Luk 1 - Nobonob Baibel

Luk nug nai imu Tiopilusnu yom

¹ O danab naɗi Tiopilus, danab kuɗum ag tatam keeke ig oonigppa beppig, amunu nai yaappig.

² Digmakppanu ukke batakppa danab ag keeke amu anidppig ele ag aeg doout yaappig. Ag am Nai Ena mehuqak danab daanna, nai amu aeg doomut.

^3-4 O danab naɗi Tiopilus, na ele keeke amunu aeg doome. Aeg doome amunu, da ele na nai doome am genabnab dookkutnu nahipnu nai amu baula yaakkulnu ool dayom amunu, da keeke amu digmakppanu ukke batakppa ele ohnu oɗmak tutukku elelenab hei, aeg doyen, iikku eleleppa yaattem.

Engel Sekaraia amegppa nid menukkunu aum

⁵ Aria, haen Herot okkai nug Juda dilag king dayeye, mana mettak danab laa dayom. Nug am ameg laa onig Abaiya ameg, amu ooppanu, nug onig Sekaraia. Nug wau am onig Elisabet. Aa oh am Aron buɗub.

⁶ Aa oh Kayak noobppa tutukku oittapiɗ. Aa Naɗinu haknunab anak, ɗo nai oh ele Kayaknu neekkakppa eleleib dim lamidpiɗ.

⁷ Amge aa nid iitta. Elisabet nug ah mattoi amunu aa hamu oiya, kaino mepiɗ.

⁸ Aria, haen laa Sekaraia laikkud ele, amuam Abaiya ameg amu, ag maɗi ahilag hekkulagnu haen be, ag henan daanna amu, Sekaraia nug ele Kayak noobppa mana mettak uɗat nuhig heum.

⁹ Nug heehe, mana mettak danab kobolppa om ena yaakppa amu ag nug ukka, kalu danab ile muttuɗig enanag bette ele, nug amu amotkkunu meeg, nug amu hekkunu Naɗinu mettid lag Oo Gun Ele amuppa noum.

¹⁰ Kalu danab ile muttuɗig enanag bette amotom, haen amuppa danab ah kuɗum ag dimittim qagmena, unuqidnana daappig.

¹¹ Daaegeg, Sekaraia nug uɗat nuhig heehe, Naɗinu engel nug kalu muttuɗig enanag ileb baknu qaɗab heqo laih naɗiappanu hibaitta dayeye, Sekaraia nug anttom.

¹² Sekaraia engel antta, nug huan ottaia, oo ele huana baɗom.

¹³ Oo baɗom amge engel nug Sekaraia amegppa aum. “Na aib baɗame. Unuqittak nahip amu, Kayak Nug aakku doyom. Na waat Elisabet nug geha nid danab menueb, na nid onig Jon ataɗkkut.

¹⁴ Geha na oot enanagnab dayeb, maɗoɗppan gamag ahak ele dooppe, danab ah kuɗum ele nug doumnu gamalag ahakku.

¹⁵ Nug Naɗi noobppa onig am binag ele daakku. Nug wain amu kaaka qaknu le laa oh ele ii lama. Nug anig ooppa dayebeb amu Kayak Ouɗi am nug ooppa ambekku.

¹⁶ Dimppa nug heeb, Israel danab kuɗum ag Naɗi, ahilag Kayak, ag nuhig kobol dim lamidkkulagnu dabmebeppeg, ag oolag eɗukku.

¹⁷ Nug Kayaknu propet Elaiyanu hak ɠagattag, ebehi ele, nug amubia awa, Naɗi noob awa, anuqa ukka heeb, danab ag ahilkad nid naunau ele oo mak daaglag. Nug heeb amu, nai tappe nak danab ag oolag eɗueb, ag genab tutukku hak danab dilag doyak dabmak ena ele aon daaglag. Nug heeb, danab ah kuɗum Naɗi uɗikkunu babaittak daaglag,” awa aum.

¹⁸ Nug anam a, Sekaraia nug engel amegppa aum. “Da attem heina, nai amuam genab daatte dookkul? Da kaino memi, amu ah dahil ele kaino meum,” awa aum.

