Lewitikas 27 - Nobonob Baibel

Keeke Yawe mettak ele eɗua awaknu nai

¹ Amu Yawe Nug Moses amegppa aum.

² “Na nai imu Israel danab ah amelagppa appe doyeg!” awa aum. ⌊Nug anam a amu, Moses nug inam Israel amelagppa aum.⌋ “Haen laa, haen amuppa, ⌊aɗi kobol laa hanhan ii bette ele,⌋ haen amuppa kobol amu danab laa, nuhigppa beeb, nug danab o ah laa nug Yawenu tituana mettak daakkunu genabnab hekkunu nai ana qagakku dayeb amu, nug danab o ah amu en mettakppa uhuqkkunu amu, nug daden inam mekku.

³ Am danab nug nuhig maɗ 20, ukka maɗ 60 ele gamagmag anam ele dayeb amu, ag 600 gram silwa da meɗaglagnu daatte. Silwa amunu uug am mana mettak lagnu melemel bia dayaɗ!

⁴ Am ah laa nug maɗ nuhig 20, ukka maɗ 60 ele gamagmag anam ele dayeb amu, ag 300 gram silwa meɗaglagnu daatte.

⁵ Am nid danab nug maɗ nuhig tanig ele ukka maɗ 20 ele gamagmag anam ele dayeb, ag 200 gram silwa da meɗaglagnu daatte. Nid ahin nug maɗ nuhig tanig ele ukka maɗ 20 ele gamagmag anam ele dayeb, ag 100 gram silwa da meɗaglagnu daatte.

⁶ Am nid danab nug maɗ nuhig kalam laippu ukka, maɗ tanig ele dayeb amu, ag 55 gram silwa meɗaglagnu daatte. Am nid ahin ah nug maɗ nuhig kalam laippu, ukka maɗ tanig ele gamagmag ele dayeb amu, ag 35 gram silwa meɗaglagnu daatte.

⁷ Am danab laa nug maɗ 60 eɗittak, ag 170 gram silwa da meɗaglagnu daatte. Ah laa nug maɗ 60 eɗittak, ag 110 gram silwa da meɗaglagnu daatte.

⁸ Am danab laa nug auntai Yawe medakkunu genabnab hekkunu nai ana qagakku dayeb, amge nug en mettakppa uhuqkkunu elele iitta amu, nug danab amu omala, mana mettak danab gumitta ukka, nug noobppa meeb, mana mettak danab nug danab amunu keeke am hettoɗia antta, nug gane mekkunu elele daatte antta, nug gane mekkunu akkuoitte. Nug daden melemel mana mettak danab nug meum ele anamppa daden mekkunu daatte.

⁹ Am aun laa nug doɗ laa, doɗ amuam mana, Yawe medakkunu elele amu, nug Yawe mana medakkunu nai ana qagatte, doɗ amuam Kayaknu tituanak ba daakku.

¹⁰ Nug doɗ amu awa, Yawe doɗ laa ii mettama. Nug doɗ atten Yawe medakkunu nai ana qakkom amu, nug doɗ amunab medakkuoitte. Nug doɗ atten medakkunu nai ana qakkom ele amu, doɗ amu beɗu ena ele dayeb amu, nug baolia, beɗu nau ele laa Yawe ii mettama, o beɗu nau ele dayeb amu, nug baolia, beɗu ena ele laa Yawe ii mettama. Am nug doɗ Yawe medakkunu nai ana qakkom ele, amu beɗu nau ele dayeb amu, nug baolia beɗu ena ele laa Yawe ii mettama. Am nug doɗ baolia, laa awa, Yawe medakku dayeb amu, doɗ tatamnu, gehanu ele, aɗit oh aa Kayaknu tituanak daaglah.

¹¹ Am aun laa nug doɗ ii lanaknu epeɗiak daatte ele, nug doɗ amu mana, Yawe medakkunu elele iitta, Yawe medakkunu nai ana qakkom dayeb amu, nug aakku doɗ awa, mana mettak danab toppa wana, nug noobppa mekkuoitte.

¹² Anam heeb, mana mettak danab nug doɗ antta, doɗ amuam doɗ beɗu enate, o doɗ beɗu nakok naute antta, daden maknu men doɗo gane antta mala, gane amunu akku. Nug amunu ab, laa nug nuhig nai ii baolima. Iittanab, aum anamib aakku daakku.

