Nug amu Kayaknu propet, Nug Kayak nai diig genab ɠagattag ele Kayak noobppa, danab ah amelagppa ele mattia mehuqa, Nug uɗat ɠagattag ele Kayak noobppa, danab ah amelagppa haaha oiyom.

²⁰ Amu mana mettak danab okkai, amu ihinkad ikki danab ele ag aon, gabman eppelagppa mena, qeppeg mauhkkunu aeg, gabman ag nug ad emaitakppa atulppig.

²¹ Amge ig nuhignu amu, ig genab Nug am Israel dilag qagaiettakppanu eɗua uhuqaknu ehanittak daakkunu dabmak aɗat daamut. Amu oh tuɗittak amu, ag anam heeg uɗie, gemu am deɗ ewam iikku.

²² Anam amu, gemu ig oonigppan ah laala, ag heeg ig dabmak kuɗum aomut. Ag buttuanab ahan moɗppa goppig,

²³ amge ag Jesus gaɗa ii anidppig. Ag ii anidna amu, ag eɗun uɗin, ag engel aɗit anategeg, ‘Jesus Nug bau daatte,’ apiɗ aeg doomut.

²⁴ Ag anam aeg amu, ig oonigppan danab laala ag moɗppa gona, keeke ah ag appig ele, amuib anidppig, amge Nug amu, ag ii anidppig,” aoya apiɗ.

²⁵ Aa anam aeh, Jesus Nug amelahppa aum. “Aa am danab dabmak tutukku iitta ele. Kayaknu propet ag nai amu mehuqppig, amge aa paha oolahppa genab dooglahnu ii hettep,” awa aum.

²⁶ Nug anam anana, Nug aa amelahppa nai tuɗitta aum. “Propet ag Kristus Nug ⌊hipunin uhuqkkunu,⌋ Nug guittak aokkununab daya awowa, anuqak abenppa daakkunu, ag Kayak oɗe aon, amunu iite yaappig?” awa aum.

²⁷ Nug anam amelahppa awowa, Nug Mosesnu naippa digme ukke, Kayaknu propet oh dilag nai ele nuhignu nai aum niitte amu, Nug amu oh diig mehuqom.

²⁸ Nug mehuqeqe, ag gona aab aa gokkulahnu gopiɗ ele amu gukkuidnana, Jesus Nug uuata gokkunu bia heum,

²⁹ amge aa Nug hagakka aoya apiɗ. “Na i ele daatu! Aam no, uudoumde!” Anam aeh, Nug lag ooppa no oh daanna,

³⁰ dimppa ee lakkulagnu hena, Jesus Nug aa ele oh balalppa daanna, Nug bret awa Kayak amegppa, “Ena heme,” awowa, pane ne, Nug matete,

³¹ aa amelah oppate, aa Nug am Jesus anidya doyeheh, Nug uuaatom. Uuaate, aa Nug baula ii anidya,

³² amu aya aya inam apiɗ. “I ibppa uɗiuɗuɗ, Nug Kayak nai meu tutukku mehuqe doomuɗ amu, i oonihppa Kayaknu nai meu elenab iite doomuɗ?” aoya apiɗ.

³³ Aa anam ayaya, aa deɗ amuppaib ahaya, eɗuya Jerusalem goya, ippunittak awak danab 11 appa daappig, amu laala ele ag qagmena daaegeg anadpiɗ.

³⁴ Anatteh amu, ag aa amelahppa appig. “Genabnab, Naɗi Nug eɗua hibaittom, Saimon nug anttom,” aon appig.

³⁵ Ag anam aeg, danab aɗit aa ibppa keeke oh be anidpiɗ, aa amunu mattiya, tuɗidya apiɗ. “Nug Kayak unuqitta, bret pana mete, i Nug anidɗa, aakku i Nug doomuɗ,” aoya apiɗ.

Ippunittak awak danab ag Jesus anidppig

³⁶ Ippunittak awak danab, amu danab laala ele ag nuhignu aakku mattinna daaegeg, Jesus Nugib aakku tula doa, oolagppa hibaitta, amelagppa aum. “Ag maɗoɗ ele dayeg!” awa aum.

³⁷ Nug anam a, ag ottaina baɗan, ag dabmakppa appig. “Ig dottog laa anidttem,” appig.

³⁸ Ag anam appig amge Nug ag amelagppa aum. “Ag aɗinu ottaitteb? Aɗinu dabmak aɗit ahilag dabmakppa bette?

³⁹ Ag da eppel bael ele iikkud antteg! Daib iikku daattem. Ag eppelag bahina aɗailna doyeg! Dottog nug beɗu, ebehi ele iitta, ag da aniɗtteb bia,” awa aum.

⁴⁰ Nug anam awowa amu, Nug eppeg baeg ele ippuanattom.

⁴¹ Ag Nug anidna, ag oolag gamag huan ahe, dabmak kuɗum ele aonna, oolagppa genabnab genab ii dooppig. Anam amu, Jesus Nug amu antta, Nug ag oɗ mattom. “Ag ee laa ana daattete?” awa oɗ mattom.

⁴² A amu ag kakai ewak laih amu aon mettaeg,

⁴³ Nug aɗa lanana anttegeg,

⁴⁴ Nug amelagppa aum. “Anukka da ag ele daatta, da ag amelagppa dahilnu nai oh Mosesnu ɗoppa, amu Kayaknu propet dilag yaakppa ele, nai amu oh bekkuoitte ami,” awa aum.

⁴⁵ Nug anam ana, Nug Kayak nai amu ag ag oolagppa tutukkunab genab maitteb dooglagnu ippuanattatta,

⁴⁶ amelagppa aum. “Anukkanu uɗiak amu, Kayaknu nai yaappig ele am inam ippunigtte. Kristus Nug guittak awa mauhowa, deɗ ewamppa nug eɗua hippaidkku. Am anam ippunigtte.

⁴⁷ Amge laa ele ippunigtte. Amuam Kristus Nug hibaitteb, ⌊nuhikkud danab⌋ ag Kristus onigppa wan atu ohppanu danab ah amelagppa ag Kayak Nug danab ah dilag hipunin uhuqa madakkunu, ag oolag eɗuglagnu mehuqkkulagoitte. Ag uɗat amu Jerusalem digmekkulag. Kayak nai anam ippunigtte.

⁴⁸ Amu ag gemu da ele iikku daattem amu, ag dahilppan keeke oh anidppig,” awa aum.

⁴⁹ Jesus Nug anam ana, Nug baula tuɗitta aum. “Doyeg! Da Mamel Nug keeke amu anukka ag madakkunu nai qakka aum amu, da meppi nekku, amge ag aab okkaippa daappeg, hab attannu ɠagattag amu ahilagppa neeb, ag uɗat digmekkulag,” awa aum.

⁵⁰ Nug anam awowa, Nug aha, diie gona, Betani guguittak appa Nug eppeg huma itattom.

⁵¹ Nug itattette, Kayak awe, Nug uuatta, hab aabppa ukkom.

⁵² Nug anam he, ag maɗoɗppan gamag ahak naɗi ele Nug binag mena, ag eɗun Jerusalem goppig.

⁵³ Gona ag hanhan Kayaknu mettid lakka daanna, ag Kayak binag menan daadttappig.