Lewitikas 23 - Nobonob Baibel

Hobul dayaknu haen anen anen

¹ Amu Yawe Nug Moses amegppa aum.

² “Na Israel danab ah nai imu appe doyeg!” awa aum. ⌊Yawe Nug anam a amu, Moses nug ag amelagppa inam aum.⌋ “Hobul dayaknu haen epeɗiak laala daatteb, amu ⌊mana mettak danab ag appeg,⌋ haen amuppa, ag oh geha Yawe noobppa qagmena, dup nona binag mekkulagoitte.

³ Deɗ eblaih laippu oh amu ag uɗat hekkulagnu daatte, amge deɗ eblaih aɗit ele amuam sabat deɗ, am hik awaknu deɗ. Deɗ amuppa ag Kayak noobppa qagmena dup nona Nug binag mekkulagnu deɗ. Deɗ amu, aben ag adeppa adeppa daatteb amu, deɗ amuam sabat; am Yawe binag awaknu deɗ.

⁴ Yawenu sabat am anam daatte. Aria, amu ele tuɗittak am hobul dayaknu haen epeɗiak daatteb. Haen amuam ele ag Yawe noobppa qagmena, dup nona, Nug binag mekkulagnu haen. Anam ha dayaknu amu, ag maɗ anen anen ohppa haen epeɗiak eleleppa, ⌊mana mettak danab ag appeg, ag⌋ hekkulag.

Pasowa, amu Bret Yis Iitta Lanaknu Hobul Nakok ele haknu hobul

⁵ Hobul dayak haen tatam amu Yawenu Pasowa deɗ. Hobul dayak amuam kalam anuqaknu deɗ 14ppa, tuebnab, haen amuppa digmette.

⁶ Amu Pasowanu Hobul dayak malak amu, Bret Yis Iitta Lanaknu Hobul Nakok haen aakku kalam amunu deɗ 15ppa digmette. Yawe dabmettaknu hobul dayak haen amu, deɗ tuɗid ele dayeb ukkeb, deɗ eblaih aɗit ele aokku, haen amu ohppa ag bret yis iitta lakkulagoitte.

⁷ Hobul amunu deɗ digmakppa amu, danab ah ag ahilag uɗat ag hanhan hetteb ele uuna, ag Yawe noobppa qagmena dup nona Nug binag mekkulagoitte.

⁸ Am deɗ eblaih aɗit amu anen anen ohppa, danab ah ag doɗ laa Yawe mettaknu aab aɗunu ofa daakkunu aon, Yawe gumidna wana, Nug mettaglagoitte. Deɗ eblaih aɗitppa amu, danab ah ag uɗat ag hanhan hetteb ele uuna, Yawe noobppa qagmena, dup nona binag mekkulagoitte,” awa aum.

Ee Tatam Oɗue Digma Awaknu Hobul

⁹ Aakku Yawe Nug Moses amegppa aum.

¹⁰ “Na Israel danab ah nai imu appe doyeg!” awa aum. ⌊Nug Moses amegppa anam a amu, Moses nug ag amelagppa inam aum.⌋ “Haen ag wan da ag madattem ele, ag amuppa tena daanna, ag ee aeg tatam oɗuttenu ehag laa akkan, mana mettak danab toppa wakkulag.

¹¹ Ag aon goppeg, sabat deɗ dimugppa mana mettak danab nug Yawe mana mettak amunu ena doya aokkunu nug ehag amu eppegppa aɗa, Yawe noobppa huma epponitta mettaknu ofa hekku.

¹² Deɗ amuppaib ag sipsip gaiɗ maɗ laippu awak ele, beɗuppa eheɗ laa iitta ele amu, ag doɗ amuppa manaknu ofa Yawenu hekkulagoitte;

¹³ am ee aegnu ofa, amu ele ouqa hak daakkuoitte. Amuam 2 kilogram plaua enanag olip goɗen ele kaboliak daakku. Amuam Yawe mettaknu aab aɗunu ofa aakku. Mana mettak amunu muttuɗignu, Yawe Nug ooppa ena dootte. Amu ele ouqak, ag 1 lita wain aon, amuppa ag wain gokkaɗaknu ofa hekkulagoitte.

