Lewitikas 5 - Nobonob Baibel

Danab hipunin attem ha, nug ib etta hipunin haknu ofa hekkuoitte

¹ Aun nug laa kobol he antta doyom, diig amunu ⌊epeɗiak danab⌋ ag nug hettoɗiakppa aɗi anttomnu madikkunu onigppa eppeg, nug madikkunu uukku dayeb, nug aakku eheɗ ha, nug amunu bu aokku.

² O iitta, aun laa nug aɗi keeke Kayaknu neekkakppa dubuttid ele daatte, amuam doɗ dakkuɗ laa ii lanaknu epeɗiak daatte gaɗate, o doɗ manan laa, ii lanaknu epeɗiak daatte gaɗate, o doɗ laa ag oolag wan qeeqe oitteb, ag ii lanaknu epeɗiak daatteb gaɗate amu, nug amu laa aɗakku dayeb, nug aakku Kayak ele ouqa dayaknu elele iitta daakku. Nug aɗom iitai dookku, amge ib amuppa nug Kayak ele ouqa dayaknu elele iitta daya, beɗuppa aab ele daakku. Amu nug doɗ dakkuɗ laa anamtai, o doɗ manan laa anamtai, o doɗ naunau wanppa oitteb laa anamtai aɗakku amu, doɗ anam amu oh ag heppeg, nug Kayak ele ouqa dayaknu elele iitta.

³ O iitta, aun nug danab o ah beɗulagnu leppu nau keeke, Kayak Nug amunu am keeke dubittid ele dootte amu, nug amu aɗeb, diig amunu, nug Kayak ele ouqak daakkunu elele iitta daakku. Nug aɗom am iitai dookku, amge ib amuppa nug Kayak ele ouqa dayaknu elele iitta daya, nug amu doya, nug aakku beɗuppa aab ele daakku.

⁴ Iitta. Aun nug dabmak elele tutukku tatam ii awawa, nug nuhig nai ɠagattag qetta akku amu, nug diig genab tutukkunute, iitta eheɗnute anam hekku, amge nug hekku haenppa nug hamu, dabmak ii awawa, hekku dayeb, diig amunu dimppa haen nug heum doya, nug beɗuppa aab ele daakku.

⁵ Amunu aun nug ib amu ohppanu ib laappa hipunin heeb, beɗuppa aab ele daakku amu, nug hipunin miagib madikkuoitte.

⁶ Nug nuhig hipunin miag uhuqowa, nug hipunin amu heum, amunu nug sipsip balatte, o meeme balatte laa awa, Yawe toppa wakkuoitte. Amuam nuhig ib etta hipunin haknu ofa aakku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele medakku.

⁷ Danab nug sipsip laa awa wakkunu elele iitta dayeb amu, nug uppuɗil beɗulag nakok aɗit, o uppuɗil beɗulag okkai nag aɗit, nug amuppa hipunin heumnu mana mettak haknu awa, Yawe toppa wakkuoitte. Ai laa am ib etta hipunin haknu ofa dayeb, laa am manaknu ofa daakku.

⁸ Nug mana mettak danab toppa awa uɗikkuoitte. Nug awa uɗieb, mana mettak danab nug ai laippu laa ib etta hipunin haknu ofa hekkunu ai laa mana, Kayak medakku. Mana mettak danab nug baag itoɗikku, amge ii otaɗa aoma.

⁹ Nug anam hewowa, nug tiig laih qaɗab daug laih tauɗ qettowa, aria tiig laih oh heeb, madmad qaɗab diigppa nokkuoitte. Amuam ib etta hipunin haknu ofa aakku.

¹⁰ Aria, mana mettak danab nug ai laa amu awa, manaknu ofa haaha, amu haknu ɗo oh dim lamitta hekku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.

¹¹ Laa nug uppuɗil beɗulag nakok aɗit, o uppuɗil beɗulag okkai nag aɗit awa, anam hekkunu elele iitta daakku dayeb amu, nug hipunin heumnu, nug 1 kilogram plaua enanag, ib etta hipunin haknu ofa haknu awa wakkuoitte. Amuam ib etta hipunin haknu ofa amunu, nug olip goɗen amuppa ii mekkuoitte, o kalu danab ile muttuɗig enanag bette ele amu daugppa ii mekkuoitte.

