Lewitikas 4 - Nobonob Baibel

Ib etta, hipunin haknu ofanu ippu

¹ Amu Yawe Nug Moses amegppa aum.

² “Na Israel amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Laa nug ii doyaya ib apiɗitta, nug Yawe aɗi keeke ii haknunab aum amu haaha, hipunin hekku amu, nug inam iikku hekku.

³ Laa amu hekku, nug mana mettak ikki danab daatte dayeb, nug Israel oh ag hipunin hekkulagnu elele daatteb bia hipunin hekku dayeb, nug Yawe toppa makau gaiɗ laa, ib etta hipunin haknu ofa daakkunu, beɗuppa eheɗ laa iitta ele amu awa, Yawe gumitta ukka, Nug medakuoitte.

⁴ Nug makau gaiɗ amu mettid haknu peh lag danab ah appa qagmetteb ele, nug lag amu odppa, Yawe toppa awa wakku. Wana, nug eppeg makau amu igippa mewowa, nug Yawe noobppa baag otaɗkkuoitte

⁵ Nug baag otaɗa, mana mettak ikki danab amu, nug makau amunu tiig laa awa, mettid haknu peh lag danab ah appa qagmetteb ele, nug lag amu ooppa nokku.

⁶ Nug noa, eppeg doɗo laa meeb, tiig amu ooppa nob, taula awa, nug haen eblaih aɗit ele Yawe noobppa Oo Gun Ele, Oo Gunnab Ele makkulaknu lamen guguittak tauɗ qedakku.

⁷ Mana mettak danab nug amu hewowa, nug tiig laa qeqeɗi waɗele oh, kalu muttuɗig ena ele manaknu qaɗabppa daatteb, qaɗab amuam mettid haknu peh lag danab ah appa qagmetteb ele, lag amu ooppa, Yawe noobppa daatte amu, nug qeqeɗi amuppa mekku. Makau tiig laa oh amu, nug mettid haknu peh lag danab ah appa qagmetteb ele, lag amu odppa, manaknu ofa haknu qaɗab diigppa, appa gokkaɗkku.

⁸ Mana mettak danab nug makau gaiɗ amu, ib etta hipunin haknu ofa daatte, nug makau gaiɗ amu ittag ooppan keeke aɗak daatte oh, nug amu awa,

⁹ nug aɗitta doɗo aɗit, ittalah ele, maɗog guguittak daattep, gamagnu maha nakok ele aokku. Danab nug aɗitta doɗo awawa, nug gamagnu maha nakok ele awaɗ!

¹⁰ Amu nug makau okkai ebehi ele dawai, o makau okkai ebehi ele anig, amuppa laippu dayaknu ofa hetteb, amu bianab aakku hekku. Mana mettak danab nug anam hewowa, nug manaknu ofa haknu qaɗabppa manakkuoitte.

^11-12 Mana mettak danab nug anam aakku hekku, amge nug aben dubuttid iitta ele, haen tutu dayaknu aab kalak dimittim, nug appa makau gaiɗ huppu laa oh akka gokku. Amuam, makau gaiɗ gaɗa, teppu, ikki, baekkud, gamagppan keeke, oo, biig, uɗuag, am keeke laa oh ele. Nug akka ukka, aben ag uhuɗ gokkaɗttebppa appa, nug aab aɗuppa maneb ewa, uhuɗ mekku.

¹³ Amu Israel danab ah oh ag ii doonna ib apiɗidna, ag Yawe keeke ii haknunab aum amu henana, hipunin hekkulag dayeb, Israel danab ah oh ag oh beɗulagppa aab ele. Ge, Israel ag keeke amuppa hipunin ii doonna hekkulag dayeb amu, ag aakku beɗulagppa aab ele.

¹⁴ Amu haen ag hipunin heppig, ag amu doona, ag ib etta hipunin haknu ofa hekkulagnu, ag makau gaiɗ aon uɗiglagoitte. Ag doɗ amu aon, mettid haknu peh lag danab ah appa qagmetteb ele, ag lag amu odppa Yawe gumidna wana, Nug mettaglagoitte.

¹⁵ Appa amu, tamaniak ikki danab ag Yawe noobppa eppelag makau gaiɗ amu igippa mewona, Yawe noobppa baag otaɗkkulagoitte.

¹⁶ Ag anam heppeg, mana mettak ikki danab nug makau gaiɗ amu tiig laa awa, mettid haknu peh lag danab ah appa qagmetteb ele, nug lag amu ooppa nokkuoitte.

¹⁷ Nug noa, eppeg doɗo meeb, tiig ooppa nob, taula awa, nug haen eblaih aɗit ele Yawe noobppa Oo Gun Ele, Oo Gunnab Ele makkulaknu lamen guguittak tauɗ qedakku.

