Luk 23 - Nobonob Baibel

Jesus Pailat noobppa dayom

¹ Ag Jesus aum amu doona, ag oh ahan, omalna Pailat toppa gona, nug eppegppa meppig.

² Ag gona, appa ahan, nug beɗuppa nai huanak yaan appig. “Ig danab imu anittutut, Nug ihinkad danab hambuppualadtte. Nug ig Sisarnu takis mematanu gun ma, Nug nugakka hume attan te, Nug atte. ‘Da Kristus, da king laa,’ awa aum,” aon appig.

³ Ag anam aeg amu Pailat nug Jesus oɗ mettom. “Na Juda dilag kingte?” A amu Jesus aum, “Na aakku attem,” awa aum.

⁴ Aakku Pailat nug mana mettak ikki danab amu danab ah kuɗum ag amelagppa aum. “Da danab imu nuhigppa eheɗ hak laa da ii anidmi,” awa aum.

⁵ Nug anam aum amge ag tuɗidna ɠagattag appig. “Nug Juda laih ohppa danab ah amelagppa biig yaak nai mattie, ag ahilag dabmak manin ii daatte. Nug kobol amu Galilinu digme uɗia, ippa ele he beum,” aon appig.

⁶ Ag anam aon aeg, Pailat doya amu nug ag oɗ mattom. “Danab imu Nug am Galili danabte?” awa aum.

⁷ Aria, nug Jesus am Galilinu, Herot Antipas wan amu gumom ele, appanu uɗiom doyowa, nug me, Herot toppa ukkom. Haen amuppa Herot nug Jerusalem dayom.

⁸ Ukke, Herot antta, ooppa enanag doyom. Nug Jesusnu nai doya, haen elab nug Jesus anidkkunu dabmeum. Aɗinu? Nug Jesus kobol danab hekkunu elele iitta laa heeb anidkkunu oo dayom.

⁹ Amunu Herot nug keeke kuɗumnu Jesus oɗ mettom, amge Jesus Nug oɗmak amu oh eɗua nob laa ii meum.

¹⁰ Amu mana mettak danab okkai amu ɗo mehuqak danab ele ag appa hippaidna daan, oolagppa gakkaɗak doon, beɗuppa nai yaappig.

¹¹ Herot nug nuhikkud daup ele ag Nug hippeg qakkan, aon aon qettan, dimettan, lamen elab enanag laa aon takkidna meeg, eɗua Pailat toppa ukkom.

¹² Anukka Herot nug Pailat ele aa kekeɗ daapiɗ, amge deɗ amuppa amu aa layam batapiɗ.

Pailat ag Jesus ad emaitakppa atulkkulagnu aum

¹³ Aria Jesus Nug eɗua Pailat toppa daye, Pailat nug mana mettak danab okkai, danab ah ikkilkad danab, amu danab ah ele ag onilagppa e, ag gumidna ukkaeg,

¹⁴ nug ag amelagppa aum. “Ag danab imu aon, da gumiɗna uɗin, ‘Nug danab ah ag gabman ele ban hekkulagnu maɗadatte,’ appig amu, da Nug ag amelagppa hettoɗimi, amge da nuhig eheɗ hak laa ii anidmi.

¹⁵ Herot nug ele eheɗ hak laa ii antta, eɗua me ihinigppa uɗiom amunu doyeg! Danab imu ig Nug qepput mauhkkunu eheɗ laa ii heum.

¹⁶ Anam daatte amunu, da heppi, Nug bu mettak aweb, da heppi gokku,” awa aum.

^17-18 Aria Pailat nug anam a, danab ah kuɗum ag daanna, ag oh enan appig. “Danab amu Nug qeppe mauhaɗ! Barabas uhuqna mekke!” aon eppig. ((Ahilag kobol laa anam daattom. Haen oh Pasowa deɗppa Pailat nug maniguittak danab laippu uhuqe do, madattom.))

¹⁹ Barabas nug am aab okkai amuppa gabman kekeɗ metta ban ha, danab laa aqe mauheg, maniguittakppa dayom.

