Lewitikas 22 - Nobonob Baibel

¹ Amu Yawe Moses amegppa aum.

² “Na Aron bekoɗ ele amelagppa nai imu appe doyeg!” awa aum. ⌊Nug anam a amu, Moses nug ag amelagppa inam aum.⌋ “Ag ofa dahilnu tituanak daatteb, Israel ag dahilnu tituanna meɗatteb ele amu, ag amu dabmattan autna aweg! Ag anam ii hekkulag dayeb amu, ag heppeg, laa ag da onil oppiaawak ele ahilag neekkakppa nauhak daakku amunu, ag amu bemanu dabmattan autna aoglagoitte. Da am Yawe.

³ Amu na ag amelagppa nai imu appe doyeg! Gemu, buɗub buɗub doobob, hanhan ag, o ag buɗulkadppan laa, nug da, Yawe, Nug da ele ouqa dayaknu elele iitta dayaya, nug Israel, ag ofa dahilnu tituanak, dahilnu tituana mettak ele daatteb aon dotteb, ag Aron buɗub oolagppan laa, nug mana mettak amunu laa awa lakku, o lakkunu bappaidkku amu, nug dagattolppanu geɗittak daakkuoitte. Da am Yawe,” awa aum.

⁴ ⌊Amu Yawe Nug tuɗitta, Moses amegppa aum.⌋ “Am mana mettak danab Aron buɗub laa ag gaɗa oɗe nau ele, o ag beɗuppan leppu nau nette ele, amu he, ag Kayak ele ouqa dayaknu elele iitta, amu ag ofa Kayaknu tituanak daatteb ele, ag mana mettak amu ii lamana. Ag daappeg, mana mettak danab nug ag Kayak ele ouqa dayaknu elele ab doona, ag lakkulag. Am mana mettak danab laa nug aɗi keeke laa, keeke amuam mauhak gaɗa lauɗittomte, o keeke laa beɗu hipab leppu nak aɗom lauɗittomte, diig amunu keeke amuam Kayaknu neekkakppa dubuttid teum daatte ele, amu mana mettak danab amu nug keeke amu aɗakku dayeb, nug Kayak ele ouqa dayaknu elele iitta daakku.

⁵ Nug aɗi diignu, nug doɗ laa ag oolag wan qeeqe oitteb laa aɗakkutai, o nug danab o ah laa Kayak ele ouqak daakkunu elele iitta aɗakkutai, o nug aɗi keeke heeb, o aɗi keeke nuhigppa beeb, diig amunu nug Kayak ele ouqak daakkunu elele iitta daakku amu, nug aakku Kayak ele ouqak daakkunu elele iitta.

⁶ Am mana mettak danab laa nug ib anamppa Kayak ele ouqa dayaknu elele iitta daakku dayeb amu, nug anam dayeb ukkeb, uudokku. Nug ofa oppiaawak ele, nug amu ii lakkuoitte, ukkeb le layowa, nug lakku.

⁷ Haen aam noobob amu, nug eɗua Kayak ele ouqa dayaknu elele daakku. Nug anam daya, nug ofa Kayaknu tituanak daatte ele amu, nug amu lakku. Aɗinu? Amuam ahilag ee aakku.

⁸ Mana mettak danab ag doɗ akka mauhppigte, o doɗ laa, doɗ dakkuɗ laa ag aqadna tuqatteg neppig amu, ag amu iinab lamana. Ag lakkulag amu, ag am Kayak ele ouqa dayaknu elele iitta daaglag. Da am Yawe.

⁹ Mana mettak danab ag aɗi kobol hekkulagnu daatteb, ag amu dim lamidkkulagoitte. Ag ii dim lamidkkulag dayeb amu, ag amunu hamu bia dooppeg, ag beɗulagppa aab dayebeb, mauhkkulag. Ag mauhmananu, na ag nau aomnanu dabmettaknu nai imu appe, mana mettak danab oh ag nai imu tutukku dim lamitteg! Da am Yawe, da hei, ag dahilnu, oppiaawak ele daatteb.

¹⁰ Mana mettak danab baegppan iitta ag ofa Kayaknu tituanak daatte ele ii lamana. Laa nug mana mettak danab laugppa ɗo daattetai, o nuhig uɗat nid amu, ag ii lamana.

¹¹ Amge mana mettak danab nug laa nuhig begbeg maɗi nid daakkunu men doɗoppa daden mekku dayeb, begbeg maɗi nid amu nug ee amu lakkunu elele. Begbeg maɗi nid amu ag nid menuglag dayeb, nid amu ele ag ele ee amu lakkulagnu elele.

¹² Am mana mettak danab aɗeg laa, nug danab mana mettak danab ii daatte laa awom dayeb amu, aɗeg amu nug ofa Kayaknu tituanak daatte elenu maha laa, mana mettak danab dilag daatte, nug amu lakkunu elele iitta.

¹³ Amge nug ah qab ma, o nug danab uuittak daattete, nug baeg laippu, ehanidkkulagnu bekkod laa iitta daya, nug eɗua mameg laugppa ukkeb, nid ahinppa appa dayom bia daaglah dayeb amu, nug mamegnu ee amu lakkunu elele daatte. Auntai laa Kayak ag lakkulagnu ii aum amu, ag ii lamana. Kayak lakkulagnu aum aakkuib, ag lakkulag.

¹⁴ Laa nug ofa Kayaknu tituanak daatte ele, nug amunu laa ii doyaya latte amu, nug mana mettak danab, ee gane lanak amu nob daden, 20 pesent laa ele tuɗitta daden mekkuoitte.

