Lewitikas 16 - Nobonob Baibel

Eheɗ haknu nob nau tiigppa iitta meeb elele medakkunu deɗ okkai

¹ Yawe nug Aron bekoɗ aɗit aa kalu danab ile, muttuɗig enanag bette amu aab laihnu aoya, Nug noobppa ilaeh ewe, aa mauhpiɗ dimppa,

² Yawe Nug Moses amegppa inam aum. “Na awan Aron amegppa, nau aomanu dabmettak nai imu appe, nug Oo Gunnab Ele, Oo amuam Oo Gun Ele, Oo Gunnab Ele makkulaknu lamen dimugppa daatte amu, nug oo amu ooppa, nug nukka dabmette haenppa oo amuppa aib noum. Aben amuam Tituanak Nainu Kunup ameg, ameg amuam eheɗ haknu nob nau tiigppa iitta me elele medatte ippunadtte amu, am aben amu. Lombig laa, Tituanak Nainu Kunup ameg, amuam eheɗ haknu nob nau tiigppa iitta me elele medatte ippunadtte amu, lombig amu ameg amu attan daatte, am da, da lombig amuppa daattem amunu, Aron nug dabmak nuhigppa mauhnoak, nug appa gokkunu da ii ami dayebeb, nug appa gokku amu, nug mauhkku,” awa aum.

³ ⌊Yawe Nug anam ana, Nug doya dim lamittaknu nai imu ele Moses mettom.⌋ “Aron nug aben Kayaknu tituanak daatte ele amuppa nokkunu amu, nug nai imu tutukkunab dim lamidkkuoitte. Tatam amu, nug ib etta hipunin haknu ofa hekkunu, nug makau gaiɗ laa awa, amu nug manaknu ofa hekkunu sipsip dawai ele awa dokkuoitte.

⁴ Anam hewowa amu, nug le layowa, nug linen lamen gaɗa aɗatte ele tatam mewowa, nug lamen nakok elab, dahilnu tituanak daatte amu, nug amu ele mekkuoitte. Amu hewowa, nug lamen nakok elab, imuagppa matagiɗ bia qakkaknu takkowa, nug igippan lamen mekkuoitte. Lamen amu oh am dahilnu tituanak daatteb. Nug le layowa, mekku.

⁵ Israel danab ah ag ib etta hipunin haknu ofa hekkulagnu, ag meeme dawai aɗit aon uɗin, ag sipsip dawai laa manaknu ofa haknu aon dokkulagoitte. Ag diin uɗippeg, mana mettak danab nug aokku.

⁶ Am Aron nug eheɗ haknu nob nau doɗ tiigppa iitta meeb elele medakkunu hak kobol nuhignu, nug baekkudppa dilagnu ele ha, nug makau gaiɗ amu ib etta hipunin haknu ofa daakkunu mana, Yawe medakku.

⁷ Anam hewowa, nug meeme dawai aɗit diiata, nug mettid haknu peh lag danab ah appa qagmetteb ele, nug lag amu odppa, Yawe noobppa maatkku.

⁸ Amu nug meeme atten amu Yawenu manana, atten am hipunin mawa atu taɗakppa ukkaknu meeme daakkun dookkunu om ena yaakku.

⁹ Aron nug om ena yaak ha, meeme atten amu Yawenu daatte, nug amu doyowa, nug ib etta hipunin haknu ofa doɗ amuppa hekku.

¹⁰ Anam hewowa, nug meeme laa, amuam hipunin mawa atu taɗakppa ukkaknu meeme, om ena yaakppa tituanak ele, amu nug meeme amu awa Yawe noobppa mekku. Nug doɗ amu bau dayebeb mekku. Am laa nug awa ukka, atu taɗakppa mekku, amu doɗ amuppa Aron nug heeb, Israel oh dilag eheɗ haknu nob nau ib amuppa iitta mekku.

¹¹ Amu Aron, nug makau gaiɗ amu, nuhig ib etta hipunin haknu ofa daakkunu, nug amuppa nuhignu, nug baekkudppanu ele dilag eheɗ haknu nob nau doɗ amu tiigppa iitta meeb elele medakkunu hekku amu, nug doɗ amu awa doa, baag otaɗeb mauhkku.