²⁰ Pailat nug Jesus uhuqkkunu oo dayom amunu, nug danab ah amelagppa Jesus uhuqkkunu baula aum,

²¹ amge ag enan appig. “Ad emaitakppa atule, ad emaitakppa atule!” aon eppig.

²² Aria Pailat nug baula, amuam haen ewam, amelagppa aum. “Aɗinu? Nug ɗo tippalak aɗi heum? Nuhigppa ɗo tippalak laa, ig Nug qepput mauhkkunu da laa ii anidmi. Anam amunu, da heppi, nug bu mettak aweb, da heppi gokku,” awa aum.

²³ Pailat nug anam aum, amge Juda ag wagainab mena, huanak ɠagattagnab enana, Pailat nug Jesus ad emaitakppa atulkkunu eppig. Ahilag ewak am Pailat nai aum, am amu eɗittom

²⁴ amunu, Pailat nug ahilag nai dim lamidkkunu dabma,

²⁵ nug danab gabman kekeɗ metta ban ha, danab laa aqe mauhppig amunu maniguittakppa dayom, ag nug aoglagnu eppig ele amu, Pailat nug danab amu awa matta, nug Jesus, ag nuhigppa aɗi hekkulagnu oolag heum hekkulagnu ag eppelagppa meum.

Jesus ad emaitakppa atulppig

²⁶ Pailat nug Jesus daup eppelagppa me, daup ag Jesus aon gonana, ibppa ag Sairini ted onig Saimon anidppig. Nug aab okkai dimittimnu uɗia, aab okkai ooppa nokkunu doodo, ag nug aɗan, ad emaitak aon, nug gugappa mena duttunna heeg, nug mawa Jesus dim lamitta ukkom.

²⁷ Danab ah kuɗum ag Jesus dim lamidna gonana, ag oolagppanu ah kuɗum ag nuhignu oo doyak okkainab doonna gaappig.

²⁸ Ag anam heppig, amge Jesus Nug eɗua amelagppa aum. “Jerusalem ah, ag dahilnu aib gaappig! Ag akka ahilagnu, amu ag bekkalkad aɗelkad dilagnu ele gayeg!

²⁹ Ag doyeg, dimppa haen nau laa uɗieb amu, danab ag akkulag. ‘Ah ag nid iitta, ah ag nid ii menuppig, ah ag deɗ laa nid huh ii madappig ele amu, ag itittak ena aoppig daatteb,’ aon akkulag.

³⁰ Geha haen amu uɗieb, amu oh beeb amu, Israel danab ah ag geha qauko dilagnu, ‘Ag nena, qaɗenigppa qeig!’ akkulag. Ao, ag qauko nakok dilagnu, ‘Ag nena tonikkeg!’ aon akkulag.

³¹ Aɗinu? Ag gemu haen nakok enappa kobol nau imu hetteb amunu, dimppa haen nauppa amu mua naunab ag tonadkku,” awa aum.

³² Haen amuppa ag Jesus aon gonana, ag danab aɗit laa ele diiatna goppig. Aa kobol nau hepiɗ amunu, aa Jesus ele aqaglagnu diiadna goppig.

³³ Ag gona, aben laa onig Ikki Ebehinu Aben, appa tena, appa Jesus ad emaitakppa atulppig. Ɗo tippalak danab aɗit, aa ele oh atuladppig. Ag danab laa Jesus eppeg naɗiap-ppa atulona, laa amu eppeg nanehppa atulppig.

³⁴ ((Ag anam heeg, Jesus Nug unuqitta aum. “Mame, na ahilag hipunin imu uhuqna matte! Ag hetteb imu amu,, ag pehettak ii doona hetteb,” awa aum.)) Amu daup amu ag nuhig lamen aoglagnu otina, ameg waɗele mewona, aun nug ameg atten aokku amu, ag om yaakppa hena aoppig.

³⁵ Danab ah ag hippaidna daanna anttegeg, ikki danab ag nug aon aon qettan appig. “Nug danab laala ehanattom amunu, Nug genab Kayak Bekka, Kayak tituanom dayeb amu, Nug nugakka Nug ehanittaɗ!” aon appig.

³⁶ Ag anam aegeg, daup danab ag ele aon aon qettan, gumidna dona, wain ena iitta mettaglagnu heppig.

