Luk 22 - Nobonob Baibel

Judas nug Jesus ikki danab madakkunu nai qakkom

¹ Aria Bret Yis Iitta Lanaknu Hobul Nakok, hobul amu onig laa am Pasowa, amu bekkunu miag dayeye,

² mana mettak danab okkai, ɗo mehuqak danab ele ag danab ah baɗadna appig. “Ig attem heta, Jesus qepput mauhkku,” aon madippig.

³ Ag anam mattieg amu Satan nug Judas Iskariot, nug ooppa noum. Nug amu ippunittak awak danab 12 oolagppan laa.

⁴ Satan nug ooppa no amu Nug ukke, mana mettak danab okkai, Kayaknu mettid lag gumaknu ban daup ikkilkad ele nug ib adekkuppa Jesus awa, ag eppelagppa mekkunu nai madippig.

⁵ Nug anam he, ag enanagnab doon, men doɗo laa mettaglagnu nai qagappig.

⁶ Ag anam aeg, Judas nug men doɗo aokku amunu oo ena dayeye, nug deɗ laa danab ah kuɗum ag Jesus ele ii daappeg, nug Jesus awa, danab nug ele nai madippig amu ag eppelagppa mekkunu ib mattiom.

Jesus ippunittak awak danab ele Pasowanu ee lappig

⁷ Aria, Bret Yis Iitta Lanaknu Hobul Nakok deɗ tatamnu neum. Kayak Nug anukka ag deɗ amuppa Pasowa Hobulnu sipsip nakkud aqaglagnu ɗo meum.

⁸ Amu deɗ amu be, Jesus Nug Pita, Jon ele amelahppa aum. “Aa goya, Pasowanu ee ihinig bappaidpeɗ, ig lakkunig,” awa aum.

⁹ Nug anam a amu aa Nug amegppa apiɗ. “Adeppa bappaidkkunihnu oot daatte?” aoya oɗ medapiɗ?

¹⁰ Oɗ mettaeh, Nug amelahppa aum. “Doyeɗ! Aa goya aab okkaippa nobepeɗ, appa amu danab nug nippud le ambak ele mawa doa, aa uɗalah teeb, aa nug dim lamidpeɗ, nug lag laappa ukkeb, aa lag amuppa ele ukkeɗ!

¹¹ Goya lag mameg amegppa inam aiɗ! ‘Ippunittak danab ihinih Nug inam aum. “Da dahilad ippunittak awak danab ele ig na lautppa oo attenppa Pasowanu ee lakkunignu elele?” ’ aoya akkulah

¹² Aa anam apeɗ, geha nug lag oo okkai attan, balal, dayak aben ele ippuanateb, aa lag oo amuppa Pasowa ee babaitteɗ!” awa aum.

¹³ Aria aa goya, Jesus Nug aum amubiaib anidpiɗ. Anidya amu, aa amuppa aakku Pasowa ee bappaidpiɗ.

¹⁴ Pasowa ee babaitteh, haen male, Jesus Nug nuhikkud totol danab 12 ele ag balalppa daappig.

¹⁵ Daanna, Nug amelagppa aum. “Da ag ele Pasowa ee imu tatam lakkunignu ool huanak daye, iikku daattem. Aria dimppa da guittak maokkul.

¹⁶ Da ag amelagppa attem. Da ag ele Pasowa ee baula paha ii lamata. Dayebeb ukkeb, ee lanak imunu meunab Kayaknu ɗo maɗoɗppa gogppa teeb amu, da baula lakkul,” awa aum.

¹⁷ Nug anam awowa, Nug kap laa awa, Nug Kayak amegppa, “Ena heme,” awowa aum. “Ag imu aon panin laeg!

¹⁸ Da ag amelagppa attem. Da baula wain paha ii lapa. Iitta. Haen ukkeb, dimppa Kayaknu ɗo maɗoɗ beeb, da baula lakkul,” awa aum.

¹⁹ Nug anam awowa, Nug bret awa, Mameg amegppa, “Ena heme” awowa, pane ne, pania madatta Nug aum. “Imuam da beɗul, da amuppa ag ehanadkkulnu madattem. Ag dahilnu dabmekkulagnu lanaknu kobol imu heig!” awa aum.

