Lewitikas 2 - Nobonob Baibel

Ee aegnu ofa, Yawe mettaknu ippu

¹ Laa nug ee aegnu ofa Yawenu hekkunu haaha amu, mana mettak amuam nug plaua enanag, amuppa hekkuoitte. Nug olip goɗen gokkaɗeb noob, kalu danab ile muttuɗig enanag bette ele, am amu daugppa mekku.

² Anam hewowa, laa nug mana mettak hette ele nug mana mettak amu awa, Aron bekkod gumatta ukkeb, amunu laa nug geha plaua enanag olip goɗen ele kaboliak eppeg laippuppa appua, amu kalu danab ile muttuɗig enanag bette, amu oh ele, ou daakkunu qaɗabppa aab aɗuppa manakku. Am mana mettak amuam aab aɗunu ofa aakku. Mana mettak amunu muttuɗignu, Yawe Nug ooppa ena dootte.

³ Ee aegnu ofa, amunu maha laa oh amu, ag Aron bekkod ele, ahilag ee daakkunu mattaglag. Mana mettak imunu maha amu, am mana mettak oh ag Yawe mettaknu aab aɗunu ofa hetteb, ofa amu oolagppan maha laala am Yawenu tituanaknab daatteb, amu maha Aron bekkod ele aoglag amu, am amunu laa aakku.

⁴ Amu ag ee aegnu ofa owenppa manak hekkulag dayeb amu, ag plaua enanag, amuppa hekkulag. Ag amu hekkulagnu amu, ag bret batappatak, yis iitta, goɗen ele kaboliak, o ag bisket teppu iitta, yis iitta, goɗen qaɗeppa laittak ele, ag amuppa mana mettak amu hekkulagoitte.

⁵ Am ee aegnu ofa amu aen maha attan me ewak dayeb amu, ag plaua enanag, olip goɗen ele kaboliak eleppa hena, amu yis iitta hekkulagoitte.

⁶ Ag hewona, ag maha naunau oppatppeg neeb, goɗen qaɗeppa gokkaɗeg! Amuam ee aegnu ofa laa aakku.

⁷ Amu nahip ee aegnu ofa am tappiɗ laappa hak dayeb amu, amu ele am plaua enanag, amu olip goɗen eleppa hak daakkuoitte.

⁸ ⌊Ee aegnu ofanu babaittak attem attem ɗo imu atte bia hekkulag am uug laal iitta, oh am ena. Amge⌋ ee aegnu ofa amu oh Yawenu daakkunu, ag akkan, mana mettak danab gumidna gona medappeg, nug qaɗabppa awa wakkuoitte.

⁹ Mana mettak danab nug ee aegnu ofa amunu maha laa oh ou daakkunu awa, amu nug qaɗabppa aab aɗuppa manakku. Amuam aab aɗunu ofa laa aakku. Mana mettak amunu muttuɗignu, Yawe Nug ooppa ena dootte.

¹⁰ Ee aegnu ofa, amunu maha laa oh amu, ag Aron, bekkod ele, ahilag ee daakkunu mattaglag. Mana mettak imunu maha amu, am mana mettak oh ag Yawe mettaknu aab aɗunu ofa hetteb, ofa amu oolagppan maha laala am Yawenu tituanaknab daatteb, amu maha Aron bekkod ele aoglag amu, am amunu laa aakku.

¹¹ Ag ee aegnu ofa, Yawe mettaknu aab aɗuppa hetteb amu, ag amu oh henana, ag aib yis mena, ee aegnu ofa Yawe medappig. Aɗinu? Ag yiste, o uppuh leppute Yawe mettaknu aab aɗunu ofa mena, ofa amu hena, Yawe mettaglagnu ii daatte.

¹² Ag ee tatam oɗutte haenppa amu, ag yis, uppuh leppu ele aon dona, Yawe mettaglagnu oolag heeb am mettaglag, amge ag mana mettak laa, Yawe Nug mana mettak amunu muttuɗignu ooppa ena dookkunu, ag ee aegnu ofa manan, Yawe mettaglag amu, ag yis, o uppuh leppu amuppa iinab memana; ag qaɗabppa yis, o uppuh leppu iinab maiglagoitte.

¹³ Am ee aegnu ofa amu, ag yu kalu ele maneg! Amuam Kayak Nug he, Nug ag ele nug tituanna nai qagappig amu, ag nai amu ag daulagppa dokkunu anam hekkulag. Ag aibnab yu kalu ee aegnu ofa hetteb, amuppa mekkulagnu daulag atiom.

¹⁴ Ag ee tatam oɗutte, ag amunu ee aegnu ofa henana, ag maha laa Yawenu manan medatteb amu, ag ee aeg amu aab aɗuppa manana, ganuɗaknu keekeppa heppeg ganuɗeb, huppu huppu neeb, akkan anamib dokkulagoitte!

¹⁵ Amuam ee aegnu ofa amunu, ag olip goɗen amuppa mena, kalu danab ile muttuɗig enanag bette ele mekkulag.

¹⁶ Am mana mettak danab nug maha amu, laa oh ou daakkunu, nug ee aeg manak, olip goɗen ele, maha amu, aria kalu danab ile muttuɗig enanag bette ele oh awa, amu nug mana, Yawe medakku. Amuam Yawe mettaknu aab aɗunu ofa aakku.