Lewitikas 6 - Nobonob Baibel

¹ Yawe Nug Moses amegppa tuɗitta aum. “⌊Na Israel danab ah amelagppa nai imu appe doyeg!” awa aum. Nug anam a amu, Moses nug Israel amelagppa inam aum.⌋

² “Laa nug Yawe ippunittomnu oo metta ii uuak kobol ii dim lamitta, hipunin imu laa qekkutai: Nug laa dilag keeke, nug atognotte ele, nug amunu hambuppuak laa hekkutai, o nug aɗi laa hekkunu ana nai qakkom, nug amunu hambubukkutai, o nug keeke laa yab aokkutai, o nug laanu keeke nai mattiak nauppa, o ib eheɗ laappa aokkutai.

³ O nug laanu keeke laa qettoɗom anttowa, nug hambubukkutai, o nug gaɗappaib, keeke laanu Yawe noobppa amunu nai ɠagattag qetta akkutai, o nug hipunin laa qekkutai.

⁴ Nug hipunin amunu laa hekku amu, nug aakku hipunin heum daatte, nug beɗuppa aab ele. Nug aɗi keeke yab awom, o nug aɗi keeke lokkumakppa awaknu duttuna hak kobolppa awom amu, nug eɗua, mameg medakkuoitte. Nug laa dilag keeke dabmetta atognono qettoɗom, o nug aɗi keeke laa niieye antta, hambuppuakppa awom ele, nug amu ele eɗua mameg medakkuoitte.

⁵ O nug aɗi keekenu hambuppuak nai ɠagattag qetta ana awom amu, nug amu ele eɗua mameg medakkuoitte. Nug keeke amu ohppanu keeke nuhig daakkunu ii daatte ele amu eɗua, laa nuhigppanu awom amu, nug keeke amu, aria maha laa ele, 20 pesent tuɗitta medakkuoitte. Nug keeke amu deɗ nug eheɗ haknu ofa hekku amu, nug deɗ amuppa keeke amu eɗua medakkuoitte.

⁶ Nug eheɗ haknu ofa amu awa doa, mana mettak danab medakkuoitte. Nug mana mettak danab medatta, nug aakku Yawe medatte. Doɗ amuam sipsip dawai, amu nug beɗuppa eheɗ laa iitta ele daakku; doɗ amu nug doɗ ena laa silwappa daden metteb, am nuhig noob am, amubia daakkuoitte.

⁷ Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Yawe Nug hipunin amu ooppan aɗi hipunin heum ele, nug amu uhuqa medakku.” Moses nug anam aum.

Manaknu ofa, amunu nai laa

⁸ Amu Yawe Nug Moses amegppa aum.

⁹ “Na Aron bekkod ele amelagppa haknunab nai imu appe doyeg!” awa aum. ⌊Nug anam a amu, Moses nug Aron bekkod ele amelagppa inam aum.⌋ “Ag manaknu ofa uuppeg, qaɗabppa dayebeb, aab ewebeb ukka, wakkaɗkkuoitte.

¹⁰ Wagɗeb buttua mana mettak danab nug linen lamen gaɗappanu takka, nug amu qaɗeppan lamen linenppa hak ele takkowa, amu nug manaknu ofa hak, uhuɗ amu awa, qaɗab guguittak mekkuoitte.

¹¹ Nug anam hewowa, nug bala meum uɗowa, nug bala hanhan mette ele amu ma, uhuɗ amu awa ukka, haen tutu dayaknu aab kalak dimittim, appa aben dubuttid iitta eleppa mekkuoitte.

¹² Qaɗabppa aab am ewawa daakkuoitte; aab nug ii qauhkkuoitte. Buttua ohppa mana mettak danab nug aab ewawa daakkunu aab bau mewowa, nug deɗ ohppanu manaknu ofa aab amuppa kobol eleleppa mewowa, nug laippu dayaknu ofa hak, doɗ amunu ittag deɗ ohppanu manaknu ofa qaɗeppa ma, mana medakkuoitte.

¹³ Aab nug deɗ ohppa haen oh qaɗabppa ewawaib daakkuoittede, aib daulag atiom. Aab amu nug iinab qauhkkuoitte,” awa aum.

Ee aegnu ofanu nai laa ele

¹⁴ Amu Yawe Nug tuɗitta, nai imu ele aum. “Imuam ib dim lamitta, ee aegnu ofa haknu nai. Aron bekkod ag mana mettak imu akkan, qaɗab guguittak, Yawe toppa wakkulagoitte.

¹⁵ Mana mettak danab nug plaua enanag, olip goɗen ele kaboliak eppeg laippuppa appua, amu kalu danab ile muttuɗig enanag bette ele daugppa mak oh ele aokku. Nug amu laa oh ou daakkunu qaɗabppa mana, Yawe medakku. Mana mettak amunu muttuɗignu, Yawe Nug ooppa ena dootte.

¹⁶ Plaua eppeg laippuppa appuom amu, plaua amu manak malak, plaua biig laih oh am Aron, bekkod ele dilagnu ee daakku. Plaua amuppa bret yis iitta hak dimppa, ag mettid haknu peh lag danab ah appa qagmetteb ele, lag amu haɗap-ppa, aben amuam Yawenu tituanak daatte amu, ag appa lakkulagnu daakkuoitte. Aben amuam Kayaknu tituanak daatte amunu, ag appa lakkulag.