¹⁴ Ag ee aeg bau aon, aib bret, o ee meu manak, o ee meu bau lappig. Ag tatam aon manan, ahilag Kayak mettona, lakkulag. Ɗo imu ahilagnu hanhan daakku. Ag, amu buɗub buɗub doobob, ag ele, ag adeppa adeppa daaglag amu, ag ɗo imu aɗan autna aon, dim lamidkkulagoitte.

Ee meu awaknu gamag ahaknu hobul dayak

¹⁵ Am sabat deɗ, deɗ amuppa ag ee aeg tatam oɗuomnu ehag laippu aon, mana mettak danab eppegppa meeg, nug amuppa Yawe noobppa, huma epponitta mettaknu ofa heum amu, deɗ amu dimugppa, deɗ amuppanu ag mettid eblaih aɗit ele ebqekkulag. Amuam deɗ 49 aakku,

¹⁶ amu deɗ 50ppa, amuam sabat deɗ eblaih aɗit ele dimugppan deɗ aakku, am ag ee meu bau awak am aon, Yawe gumidna wana, Nug mettaglagnu daatte. Ag aon wana, ag ee aegnu ofa hekkulag.

¹⁷ Amu hekkulagnu amu, ag daattebppanu bret kunum aɗit diiatna, mana mettak danab toppa wappeg, nug awa, Yawe noobppa huma epponitta mettaknu ofa hekku. Amuam mana mettak Yawenu hak daakku. Bret kunum aɗit anen anen, amuam 2 kilogram plaua enanag, yis ele kabolia manak daakkuoitte. Bret amuam maɗ anen anenppa, ahilag ee tatam oɗutte manan, Yawe mettaglagnu ofa aakku.

¹⁸ Bret amu ele ouqak amu, ag sipsip gaiɗ eblaih aɗit ele maɗ laippu awak ele, beɗulagppa eheɗ laa iitta ele amu, makau gaiɗ laippu, amu sipsip dawai aɗit ele diin, Yawe gumidna wana, Nug mettaglag. Amuam Yawenu manaknu ofa aakku. Ee aegnu ofa, amu wain gokkaɗaknu ofa ele amu, Yawe Nug ag haen anen anenppa manan mettaglagnu aum amu, ag amu ele heig! Mana mettak amuam aab aɗunu ofa aakku. Mana mettak amunu muttuɗignu, Yawe Nug ooppa ena dootte.

¹⁹ Aria, ag meeme dawai laippu aon gona, amuppa ag ib etta hipunin haknu ofa hekkulagoitte. Ag amu hewona, ag sipsip gaiɗ aɗit, maɗ laippu awak ele, amuppa Yawe ele laippu dayaknu ofa hekkulagoitte.

²⁰ Mana mettak danab nug sipsip gaiɗ aɗit, am bret kunum, amuam ee tatam oɗutteppanu hak amu, nug amu ele awa, Yawe noobppa huma epponitta mettaknu ofa hekku. Amuam ofa Kayaknu tituanak daatte, amu mana mettak danab dilag daakku.

²¹ Deɗ laippu amuppa amu, ag uɗat ahilag oh ag hanhan hetteb amu, ⌊mana mettak danab ag,⌋ ag amu uun, ii hemananu appeg, ag Yawe noobppa qagmena dup nona Nug binag mekkulagoitte. Ɗo imuam ahilag hanhannu daakku. Ag, amu buɗub buɗub doobob, ag ele, ag adeppa adeppa daaglag amu, ag ɗo imu aɗan autna aon, dim lamidkkulagoitte.

²² Am haen ag ahilag ee aeg aotteb amu, ag aib dad daugppan tuqanna, ee meu awak danab, ag ee laa heeg neum, ag amu ele aib eɗun aoppig. Uuppeg dayebeb, daɗek danab, wan laihnu danab ele, ahilag dayaɗ! Da am Yawe, ahilag Kayak,” awa aum.

