Lewitikas 15 - Nobonob Baibel

Beɗu ooppan leppu naknu ɗo

¹ Amu Yawe nug Moses, Aron ele amelahppa aum.

² “Aa Israel danab ah amelagppa nai imu apeɗ doyeg!” awa aum. ⌊Nug anam a amu, aa Israel danab ah amelagppa inam apiɗ.⌋ “Haen laa ⌊nug oɗe laa ele, diig amunu⌋ nug beɗuppan leppu laa nette amu, leppu amuam Kayaknu neekkakppa dubuttid ele.

³ Leppu amu nug haen oh nekkute, o iitta haen laib laib keldoak dayaya, ii nekkutai, amge amunu keeke laa he, ii baolitte. Iitta. Amuam he, danab amu nug aakku Kayak ele ouqa dayaknu elele iitta daatte. Amu nai imuam leppu nak amuam attem heeb, danab laa nug Kayak ele ouqa dayaknu elele iitta daakku, o keeke laa Kayaknu neekkakppa dubuttid ele daakkunu nai.

⁴ Aun laa nug beɗuppan leppu nette ele amu, nug niiak abenppa niitte dayeb, niitte aben amuam Kayaknu neekkakppa dubuttid ele daakku. Amu aɗi keeke oh nug qaɗeppa heɗep na daatte ele amu, keeke amuam Kayaknu neekkakppa dubuttid ele daakku.

⁵ Aun laa nug laa amunu niiak aben aɗatte amu, nug lamen nuhig mihalatta, nug le ele laakkuoitte. Anam ha, nug Kayak ele ouqa dayaknu elele iitta dayeb ukkeb, tueb batakku.

⁶ Aun laa nug laa beɗuppan leppu na, keeke qeum ele, amuppa heɗep na daatte amu, nug lamen nuhig mihalatta, nug ele le laakkuoitte. Nug Kayak ele ouqa dayaknu elele iitta dayeb ukkeb, tueb batakku.

⁷ Aun nug laa beɗuppan leppu nette ele nug lauɗidtte, nug nuhig lamen iha, nug le ele laakkuoitte. Nug am Kayak ele ouqa dayaknu elele iitta dayeb ukkeb, tueb batakku.

⁸ Aun laa nug beɗuppan leppu nette amu, nug hunueb ukka, laa nug Kayak ele ouqa dayaknu elele laidkku dayeb amu, laa amu nug lamen nuhig mihalatta, nug ele le laakkuoitte. Nug Kayak ele ouqa dayaknu elele iitta dayeb ukkeb, tueb batakku.

⁹ Aun laa nug beɗuppan leppu nette amu, nug hos attan ta dayaya gokkutai, o nug karisppa dayaya gokkutai, o nug keeke laa attan daya gokku dayeb amu, lamen keeke, nug dayomppa, amuam Kayaknu neekkakppa dubuttid ele daakku.

¹⁰ Aun laa nug aɗi keeke danab beɗuppan leppu nette ele dayomppa lauɗidtte amu, nug Kayak ele ouqa dayaknu elele iitta dayeb ukkeb, tueb batakku. Aun nug keeke amu maotte amu, danab amu nug lamen nuhig mihalatta, nug le ele laakkuoitte. Nug Kayak ele ouqa dayaknu elele iitta dayeb ukkeb, tueb batakku.

¹¹ Aun laa nug beɗuppan leppu nette ele, nug eppeg tatam ii mihowa, laa beɗu aɗatte dayeb amu, laa amu nug lamen nuhig mihalatowa, nug le ele laakkuoitte. Nug am Kayak ele ouqa dayaknu elele iitta dayeb ukkeb, tueb batakku.

¹² Laa nug beɗuppan leppu nette ele nug wan hinai keeke lauɗidkku dayeb amu, laa nug wan hinai keeke amu ob aoɗkkuoitte. Ag wan hinai keekeppa anam hekkulag, amge keeke adppa hak, am tappiɗ, tappiɗ okkai okkai, huɗup, o keeke laa aɗakku dayeb amu, ag leppa mihaladkkulagoitte.

¹³ Haen laa nug beɗuppan leppu nette ele, nug eɗua ena daatte dayeb amu, nug eɗua, Kayak ele ouqeya daaglahnu elele bekkunu amu, nug deɗ eblaih laippu ele anam dayeb ukkeb, deɗ eblaih aɗitppa nug amu hekkuoitte. Nug lamen nuhig ihalattowa, nug le gotteppa ele le laya, nug Kayak ele ouqa dayaknu elele daakku.

¹⁴ Am deɗ eblaih ewamppa amu, laa amu nug uppuɗil beɗulag nakok aɗit, o nug uppuɗil beɗulag okkai nag aɗit diia uɗikkuoitte. Nug diia uɗia, mettid haknu peh lag danab ah appa qagmetteb ele, nug lag amu odppa Yawe noobppa uɗia, nuhig mana mettak amu, mana mettak danab meɗakkuoitte.

¹⁵ Am mana mettak danab nug appa ai aɗit amuppa mana mettak hekku; laa amu ib etta hipunin haknu ofa, laa am manaknu ofa. Ib amuppa mana mettak danab nug doɗ amu mana, Kayak metta, nug Yawe noobppa heeb, leppu nak iitta meum, amunu dubuttid danab amuppa daatte Kayaknu neekkakppa iitta mekkunu hak am elele medakku.

¹⁶ Am haen danab nug ah ele niieh, leppu nette ele, leppu amu haen laa, danab laa nug ah ele ii niipeɗ, nuhigppa hamu nekku dayeb amu, nug beɗu oh ihakkuoitte. Nug Kayak ele ouqa dayaknu elele iitta dayeb ukkeb, tueb batakku.

