Lewitikas 3 - Nobonob Baibel

Laippu dayaknu ofa haknu ippu

¹ Am laa nug laippu dayaknu ofa hekkunu haaha, nug makau awa dotte dayeb, nug makau dawai laa, o makau anig laa awa, mana mettak hekku. Amu nug doɗ awa, Yawe gumitta doa, nug medatte amu, nug laa beɗuppa eheɗ laa iitta ele awa dokku.

² Laa nug mana mettak hette ele, nug eppeg doɗ amu igippa mewowa, nug mettid haknu peh lag danab ah appa qagmetteb ele, nug amu odppa baag otaɗkkuoitte. Mana mettak danab, Aron bekkod, ag doɗ tiig amu qaɗab gigin waɗele ohppa tauɗ qettaglag.

³ Laippu dayaknu ofa laih amu, nug Yawe medakkuoitte. Amuam Yawe mettaknu aab aɗunu ofa aakku. Maha laih nug mana, Yawe medakku, amuam ittag ooppan keeke aɗak daatte oh,

⁴ aria, aɗitta doɗo aɗit, ittalah ele, maɗog guguittak daattep, amu gamagnu maha nakok ele. Danab nug aɗitta doɗo awawa, nug gamagnu maha amu ele awaɗ!

⁵ Aron bekkod ag manaknu ofa ⌊buttua oh hetteb ele⌋ amu, ag amu qaɗeppa mena, qaɗabppa aab aɗuppa maiglag. Mana mettak amuam aab aɗunu ofa aakku. Mana mettak amunu muttuɗignu, Yawe Nug ooppa ena dootte.

⁶ Am laa nug laippu dayaknu ofa hekkunu haaha, nug sipsip, o meeme awa dotte dayeb, nug sipsip o meeme dawai laa, o, sipsip o meeme anig laa awa, mana mettak ha, Yawe medakku. Amu nug Yawenu doɗ awa dotte amu, nug laa beɗuppa eheɗ laa iitta ele amu awa dokkuoitte.

⁷ Nug sipsip nag laate mana mettak ha, nug awa, Yawe gumitta wana, Nug medakku.

⁸ Nug awa wana, nug eppeg igippa mewowa, mettid haknu peh lag danab ah appa qagmetteb ele, nug lag amu odppa baag otaɗkkuoitte. Aron bekkod ag sipsip tiig aon, qaɗab gigin waɗele ohppa tauɗ qettaglag.

⁹ Laippu dayaknu ofa laih amu Yawe medakkuoitte. Amuam Yawe mettaknu aab aɗunu ofa aakku. Maha laih nug mana, Yawe medakku, amuam boob ittag ele oh, gome ebehippa guguittak okkulak, amu ittag ooppan keeke aɗak daatte oh,

¹⁰ aɗitta doɗo aɗit, ittalah ele, maɗog guguittak daattep, aria gamagnu maha nakok ele. Danab nug aɗitta doɗo awawa, nug gamagnu maha nakok ele awaɗ!

¹¹ Mana mettak danab nug ee bia daakkunu qaɗabppa maneb eokku. Amuam Yawe mettaknu aab aɗunu ofa aakku.

¹² Aria, Nug meeme gaiɗ, o balat laate mana mettak ha, nug awa, Yawe gumitta wana medakku.

¹³ Nug awa wana, nug eppeg igippa mewowa, mettid haknu peh lag danab ah appa qagmetteb ele, nug lag amu odppa baag otaɗkkuoitte. Aron bekkod ag meeme tiig aon, qaɗab gigin waɗele ohppa tauɗ qettaglag.

¹⁴ Doɗ nug mana, Yawe medatte elenu amu, nug maha laih Yawe medakkuoitte. Amuam Yawe mettaknu aab aɗunu ofa aakku. Maha laih nug mana, Yawe medakku, amuam ittag ooppan keeke aɗak daatte oh,

¹⁵ aria, aɗitta doɗo aɗit, ittalah ele, maɗog guguittak daattep, amu gamagnu maha nakok ele. Danab nug aɗitta doɗo awawa, nug gamagnu maha nakok ele awaɗ!

¹⁶ Mana mettak danab nug qaɗabppa ee bia maneb eokku. Amuam aab aɗunu ofa aakku. Mana mettak amunu muttuɗignu, Yawe Nug ooppa ena dootte. Ittag oh Yawenu daatte amu, ag amu aib daulag atiom! Ag dabmekkulag.

¹⁷ Ag ittagte, o tiigte amu iinab lakkulagoitte. Ɗo imu buɗub buɗub doobob, ahilagnu hanhan daakkunu daatte.” Moses nug anam aum.