Lewitikas 8 - Nobonob Baibel

Mana mettak danab dayaknu baɗ awak

¹ Amu Yawe Moses amegppa aum.

² “Na gemu Aron, bekkod ele, amu ahilkad mana mettaknu uɗatnu bala ele, aria laittaknu goɗen, ib etta hipunin haknu ofa haknu makau dawai laippu, aria sipsip dawai aɗit, amu kaleg bret yis iitta ele amuppa daatte, amu ele, na amu oh diin,

³ dahil mettid haknu peh lag danab ah appa qagmetteb ele, lag amu od oɗeppa do! Diin dona amu, Israel danab ah ohnab appa qagmekkulagnunab appe doyeg!” awa aum.

⁴ Yawe anam aum amunu, Moses nug Yawenu nai dim lamitta he, danab ah ohnab ag mettid haknu peh lag danab ah appa qagmetteb ele, ag lag amu odppa qagmeppig.

⁵ Ag qagmeeg, Moses nug amelagppa aum. “Yawe Nug da aɗi hekkulnunab aum amu, gemu da hekkulnu hettem,” awa aum.

⁶ Anam awowa amu, nug Aron, bekkod ele diia doa he, ag le laappig.

⁷ Nug lamen nakok elab awa, Aron nuhigppa aɗuitte no, lamen elab ele aɗuitte no, nug lamen imuagppa matagiɗ bia qakka, nug lamen enanag-epod nuhigppa ma, lamen imuagppa matagiɗ biappa qakkom.

⁸ Aakku Moses nug momo tonaknu lamen Aron aɗuitte te, nug Urim, Tumim ele diiata, lamen amunu battam ooppa inatom.

⁹ Nug amu hewowa, nug igippan lamen Aron igippa ma, Yawe Nug Aron tituanom ippunadkkunu at laa golppa hak, amuam Yawenu tituanak daatte amu, nug amu lamen amu noobppa, Yawe Nug anam haknunab aum bianab meum.

¹⁰ Aria, Moses nug laittaknu goɗen awa, mettid haknu peh lag, amu keeke oh ooppa daatte ele, nug amu oh goɗen gokkaɗakppa tituanak heum. Nug anam heehe, keeke amu oh Yawenu tituana mettak daappig.

¹¹ Nug qaɗab haen eblaih aɗit ele tauɗ qedatta, qaɗabppan keeke oh, lenu tappiɗ, nuhig balal, baeg ele tauɗ qattom. Nug anam ha, nug keeke amu oh goɗen gokkaɗakppa tituanak haaha, nug Yawenu tituana mettak daaglagnu anam heum.

¹² Anam hewowa, amu nug Aron, nug Yawenu tituana mettak daakkunu, nug laittaknu goɗen laa awa, Aron mana mettak danab daakkunu goɗen gokkaɗakppa tituanom.

¹³ Moses nug anam hewowa, amu Yawe Nug anam haknunab aum bia, nug Aron bekkod diia doa, lamen nakok elab, nug lamen amu aɗualatte noeg, lamen matagiɗ imualagppa tagattowa, ikkilagppan lamen ele ikkilagppa itattom.

¹⁴ Moses nug amu ha mala, nug makau dawai, ib etta hipunin haknu ofa haknu awa, Yawe gumitta wana, Nug mette, Aron nug bekkod ele ag eppelag makau igippa meppig.

¹⁵ Ag eppelag igippa meeg amu, aria Moses makau dawai amu baag otaɗom dimppa, qaɗab oppiak ele daakkunu, Moses nug eppeg doɗo makau amunu tiigppa me no awa, manaknu ofa haknu qaɗabnu qeqeɗi waɗele ohppa meum. Amu tiig laih dayom amu, nug amu oh qaɗab diigppa gokkaɗom. Amunu Moses nug ib amuppa tiigppa he, qaɗab am Yawenu tituana mettak daya, Yawenu neekkakppa oppiaawak dayom.

¹⁶ Nug ittag ooppan keeke aɗak daatte oh, gamagnu maha nakok, amu aɗitta doɗo aɗit, ittalah ele, nug amu oh diia, qaɗabppa manatte eoppig.

¹⁷ Yawe Nug Moses anam haknunab aum bia, nug makau dawai kunum laih oh, amuam gaɗa, teppu, amu biig, biig ooppan biilag ele oh akka, nug haen tutu dayaknu aab kalak dimittim appa ukka, mane ewa, iitta meum.

¹⁸ Moses anam hewowa amu, nug sipsip dawai laa, manaknu ofa haknu awa, Yawe gumitta wana, Nug mette, Aron, nug bekkod ele ag eppelag igippa meppig.

¹⁹ Ag eppelag igippa meeg amu, aria Moses sipsip dawai amu baag otaɗowa, nug sipsip dawai tiig awa, qaɗab gigin waɗele ohppa tauɗ qettom.

²⁰ Anam hewowa amu, nug sipsip dawai amu tuqe, huppu huppu neeg, ikki, maha laala, amu ittag ele nug qaɗabppa mane ewom.