¹⁷ Amu danabnu leppu amuam lamen keeke, o keeke laa doɗ gaɗappa hattakte, amu leppu amu na aqadtte amu, nug ihaladkkuoitte. Am keeke amuam Kayaknu neekkakppa dubuttid ele dayeb ukkeb, tueb batakku.

¹⁸ Am haen danab nug ah ele aa niittep, amu dimppa aa oh le laaglahoitte. Aa Kayak ele ouqa dayaknu elele iitta daapeɗ ukkeb, tueb batakku.

¹⁹ Am haen ah nug kalam qette, nug geha Kayak ele ouqa dayaknu elele iitta, deɗ eblaih aɗit anam daakku. Aun laa nug haen amuppa beɗu lauɗidtte amu, nug Kayak ele ouqa dayaknu elele iitta dayeb ukkeb, tueb batakku.

²⁰ Kalam qak, haen amuppa aɗi keeke laa ah anam ele nug qaɗeppa dayom, o nug qaɗeppa niiom ele amu, keeke amuam Kayaknu neekkakppa dubuttid ele.

²¹ Aun laa nug ah amunu niiak aben lauɗidkku dayeb amu, nug nuhig lamen mihaladkkuoitte. Nug le ele layowa, nug Kayak ele ouqa dayaknu elele iitta dayeb ukkeb, tueb batakku.

²² Ah laa anam ele, nug keeke laa qaɗeppa heɗep na dayom ele, aun laa keeke amu lauɗidkku amu, nug lamen nuhig ihalatta, le laakkuoitte. Nug Kayak ele ouqa dayaknu elele iitta dayeb ukkeb, tueb batakku.

²³ Keeke amuam niiak balalte, o iitta dayak balalte, o keeke laa oh ele, amge laa nug keeke amu lauɗidkku dayeb amu, nug Kayak ele ouqa dayaknu elele iitta dayeb ukkeb, tueb batakku.

²⁴ Am danab laa nug haen amuppa ah anam ele dayeye, nug ele niipeɗ, tiig laidkku dayeb amu, nug deɗ eblaih aɗit ele, Kayak ele ouqa dayaknu ele iitta daakku. Am niiak aben adekku danab nug amuppa niitte ele amu, niiak aben amu ele am Kayaknu neekkakppa dubuttid ele daakku.

²⁵ Am ah laa nug kalam qeeb, malak haen amu eɗitteb, tiig nakib daakku dayeb, o nug beɗuppan leppu nakib dayeb, amu haen oh leppu amu nette ele amu, ah amu nug Kayak ele ouqa dayaknu elele iitta daakku.

²⁶ Keeke laa ah amu, nug qaɗeppa niitte, o nug qaɗeppa daatte ele amu, amuam kalam aqe, keeke amu Kayaknu neekkakppa dubuttid ele daatte, amubia imu ele am Kayaknu neekkakppa dubuttid ele daaglag.

²⁷ Aun laa nug ah amunu niiak aben lauɗidkku, o nug keeke laa ah nug qaɗeppa dayom ele, nug amu lauɗidkku dayeb amu, nug Kayak ele ouqa dayaknu elele iitta daakku. Nug lamen nuhig ihalatta, le ele laakkuoitte. Nug Kayak ele ouqa dayaknu elele iitta dayeb ukkeb, tueb batakku.

²⁸ Am haen ah amu nug leppu nak nuhig maleb amu, nug deɗ eblaih aɗit anam ameg mak daakkuoitte. Amu dimppa, nug Kayak ele ouqa dayaknu elele daakku.

²⁹ Am deɗ eblaih ewamppa, ah nug uppuɗil beɗulag nakok aɗit, o nug uppuɗil beɗulag okkai nag aɗit diiata, mana mettak danab toppa, mettid haknu peh lag danab ah appa qagmetteb ele, nug lag amu odppa wakkuoitte.

³⁰ Am mana mettak danab nug ai laappa ib etta hipunin haknu ofa hekku, laa amu nug manaknu ofa hekku. Ib amuppa, mana mettak danab nug Yawe noobppa heeb, leppu nak iitta meum, amunu dubuttid ah amuppa daatte Kayaknu neekkakppa iitta mekkunu hak elele medakku,” aoya apiɗ.

³¹ Kayak Nug anam ana, nug tuɗitta, Moses, Aron ele amelahppa aum. “Am Israel danab ah ag dahil mettid haknu peh lag, lag amuam ahilag haen tutu dayaknu aab kalak ooppa daatte amu, ag lag amu heppeg, dahil neekkakppa dubuttid daamanu, aa danab ah amelagppa aɗi keeke he, danab ah ag da ele ouqa dayaknu elele iitta daatteb, ag amu dooglagnu, aa ag nau aomnanu dabmettak nai apeɗ dooglagoitte. Am ag mettid haknu peh lag dahil heppeg, dahil neekkakppa dubuttid ele daakku amu, ag mauhkkulag.

^32-33 Imuam aun laa nug ⌊oɗe ele amunu nug⌋ beɗuppan leppu nette, diig amunu nug Kayak ele ouqa dayaknu elele iittanu nai; am danab aun beɗuppan leppu ah ele niiak nette bia nettenu nai; amu ah ag kalam aqattenu nai; am danab ah ele niipeɗ, beɗulahppan leppu nette dilah nai; aria imuam ah nug Kayak ele ouqa dayaknu elele iitta daye, danab nug nug ele niittep, danab amunu nai ele. Nai imu, am amu oh tonadtte,” awa aum.