¹⁸ Mana mettak danab nug amu hewowa, nug tiig laa qeqeɗi waɗele oh, kalu muttuɗig ena ele manaknu qaɗabppa daatteb, qaɗab amuam mettid haknu peh lag danab ah appa qagmetteb ele, lag amu ooppa, Yawe noobppa daatte amu, nug qeqeɗi amuppa mekku. Makau tiig laa oh amu, nug mettid haknu peh lag danab ah appa qagmetteb ele, lag amu odppa, manaknu ofa haknu qaɗab diigppa appa gokkaɗkku.

¹⁹ Mana mettak danab nug doɗ ittag oh awa, qaɗabppa maikkuoitte.

²⁰ Nug ib etta hipunin haknu ofa, mana mettak ikki danab hipunin hewowa heum, amubia hekku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele medakku. Kayak Nug hipunin uhuqa madakku.

²¹ Am mana mettak danab nug makau gaiɗ amunu huppu laala daatteb, amu oh haen tutu dayaknu aab kalak dimittim awa ukka, appa maneb eokkuoitte. Amu laa nug ib etta hipunin haknu ofa hekkunu, mana mettak ikki danab hipunin hewowa heumbianab hekkuoitte. Amuam ib etta hipunin haknu ofa, Israel dilag tamaniak oh dilag aakku.

²² Am haen Israel dilag ikki danab laa nug ii doyaya ib apiɗitta, Yawe, nuhig Kayak, Nug keeke ii haknunab aum amu haaha, hipunin hekku dayeb, nug aakku beɗuppa aab ele.

²³ Haen nug hipunin heum doya amu, nug meeme dawai laa, eheɗ laa beɗuppa iitta ele amu awa, nug hipunin heumnu mana mettak hekkunu wakkuoitte.

²⁴ Nug eppeg meeme dawai amu igippa mewowa, aben manaknu ofa baag otaɗttebppa ele, appa Yawe noobppa baag otaɗkkuoitte. Amuam ib etta hipunin haknu ofa aakku.

²⁵ Nug amu heeb, mana mettak danab nug eppeg doɗo ib etta hipunin haknu ofanu tiigppa meeb noob awa, manaknu ofa haknu qaɗabnu qeqeɗi waɗeleppa mekku. Nug amuppa meeb, tiig laa oh am qaɗab diigppa gokkaɗkku.

²⁶ Am nug qaɗabppa, Yawe ele laippu dayaknu ofa hetteb bianab ha, meeme ittag oh maneb eokkuoitte. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.

²⁷ Aun laa Israel ooppa nug ii doyaya Yawenu ib apiɗitta, Yawe Nug keeke ii haknunab aum amu haaha, hipunin hekku dayeb, nug aakku beɗuppa aab ele.

²⁸ Haen nug hipunin heum doya amu, nug mana mettak haknu meeme balat, beɗuppa eheɗ laa iitta ele, amu awa, nug hipunin heumnu mana mettak hekkunu wakkuoitte.

²⁹ Nug eppeg am ib etta hipunin haknu ofa hekkunu doɗ amu igippa mewowa, amu manaknu ofa haknu abenppa, amuppa baag otaɗkkuoitte.

³⁰ Nug amu heeb, mana mettak danab nug eppeg doɗo doɗ amunu tiigppa meeb noob awa, manaknu ofa haknu qaɗabnu qeqeɗi waɗeleppa mewowa, amu tiig laih oh qaɗab diigppa gokkaɗeb nokku.

³¹ Am laa nug beɗuppa aab ele nug meeme ittag oh, ag laippu dayaknu ofa hetteb bianab doɗ beɗuppanu aokkuoitte. Nug anam heeb, mana mettak danab nug ittag qaɗabppa maneb eokku. Mana mettak amunu muttuɗignu, Yawe Nug ooppa ena dootte. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.

³² Am laa nug ib etta hipunin haknu ofa hekkunu haaha, nug sipsip awa dotte dayeb, nug sipsip balat eheɗ laa beɗuppa iitta ele, amuppa hekkuoitte.

³³ Nug eppeg am ib etta hipunin haknu ofanu doɗ igippa mewowa, aben manaknu ofa baag otaɗttebppa ele, appa Yawe noobppa baag otaɗkkuoitte. Amuam ib etta hipunin haknu ofa aakku.

³⁴ Nug amu heeb, mana mettak danab nug eppeg doɗo ib etta hipunin haknu ofanu tiigppa meeb noob awa, manaknu ofa haknu qaɗabnu qeqeɗi waɗeleppa mekku. Nug amuppa ma, tiig laa oh am qaɗab diigppa gokkaɗkku.

³⁵ Aun laa nug beɗuppa aab ele nug ag Yawe ele oolag laippu dayaknu ofanu sipsip-ppa, mana mettak hetteb bianab, nug sipsip amu ittag oh aokkuoitte. Anam heeb, mana mettak danab nug ittag qaɗabppa, Yawe mettaknu aab aɗunu ofa daatte ele, nug amu qaɗeppa maneb eokku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.