Lewitikas 18 - Nobonob Baibel

Beɗuppa wanaknu kobol haknu aib anakppa, aun aɗi ag ewau daaglagnu elele iitta ippunittak nai

¹ Aria Yawe Moses amegppa aum.

² “Na Israel danab ah da aɗi attem imu appe doyeg!” awa aum. ⌊Nug anam a amu, Moses nug Yawe oɗe awa, ag amelagppa inam aum.⌋ “Da am Yawe, ahilag Kayak.

³ Amunu wan ag daattappigppa ele, Isip, danab ah appanu bia, o Kanan wan da ag madattem amu, ag appanu bia ele aib heppig. Ag danab ah appanu bia ii daaglagoitte.

⁴ Da am Yawe, ahilag Kayak amunu, ag dahil ɗo iɗu iɗu dabmettan, pehettak dim lamidkkulagoitte.

⁵ Ag dahil ɗo iɗu iɗu dim lamitteg! Aɗinu? Danab nug dahil ɗo anam dim lamidkku dayeb, amuppa nug bauklel daakku. Da am Yawe,” awa aum. ⌊Yawe Nug anam ana, Nug ɗo laala imu Moses mettom.⌋

⁶ “Ag aib laa tiilag laippuppan ele beɗuppa wanak heppig. Da Yawe, da iikku attem.

⁷ Na anin ele aib beɗuppa wanak hepiɗ. Na anin ele beɗuppa wanak hekkut dayeb amu, na aakku na mamen hunu qelom bia hekkut. Nug am na anin; na aibnab nug ele beɗuppa wanak hepiɗ.

⁸ Na aib, na mamen wau ele beɗuppa wanak hepiɗ. Na mamen wau ele beɗuppa wanak hekkulah dayeb amu, na aakku na mamen hunu qelom bia hekkut.

⁹ Na aib appinam ele beɗuppa wanak hepiɗ. Na appinam laa amu, na mamen laa aɗegtai, o na anin laa aɗegtai, amge na nug ele aib beɗuppa wanak hepiɗ. Nug am na baenppanu laippu laatai, o nug aben laihte menuak ena meum, amu oh amu elele iitta. Na nug ele aibnab beɗuppa wanak hepiɗ.

¹⁰ Na nid ahin alan ele aibnab beɗuppa wanak hepiɗ, amuam na bekkat laa aɗegte, o na aɗen laa aɗegte. Aɗinu? Na anam hekkut dayeb amu, na nakka, na nagakka beɗun hunu qelom bia hekkut.

¹¹ Na aib mamen wau aɗeg, nid ah amu na mamen, nug wau laa, na anin iitta, nug ah amu ele menupiɗ amu, na nug ele beɗuppa wanak aib hepiɗ, nug am na appinam.

¹² Na binim, mamen appinag, nug ele aib beɗuppa wanak hepiɗ. ⌊Aɗinu?⌋ Nug am na mamen ele tiilah laippunab.

¹³ Na anin apagte, o makkegte ele beɗuppa wanak aib hepiɗ, Aɗinu? Nug am na anin ele tiilah laippunab.

¹⁴ Na mamen awagte, o amagte wau ele beɗuppa wanak aib hepiɗ. Na anam hekkut dayeb amu, na mamen nakok hunu qelom bia hekkut. Na mamen awagte, o amagte wau, nug am na anin nakok.

¹⁵ Na aib ahipan ah ele beɗuppa wanak hepiɗ. Nug am na bekkat wau.

¹⁶ Na aib awante, o amapte wau ele beɗuppa wanak hepiɗ. Na anam hekkut dayeb amu, na awan, o amap hunu qelom bia hekkut.

¹⁷ Na aib, ah laa nug aɗeg ele oh, aa ele beɗuppa wanak heppig. Amu na ah amu, na nug bekka aɗegte, o nug aɗeg aɗegte ele aib beɗuppa wanak heppig. Bekka aɗeg, o aɗeg aɗeg, huu amu ag am ah amu tiig laippuppanabnu makkulak doak daatteb amunu, anam haknu amu nau hak kobol.

