Luk 2 - Nobonob Baibel

Maria Jesus menuom

^1-2 Amu Elisabet nug Layattak Jon menue, haen amu nakok dimppa Kwirinius nug Siria dilag gawana dayeye amu, Sisar Ogastus nug Rom danab oh onilkad bukppa yaalattak daaglagnu ɗo meum. Imuam haen anuqak ag onilag yaak uɗat amu heppig.

³ Sisar nug ɗo amu me, danab ah oh ag onilkad bukppa yaalattak daaglagnu ag appalag diigppa goppig.

⁴ Aria, Josep nug Dawit buɗub amunu, nug Galilinu aab Nasaret appanu aha, Juda wanppa Dawit appag diig Betlehem, nug appa ukkom.

⁵ Nug nug onig bukppa yaak daakkunu appa ukke, Maria ele oh gopiɗ. Maria, Josep ele a layam daapiɗ, amu Maria nug oo ele dayom.

⁶ Aa appa goya daaeheh, Marianu nid awak haen do,

⁷ nug nid naanaeg, am nid danab, nug Nug menuom. Menua, niiak lag ambeum amunu, nug bekka lamen elabppa ehakka, doɗ dilag ee lanak taɗaɗ ooppa me niiom.

Sipsip gumak danab ag Jesus doumnu dooppig

⁸ Amu tuqan amuppa Betlehem aab guguittak doɗ sipsip gumattak danab ag sipsip gumadna daaegeg,

⁹ Kayaknu engel gumatta ne, Naɗi binag amahlak oppiaawak ele ag taliliatta honaɗom. Honaɗe amu, ag baɗak eheɗ nau doyeg,

¹⁰ engel nug amelagppa aum. “Ag aib baɗappig. Da oo maɗoɗppan gamag ahak okkainu nai ena danab oh dilagnu awe nemi.

¹¹ Gemu deɗ imuppa Dawitnu aabppa, am Betlehem amu, appa ah laa nid awom. Nid amu Nug danab dilag Padal ii maknu ehanittak daatte; Nug amu Naɗi, Kristus.

¹² Ag Nug anidkkulagnu epponak keeke amu inam. Nug anig Nug lamen elabppa ehakka, doɗ dilag ee lanak taɗaɗ ooppa me niitte,” awa aum.

¹³ Engel nug amelagppa ana male, pahanab Kayaknu engel kuɗum hab aabppanu neeg, moitan daanna, ahi ettana appig.

¹⁴ “Kayak Nug attannab daatte; ig Nug binag amahlak oppiaawak ele metu! Wanppanu danab, ag nuhignu daatteb amu, ag maɗoɗ mattom,” aon appig,

¹⁵ Engel ag anam awona, ag eɗun hab aabppa teeg, sipsip gumak danab ag ahan, akka akka nai inam madippig. “Ig Betlehem gota, kobol Naɗi Nug amenigppa aum amu anidtu!” aon appig.

¹⁶ Anam ana amu ag paha gona Maria, Josep, amu nid yuɗ ele, nug doɗ dilag taɗaɗppa niieye, anattona,

¹⁷ ag eɗun gonana, ag danab amelagppa nid amunu nai dooppig amu ag mehuqppig.

¹⁸ Mehuqeg doona amu ag oolag ottaie, dabmak kuɗum aoppig.

¹⁹ Amge Maria nug nai amu ooppa me dayeye, dabmettom.

²⁰ Anam dayeye amu, sipsip gumak danab ag oolag gamag ahehe, eɗun gona, ag kobol oh ag amelagppa anidna, nai daulagppa dooppig ele amu, ag amunu Kayak binag amahlak oppiaawak ele, aria onig okkai ele meppig.

Josep wau ele Jesus aoya, Kayaknu mettid lakka gopiɗ

²¹ Dimppa, deɗ eblaih ewamppa, amuam nid nakok gaɗa otaɗaknu deɗ amu, anig mameg ele aa Nug onig Jesus ataɗpiɗ. Nug anig ooppa ii dayeye, engel nug onig amu akkulagnu aum.

²² Aria ah nid awak dimppa beɗu babaittak daakkunu, Josep, Maria ele aa ahilah mana mettak amu haknu haen Moses ɗoppa yom bia be, aa nid Naɗi eppegppa mekkulahnu Jerusalem tepiɗ.

²³ Kayaknu ɗoppa Israel danab ag anam hekkulagnu yaak daatte am inam. “Nid danab tatamnu, ag anilkad menuadppeg, ag diin Naɗi eppegppa maadppeg, ag nuhignu tituana mettak daaglag.”

²⁴ Aa anam hekkulahnu teya amu aa Maria beɗu babaittak daakkunu mana mettak amu ele hekkulahnu tepiɗ. Naɗinu ɗoppa, amu haknu yaak inam daatte. “Ag uppuɗil beɗulag nakok aɗit main Kayak mettaglag o iitta uppuɗil beɗulag okkai nag aɗit main metteg!”

²⁵ Haen amuppa danab laa Jerusalem dayom, nug onig Simeon. Nug Kayak noobppa tutukku oiyaya, Kayak binag ena maama, Israel dilag ehanattak danab ameg meum. Kayak Ouɗi nuhigppa dayom.

²⁶ Anam amu Kayak Ouɗi Nug danab amu nug paha ii mauhma. Iitta. Tatam nug Naɗinu Kristus anittowa, dimppa nug mauhkkunu ippunittom.

