Lewitikas 20 - Nobonob Baibel

Oɗe ii dim lamittaknu bu mettak

¹ Amu Yawe Nug Moses amegppa aum.

² “Na Israel danab ah amelagppa nai imu appe doyeg!” awa aum. ⌊Nug anam a amu, Moses nug ag amelagppa inam aum.⌋ “Am Israel oolagppa, laa nug Israel ted, o wan laihnu danab, ag uɗin, ag oolagppa daatteb, am amu laatai, nug nid nuhig awa, mana mettak ha, Molek medakku dayeb amu, tamaniak ooppan danab ah ag nug menppa qeppeg mauhkkuoitte.

³ Da nuhignu eheɗ hekkulnu doyeye dayen, da heppi, nug Israel oolagppan geɗittak daakku. Aɗinu? Nug nid nuhikkud Molek mettom amunu, da anam hekkul. Nug amu ha, nug aakku he, dahil neekkakppa dahil mettid haknu peh lag dubuttid teum daatte; nug ele he, da onil oppiaawak ele laa dilag neekkakppa nauhom daatte.

⁴ Amu ag Israel danab ah ag nid Molek mettak amu anidna, ag hamu bia doonna, nid amu mameg ii qekkulag dayeb amu,

⁵ da geha danab amu baekkudppa ele eheɗ hadakkulnu doyeye dayen, da heppi, geha nug, amu laa oh ag Molek dim lamidna binag metteb ele, ag Israel oolagppanu geɗittak daaglag.

⁶ Am aun nug danab ah oolagppa, dahilnu ooppa genab ii doya, nug mauhak ele gamag danab, mauhak ele mattiak danab ele dabmadatta dim lamadkkunu gumatta gokku, nug amu dilag kobol digdig ele dim lamidkku dayeb amu, da geha danab amu eheɗ hedakkulnu doyeye dayen, da heppi, nug Israel oolagppanu geɗittak daakku.

⁷ Da am Yawe, ahilag Kayak amunu, ag dahilnu tituana meɗak daaglagnu hena daan, ag dahilnu, oppiaawak dayeg!

⁸ Ag dahil ɗo dabmettan dim lamitteg! Da am Yawe, daib, da hei, ag dahilnu, oppiaawak daatteb.

⁹ Am aun laa nug mameg, o anig eheɗ laa awaknu anak waappa daakkunu akku amu, ag nug qeppeg mauhaɗ! Nug mameg o anig eheɗ laa awaknu anak waappa daakkunu aum amunu, nug beɗuppa nug mauhkku.

¹⁰ Am danab laa nug ewau pakkua heeb, danab laa wau ele gappai hekkulah dayeb, ag ah danab ele oh aqatppeg mauhkkulahoitte.

¹¹ Am laa nug mameg wau ele beɗuppa wanak hekkulah dayeb amu, nug mameg hunu qelo bia hekku; danab ah ele ag aa aqatppeg mauhkkulahoitte. Am aa beɗulahppa ag aqatppeg mauhkkulah.

¹² Am laa nug ahipa ele beɗuppa wanak hekkulah dayeb amu, ag aa aqatppeg mauhkkulahoitte. Aa keeke laa kaliaknab, danab ah ag ii helob ele hepiɗ. Am aa beɗulahppa ag aqatppeg mauhkkulah.

¹³ Am danab laa nug danab laa ele, ah danab ele niittep bia niiglah dayeb amu, ag aqatppeg, aa oh mauhkkulahoitte. Aa kobol laa, Kayak Nug amunu ooppa uuaknab dootte amu hepiɗ. Am aa beɗulahppa ag aqatppeg mauhkkulah.

¹⁴ Am danab laa nug ah laa, anig ele oh wauuɗ daaglahnu diiatkku dayeb, kobol amuam nau hak kobol. Kobol nau amubia ag oolagppa daamanu amu, ag ewam amu oh aabppa manadppeg, ewatteb mauhkkulagoitte.

¹⁵ Am danab laa nug doɗ laa ele gappai aoglah dayeb amu, ag danab amu qeppeg mauhaɗ! Doɗ ele ag qeppeg mauhkkuoitte.