¹³ Am doɗ mameg nug doɗ amu tituanakppanu eɗua uhuqak hekkunu dabmekku dayeb amu, nug daden haknu men doɗo melemel gane, mana mettak danab nug aum, nug amu tuɗitta, 20 pesent laa ele ma, daden mekkuoitte.

¹⁴ Am aun laa nug lag nuhig Yawenu tituana medakku amu, mana mettak danab nug ukka neekka, lag amuam enate, naute antta, daden maknu men doɗo gane antta, men doɗo amunu akku. Nug amunu ab, laa nug nuhig nai ii baolima. Iittanab, aum anamib aakku daakku.

¹⁵ Amu lag mameg nug lag amu tituanakppanu eɗua uhuqak hekku dayeb, nug daden haknu silwa men doɗo melemel gane, mana mettak danab nug aum, nug amu tuɗitta, 20 pesent laa ele ma, daden mekkuoitte. Anam heeb, lag amu eɗua nuhig daakku.

¹⁶ Am aun laa nug wan maha laa, nug wan amu nug mameg eppegppanu nug aug daakkunu awom amu, nug Yawenu tituana medakku dayeb, mana mettak danab nug wan amu daden maknu men doɗo gane anidkkunu amu, nug wan amuppa bali ebakku amu, nug bali aeg kilogram gane tauɗkku amu dabmekku. Danab nug wan maha amuppa 20 kilogram tauɗkku dayeb amu, nug wan amu en mettakppa uhuqkkunu 600 gram silwa mekku, ⌊o nug bali aeg 40 kilogram tauɗkku dayeb amu, nug wan amu en mettakppa uhuqkkunu 1.2 kilogram silwa mekku⌋. Nug anam anam dabmekku.

¹⁷ Wan mameg nug maɗoɗnu gamag ahak dayaknu maɗ tituanak daatteppa wan amu Yawenu tituana medakku dayeb amu, nug men doɗo kunum oh eleleppa daden mekku.

¹⁸ Amge wan amu maɗoɗnu gamag ahak dayaknu maɗ tituanak daatte amu ukkeb dimppa, nug Yawenu tituana medakku dayeb amu, mana mettak danab nug maɗ gane baula ukkeb, maɗoɗnu gamag ahak dayaknu maɗ tituanak daatte eɗua dokku amu dabmetta mala, nug wan amu daden maknu men doɗo ganenab amu eleleppa ma, daden haknu mekku.

¹⁹ Am wan mameg nug wan Yawenu tituanak daakkunu Yawe mettom, nug wan amu tituanakppanu eɗua uhuqak hekkunu dabmekku dayeb amu, nug daden haknu silwa men doɗo melemel gane, mana mettak danab nug aum, nug amu tuɗitta, 20 pesent laa ele ma, daden mekkuoitte. Anam heeb, dad amu eɗua nuhig daakku.

²⁰ Amge wan mameg nug wan amu tituanakppanu eɗua uhuqak hekkunu oo ii heebeb ukkeb, maɗoɗnu gamag ahak dayaknu maɗ tituanak daatte bekku, nug wan amu tituanakppanu eɗua uhuqak heeb, wan amu eɗua nug eppegppa daakkunu elele iitta. Hanhan anamib daakku; nug eɗua wan amu mameg daakkunu elele iitta. O nug maɗoɗnu gamag ahak dayaknu maɗ tituanak daatte ii bak haenppa wan amuam Kayaknu daakkunu tituana mettak daakkunu awowa, amu dimppa nug ⌊eheɗ ha,⌋ danab laa, wan amu uɗat metteb ukkeb ukkeb, maɗoɗnu gamag ahak dayaknu maɗ tituanak daatte beeb malakku akku dayeb, nug wan amu tituanakppanu eɗua uhuqak heeb, wan amu eɗua nug eppegppa daakkunu elele iitta. Hanhan anamib daakku; nug eɗua wan amu mameg daakkunu elele iitta.

²¹ Haen maɗoɗnu gamag ahak dayaknu maɗ tituanak daatte, maɗ amu dob amu, wan amu eɗua mameg toppa ii wama. Iittanab, amuam Kayaknu tituanak daakku. Amuam wan laa Yawenuib nuhig pelemppa daatte, am amubia daakku. Amuam mana mettak danab dilag.