^15-16 Mana mettak danab ag laa, ag mana mettak danab iitta, ag ag uuadppeg, ag ofa Kayaknu tituanak daatteb, Israel danab ah ag aon, Yawe gumidna wana, Nug medatteb ele, ag amu lakkulag amu, amuppa mana mettak danab ag heppeg, ofa amuam dubuttid tak daakku. Ag hekkulag dayeb amu, Israel danab ah ag beɗulagppa aab ele daan, bu aoglagnu daaglag. Anam amunu, mana mettak danab ag anam aib heppig. Aɗinu? Da am Yawe, da hei, ag dahilnu, oppiaawak ele daatteb,” awa aum.

Mana mettak elele am elele ii hak ele

¹⁷ Amu Yawe Nug Moses amegppa aum.

¹⁸ “Na nai imu appe, Aron, nug bekoɗ, amu Israel oh ele doyeg!” awa aum. ⌊Nug anam a amu, Moses nug nai imu ag amelagppa aum.⌋ “Nai dim lamittaknu imu am, Israel danab ag, amu wan laihnu danab, ag uɗin, ag oolagppa daatteb ele, ahilag ohnu aakku daatte. Am aun laa nug nai genab ana qakkaknu ofa hekkunu, o nug ɗo hamu mettaknu ofa hekkunu, nug Yawenu manaknu ofa hekku dayeb amu,

¹⁹ Yawe Nug manaknu ofa amunu ena doya aokkunu nug doɗ dawai beɗuppa eheɗ laa iitta eleppa awa, Yawe gumitta ukka, Nug medakkuoitte. Amuam makau dawaite, o sipsip dawaite, o meeme dawaite mana mettaknu daatte. Am doɗ anam bia laa iitta dayeb amu, Nug ena ii doya, ii aoma.

²⁰ Aibnab doɗ nug beɗuppa eheɗ ele amu maippig. Aɗinu? Ag anam hekkulag dayeb amu, Yawe Nug ena doya, ii aoma.

²¹ Amu haen laa nug nai genab ana qakkaknu ofa hekkunu, o nug ɗo hamu mettaknu ofa hekkunu laippu dayaknu ofa hekku amu, nug makau, o sipsip, o meeme, nug doɗ amuppa hekku. Amu Yawe Nug mana mettak amunu ena doya aokkunu, doɗ amuam beɗuppa eheɗ laa iitta ele daakkuoitte.

²² Amge ag doɗ laa, ameg nau ele, o guittak laa awom ele, o beɗuppa teppu huma tak laa ele, o beɗuppa ihi ele, o beɗuppa ihi gon ele, ag doɗ amubia aon gona, qaɗabppa, Yawe mettaknu aab aɗunu ofa daakkunu iinab hemana.

²³ Am makau okkai ebehi ele dawaite, o sipsipte, am baeg elab o tutu, nug eɗittak daatte, o nug okkai elele ii mak amu, doɗ amubia amu, laa nug ena heme anaknu ofa hekkunu, nug doɗ amu awa, mana, Yawe medakkunu elele. Amge laa nug nai genab ana qakkaknu ofa doɗ amubiappa ii hekkuoitte.

²⁴ Am nahip wanppa doɗ laa nug hipab nauhak ele, o nug hipab geɗittak daatte amu, ag aibnab manan, Yawe medappig.

²⁵ Am wan laihnu danab ag doɗ hipab nauhak ele, o hipab geɗittak ele amu, ag Israel, ag amu aon, Kayak ahilag, nuhig ee bia daakkunu ii main mettaglagoitte. Aɗinu? Doɗ amuam ag beɗulagppa eheɗ ele amunu, Kayak nug ahilag mana mettak amu, ag ehanadkkunu ena ii doya, ii aoma,” awa aum.

²⁶ Aria, Yawe Nug Moses amegppa ele aum.

²⁷ “Am haen makau dawaite, o sipsipte, o meemete nag laa, bau menuak dokku amu, nug deɗ eblaih aɗit ele anam anig ele oh daaglahoitte. Am deɗ eblaih ewamppa digma ukkak amu, Yawe mettaknu aab aɗunu ofa daakkunu elele.

²⁸ Amge na doɗ anig nug, nag ele oh deɗ laippu amuppaib ii aqatkutoitte. Amuam makau anigte laa, o sipsipte laa.

²⁹ Haen ag ena heme anaknu ofa laa Yawenu hena, ag mana mettak amuam pehettan managlagoitte. Ag anam hekkulag dayeb, Kayak Nug mana mettak amunu ena doya aokku.

³⁰ Ag doɗ mana, Yawe mettak amu hena, laih manan, Nug medatteb, ag deɗ amuppaib maha ahilag lakkulag. Ag aib laih laa uuppeg dayeb ukkeb, wagɗeb, deɗ amuppa laa lappig. Da am Yawe.

³¹ Da am Yawe amunu, ag dahil ɗo ag dim lamidkkulagnunab daatteb, ag genab tutukku dim lamidkkulagoitte.

³² Ag aib heppeg, da onil oppiaawak ele laa dilag neekkakppa nauhak dayom. Da am oppiaawak daattem amunu, Israel danab ah ag dahilnu, ‘Keeke hamu,’ ii doomna. Amuam da, da Yawe, da hei, ag dahilnu, oppiaawak ele daatteb.

³³ Amu da, da ag, ahilag Kayak daakkulnu, da ag Isipnu diie, omalatti uɗippig. Da am Yawe,” awa aum.