¹⁶ Am ah laa nug doɗ dawai laa ele gappai aoglahnu gukkuittak ukkeb amu, nug, doɗ amu ele oh aqatppeg mauheɗ! Ao, ag aa oh aqatppeg mauhkkulahoitte. Am aa beɗulahppa, ag aqatkkulag.

¹⁷ Am danab laa nug appinag laa, nug mamegte, o anigte aɗeg ele aa beɗuppa wanak hekkulah dayeb, amuam uɗa nak nau guittak ele kobol. Ag tamaniakppa, danab ah oh noolagppa heppeg, aa Israel oolagppan geɗittak daaglahoitte. Danab nug appinag ele aa gappai aoglah amu, danab amu nug appinag hunu qelo bia hekku. Nug anam hekku dayeb, nug eheɗ aakku ha, nug amunu bu aokku.

¹⁸ Am danab laa nug ah laa nug kalam qeeqe, nug ele beɗuppa wanak hekkulah dayeb, danab nug ah amu, nug Kayak ele ouqa dayaknu elele iitta dayeye, nug he, aa eheɗ hepiɗ, ah ele amu hekkulahnu ib oo ii neum amunu, aa Israel oolagppanu geɗittak daaglahoitte

¹⁹ Aib na anin apagte, o makkegte, o na mamen apagte, o appinagte ele beɗuppa wanak hepiɗ. Aɗinu? Na anam hekkut dayeb amu, na tiin laippu hunu qelom bia hekkut. Am aun laa nug mameg apagte, o appinagte, o anig makkegte, apagte ele beɗuppa wanak hekkulah amu, aɗit amu oh aa aakku eheɗ heya, aa amunu bu aoglah.

²⁰ Am danab laa nug mameg nakok laa wau ele gappai aoglah dayeb amu, nug mameg nakok hunu qelo bia hekku. Nug anam hekku dayeb, aa oh eheɗ aakku heya, aa amunu bu aoglah. Ahilahppan nid laa iitta, aa hamu mauhkkulah.

²¹ Am danab laa nug awag, o amag wau ele gappai aoglah dayeb amu, nug kobol dubuttid ele hekku. Nug anam hekku dayeb amu, nug awag, o amag hunu qelo bia hekku. Ahilahppan nid laa iitta, aa hamu mauhkkulah.

²² Ag dahil ɗo iɗu iɗu oh dabmettan dim lamitteg! Ag anam ii hekkulag amu, da geha, wan ag omalatte gottem ele, da amuppan heppi, danab nug bahe ba gotte, amubia ag wan amu uun gokkulag.

²³ Am ag danab ah ag gemu wan amuppa daatteb ele, da heppi, ag Israel ag danab amu lamadkkulag. Ag kobol nau, da oolppa uuaknab doottem ele heppig amunu, da ag geɗadmi. Anam amunu, ag ahilag kobol am aib dim lamidna heppig.

²⁴ Amge, wan ahilag, wan amuam enanag, wan ittag ele, amuppa ee meu huana otte amu, da wan amu madappi, ag aoglagnu nai ain qakkami, wan amuam ag aulag daakku. Da am Yawe, ahilag Kayak. Da aakku, ag danab laa oh oolagppanu ag danab ah laa daaglagnu tituanadmi.

²⁵ Diig amunu, ag doɗ lanaknu epeɗiak daatte, amu doɗ ii lanaknu epeɗiak daatte, amu ai lanaknu epeɗiak daatte, ai ii lanaknu epeɗiak daatte ele amu, ag tutukku epeɗin anidkkulag. Ag doɗ laa, o ai laa, o doɗ naunau ag oolag wan qeeqe oitteb ele laa, da ag ii lamananu ami amu, ag iinab lamana. Ag lakkulag dayeb amu, ag akka ag heppeg, dahil neekkakppa ag dubuttid tak ele daaglag.

²⁶ Da, Yawe, da oppiaawak daattem amunu, ag dahilnu oppiaawak ele daaglagoitte. Da ag danab ah diilag laa ele daan, dahiladnab daaglagnu, danab ah laa oh oolagppanu tituanadmi.

²⁷ Am ag danab o ah laa, nug mauhak ele gamag danab daatte, o nug mauhak ele mattiak danab daatte ele amu, ag menppa qeppeg mauhkkuoitte. Am laa ag amu hetteb, ag beɗulagppa, ag aqappeg mauhkkulag,” awa aum.