¹² Nug plaua awa ukka, mana mettak danab medakkuoitte. Nug awa ukkeb, mana mettak danab nug eppeg laippuppa appua, maha amu laa oh ou daakkunu aokku. Anam ha, nug plaua eppegppa aɗatte amu, nug Yawe mettaknu aab aɗunu ofa qaɗabppa daatte qaɗeppa manakku. Amuam ib etta hipunin haknu ofa aakku.

¹³ Ib amuppa amu, mana mettak danab nug mana mettak amuppa heeb, danab aun nug aɗi hipunin laa amu oolagppa heum ele amu, hipunin amunu eheɗ haknu nob nau doɗ tiigppa iitta meeb elele metteb, Yawe Nug hipunin uhuqa medakku. Plaua laih oh amu, geha ee aegnu ofa hena hetteb, amubia mana mettak danabnu daakku.” Moses nug anam aum.

Eheɗ haknu ofa, mana mettak amu haknu ippu

¹⁴ Amu Yawe Nug Moses amegppa aum. ⌊“Na Israel amelagppa nai imu appe doyeg!” awa aum. Nug anam a amu, Moses nug Israel amelagppa inam aum.⌋

¹⁵ “Aun nug Yawe ippunittomnu oo metta ii uuak kobol ii dim lamitta, nug ii doyaya ib apiɗitta, aɗi keeke laa, amu Yawenu tituanak daatte amu, nug Yawe medakkunu daatte ii medatte, nug hipunin aakku hette. Laa anam hekku amu, nug aakku hipunin heum daakku amunu, nug sipsip dawai laa eheɗ haknu ofa haknu awa, Yawe toppa wakkuoitte. Doɗ amu nug beɗuppa eheɗ laa iitta ele daakku, amu doɗ amu nug doɗ ena laa silwappa daden metteb, am nuhig noob am, amubia daakkuoitte. Silwa amunu uug am, mana mettak lagnu melemel bia dayaɗ! Amuam eheɗ haknu ofa aakku.

¹⁶ Laa nug hipunin heum ele, nug mana mettak amu ii hak haenppa, nug aakku aɗi keeke Yawe medakkunu dayom ele amu metta, nug maha laa, 20 pesent atteb amu, nug laa amu ele tuɗitta medakkuoitte. Nug daden amu mana mettak danab metteb, mana mettak danab nug danab hipunin heumnu sipsip dawai, amuppa eheɗ haknu ofa ha, mana mettak amuppa nug heeb, eheɗ haknu nob nau doɗ tiigppa iitta meeb elele metteb, Yawe Nug hipunin uhuqa medakku.

¹⁷ Laa nug ii doyaya ib apiɗitta, Yawenu ɗoppa ⌊nuhig keekeppan⌋ keeke laa haknu aib daatte ele, nug amu tippalkku dayeb, nug aakku hipunin hekku. Anam amu, nug beɗuppa aab ele dayebeb, bu aokku.

¹⁸ Nug anam hewowa, haen nug eheɗ heum doya amu, nug sipsip dawai, eheɗ haknu ofa hekkunu awa wakkuoitte. Doɗ amu nug beɗuppa eheɗ laa iitta ele daakku, amu doɗ amu nug doɗ ena laa silwappa daden metteb, am nuhig noob am amubia daakkuoitte. Mana mettak amuppa amu, mana mettak danab nug hipunin danab amu ii doyaya heumnu heeb, eheɗ haknu nob nau doɗ tiigppa iitta meeb elele metteb, Kayak Nug uhuqa medakku.

¹⁹ Amuam eheɗ haknu ofa aakku. Amu danab nug mana mettak amu hekkunu diig am, nug Yawenu keekeppanu ɗo laa tippalom amunu, nug beɗuppa aab ele. Nug Yawe, nuhigppa hipunin heum,” awa aum.