¹⁹ A amu engel nug oɗeppa awa aum. “Da am Gabriel. Da Kayak noobppa daattem, amu Nug he, da amenppa nai ena imu appi dookkutnu uɗimi.

²⁰ Amge na da nai ami amu ootppa genab ii doome amunu, na nai madikkutnu, oɗenppa oqotti laa hekkutnu ele elele iitta daakkut. Iitta. Na anam daappe ukkeb, haen keeke amu oh genab beeb, na eɗun nai madikkut. Da nai ami amu haen dob, genab meu bekku,” awa aum.

²¹ Aria, engel nug nai amu mattieye, Sekaraia nug lag ooppa dayeye, danab ah ag nug ameg mena daanna, dabmak kuɗum aona, akka akka appig. “Kayaknu mettid lag amuppa keeke attem be, nug haen elab daatte?” aon appig.

²² Dimppa nug dimittim doa, nug oɗeppa ag amelagppa nai akkunu elele iitta dayom. Anam amu ag dooppig, nug Kayaknu mettid lag ooppa tulegleg laa anttom. Aɗinu? Nug eppegppaib nai mattiak bia heum; nug oɗeppa nai laa madikkunu elele iitta.

²³ Aria, anam daye dimppa Sekaraia nug nuhig uɗat haen, Kayaknu mettid lakkanu, amu male, nug eɗua appagppa ukkom.

²⁴ Ukka dayeye, dimppa nug wau Elisabet oo ele daya, nug kalam tanig ele lakka lokkuma dayaya nug aum.

²⁵ “Naɗi Nug dahilnu oo doye ehaniɗa, uɗa nak dahil danab oh amelagppa oppiom,” awa aum.

Engel Maria amegppa Jesus menukkunu aum

²⁶ Amu Elisabet nug oo ele dayeye, kalam eblaih laippu ele ooppa Kayak Nug engel Gabriel me, Nug Galilinu aab Nasaret, appa ukkom.

²⁷ Nug nai awa, ah makkun laa danab aokkunu tituanppig ele gumitta ukkom. Danab ah aokkun dayom am onig Josep; nug Dawit buɗub. Ah makkun am onig Maria.

²⁸ Gabriel nug Maria gumitta noa, humitta aum. “O ah makkun, na maɗoɗ ele daye! Naɗi Nug na itittom. Nahip itittak ena am ah laa oh dilag itittak ena eɗidtte. Nug na ele daattep,” awa aum.

²⁹ Maria nug nai amu doya, nug ottaia dabmak kuɗum awa, nug nukka nuhig dabmakppa aum. “Nai amu attemunab?” awa aum.

³⁰ Anam a amu engel nug amegppa aum. “Maria, na aib baɗame. Kayak nahipnu oo ena daatte.

³¹ Doye, geha na oot ele daanna, nid danab menuna, na Nug onig Jesus ataɗkkut.

³² Nug onig am binag ele daakku. Ag nuhignu, ‘Kayak Attannab Laa Oh Eɗattak bekka,’ aon akkulag. Kayak Nug heeb, nug king alag Dawit dayom bia daakku.

³³ Nug haen oh Jakop buɗubnu king daakku. Nuhig ɗo maɗoɗ am ii tuqa aoma,” awa aum.

³⁴ Anam a amu, Maria engel amegppa aum. “Keeke amuam attemutai bekku? Da danab ii awen, ah makkun daattem,” awa aum.

³⁵ Anam a amu, engel nug oɗeppa awa aum. “Geha Kayak Ouɗi nahip-ppa uɗieb, Kayak Attannab Laa Oh Eɗattak, nuhig ɠagattag na tonidkku amunu, na nid oppiaawak ele menukkut amu, ag nuhignu, ‘Kayak Bekka,’ aona akkulag.

³⁶ Doye, na tiin laippu Elisabet nug kaino meum, amge nug oo ele. Nug nid danab menukku. Anukka nug nid menuaknu elele iitta, amge gemu nug oo ele dayeye, nuhig kalam eblaih laippu ele daatte.