Trampet Iwalaknu Hobul dayak haen

²³ Amu Yawe Nug Moses amegppa aum.

²⁴ “Na Israel danab ah nai imu appe doyeg!” awa aum. ⌊Nug anam a amu, Moses nug inam ag amelagppa aum.⌋ “Kalam ebqak eblaih aɗit ele, kalam amunu deɗ digmakppa, ag hik aoglagnu daatte. Deɗ amuppa ag uɗat hekkulagnu ii daatte. Ag uɗin, Kayak noobppa qagmena dup nona Nug binag mekkulagnu daatte. Amuam Trampet Iwalaknu Hobul dayak haen aakku. Trampet huana iwaleb, ag qagmekkulag.

²⁵ Ag deɗ amuppa uɗat ag hanhan hetteb amu, ag iinab hekkulagoitte. Iitta! Ag doɗ Yawe mettaknu aab aɗunu ofanu aon, Yawe gumidna wana, mettaglagoitte.

Eheɗ haknu nob nau tiigppa iitta meeb elele medakkunu deɗ okkai

²⁶ Aakku Yawe Nug Moses amegppa aum.

²⁷ ⌊Na Israel amelagppa nai imu appe doyeg!” awa aum. Nug anam a amu, Moses nug Israel amelagppa inam aum.⌋ “Kalam ebqak eblaih aɗit ele, kalam amunu deɗ eblaih tanig eleppa am Eheɗ haknu nob nau tiigppa iitta meeb elele medakkunu deɗ okkai. Deɗ amuppa ag Yawe noobppa qagmena, Nug noobppa dup nona binag mena, ag ee ohnu kud mena daan, ag doɗ aab aɗunu ofanu aon, Yawe gumidna wana Nug mettaglagoitte.

²⁸ Ag deɗ amuppa uɗat laa iinab hemana. Amunu diig am, deɗ amuam Eheɗ haknu nob nau tiigppa iitta meeb elele medakkunu deɗ okkai. Deɗ amuppa mana mettak danab nug Yawe, ahilag Kayak, nug Nug noobppa, ahilagnu eheɗ haknu nob nau tiigppa iitta meeb elele medakkunu kobol hekku.

²⁹ Am aun laa nug deɗ amuppa, nug nukka onig ii qeeb neeb daakku amu, nug Israel oolagppanu geɗittak daakkuoitte.

³⁰ Am aun laa nug deɗ amuppa uɗat iɗu iɗunu laa hekku amu, da geha nug ag oolagppanu heppi nauhkku.

³¹ Ag uɗat ii hekkulagoitte! Ɗo imuam ahilagnu hanhannu daatte. Ag, amu buɗub buɗub doobob, ag ele, ag adeppa adeppa daaglag amu, ag ɗo imu aɗan autna aon, dim lamidkkulagoitte.

³² Deɗ amuam sabat deɗ, am hik awaknu deɗ. Amu ag deɗ amuppa, ag akka onilag qeppeg nekkuoitte. Sabat deɗ amu, am kalam ebqak eblaih aɗit ele, kalam amunu deɗ eblaih waɗeleppa, tueb digmeeb ukkeb, deɗ eblaih tanig eleppa tueb batakku,” awa aum.

Peh Dayaknu Hobul dayaknu haen

³³ Aakku Yawe Nug Moses amegppa aum.

³⁴ “Na Israel danab ah nai imu appe doyeg!” awa aum. ⌊Nug anam a amu, Moses nug nai inam ag amelagppa aum.⌋ “Pehppa Dayaknu Hobul amu, am kalam ebqak eblaih aɗit ele, kalam amunu deɗ 15ppa digmekku. Yawe noobppa hobul dayak amu, am deɗ eblaih aɗit oh daakku.

³⁵ Deɗ tatam amuppa ag Kayak noobppa qagmena, dup nona, Nug binag mena, ag uɗat ag hanhan hetteb amu, ag ii hemana.