¹² Nug qewowa, nug kalu danab ile muttuɗig enanag bettenu tappiɗ gapappa hak awa, amu nug ottag qaɗab Yawe noobppa daatte, amuppa awa ineb ambekku. Aria, nug eppeg aɗit ohppa kalu ile muttuɗig enanag bette amu appua awowa, nug amu, aria kalu ile muttuɗig enanag bettenu tappiɗ ele mawa, Oo Gun Ele, Oo Gunnab Ele makkulaknu lamen, nug amu ooppa, Oo Gunnab Eleppa nokku.

¹³ Appa Yawe noobppa, nug kalu ile muttuɗig enanag bette ele amu ottag attan meeb, amu kalu danab ile muttuɗig enanag bette ele kahug amu ba, Tituanak Nainu Kunup kontrak inak ele ameg, ameg amuam eheɗ haknu nob nau tiigppa iitta me elele medatte ippunadtte, Kayaknu tituanak nai tonatte amu, am ameg amu hautkku. Nug nai imu dim lamidkku dayeb amu, nug ii mauhma.

¹⁴ Nug anam hewowa amu, nug eppeg doɗo makau gaiɗ amunu tiigppa meeb noob awa, Tituanak Nainu Kunup ameg, ameg amuam eheɗ haknu nob nau tiigppa iitta me elele medatte ippunadtte amu, nug ameg amu noobppa tauɗ qedakku. Nug anam hewowa amu, nug haen eblaih aɗit tiig amu aben Tituanak Nainu Kunup ameg noobppa daatte, aben amuppa tauɗ qedakku.

¹⁵ Nug amu ha malowa, Aron nug danab ah dilagnu ib etta hipunin haknu ofa hekkunu nug meeme baag otaɗeb mauheb, tiig awa, nug Oo Gun Ele, Oo Gunnab Ele makkulaknu lamen, nug lamen amu ooppa, nug makau tiigppa heum bia anam meeme amu tiigppa hekku. Nug tiig amu Tituanak Nainu Kunup ameg, ameg amuam eheɗ haknu nob nau tiigppa iitta me elele medatte ippunadtte amu, nug ameg amu tauɗ qedakku. Nug anam hewowa amu, nug haen eblaih aɗit tiig amu aben Tituanak Nainu Kunup ameg noobppa daatte, aben amuppa tauɗ qedakku.

¹⁶ Ib amuppa, mana mettak danab nug doɗ amu mana, Kayak medatta, nug heeb, Oo Gunnab Ele am Kayaknu neekkakppa oppiaawak daakku. Nug amu hekkunu diig am, Israel danab ag Kayak ele ouqa dayaknu elele iitta, ag hipunin henana, nai tappe nak ele hetteb amunu, ag aɗi aɗi hipunin heppig, nug amunu amu hekkuoitte. Aria, nug mettid haknu peh lag danab ah appa qagmetteb ele, nug lag amunu ele anamib hekku. Israel ag Kayak ele ouqa dayaknu elele iitta daaegeg, lag amu ag oolagppa daatte amunu, nug anam hekku.

¹⁷ Aron nug Oo Gunnab Ele, amuppa ukka, eheɗ haknu nob nau iitta mekkunu heebeb amu, haen nug appa daya, eɗua dimittim ii uɗiom, auntai laa nug mettid haknu peh lag danab ah appa qagmetteb ele, nug lag amu ooppa aib noum. Aron nug amu haaha, nug nukka nuhignu, nug baekkudppan dilagnu, amu Israel danab ah oh ele dilagnu, ag eheɗ hak ahilagnu nob nau tiigppa iitta meeb elele medakkunu aakku hette.

¹⁸ Nug anam hewowa amu, nug uɗia, doɗ tiigppa nug qaɗab Yawe noobppa daattenu heeb, qaɗab am Yawenu neekkakppa oppiaawak daakku. Nug amu hekkunu amu, nug makau gaiɗ tiig laa awa, amu meeme tiig laa ele awa, qaɗabnu qeqeɗippa mekku.

¹⁹ Israel ag Kayak ele ouqa dayaknu elele iitta amunu, qaɗab amu oppiaawak daakkunu, Kayaknu tituana mettak daakkunu amu, nug eppeg doɗo tiigppa meeb noob awa, nug haen eblaih aɗit qaɗab attan tauɗ qedakku.

²⁰ Aron nug Oo Gunnab Ele, mettid haknu peh lag danab ah appa qagmetteb ele, qaɗab ele Kayaknu neekkakppa oppiaawak daaglagnu keeke oh ha mala amu, nug meeme bau daatte awa, qaɗab guguitta wakku.