¹⁷ Ag plaua amu mainna, ag yis ele ii kabolimnanu, ag dabmenan hekkulagoitte. ⌊Yawe atte,⌋ ‘Da Yawe, da danab ah ag ee aegnu ofa, da meɗaglagnu dahilppa aon uɗippeg, da mana mettak danab ag ahilag ee daakkunu maha amu ag mattami,’ awa atte. Mana mettak amuam aab aɗunu ofa. Amuam ib etta hipunin haknu ofa, amu eheɗ haknu ofa ele, aa Kayaknu tituanaknab daattep, amubia ee aegnu ofa maha Aron, bekkod dilag amu, amu ele amubia aakku.

¹⁸ Mana mettak danab ag Yawe mettaknu aab aɗunu ofa hadatteb ele, amu maha laa am ahilag daakkunu tituanak daatte amunu, Aron buɗubppan danab aun nug ee aegnu ofanu maha amu lakkun elele, gemu, buɗub buɗub doobob, hanhan ele. Aun laa, o aɗi keeke laa ee amu lauɗidtte amu, ee amu heeb, nug Yawenu tituanak ba daakku,” awa aum.

Kayak uɗat digma hekkunu baɗ awaknu mana mettak haknu ippu laala

¹⁹ Yawe Nug imu ele Moses amegppa a, ⌊nug Israel danab ah amelagppa mattiom⌋.

²⁰ “Deɗ Aron bekkod ele ag mana mettak danab daaglagnu goɗen gokkaɗakppa tituanak aoglag, deɗ amuppa ag mana mettak inam hekkulagoitte. Ag 1 kilogram plaua enanag, ee aegnu ofanu aon, Yawe toppa uɗiglag. Ag maha laih amu buttua mana mettak hewona, maha laih amu tueb mana mettak hekkulagoitte.

²¹ Ag plaua, olip goɗen ele kabolin autna aona, aen mahappa manona, ag panappeg naunau neeb, amu ee aegnu ofa daakkunu, ag aon, Yawe gumidna wana, Nug mettaglagoitte. Ag anam hekkulag amu, Yawe Nug mana mettak amunu muttuɗignu ooppa ena dookku.

²² Mana mettak ikki danab bekka, nug mameg abenab aokkunu daatte, haen nug digma, mana mettak danab abenab awa daakku amu, nug deɗ nug goɗen laittakppa tituanak aotte, deɗ amuppa nug mana mettak amubianab ele hekkuoitte. Amuam oh Yawe tituana aum bia, nuhig daatte amunu, maneb iitta mekkuoitte.

²³ Mana mettak danab dilag ee aegnu ofa oh am anam maippeg, iittanab mekkuoitte. Maha nakoknab laa am lanaknu laa iinab daama,” awa aum.

Ib etta, hipunin haknu ofa haknu ippunu nai laa ele

²⁴ Amu Yawe Moses amegppa aum.

²⁵ “Na Aron, bekkod ele amelagppa nai imu appe doyeg!” awa aum. ⌊Nug anam a amu, Moses nug Aron, bekkod ele amelagppa inam aum.⌋ “Imuam ib etta hipunin haknu ofa dim lamitta haknu nai. Am ib etta hipunin haknu ofa haknu doɗ awa doak amu, ag doɗ amu aben ag manaknu ofa hekkulagnu baag otaɗtteb, ag aben amuppa, Yawe noobppa baag otaɗkkulagoitte. Mana mettak amuam Kayaknu tituanaknab daatte.

²⁶ Am mana mettak danab aun nug ib etta hipunin haknu ofa hekku amu, nug, ⌊mana mettak danab laa ele, ag⌋ mettid haknu peh lag danab ah appa qagmetteb ele, ag lag amunu haɗap-ppa appa daanna lakkulagoitte. Aben amuam Kayaknu tituanak daatte amunu, ag appa lakkulagoitte.

²⁷ Aun laa, o aɗi keeke laa doɗ teppu amu lauɗidtte amu, nug ele Kayaknu tituanak ba daakku, amu tiig, aun laa nuhig lamen qette amu, lamen amu ag aben Kayaknu tituanak daatte eleppa ihaglagoitte.

²⁸ Am wan waate laa, doɗ teppu amuppa battiak dayeb amu, ag aoɗkkulagoitte. Am tappiɗ laa brasppa hak, amuppate battiak dayeb amu, ag leppa pehettan ihaglagoitte.

²⁹ Mana mettak danab baegppan amu, amuppan danab oh ag mana mettak amu lakkulagnu elele. Amuam Kayaknu tituanaknab daatte.

³⁰ Amge mana mettak danab nug doɗ laa ib etta hipunin haknu ofa daattenu tiig awa, mettid haknu peh lag danab ah appa qagmetteb ele, nug tiig amu awa, lag amu ooppa Oo Gun Eleppa ukka, mana mettak amu tiigppa nug eheɗ haknu nob nau doɗ tiigppa iitta meeb elele medakkunu hette amu, laa nug doɗ amu teppu nakok laa iinab lama. Teppu amu manappeg, ewa iitta mekkuoitte.