³⁷ Ag anam henan amu inam appig. “Na Juda dilag king daattem dayeb amu, na nagakka na ehanitte!” aon appig.

³⁸ Amu nuhignu nai laa inam aon yaana, ad emaitak igippa atulppig. “Danab imu nug amu Juda dilag king.”

³⁹ Danab nau aɗit atulatppig amu, laa nug ele Jesus awa awa qetta aum. “Na am Kristusde! Na nagakka beɗun uhuqna, i ele uhuqite!” awa aum.

⁴⁰ Am laa nug anam aum, amge laa nug laa aum amu doya, daug bata, amegppa aum. “Na anam aib ame! Na Kayak iite baɗidna, danab umu mauhkkunu daatte bia mauhkkutnu daanna kobol nau nahip amu tuɗidna hekkutnu hettem?

⁴¹ I nitaeg mauhttep imunu am ag eheɗ laa ii hetteb; ag kobol elele hetteb. I nob imu aognihnu am nai iitta. Aɗinu? Ihinih eheɗ hemuɗ nob iikku aottep, amge danab imu Nug eheɗ laa ii heum,” awa aum.

⁴² Nug anam ana, nug Jesus amegppa aum. “Jesus, haen na nahip ɗo maɗoɗppa daanna amu, na dahilnu dabmekkutnu ool daatte,” awa aum.

⁴³ Nug anam a amu Jesus Nug amegppa aum. “Da genabnab na amenppa attem. Gemu na da ele i oh Paradisppa daagnih,” awa aum.

Jesus mauhom

^44-45 Ag anam heeg ukke, aam ameg 12ppa gatatu na, wan amu oh tone ukke, tueb aam ameg ewamppa batom. Anam he, lamen okkai Kayaknu mettid lag ooppa aiheg dayom amu kattiɗa aɗit meum.

⁴⁶ Anam he, Jesus Nug baag okkaippa ewa aum. “Mame, da ouɗil na eppenppa mettem,” awa aum. Nug anam awowa, Nug mauhom.

⁴⁷ Jesus mauhe, ban daup 100 dilag ikki nug amu antta, nug Kayak binag ma aum. “Genabnab danab imu Nug genab tutukku hak danab,” awa aum.

⁴⁸ Danab ah oh anidkkulagnu uɗippig, ag kobol beum amu anidna, ag oolag uug ele eɗun goppig.

⁴⁹ Keeke amu oh beum amu, Jesus laikkud, amu ah laala Galilinu ahan uɗippig ele, ag piɗe daanna, kobol amu oh anidppig.

Jesus gaɗa amu men moɗppa meppig

^50-51 Aria danab laa, onig Josep, nug Juda dilag aab onig Arimateanu, nug amu danab ena tutukku, nug Juda dilag hettoɗiak okkai onig Sanhidren, amunu nug laa aakku, amge nug hettoɗiak danab laalanu dabmak, ahilag kobol ele Jesusnu heppig amu, nug uuom. Nug Kayaknu ɗo maɗoɗ ameg ma dayom.

⁵² Danab amu nug Pailat gumitta ukka, Jesus gaɗa aokkunu oɗ mette, Pailat nug aokkunu elele aum.

⁵³ Nug anam a, Josep nug Jesus gaɗa awa, linen lamenppa ita, nug moɗ laa ooppa meum. Moɗ amu ag menppa bappaidppig. Moɗ bappaidppig amuppa mauhak gaɗa laa ii meppig; hamu dayom.

⁵⁴ Deɗ amuam ag Sabat deɗnu keeke babaittaknu deɗ, Sabat digmekkunu heum.

⁵⁵ Josep nug anam heehe, ah ag Galilinu ahaeg Jesus ele uɗippig, ag Josep dim lamidna gona, moɗ amu anidna, Josep nug Jesus gaɗa attem meum, amu ele ag anidppig.

⁵⁶ Ag anttona amu, ag eɗun lakka gona, ag spais, leppu muttuɗig enanag ele Jesus beɗu laaittaknu amu babaittona, ag Sabat amu, ɗo atte bia, ag hik aoppig.