²¹ Amge Moses nug tatam gamagppan keeke, amuam oo, biig, uɗuag, keeke amubia, amu baekkud ele oh leppa ihalattowa, nug qaɗabppa sipsip dawai amu oh manaknu ofa ha manom. Amuam Yawe mettaknu aab aɗunu ofa aakku. Mana mettak amunu muttuɗignu, Yawe Nug ooppa ena dootte. Imu oh amu Yawe Nug Moses anam hekkununab aum bia heum.

²² Aakku Moses nug sipsip dawai laa amu awa, Yawe gumitta wana, Nug mettom. Sipsip dawai amuam baɗ awaknu epeɗiak. Aron, nug bekkod ele ag eppelag igippa meppig.

²³ Ag eppelag igippa meeg amu, aria Moses sipsip dawai amu baag otaɗowa, nug tiig laa awa, nug Aron daug naɗiap bamippa mewowa, eppeg naɗiap doɗo tanig amuppa mewowa, amu nug baeg naɗiap doɗo tanig, amuppa ele meum.

²⁴ Anam hewowa, nug Aron bekkod diia wana, ag daulag naɗiap bamippa mewowa, ag eppelag naɗiap doɗo tanig amuppa mewowa, amu ag baelag naɗiap doɗo tanig, amuppa ele meum. Nug tiig laih oh qaɗab gigin waɗele ohppa tauɗ qettom.

²⁵ Dimppa nug ittag, boob ittag ele, ittag ooppan keeke aɗak daatte oh, gamagnu maha nakok, aria aɗitta doɗo aɗit, ittalah ele, amu tuɗi naɗiap ele oh amu diiom.

²⁶ Amu nug kaleg bret yis iitta inak, Yawe noobppa daatte amu, nug kaleg amuppanu bret batappatak, yis iitta laippu, amu bret batappatak, yis iitta, goɗen ele kaboliak laippu, amu bisket teppu iitta, yis iitta laippu ele amu awa, ittag amu tuɗi naɗiap ele qaɗeppa maattom. Bret amu oh am kaleg, bret yis iitta inak, am kaleg amuppan awak.

²⁷ Nug keeke amu oh Aron, bekkod ele matte, ag aon, ag Yawe noobppa, huma epponitta mettaknu ofa heppig.

²⁸ Ag anam heeg amu, Moses nug amu oh ag eppelagppanu awa, manaknu ofa qaɗeppa ma, nug baɗ awaknu ofa heum. Amuam Yawe mettaknu aab aɗunu ofa aakku. Mana mettak amunu muttuɗignu, Yawe Nug ooppa ena dootte.

²⁹ Aakku Moses nug doɗ momo awa, Yawe noobppa huma epponitta mettaknu ofa heum. Yawe Nug Moses amegppa haknunab amegppa aum bia, Moses amu heum. Amu sipsip dawai momo teppu amu, amuam baɗ awaknu ofanu doɗnu momo amu, momo amu nuhig dayom.

³⁰ Dimppa, Moses nug laittaknu goɗen laa awa, tiig qaɗabppa dayom, amu laa ele awa, Aron beɗuppa, nuhig lamen ele tauɗ qettom; nug bekkod dilagppa ele anam heum. Nug ib amuppa he, Aron, bekkod ele, ahilkad lamen ele, ag oh Yawenu tituana mettak daappig.

³¹ Moses nug anam hewowa amu, nug Aron, bekkod ele amelagppa aum. Ag mettid haknu peh lag danab ah appa qagmetteb ele, ag lag amu odppa, Nug ag anam hekkulagnunab aum bia, ag doɗ teppu laa daatte amu, ag amu oh uhina, ag appa ag baɗ awaknu ofanu kalegppa bret daatte amu ele laig! Ag amu hekkulagnunab amu, Yawe Nug inam aum. “Aron, bekkod ele aguppa laig!” awa aum.

³² Doɗ teppute, o bret laihte daatte amu, ag maneb, ewa iitta maknu daakkuoitte.

³³ Ahilag baɗ awak kobol amu deɗ eblaih aɗit ele daakkun daatte amunu, ag aib mettid haknu peh lag danab ah appa qagmetteb ele, ag lag amu haɗap uuidna, keeke laala deɗ eblaih aɗit amu ooppa hekkulagnu goppig.

³⁴ Yawe Nug gemu ig hemut amu, amu oh am eheɗ haknu nob nau doɗ tiigppa iitta meeb elele medakkunu kobol ahilagnu hekkunignunab a, ig hemut. Yawe Nug ig hekkunignunab ana, ig amenigppa aum amunu ig hemut.

³⁵ Ag aib daulag atiom. Ag mettid haknu peh lag danab ah appa qagmetteb ele, ag lag amunu haɗap-ppa deɗ eblaih aɗit, amun tuqan ele, Nug ag aɗi hekkulagnu aum henan daaglagoitte. Ag ii mauhmananu, ag keeke oh Yawe Nug ag amuppa hekkulagnu aum amu, ag amu hekkulagoitte. Yawe Nug ag anam hekkulagnu da amelppa akkulnunab aum amunu, ag anam hekkulag.

³⁶ Yawe Nug Moses oɗeppa ag anam hekkulagnunab ippuanattom amu, Aron, nug bekkod ele ag anamib heppig.