²⁷ Aria, Josep wau ele gopiɗ, deɗ amuppa Kayak Ouɗi Nug he, Simeon nug aha ukka, Kayaknu mettid lag ooppa no, anig mameg ele aa nid nakok Jesus omalya, ɗo atte bia hekkulahnu tepiɗ.

²⁸ Teeh, Simeon anatta, nug nid awa, eppegppa aɗa, Kayak binag ma aum.

^29-31 “O Naɗi, na anukka da, nahip maɗi nid, na da amelppa da nid imu, nahip Padal ii maknu ehanittak danab, na danab ah oh anidna dooglagnu me neum ele amu, da anidkkulnu ame amu, da gemu iikku amelppa anidmi amunu, da mauhkkul am nai iitta.

³² Nug iitta aɗi ag nahip ib anidkkulagnu, Nug Israel ag binag amahlak oppiaawak ele aoglagnu amahlak daatte,” awa aum.

³³ Nug anam a amu, Josep, Maria ele aa Simeon Jesusnu anam mattie doya, aa nai amunu dabmak kuɗum aopiɗ.

³⁴ Simeon anam ana, nug itittak ena matowa, nid anig Maria amegppa aum. “Doye, nid imu heeb, Israel danab ah kuɗum ag nena qekkulag, amge Nug heeb, kuɗum ag eɗun ahaglag. Nug am Kayak anidkkunignu epponak keeke daakku, amge danab kuɗum nuhignu nai nau akkulag.

³⁵ Amunu diig am, danab kuɗum dilag dabmak aakku miag atiak daakku. Amu oo doyak okkai, qep aegppa yaak bia, na yaaidkku,” awa aum.

³⁶ Aria, propet ah laa ele dayom am onig Ana. Nug kaino ma malom. Nug Aser buɗub, Panuel aɗeg. Anukka nug danab awe, gamu ele maɗ eblaih aɗitib daapiɗ.

³⁷ Anam daayya, nug gamu mauhe, qab ma, hamu maɗ 84 dayaya, nug Kayaknu mettid lag ii uuttom. Nug ee ohnu kud ma dayaya, unuqittatta, tuqan amun ele Kayak noobppa dup noa binag maama dayom.

³⁸ Haen amuppaib nug ele uɗia, Kayak amegppa, “Ena heme,” aum. Anana, nug nid amunu nai mehuqa, danab oh ag qagaiettakppanu eɗua uhuqak, ag ehanittak amu Jerusalem appa uɗikkunu ameg meppig ele, nug ag Jesusnu amelagppa aum.

³⁹ Amu aa keeke oh Naɗinu ɗo atte bia heya malaeh, ag Galili goya, ahilah aab Nasaret, ag appa goppig.

⁴⁰ Gona daanna, nid ena ma, doyak dabmak ena okkainab awa, ɠagattag ele awe, Kayaknu ehanittak okkai hamu megatte amu, nuhigppa dayom.

Jesus maɗ 12 dayaya, Kayaknu mettid lakka ukkom

⁴¹ Amu Jesus anig mameg ele aa haen oh maɗ ohppa Pasowanu Hobul hekkulahnu Jerusalem tedapiɗ.

⁴² Haen Jesus Nug maɗ nuhig 12, aria ag hobul amunu kobol dim lamidna, Jerusalem teppig.

⁴³ Dimppa Pasowa Hobul amu male, ag eɗun ukkaegeg, Jesus Nug Jerusalem dayom, amge Nug mameg anig ele aa Nug appa dayom amu aa ii doopiɗ.

⁴⁴ Aa ahilah dabmakppa, “Nug danab oolagppa oitte,” ayaya, deɗ laippu oiyeh, tueb me, aa baeltippa mudippan lailti oolagppa ele Nug madipiɗ.

⁴⁵ Aa madipiɗ amge aa ii anidpiɗ amunu, aa Nug mattiya anidkkulahnu eɗuya, Jerusalem gopiɗ.

⁴⁶ Goya, aa Nug mattieheh, deɗ aɗit ukke, dimppa deɗ ewamppa aa Nug Kayaknu mettid lag ooppa dayeye anidpiɗ. Nug Juda dilag ippunittak danab oolagppa dayeye, ag nai mattiegeg doya, Nug eɗua oɗ madette daappig.

⁴⁷ Amu danab oh ag nuhig nai dooppig ele, ag nuhig diignu doyak tutukku, nuhig oɗmaknu nob elenu dabmak kuɗum aoppig.

⁴⁸ Daaegeg, mameg anig ele aa Nug anidya, aa ottaiya, dabmak kuɗum aoya, anig Nug amegppa aum. “O nid dahil, na aɗinu inam he, i inam oittep? Na mamen nug da ele i oonih uugnab dayeye, na mattidmuɗ,” awa aum.

⁴⁹ Anam a amu Nug eɗua amelahppa inam aum. “A aɗinu ahaya, da mattiɗttep? Da Mamel laugppa daakkulnunab daatte amu, aa iite doottep?” awa aum.

⁵⁰ Nug anam aum amge nai Nug amelahppa aum amu aa diig ii doopiɗ.

⁵¹ Aria, Jesus Nug aa ele eɗun, Nasaret gona, Nug aa oɗelah dim lamittette, anig nug keeke amu ohnu ooppa me dayeye, dabmaama dayom.

⁵² Amu Jesus Nug ena meeme, nuhig doyak ele okkai meeme, Kayak noobppa, danab noolagppa ele Nug ena oiya, tuɗitta he, ena dooppig.