¹⁸ Na nahip ah makkegte, o appagte, na waat amge na waatnab iitta, na nug ele niiglahnu aib aome. Amge na waat nug mauhkku dayeb, na nug apag, o makkeg na waat daakkunu aokkut am nai iitta.

¹⁹ Na aib ah laa kalam qeeqe, Kayak ele ouqa dayaknu elele iitta daatte amu, nug ele beɗuppa wanak hepiɗ.

²⁰ Na layap, nahip mudippan laippu, na nug wau ele aib beɗuppa wanak hepiɗ. Na anam hekkut dayeb amu, na Kayaknu neekkakppa dubuttid tak ele daakkut.

²¹ Ag nid naunau ahilkad Molek toppa diin wana, manan nug mettaglag dayeb amu, ag aakku da, ahilag Kayak, ag da onil laa dilag neekkakppa heppeg nauhak daakku. Ag anam aibnab heppig! Da am Yawe.

²² Ag aib danab danab ele gappai aoppig. Kayak nug hipunin amunu ooppa uuaknab dootte.

²³ Danab laa nug doɗ laa ele gappai iinab aoglahoitte. Laa nug amu hekku dayeb amu, nug da, Yawe, nug dahil neekkakppa dubuttid tak ele daakku. Am ah laa nug doɗ dawai laa ele gappai aoglahnu gumitta iinab wakkuoitte. Da Yawe, da amunu oolppa uuaknab doottem. Kobol anam am, hipunin kaboliaknab aakku.

²⁴ Ib imu ohppa danab ah Kanan wanppa daatteb ele ag heegeg, dahil neekkakppa ag oolagppa dubuttid teum daatte. Amu diig amunu da heppi, ag Israel, ag danab amu lamadkkulag. Amunu ag Israel, ag kobol wan amuppan danab ag hetteb ele heppeg, da ahilagnu da dahil neekkakppa ag oolagppa dubuttid teum daatte anidpanu, ag kobol amu aibnab heppig.

²⁵ Wan imuppan danab ah ag kobol dubuttid tak ele anam heppig amunu, wan atu imu oh am dahil neekkakppa dubuttid teum daatte. Diig amunu da danab ah ag ippa daatteb ele, da ag bu matten heppi, ag ahan gokkulag, danab nug bahe ba gotte, amubia ag gona, ag appa ii daamna.

²⁶ Ag dahil ɗo iɗu iɗu dim lamidkkulagoitte. Ag kobol laala, da kobol amunu oolppa uuaknab doottem ele amu, ag amu ii hemananu daaglagoitte. Imuam, ag Israel danab, amu wan laihnu danab, ag uɗin, ag oolagppa daatteb ele, am ahilag ohnu aakku daatte.

²⁷ Am danab ah, wan da ag appanu diie gottem ele, amuppanu ag kobol dahil neekkakppa dubuttid ele heegeg, dahil neekkakppa ag oolagppa dubuttid teum daatte amunu, dahil neekkakppa wan amuppa dubuttid tak okkai ele daatte.

²⁸ Am ag Israel, ag kobol dubuttid ele hekkulag amu, amuppa ag heppeg, wan dubuttid tak ele daakku, amu da heppi, danab nug bahe ba gotte, amubia ag wan amu uun gokkulag. Danab ah ag geha wan amuppa daatteb ele, ag kobol dubuttid ele anam hetteb amunu, da aakku heppi, ag danab laa keeke bahe ba gotte bia, ag wan amu uun gona, appa ii daamna.” Yawe Nug ɗo amu Moses mettom.

²⁹ Amu Yawe Nug aum. “Aun laa nug kobol ooppa uuaknab doyak ele, nug amunu laa hekku amu, nug Israel oolagppanu geɗittak daakkuoitte.

³⁰ Amunu ag ɗo dahil dim lamidna autna aona, kobol da oolppa uuaknab doottem, danab ah wan amuppa daan hetteb ele amu, ag kobol amu laa aibnab heppig. Ag kobol amu laa heppeg, ag dahil neekkakppa dubuttid tak ele daaglagnu aib heppig. Da am Yawe, ahilag Kayak.” Yawe Nug anam aum.