³⁷ Antte! Kayak Nug keeke oh hekkunu elele,” awa aum.

³⁸ Anam a amu, Maria nug aum. “Da amu Naɗinu maɗi ah. Na ame bia amu, Nug dahilppa anam haɗ!” awa aum. Awa a amu, engel nug eɗua ukkom.

Maria Elisabet gumitta ukkom

³⁹ Engel ukke haen amuppa Maria nug aha, paha Juda wanppa qauko qauko daattebppa, appa aab laappa ukkom.

⁴⁰ Ukka, Sekaraia laugppa ta, nug Elisabet humittom.

⁴¹ Anam he amu Elisabet nug Marianu nai amu doyeye, nid ooppa niiom amu nug ottaia, oola te, Kayak Ouɗi Nug Elisabet ooppa ambeum.

⁴² Nug ooppa ambe, Elisabet nug Maria amegppa baag okkaippa aum. “Na am itittak ena ele. Nahip itittak ena amu ah laa oh dilag itittak ena eɗidtte, amu na ootppanu nid, Nug ele itittak ena ele.

⁴³ Naɗi dahil amu, Nug anig nug dahilnu ii helobia amge ena da gumiɗa uɗiom daatte. Nug anam heum, amge da am ah enate nug anam helo?

⁴⁴ Doye, da daulppa nahip humittak dooiyi, da oolppa nid nug ele gamag ahe, nug ottaia, oola teum.

⁴⁵ Naɗi a, na ootppa genab doome amunu, na Naɗinu itittak ena aome daattem. Nug aum amu, amuam genab anam bekku.” Elisabet nug anam aum.

Marianu ahi

⁴⁶ Elisabet nug anam a amu Maria nug aum. “Da ool am Naɗi binag amahlak oppiaawak ele medatte.

⁴⁷ Padal ii maknu ehanittak dahil am Kayak. Da nuhignu maɗoɗppan gamag ahak doottem.

^48-49 Aɗinu? Da am nuhig maɗi ah, keeke hamu bia, amge Nug dahilnu oo doyom! Kayak Ebehi Oh Ele Nug keeke naɗinab dahilppa heum amunu gemu, butti aɗi ele buɗub buɗub doobob, danab ah amu ag akkulag. ‘Kayak Nug itittak ena okkai nug mettom,’ aon akkulag. Nug onig am Oppiaawak Ele.

⁵⁰ Buɗub buɗub doobob, Nug danab ag nuhignu ebehilag oh bodoetta le mette, Nug amu dilagnu oo gai-iitta doya oo metta ehanadtte.

⁵¹ Nug nuhig ɠagattagppa uɗat okkainab heum. Ao, Nug he, dada danab ag oolna, tamtam gona oitteb.

⁵² Nug king ebehilag ele tabatte noeg, danab onilag iitta amu humattom.

⁵³ Danab enug aqak dooppig ele amu Nug he, oolag dittiom. Ao, danab ag enulag ele amu, Nug aɗatte, ag keeke laa ii aɗappig, hamu goppig.

^54-55 Nug maɗi nid nuhikkud, amuam Israel danab amu, nug ah ehanattom. Nug ig alankad Abraham, nug buɗub ele, Nug amu dilagnu hanhan oo gai-iitta doya oo matta ehanadkkunu ig mamelkad aɗi amelagppa aum, Nug nai amu daug ii atitte. Iitta. Nug anam hette,” awa aum.

⁵⁶ Maria nug anam ana amu, nug Elisabet ele kalam ewam anam dayoya, nug eɗua appagppa ukkom.

Elisabet Layattak Jon menuom

⁵⁷ Maria nug eɗua appagppa ukke, Elisabet nug nuhig nid awak haen be, nug nid danab menuom.

⁵⁸ Menue amunu Elisabet mudippanu amu nuhikkudppa ele ag Naɗi nuhignu oo gai-iitta doya oo metta ehanittom doona, ag nug ele maɗoɗppan gamag ahak dooppig.