²⁰ Ag ee lana malona, Nug matu heum, amubianab Nug kap awa amelagppa aum. “Kap imuppa da nug tituana nai qakkak bau da tiilppa hettem. Da tiil ag ehanadkkunu gokkaɗttem.

²¹ Amge iikkud antteg! Danab da kekeɗ eppelagppa meiɗkku ele amu, nug da ele oh iikku balalppa daattem.

²² Danab Bekkalag da, da Kayak anukka aum amubia mauhkkul, amge danab nug da kekeɗ eppelagppa meiɗkku amu, nuhignu gadonnab gadon,” awa aum.

²³ Nug anam a amu ag ahan, akka akka nug oɗ mettan appig. “Aun nug kobol amu hekku?” aon appig.

²⁴ Amu hewona, ippunittak awak danab ag ahilag dabmakppa, ag oolagppanu aun nug am okkai daattenu aɗaeg be, mattin aeg ona aeg do heegeg,

²⁵ Jesus Nug ag amelagppa aum. “Iitta aɗi danab ah ag ahilkad king waalagppanab daatteb, amu king ag danab amu ag aɗi hekkulagnu atteb amu, ag hetteb. Danab ah amu ag nai amu uuglagnu ib iitta daatteb, amge okkai danab, laa ag aɗi hekkulagnu ɗo metteb ele amu, ag akka ahilagnu, ‘Ig am danab lailkad,’ atteb.

²⁶ Iitta aɗi dilagppa am anam daatte, amge ag dahilad daatteb amu, ag am anam iitta. Ag oolagppa danab aun nug okkai daatte, nug danab dimnab daatte bia dayaɗ! Aun nug ikki daatte amu, nug ahilag maɗi nid dayaɗ!” awa aum.

²⁷ Nug anam awowa, Nug baula aum. “Wannu kobolppa amu, aun nug am anuqak? Laa nug balalppa dayaya ee latte, nug am anuqakte, o iitta maɗi nid nug laa balalppa daatteb ele, nug ag ee madatte amu, nug am anuqaktai? Iitta. Laa balalppa ee latte, danab amuam anuqak daatte, amge da amu ag oolagppa maɗi nid bia ag ehanatten daattem amunu, amuppa ag dootteb, danab nug anuqak daakku, nug maɗi nid bia dayaɗ!

²⁸ Aria haen uug digdig dahilppa beppig amu, ag da ele daadmut, ag da ii uuiɗppig.

^29-30 Da Mamel, Nug ɗo maɗoɗ da meɗom, amu anamib da ag ɗo maɗoɗ dahil, amuppa ag dahil balalppa ee le ele lanan daaglagnu, ag sia king 12ppa daanna, Israel dilag huu okkai 12 amu gumadkkulag ɠagattag madattem,” awa aum.

³¹ Jesus Nug nai amu mattiowa Nug Saimon onig diia, baula aum. “Saimon, Saimon, na doye! Satan nug matu ag ahilag ooppa genab doyak am ɠagattag o ɠagattag iitta anttaknu, uug madakkunu Kayak oɗ mettom,

³² amge Saimon, da na ehanitten, ooppa genab doyak nahip amu iitta ii memanu Kayak unuqidmi. Amu geha na eɗun ɠagattag daanna, na laipad ɠagattag daaglagnu ehanatte!” awa aum.

³³ Nug anam a, Pita nug Jesus amegppa, “Naɗi da na ele maniguittakppa goɗa, oh mauhkkunihnu uug ii doottem. Hekkulnuib doottem,” awa aum.

³⁴ Amge Jesus Nug aum. “Pita, da na amenppa attem, tuqan imuppa na dahilnu, ‘Da Nug ii doottem,’ aon, haen ewam batak akkut. Na haen ewam anam appe, geha matuk dawai nug gaakku,” awa aum.

³⁵ Jesus Nug Pita amegppa nai amu awowa, Nug nai baula tuɗitta ippunittak awak danab 12 amelagppa aum. “Anukka da hei ag gonana amu, men doɗo inaknu hogot, oiyaknu battam, baelag gaɗa ele ii akkan goppig, haen amuppa amu ag keeke laanu tutu mak dooppigte o iitta?” oɗ mattom. Oɗ matte amu ag, “Iitta,” appig.