²¹ Nug eppeg aɗit oh meeme igippa ma, nug hipunin ohnu, amu Israel danab ah dilag nai tappe nak amunu ele miagib madikku. Amuppa, nug geha danab ah dilag hipunin amu meeme igippa mekku. Nug anam hewowa, meeme amu, danab laa otippig ele, nug eppegppa meeb, nug awa atu taɗakppa appa gokku.

²² Meeme nug danab ah dilag hipunin oh amu mawa, atu taɗakppa, appa gokku. Mawa ukkeb, danab nug appa uuitteb oikku.

²³ Aron nug anam hewowa amu, nug mettid haknu peh lag danab ah appa qagmetteb ele, nug lag amu ooppa ukka, nug Oo Gunnab Ele amuppa nokkunu ha, linen lamen takkom ele amu eɗua uɗa, meeb daakku.

²⁴ Nug aben Kayaknu tituanak daatte eleppa beɗu kunum oh le laakku. Hewowa, nug eɗua lamen nuhig laa takka, dimittim uɗia, nug manaknu ofa nuhig hewowa, nug manaknu ofa danab ah dilag hekku. Amuppa, Aron nug doɗ amu mana, Kayak medatta, eheɗ haknu nob nau nuhignu, danab ah dilagnu ele tiigppa iitta meeb elele medakkunu hekku.

²⁵ Nug ittag oh ele ib etta hipunin haknu ofa ha qaɗabppa manakku.

²⁶ Amu laa nug hipunin mawa atu taɗakppa ukkaknu meeme amu awa ukka mekkunu otippig ele amu, nug anam ha mala, nug lamen nuhig miha, nukka le ele laakkuoitte. Anam hewowa, nug haen tutu dayaknu aab kalakppa eɗua dokkun elele.

²⁷ Amu Aron makau gaiɗ, meeme dawai ele ib etta hipunin haknu ofanu aqa, nug eheɗ haknu nob nau tiigppa iitta meeb elele medakkunu, tiilah Oo Gunnab Ele amuppa awa noum amu, laa nug gaɗalah, teppulah, amu biilah ele doɗ amunu akka, haen tutu dayaknu aab kalak dimittim ukka, manatteb eoglagoitte.

²⁸ Laa nug keeke amu manadtte ele, nug nuhig lamen ihalatta, nug ele le laakkuoitte. Nug amu ha malowa, nug haen tutu dayaknu aab kalakppa eɗua dokkun elele.

²⁹ Ag keeke imu oh maɗ ohppa, kalam ebqak eblaih aɗit ele, kalam amunu deɗ eblaih tanig eleppa hekkulagoitte. Ag deɗ laippu amu ohppa amu, ag ee ohnu kud mena daanna, uɗat laa iinab hemana. Ɗo imu nug hanhannu, Israel danabnab, amu wan laihnu danab, ag uɗin, ag oolagppa daatteb ele, ahilag ohnu daatte.

³⁰ Aɗinu? Deɗ amuppa mana mettak dilag ikki anuqak nug heeb, eheɗ haknu nob nau tiigppa iitta meeb elele metteb, ag Yawe noobppa oppiaawak daaglag.

³¹ Deɗ amuam sabat deɗ, am hik awaknu deɗ; ag geha deɗ amuppa ee ohnu kud mena daaglagoitte. Ɗo imu amu, ahilagnu hanhan daakku.

³² Am butti aɗi mana mettak danab laa nug mana mettak ikki danab daakkunu goɗen gokkaɗakppa tituanak awa, baɗ ele awa daakku amu, nug hipunin haknu nob nau tiigppa iitta meeb elele medakkunu kobolnu keeke oh hekku. Nug lamen linenppa hak, Kayaknu tituanak daatteb, nug lamen amu takka,

³³ nug mana mettak Kayak medatta, Oo Gunnab Elenu, mettid haknu peh lag danab ah appa qagmetteb ele, lag amunu, qaɗabnu, mana mettak danab dilagnu, Israel danab ah oh dilagnu ele, nug ahilag eheɗ haknu nob nau iitta meeb elele medakkunu doɗ tiigppa hekku.

³⁴ Ɗo imu amu ag Israel danab ah, am ag ahilagnu, hanhannu daatte. Mana mettak danab nug maɗ anen anenppa, haen laippu, hipunin ag heppignu amu, nug hipunin amu haknu nob nau tiigppa iitta meeb elele medakkunu hekkuoitte,” awa aum. Am Moses nug Yawenu nai dim lamitta hekkununab aum amu, nug amu oh dim lamitta heum.