Lewitikas 21 - Nobonob Baibel

Dim lamittaknu nai, mana mettak danab dilag

¹ Amu Yawe Nug Moses amegppa aum. “Na nai imu mana mettak danab, am Aron bekkod aakku, na ag amelagppa nai imu appe doyeg!” awa aum. ⌊Nug anam a amu, Moses nug ag amelagppa inam aum.⌋ “Mana mettak danab nug layag nuhigppanab iitta laa mauhom gaɗa ii aɗama. Nug anam hekku dayeb amu, nug Kayak ele ouqa dayaknu elele iitta daakku.

² Amge mana mettak danab nug mauhak gaɗa aɗakkunu amu, laa nuhigppanab aakkuib aɗakku. Amuam, nug anig, o mameg, o nug bekka, o nug aɗeg, o nug awag, o nug amag,

³ o appinag ah makkun, nug atognotte ele. Nug appinag ah makkun laa danab ii awak ele mauhom gaɗa aɗa, Kayak ele ouqa dayaknu elele iitta daakkunu elelenu diig am, nid ahin amu nug gamu, nug amu hekkunu, am nug amu laa iitta.

⁴ Amge laa mauhom ele, nug mana mettak danab, nug nug ele ewau matulakppaib layag daattep dayeb, mana mettak danab nug Kayak ele ouqa dayaknu elele iitta daamanu, nug gaɗa ii aɗama. Nug gaɗa aɗakku dayeb amu, nug am Kayak ele ouqa dayaknu elele iitta daakku. Nug anam hekku dayeb amu, nug heeb, Yawenu neekkakppa nug dubuttid tak ele daakku.

⁵ Haen danab o ah laa nug mauheb amu, mana mettak danab ag ikkilag uɗug ii hoippeg goma, akkaɗilag daug daug ele ii hoimna, o beɗulag ele ii oppatkkulagoitte.

⁶ Mana mettak danab ag Kayaknu oppiaawak ele daaglagoitte. Nug am ahilag Kayak daatte. Ele amu, ag heppeg, Kayak onig laa dilag neekkakppa nauhak daakku amu, ii hekkulagoitte. Aɗinu? Mana mettak danab ag doɗ, ee laa ele Israel eppelagppanu aon, Yawe mettaknu aab aɗunu ofa hetteb amunu, ag Yawenu oppiaawak ele daaglagoitte.

⁷ Am mana mettak danab ag ib baag ah laa, ah amu nug nuhig hak amuppa amu dahil neekkakppa nug ooppa dubuttid teum daatte ele, amu ag ah amu ii aoglagoitte. Ag ah laa, nuhig ewau matulak awak otaɗak ele amu, ag nug ele ii aoglagoitte. Amunu diig am, mana mettak danab ag Kayaknu oppiaawak ele daatteb.

⁸ Ag laa amu, ag mana mettak danab ag ahilag doɗ manan Kayak medatteb amunu, ag ahilagnu, ag am Kayaknu oppiaawak ele daatteb doyeg! ⌊Yawe Nug amunu inam aum.⌋ ‘Ag mana mettak danab dilagnu, “Ag Kayaknu oppiaawak ele daatteb,” dabmenana oiglagoitte! Aɗinu? Da, Yawe, da oppiaawak dayeye, da hei, ag dahilad danab ah, ag dahilnu, oppiaawak daatteb.’

⁹ Am mana mettak danab laa aɗeg nug ib baag ah ba, gappai awawa oikku dayeb amu, amuppa nug dahil neekkakppa nug ooppa dubuttid teum daatte, am nug aakku mameg uɗa nak nau guittak ele medatte. Ag nug maippeg mauhkkuoitte.

¹⁰ Mana mettak ikki danab, nug laikkud oolagppan nug danab laittaknu goɗen ele nug igippa gokkaɗe, nug mana mettak danab dilag lamen tagakkunu baɗ awom daatte, ⌊auntai laa mauhkku amu⌋ nug ikki uɗug uueb, mauhnoak ii daakkuoitte. O nug lamen iinab pattiɗkkuoitte

¹¹ Nug ha, Kayak ele ouqa dayaknu elele iitta daamanu, nug mauhak gaɗa laa, nug anig, o mameg gaɗate, amu ele guguitta ii wakkuoitte.