³⁶ Ag anam aeg, Nug ag amelagppa inam aum. “Amge gemu danab nug men doɗo inak hogot amu oiyaknu battam ele dayeb, nug awa ukkaɗ! Danab nug qep elab iitta, nug lamen nuhig awa meeb, danab laa men doɗo medappeg, nug qep elab awaɗ!

³⁷ Aɗinu? Kayak naippa nai laa yaak daatte. Nai amuam inam. ‘Ag Nug danab nau ele laippu qagmaadkkulag.’ Nai amu daatte amunu, da ag amelagppa attem; keeke amu geha dahilppa bekkuoitte. Ao genab, nai oh Kayak naippa dahilnu daatte amu gemu meu okkunu tette,” awa aum.

³⁸ Nug a amu ag appig. “Naɗi, na antte! Ig amu qep elab aɗit iikku,” aon appig. Aon aeg Nug ag amelagppa, “Aakku elele,” awa aum.

Jesus Getsemani datta unuqittom

³⁹ Nug anam awowa, Nug dimittim noa, Nug haen kuɗum hettom bia Nug Olipnu Qaukoppa ukkom. Nug ugekke, nuhikkud ippunittak awak danab ag Nug dim lamidppig.

⁴⁰ Ukka Nug qaukoppa ta amu, ippunittak awak danab amelagppa aum. “Satan ag eeɗatteb eheɗppa gomananu amu, ag unuqitteg!”

⁴¹ Nug amelagppa anam awona, uuatta nakok piɗe waum, danab men mawe gotte amubia. Wana gateg qaun o, unuqitta aum.

⁴² “O Mame, uug oh da maokkul ele, amuam leppu mua eheɗ nau kap-ppa daatte bia, amu na ib laa anidna appe, da le kap amuppanu amu da ii lapa, amge na dahil dabmaknab aottem ii dim lamidmana, na nahip dabmaknab aottem, amuib dim lamidkkutnu ool daatte” awa aum.

⁴³ ((Nug unuqitte, engel laa hab aabppanu na, ɠagattag metta ehanittom.

⁴⁴ Jesus Nug beɗuppa uug nau, mauhak bia doyaya, Nug oo unuqagppanu unuqittette, heɗi tiig bia na, wanppa noum.))

⁴⁵ Nug unuqitta mala, aha hibaitta, nuhikkud ippunittak awak danab gumatta wana, ag oolag uug naɗi ele amu, ag beɗulag uug mette niiegeg anattom.

⁴⁶ Anatta Nug amelagppa aum. “Ag aɗinu niitteb? Satan ag eeɗatteb eheɗppa gomananu amu, ag ahan unuqitteg!” awa aum.

Judas nug Jesus kekeɗ eppelagppa meum

⁴⁷ Jesus nai amu amelagppa anana dayeye, danab kuɗum uɗippig. Judas, nug am ippunittak awak danab 12 oolagppanu laa, nug anuqa uɗia, Jesus ootuqidkkunu gumitta ukkom.

⁴⁸ Ukke amu Jesus aum. “Judas, na Danab Bekkalag da, da ootuqittakppa awiɗna kekeɗ eppelagppa meiɗttemte,” awa aum?

⁴⁹ Jesus Nug Judas amegppa anam aawo, ippunittak awak danab ag Jesus ele daanna, laa ag aɗi hekkulagnu heeg anidna, Jesus amegppa appig. “Naɗi ig qep elab imuppa aqadpput mauhkkulagte?” aon appig.

⁵⁰ Ag anam awona, ag oolagppanu laa aha, qep nuhig awa, mana mettak ikki danabnu maɗi nid laa daug naɗiap hoiyom.

⁵¹ Jesus Nug ippunittak awak danab nug anam he antta, Nug aum. “Kobol amu uueg!” awa aum. Awona Nug danab amu nug daug nakok aɗe, daug eɗua dayom bia tuaɗiom.

⁵² Jesus Nug amu hewowa, Nug mana mettak danab okkai, Kayaknu mettid lag gumaknu ban daup ikkilkad, amu Juda dilag ikki danab, ag Nug aɗaglagnu uɗippig, Nug amu dilag aum. “Da nai tappe nak danab naute daattem amunu ag qep elab, daɗib ele aon aɗailkkulagnu uɗippig?