³⁶ Hobul dayak haen amunu deɗ eblaih aɗit, ag deɗ anen anen oh ag doɗ akkan, Yawe mettaknu aab aɗunu ofanu Yawe gumidna wana, Nug mettaglagoitte. Deɗ eblaih ewamppa amu, ag eɗun, Yawe noobppa qagmena dup nona Nug binag menana, ag doɗ Yawe mettaknu aab aɗunu ofanu aon, Yawe gumidna wana, Nug mettaglagoitte. Qagmak deɗ eblaih ewamppa amu, amuam qagmak amu oh bagqekkulagnu; deɗ amuppa ahilag uɗat oh ii hemana.

³⁷ Amuam hobul dayaknu haen epeɗiak aakku. ⌊Mana mettak danab⌋ ag appeg hekkulag. Hobul dayak haenppa amu, ag Yawe noobppa qagmena dup nona Nug binag mekkulag. Ag qagmetteb amu, ag keeke Yawe mettaknu aab aɗunu ofa amu ohnu hekkulag. Amuam manaknu ofa, ee aegnu ofa, wain gokkaɗaknu ofa ele. Am ag Yawe, Nug ag deɗ attenppa hekkulagnu aum amu, ag anamppa aakkude heig!

³⁸ Ag hanhan Yawenu sabat deɗppa doɗ manadna, Yawe medatteb, ag anamib tuɗidna hena, mana mettak laa imu oh ele hekkulag. Deɗ laalappa ag Yawe keeke laa ɗo hamu mettaglag; amu ag deɗ laala nai genab ana qakkaknu ofa hekkulag; amu deɗ laala ag ɗo hamu mettaknu ofa hekkulag. Amge hobul dayak deɗppa, amu mana mettak laa imu ele hekkulagoitte.

³⁹ Ag hobul dayak haenppa anam aakku hekkulag amunu, kalam ebqak eblaih aɗit ele, kalam amunu deɗ 15ppa, ag dattanu keeke aon, bakkalenu mak lakka mena malona, amu ag Yawe dabmenana, qagmak gamag ahak ele heig! Ag deɗ eblaih aɗit ele ohppa Yawe noobppa anam hekkulag. Ag deɗ digmakppa, amu deɗ eblaih ewamppa ele amu, ag hik aoglagoitte.

⁴⁰ Aria, hobul amu dayaknu haen, deɗ tatam amuppa amu, ag ad meu ena oppig ele amu aonna, ad pam eppeg okkuladnan, ad laala uɗug kuɗum ele eppeg matakkadnan, ad popla ele imuag peh maknu okkulatteg! Anam hewona, ag deɗ eblaih aɗit oh, Yawe, ahilag Kayak, ag Nug noobppa gamalag ahaɗ!

⁴¹ Am ag deɗ eblaih aɗit ele amu, maɗ anen anen ohppa Yawe dabmenana, qagmak gamag ahak ele hena daaglagoitte. Ɗo imuam ahilagnu hanhannu daatte. Ag, amu buɗub buɗub doobob, ag ele, ag adeppa adeppa daaglag amu, ag ɗo imu aɗan autna aon, dim lamidkkulagoitte. Ag kalam eblaih aɗitppa Yawe dabmena, qagmak gamag ahak ele hekkulag.

⁴² Am hobul dayak amunu deɗ eblaih aɗit amu ohppa amu, ag Israelnab danab ah, ag peh waappaib daaglagoitte.

⁴³ Amuam Israel menuak bau anen anen dokkulag, ag dooglag; da ag alalkad, ag Isip wanppanu, qagaiettakppa ii daamnanu ehanatten hei, ag alalkad ag peh waappa daaegeg, da ag Isipnu diien, omalatti uɗippig. Da am Yawe, ahilag Kayak,” awa aum.

⁴⁴ Amunu Moses nug hobul dayaknu haen epeɗiaknu Yawe mattom, nug nai amu ag amu dim lamittaknu Israel mattom.