²² Am aun laa nug wan maha laa, nuhig wan, nug mameg eppegppanu nug aug daakkunu maha iitta, am wan maha laa, amu Yawenu tituana medakku dayeb amu,

²³ mana mettak danab nug maɗ gane dayebeb ukkeb, maɗoɗnu gamag ahak dayaknu maɗ tituanak daatte bekku amu dabmetteb ukkeb, nug men doɗo gane amu akku. Ab amu, wan mameg nug aakku men doɗo gane anak anamppa deɗ amuppa daden mekkuoitte. Am keeke Yawe Nug amunu nuhignu tituanak daatte anidtte.

²⁴ Am maɗoɗnu gamag ahak dayaknu maɗ tituanak daatte, maɗ amuppa amu, wan maha amuam eɗua, wan mamegnab, laa nuhignu daden meum ele, nug eppegppa wakku.

²⁵ Am mana mettak danab nug daden nob attem akkunu amu, nug men doɗo mana mettak lagnu melemel bia akkuoitte. Sekel laippu, aria gera 20 ele, aa oh ahilah uug am laippu.

²⁶ Ag makau okkai ebehi ele ⌊dawai⌋ tatamnu laate, o sipsip ⌊dawai⌋ tatamnu laate Yawenu tituanna mettaglagnu elele iitta. Doɗ amuam doɗ ⌊dawai⌋ tatamnu, am Yawenu aakku daatteb amunu, ag anam hekkulagnu elele iitta.

²⁷ Amge, doɗ ii lanaknu epeɗiak daatte ele, amunu laa ⌊dawai⌋ tatamnu laa dokku dayeb amu, doɗ mameg nug nug daden haknu men doɗo melemel gane, mana mettak danab nug aum, nug amu tuɗitta, 20 pesent laa ele ma, daden mekkunu elele. Amge nug doɗ amu tituanakppanu eɗua uhuqak amu ii hekku dayeb amu, mana mettak danab nug awa, nob ganenu meeb, laa nug daden mekku.

²⁸ Amge keeke laa danab nug amu he, Yawenuib nuhig pelemppa daatte amu, ag daden ha maknu, o en mettakppa uhuqaknu iinab hemana. Danab laate, o doɗ laate, o aug wan laate, amge keeke amu mameg nug keeke Yawenuib nuhig pelemppa daatte, nug keeke amu tituanakppanu eɗua uhuqak hekkunu elele iitta; ma heeb, laa daden mekkunu ele, elele iitta. Nug anam ii hema. Keeke laa Yawenuib nuhig pelemppa daatte, amuam Yawenu, tituanaknab daatte.

²⁹ Amu danab nug nauhkkun Yawenuib nuhig pelemppa daatte amu, laa nug en mettakppa uhuqkkunu elele iitta. Laa nug anam daatte amu, ag nug qeppeg mauhaɗ!

³⁰ Wanppan kehte, o ad meute laa obatak eblaih tanig ele ooppanu obatak laippu am Yawenu. Yawe Nug amunu nuhignu tituanak daatte anidtte.

³¹ Am na keh laate, o ad meu laate, obatak eblaih tanig ele ooppanu obatak laippu Yawenu daatte amu, keeke amu tituanakppanu eɗua uhuqak hekkut dayeb, na daden mekkutnu men doɗo, 20 pesent laa ele tuɗidkkutoitte.

³² Am nahip doɗ aɗppanu, doɗ eblaih tanig ele ooppanu laippunu amu, Yawe Nug amunu nuhignu tituanak daatte anidtte.

³³ Amu doɗ eblaih tanig ele ooppanu laippu amu, enate, o naute anamppa ii epeɗiglagoitte. Danab laa nug doɗ laa, nug doɗ amu doɗ laappa baoliak hekkutai. Aun laa nug doɗ laa baolia, laanu mekku dayeb amu, doɗ tatam, amu doɗ laa ele oh aa Yawenu tituanak daaglah. Aa mamelah doɗ aɗit amu tituanakppanu eɗua uhuqak heeb, aa eɗuya, nug eppegppa daaglahnu elele iitta,” awa aum.

³⁴ Yawe Nug ɗo imu oh, Israel ag dim lamidkkulagnunab ana, Sinai Qaukoppa Moses eppegppa meum.