⁵³ Deɗ oh da ag ele Kayaknu mettid lag ooppa daamut, amge ag ii aɗailppig Anam amge haen imuam ahilag haen, amu Satan nug uɗat nuhig ahilagppa hette,” awa aum.

Pita nug Jesus ii doottenu aum

⁵⁴ Jesus Nug nai amu amelagppa ana male, ag Nug aɗan aon goppig. Ag Nug aon, mana mettak ikki danab laugppa ukkaegeg, Pita nug nakok piɗe dim lamatta ukkom.

⁵⁵ Amu danab ag lag amunu haɗap-ppa aab ilan uɗigna daaegeg, Pita ele oh daappig.

⁵⁶ Daaegeg, maɗi nid ahin laa Pita aab uɗikka dayeye antta, ah amu nug Pita pehettak neekkittatta, “Danab imu nug Jesus ele oipiɗ,” awa aum.

⁵⁷ Ah nug aum, amge Pita nug amegppa aum. “Ah, am iitta! Da Nug ii doottem,” awa aum,

⁵⁸ Nug anam awowa nakok dayeye amu, danab laa nug Pita antta nug amegppa, “Na ele nuhig danab laa,” awa aum. Amge Pita nug amegppa aum. “Danab, da am iittanab!” awa aum.

⁵⁹ Nug anam a, dimppa aua laippu anam ukke, danab laa nug Pitanu inam aum. “Danab umu nug am Galili danab amunu, genabnab, nug Jesus ele oh oipiɗ ele,” awa aum.

⁶⁰ Nug anam aum amge Pita nug aum. “Danab, da na nai ame amu, da na attem hena madittemnu ii doottem!” Nug anam aawo, matuk dawai paha gayom.

⁶¹ Anam he, Naɗi Nug eɗua Pita neekkitte, nug ameg qewoya, Pita aakku Jesusnu nai, “Tuqan imuppa na dahilnu, ‘Da Nug ii doottem,’ aon, haen ewam batak akkut. Na haen ewam anam appe, geha matuk dawai nug gaakku,” nai amu Pita daugppa doum.

⁶² Nai amu daugppa do, aakku Pita dimittim ukka, oo doyak huanak ele gayom.

Ag Jesus aon aon qedappig

⁶³ Amu danab ag Jesus gumappig ele amu, ag Nug aon aon qettan, Nug makkuɗppig.

⁶⁴ Ag lamenppa ameg qakkan, eppelagppa Nug iɗu owona amu, ag appig. “Kayak na ehanitteb, aun nug na oittom appe dootu!” aon appig.

⁶⁵ Ag anam henan, ag awa awa qettak kobol digdig laappa nuhigppa ele heppig.

Laala Jesus hettoɗidppig

⁶⁶ Anam amu, aam beebe, Juda dilag hettoɗiak okkai onig Sanhidrennu danab, mana mettak danab okkai amu ɗo mehuqak danab ele ag uɗin qagmeeg, ag Jesus aon gona, ag noolagppa meeg dayom.

⁶⁷ Nug appa dayeye amu, ag Nug amegppa appig. “Na genab Kristus daattem dayeb, na amu ig amenigppa a!” aon appig. Aeg amu Nug ag amelagppa aum. “Da ag amelagppa appi amu, ag oolagppa genab ii doomna,” awa aum.

⁶⁸ Ana Nug aum. “Da keeke laanu oɗ mattalom amu, ag nai dahil amu nob eɗun ii akkulag,

⁶⁹ amge dimppa Danab Bekkalag da, da Kayak Ɠagattag Oh Ele amu, da Nug eppeg naɗiap-ppa daakkul,” awa aum.

⁷⁰ Jesus anam a amu, ag oh appig. “Aakku amunu na am Kayak Bekkate?” aon appig. Aeg amu Nug amelagppa aum, “Ag anam atteb,” awa aum.

⁷¹ Anam a amu ag appig. “Ig danab laala danab imu eheɗ heumnu mattiglagnu ii mattimta. Nug nukka Nug oɗeppa aawo, ig nuhig nai aakku doomut,” aon appig.