Lewitikas 19 - Nobonob Baibel

Kayaknu oppiaawak ele dayaknu nai

¹ Amu Yawe Nug Moses amegppa aum.

² “Na Israel danab ah oh amelagppa nai imu appe doyeg!” awa aum. ⌊Nug anam a amu, Moses nug Yawe oɗe awa, Israel danab ah amelagppa inam aum.⌋ “Da Yawe, ahilag Kayak, da oppiaawak daattem amunu, ag ele oppiaawak dayeg!

³ Ag anen anen anilkad mamelkad dilagnu ena elele dooglagoitte. Amu dahil sabatnu ɗo da ag mattami amu, ag haen oh dabmettan, amu waappa daaglagoitte. Da am Yawe, ahilag Kayak.

⁴ Ag aib kayak hambuppuaknu oolagppa genab dooppig. Ele amu, ag aib kayak hambuppuak dottolag aenppa, keeke hattana, noolagppa dup nona binalag meppig. Da am Yawe, ahilag Kayak.

⁵ Haen ag laippu dayaknu ofa henana, ag doɗ manan, da Yawe, da meɗaglag amu, da mana mettak amunu ena doyen aokkulnu, ag amelagppa attem hekkulagnu ami bia, ag heig!.

⁶ Ag deɗ mana mettak amu hetteb, deɗ amuppaib, o deɗ amu uueb, wagkkaɗeb deɗ amuppa lakkulagoitte. Amge ag deɗ ewam amuppa amu, keeke laa big daatte dayeb, ag manadppeg eoglagoitte.

⁷ Am aun laa nug deɗ ewam amuppa mana mettak hak amu lakku dayeb amu, da keeke amunu am, da oolppa uuaknab dookkul. Da mana mettak amunu ena doyen, ii aopa.

⁸ Aun laa nug deɗ ewam amuppa lakku amu, nug eheɗ aakku ha, nug amunu bu aokku. Aɗinu? Nug aakku keeke laa da, Yawe, da amunu dahilnu tituanak daatte anidttem amu, nug he, dahil neekkakppa dubuttid teum daatte. Aun nug anam hette, nug Israel oolagppanu geɗittak daakkuoitte.

⁹ Am haen ag ahilag ee aeg aotteb amu, ag aib dad daugppa tuqanna, ee meu awak danab, ag ee laa heeg neum, ag amu ele aib eɗun aoppig.

¹⁰ Amu grep meu awaknu ele aakku, grep muɗi eppegppanu ag baelag aɗu eɗun aib tuqappig, grep wanppa nena qeppig ele amu, ag aib aoppig. Grep meu, ee aeg amu ele uuppeg, daɗek dilag, wan laihnu danab ele, ahilagnu dayaɗ! Da am Yawe, ahilag Kayak.

¹¹ Ag aib yab heppig. Ag aib nai hambubuppig. Ag aib lailkad dilagppa ameg qakkak kobol heppig.

¹² Am keeke laa genab iitta dayeb amu, ag aib da onil diin, nai ɠagattag qettan, keeke amunu, ‘Am genabnab,’ aon appig. Ag anam hekkulag dayeb amu, ag heppeg, da, ahilag Kayak, ag da onil laa dilag neekkakppa heppeg, nauhak daakku. Da am Yawe.

¹³ Ag aib lokkumak kobol eheɗppa ahilkad mudippan laippu, ahilkad keeke aoppig. Ahilag keeke ele aib yab aoppig. Ag haen oh ahilkad uɗat nid ag uɗat heppignu nob, daden ⌊elele⌋ haenppa matteg!

¹⁴ Am ag laa nug daug ituak ele, ag nug eheɗ laa awaknu anak waappa daakkunu aib appig. Ag aib laa nug ameg gaɗuak ele, nug noobppa keeke taataɗ qedakkunu meppig. Ag aib amu heppig, amge ag ahilag Kayaknu ebehilag oh bodoetta le maɗ! Da am Yawe.

¹⁵ Na nai doya mala hettoɗia epeɗia elele mettak kobol dim lamitte! Aib apiɗidme! Na laa nug daɗekte, o iitta nug enub elete amu, na amu aib dabmeme. Iitta. Na Kayak noobppa kaliak laa iitta eleppa na laipad dilag nai doya mala hettoɗia epeɗia elele mettak kobol dim lamidkkutoitte.

¹⁶ Laa baeg aib qeme. Na keeke laa heppe, diig amunu na layap nug mauhkkutai amu, na amu aib heme. Da am Yawe.

¹⁷ Na layapnu nau ninig ele aib doome. Amge na layap laa nug hipunin heebeb, na Kayak noobppa na nug ele beɗulttippa aab ele daamyanu, na genab layap daug bate!

¹⁸ Na aib laa nahipnu eheɗ heum amu, nug nob nau medakkutnu heme. O iitta, na nob nau laa mettaknu dabmak ootppa aɗa oiyak aib heme, amge na nakka nahipnu oot mauhtte, amubia na laipad dilagnu ele oot mauhaɗ! Da am Yawe.