⁵⁹ Amu deɗ eblaih ewamppa ag nid gaɗa otaɗkkulagnu gona, ag nid amu nug mameg onig Sekaraia oela qettaglagnu appig,

⁶⁰ amge nid anig nug aum. “Iitta! Ig nug onig Jon ataɗkkunig,” awa aum.

⁶¹ A amu ag nug amegppa appig. “Na baenadppa ag onilag anam laa ele iitta,” appig.

⁶² Ana, ag eppelagppa nid amu nug onig aun akkulagnu nug mameg oɗ medappig.

⁶³ Eppelagppa anam heeg amu, Sekaraia nug eppegppa yaaknu uɗug nug mettaglagnu heum. He mettaeg amu nug, “Nid onig am Jon,” yom. Anam ye amu ag ottaina dabmak kuɗum aoppig.

⁶⁴ Nug nid onig ye anidna, ag dabmak kuɗum aoegeg amu, haen amuppanab Sekaraia nug oɗe oppate, lemaɗu uug iitta me, nug nai mattiaya, Kayak binag meum.

⁶⁵ Anam he, nug mudippanu laikkud ag oh baɗappig. Aria ag ahan, nai amu tuɗitteg, Juda wanppa qauko qauko daatteb, aben amu ohppa ukkom.

⁶⁶ Danab oh ag nai amu doona oolagppa dabmak kuɗum aona appig. “Dimppa nid amu ena ma amu nug aɗi hekku?” aon appig. Aɗinu? Naɗinu ɠagattag nug ele dayom amu ag anidppig.

Sekaraianu ahi

⁶⁷ Amu Kayak Ouɗi Nug Jon mameg Sekaraia nug ooppa ambe, Sekaraia nug propet nai imu mehuqa aum.

⁶⁸ “Ig Naɗi, Israel dilag Kayak, Nug binag metu. Aɗinu? Nug uɗia, Israel danab nuhikkud qagaiettakppanu eɗua uhuqak ha mattom.

^69-75 Nug anukka nuhikkud propet oɗelagppa aum bia, Nug ig kekeɗ ihinkad eppelagppanu, amu danab laa ag ihinignu oolagppa nau ninig ele dootteb, Nug ig ag eppelagppanu ele eɗua awigkkunu, Nug ig mamenkad aɗi dilagnu oo gai-iitta doya oo metta ehanadkkunu, Nug nuhig nug tituana nai qakkak nai, amuam Nug ig alanig Abraham amegppa Nug onigppa nuhig nai ɠagattag qetta aum amu, Nug nai amu daug ii atimanu, amu Nug ig ihinkad kekeɗ eppelkadppa qagaiettakppa daamtanu ehanikkeb, ig baɗak iitta daat, Nug noobppa genab tutukku hak danab, oppiaawak ele ihinig deɗ oh daat, ig Nug waappa daat Nug oɗe dim lamidkkunignu elele daagnignu, Nug ig padal mematanu ehanittak danab ɠagattag, nuhig maɗi nid Dawit, nug buɗubppanu me uɗiom,” awa aum.

^76-77 Sekaraia nug anam ana, nug nai baula tuɗitta aum. “O nid dahil, na Naɗinu ib bappaidkkutnu, na Kayak, Nug danab nuhikkud hipunin uhuqa mettak ibppa eɗua diikkunu ippunadkkutnu amu na Naɗi noob aon, anuqna gokkut amunu ag nahipnu, ‘Nug am Kayak Attannab Laa Oh Eɗattaknu propet,’ aon akkulag

⁷⁸ Kayak ihinig Nug oo gai-iitta doya oo metta ehanittak kobol naɗi ele amunu, Nug ig ehanigkku. Geha Nug heeb, hab aabppanu amahlak uɗia, ig amahaligkku.

⁷⁹ Danab ag gatatuppa mauhkkulagnu miag daatteb amu, amahlak madakku. Nug ig ib maɗoɗ ele amu tappat gokkunignu ulum daakku,” awa aum.

⁸⁰ Aria, dimppa nid nug ena meeme, Kayak Ouɗi Nug ehanittom. Ehanittette, nug atu taɗakppa dayaya, dimppa Israel amelagppa Kayak nai digma mehuqom.