¹² Mana mettak ikki danab nug mauhaknu keeke laala hekkunu, nug Kayaknu mettid haknu peh lag iinab uuitta gokkuoitte. Nug heeb, Kayaknu lag dubuttid tekku iinab hekkuoitte. Aɗinu? Danab laittaknu goɗen amu mana mettak ikki danab igippa gokkaɗe no, laitta mala he, nug aakku amuppa nug dahilnu tituana mettak daatte. Da am Yawe.

¹³ Mana mettak ikki danab nug am ah, danab laa ele ii niipiɗ, nug wau daakkunu aokkuoitte.

¹⁴ Nug ah gamu mauhe, qab daatte, ah nuhig ewau matulak awak otaɗak ele, o ah nug ib baag oiyak ah, ib baag ah nug nuhig kobol amuppa nug dahil neekkakppa nug ooppa dubuttid teum daatte amu, nug ah anam ele am ii aoma. Mana mettak ikki danab nug Israel danab ah, nug amuppanu ah laa, danab laa ele ii niipiɗ aokkuoitte.

¹⁵ Nug ah laa amubia ii aokku dayeb amu, amuppa nug heeb, nug buɗub ag dahil neekkakppa ag oolagppa dubuttid teum daatte daaglag, amu diig amunu nug nuhig huu, Israel danab ah, nug amuppanu ah laa danab laa ele ii niipiɗ aokkuoitte. Da am Yawe. Da hei, nug dahilnu, oppiaawak ele daatte,” awa aum.

¹⁶ Aria, Yawe Nug Moses amegppa aum.

¹⁷ “Imu appe, Aron doyaɗ!” awa aum. ⌊Nug anam a amu, Moses nug Aron amegppa inam aum.⌋ “Buɗub buɗub doobob, amuppan na buɗunppan laa ag beɗulagppa nauhak ele, ag Yawe, ahilag Kayak, ag mana mettak nuhignu iinab hemana.

¹⁸ Aun laa nug beɗuppa eheɗ ele, nug ameg gaɗuakte, o nug baeg nau autaut oittete, o nug baeg eppeg keeke kaliak elete, nug qaɗabppa, mana mettak hekkunu iinab Yawe gukkuitta wama.

¹⁹ Amu laa nug baeg kaliak, o nug eppeg kaliak,

²⁰ o nug gome topiak elete, o nug tutunabte, o nug ameg nau elete, o nug ihiud elete, o nug beɗuppa ihuanhuan naunau elete, o nug hipab nauhak elete amu, laa amu ele nug qaɗabppa, mana mettak hekkunu Yawe ii gukkuitta wama.

²¹ Laa anam ele nug am genab mana mettak danab Aron buɗub laa aakku, amge nug Yawe mettaknu aab aɗunu ofa hekkunu elele iitta. Nug beɗuppa uug daatte amunu, nug mana mettak laa Kayak medakkunu ii hema.

²² Nug amu ii hema me, nug Kayaknu mana mettak hak, laa Kayaknu tituanak daatteb, laa Kayaknu, tituanaknab daatteb amu, nug amu lakku.

²³ Nug beɗuppa uug ele daatte amunu, nug Yawe laugppa Oo Gun ele, Oo Gunnab Ele makkulaknu lamen, o nug qaɗab guguittak ii goma. Nug amu helo am nug heeb, dubuttid tak am dahil mettid haknu peh lagppa daalo, amunu nug ii hekkuoitte. Da am Yawe, da hei, aben aɗit amu aa dahilnu tituanak daattep,” awa aum.

²⁴ Yawe Nug keeke amu ohnu Moses amegppa mattie, Moses nug nai dim lamittaknu nai imu oh Aron, bekkod ele, amu Israel oh ele amelagppa mattiom.