¹⁹ Ag dahil ɗo dim lamitteg! Ag ahilkad doɗ laa aon, amu doɗ diig laa ele aon heppeg, aa tuqaippa uɗat laa heyaya, laa uɗat nakokib heebeb, laa uɗat okkainab heebeb, beɗu gai-iitta meeb naqekku amu, ag amu aib heppig. Ag aib dad ahilkadppa ee aeg diig aɗit ebappig. Ag aib lamen laa lamen haknu muɗi diig aɗitppa hak amu tagappig.

²⁰ Am begbeg maɗi ah laa, nug am danab laa wau daakkunu tituanak daatte, amge ah amunu okkai nug ah amu ii uhuqom daatte, auntai laa ele nug ah amu uhuqak aokkunu daden mak ii meum dayeye, danab laa nug ah amu ele gappai aoglah dayeb, danab amu hekku ele amu, nug amunu nobnu uug maokku. Amge danab nug ah ii uhuqak haenppa amu heum amunu, ag ah, danab ele aa aqatmananu ii amana.

²¹ Amge danab nug aakku hipunin heum. Nug hipunin heum amunu, nug eheɗ haknu ofa hekkuoitte. Nug amu hekkunu, nug sipsip dawai laa mettid haknu peh lag danab ah appa qagmetteb ele, nug lag amu odppa Yawe medakkunu awa uɗikkuoitte.

²² Am mana mettak danab nug sipsip dawai amu eheɗ haknu ofa Yawe noobppa ha, amuppa nug heeb, danab amunu eheɗ haknu nob nau tiigppa iitta mekkunu elele medakku. Amu Yawe Nug danab amunu hipunin uhuqa medakku.

²³ Am ag wan amuppa nona, ag ad meu otteb ele digdig appa eppaladppeg, meu obeppeg, digmak maɗ ewam amuam uuadppeg, ad ag akka daanna, meulkad onanaib dayeg! Ag aib lappig.

²⁴ Am maɗ waɗeleppa amu, ad meu amu oh Yawenu tituanak daakku. Am danab nug Yawe keeke enanag ha mette, gamag ahak doya, doɗ mana Yawe medatte, am amubia daakku.

²⁵ Anam daya maleb, maɗ tanig eleppa amu, ag ad meu aon lakkulag. Hak anamppa ad diig ag meulkad huana okkulag. Da am Yawe, ahilag Kayak.

²⁶ Teppu laa tiig ii gokkaɗa ukkak ele amu, ag aib lappig. Ag eman hak kobol, o onig awak, o emaɗ hak kobol aib heppig.

²⁷ Am ag aib ikkilkad uɗug ikkilkad heqo laihppa digmena otaɗppeg, uɗalag dim lamittak ukkeb, ikkilag heqo laih batak wab, amu ag akkaɗilkad ele laih laih aib hoippig.

²⁸ Ag mauhppig dilag mahinna daanna amu, ag aib gaɗalag otaɗppig. Ag aib gaɗalkad penpen aqappig. Da am Yawe.

²⁹ Na aib heppe, aɗen nug ib baag ah laa beum. Na anam hekkut dayeb amu, nuhignu dubuttid teum, Kayak Nug ooppa uuaknab dootte. Ag anam hekkulag dayeb amu, wan da ag madattemppa, appa gappai digdig, hak nau ele ambak daakku.

³⁰ Ag sabat dahilnu ɗo, da ag mattami amu, ag ɗo amu dim lamidnana, dahil mettid haknu peh lagnu ebehilag oh bodoetta le maɗ! Da am Yawe.

³¹ Ag mauhak ele gamag danab, mauhak ele mattiak danab ele gumadna goppeg, ag heppeg, dahil neekkakppa ag oolagppa dubuttid tak ele daaglag amunu, ag aib gumadna goppig. Da am Yawe, ahilag Kayak.

³² Kaino laa gumitta dob amu, na hibaitte! Aun nug tatamnu daatte, na nuhignu ena elele doye! Ag ahilag Kayaknu ag ebehilag oh bodoetta le maɗ! Da am Yawe.

³³ Ag wan laihnu danab nug uɗia, ag oolagppa daatte amu, ag nug aib eheɗ hedappig.

³⁴ Ag amu dilagnu amu, ag akka ag ahilkad menuattak ena hadattebbia, ag anamib amu dilag hattan, ag akka ahilagnu oolag mauhtte bia, ahilagnu oolag mauhkkuoitte. Aɗinu? Ag ele am haen laa, Isip wanppa, wan laihnu danab ah daappig. Da am Yawe, ahilag Kayak.

³⁵ Haen ag keeke laanu, nuhig elabnu, o nuhig emaitaknu melemel hena, o keeke laanu uug nuhig melemel hena amu, ag skel, o melemel tutukku iitta daatte, amuppa aib heppig.

³⁶ Ahilag skel, nuhig uug doyaknu keeke ele am tutukkunab daakkuoitte. Ahilag keeke inaknu teɗu, keeke qaɗaiettak, o leppu mettak melemel haknu, ag amu tutukkunab hekkulagoitte. Da am Yawe, ahilag Kayak. Da ag Isipnu diie, omalatti uɗippig.

³⁷ Ag dahil ɗo iɗu iɗu oh dabmettan dim lamitteg! Da am Yawe,” awa aum.