Lewitikas 14 - Nobonob Baibel

Gaɗa oɗe nau iitta meeb, danab amu nug Kayak ele ouqa dayaknu ippunu nai

¹ Amu Yawe Moses amegppa aum.

² “Nai imuam danab o ah nug gaɗa oɗe nau ele, amge gaɗa oɗe nau amu iitta meeb, nug Kayak ele ouqeya daaglahnu kobol aɗi hekku, amunu bette. Gaɗa oɗe nau iitta meeb dimppa, laa ag nug aon, aben laa mana mettak danab nug appa ukka, pehetta itala anidkku ele amuppa ukkeg! Aben amuam haen tutu dayaknu aab kalak dimittim daatte.

³ Am laa nug gaɗa oɗe nau ele, nug haen tutu dayaknu aab kalak dimittim, aben amuppa ukkeb amu, mana mettak danab nug appa ukka, pehetta itala anidkku. Am mana mettak danab nug danab amu, nug beɗuppa gaɗa oɗe nau amu iitta meum antta amu,

⁴ nug laa hekkununab ab, laa nug ai bau aɗit, lanaknu epeɗiak daattep diiata, ad sida maha laa, amu muɗi string kokoɗnab laa, ad hisop eppeg ele diia, mana mettak danab nug danab gaɗa oɗe nau ele amge iitta meum, nug Kayak ele ouqeya daaglahnu amuppa uɗat hekkunu, nug mana mettak danab gumitta uɗikku.

⁵ Am mana mettak danab nug hinai laa le ele, le amuam le gotteppan itak ele amu, hinai amu dayebeb, danab laa nug ai laa awa, hinai am ai amu waappa dayebeb, amu danab amu nug ai hinai attan qaknunab ab, qekku.

⁶ Nug qeeb, mana mettak danab nug ai laa, ad sida, muɗi kokoɗnab amu hisop eppeg ele aɗa, ai laa baag otaɗe, tiig noa, hinai le ele ooppa daatte amu, nug amu ooppa meeb noob, eɗua eeɗeb bekku.

⁷ Am mana mettak danab nug ai mauhom tiig, le ele amu awa, laa nug Kayak ele ouqeya daaglahnu bekkun daatte amu, haen eblaih aɗit anam tauɗ qetta, nug danab amu amegppa nug Kayak ele ouqa dayaknu elele akku. Kobol amu malak dayeb amu, mana mettak danab nug ai bau amu paɗeb, nug hagagɗa, aab dimittim, dadppa keeke, nug appa ukka oikku.

⁸ Laa nug Kayak ele ouqeya daaglahnu bekkun daatte, nug Kayak ele ouqa dayaknu kobol heeb, gogppa tekkunu amu, nug inam hekkuoitte. Nug lamen nuhig miha, beɗu uɗig oh hoiyeb ukkeb, nug le laakkuoitte. Nug anam ha, Kayak ele ouqa dayaknu elele amunu, nug eɗua, haen tutu dayaknu aab kalak, amuppa gokkunu elele. Anam aakku hekku, me nug nuhig peh lag ooppa ii noma, nug deɗ eblaih aɗit ele dimittim daakkuoitte.

⁹ Deɗ eblaih aɗit ele, deɗ amuppa amu, nug inam hekkuoitte. Nug beɗu uɗig oh, amuam ikki, akkaɗi, amehpi, amu beɗu oh uɗig ele baula akkeb ukkeb, lamen nuhig mihalatta, le ele laakkuoitte. Anam heeb amu, nug Kayak ele ouqeya daaglahnu elele.

¹⁰ Am deɗ laa, deɗ eblaih ewamppa amu, laa nug beɗu ena dayom ele nug sipsip gaiɗ aɗit, amu sipsip balat laippu, maɗ laippu awak ele, ag beɗulagppa eheɗ laa iitta ele, amu 3 kilogram plaua enanag olip goɗenppa kaboliak, ee aegnu ofa daakkunu, amu olip goɗen kap aɗit ele diia, wakkuoitte.

¹¹ Diia wab, mana mettak danab nug danab laa Kayak ele ouqeya daaglahnu elele atte, mana mettak danab amu nug danab Kayak ele ouqeya daaglahnu bekkun daatte, aria keeke nug mana, Kayak mettaknu diia waum ele amu, nug amu oh akka, danab amu omala, mettid haknu peh lag danab ah appa qagmetteb ele, lag amu odppa, Yawe noobppa maadkku.

¹² Am mana mettak danab nug sipsip gaiɗ laa, olip goɗen ele eheɗ haknu ofa daakkunu, nug Yawe noobppa doɗ amu, goɗen ele awa, nug huma epponitta mettaknu ofa hekku.

¹³ Nug geha mettid haknu peh lagnu od haɗap-ppa, aben amuam Kayaknu tituanak daatte amu, aben amuppa ag ib etta hipunin haknu ofa, amu manaknu ofa hena, doɗ baalag otaɗatteb, aben amuppa sipsip gaiɗ baag otaɗeb mauhkku. Nug amu hekkunu diig am, ib etta hipunin haknu ofa, amuam mana mettak danab, nuhig daatte, amubia eheɗ haknu ofa ele, am mana mettak danabnu daakku. Mana mettak amuam Kayaknu tituanaknab daatte.

¹⁴ Am mana mettak danab nug eheɗ haknu ofa haknu doɗ tiig laa awa, laa nug Kayak ele ouqeya daaglahnu bekkun daatte amu, nug nug daug bami naɗiap amuppa mewowa, eppeg naɗiap tanigppa mewowa, amu baeg naɗiap tanig amuppa mekku.

¹⁵ Mana mettak danab nug anam hewowa amu, nug olip goɗen laih laa gokkaɗeb, nug eppeg naneh gottu mettom ooppa nokku.

¹⁶ Gokkaɗowa, nug eppeg hiqal naɗiap meeb, goɗenppa nob, amu awa, haen eblaih aɗit ele Yawe noobppa tauɗ qedakku.

¹⁷ Amu mana mettak danab nug goɗen eppeg oo nanehppa daatte amu awa, danab Kayak ele ouqeya daaglahnu bekkun daatte, amu daug bami naɗiap, amuppa mewowa, amu eppeg doɗo tanig naɗiap, amuppa mewowa, baeg naɗiap tanigppa mekku. Nug eheɗ haknu ofa hak, nug tiig amu ele amu heum amu, amu biaib tiig amu qaɗeppa nug goɗenppa anam hekku.

¹⁸ Am mana mettak danab nug goɗen laih daatte, nug danab o ah Kayak ele ouqeya daaglahnu bekkun daatte, nug nug igippa gokkaɗeb nokku. Mana mettak danab nug keeke amu oh hette amu, ib amuppa nug Yawe noobppa eheɗ haknu nob nau iitta mekkunu heeb elele medakku.

¹⁹ Anam hewowa, nug ib etta hipunin haknu ofa hekkuoitte. Amu mana mettak danab nug mana, Kayak metta heeb, danab Kayak ele ouqeya daaglahnu bekkun daatte, nug Kayaknu neekkakppa oppiaawak daakku. Amu dimppa, mana mettak danab nug manaknu ofa haaha, doɗ baag otaɗeb mauheb,

²⁰ amu nug qaɗabppa ee aegnu ofa ele oh ma, amu mana mettak danab nug mana mettak amu Kayak metta, nug amuppa eheɗ haknu nob nau iitta mekkunu heeb elele metteb, danab o ah amuam nug Kayaknu neekkakppa oppiaawak daakku, amu nug Kayak ele ouqa dayaknu elele daakku.

²¹ Amge aun nug keeke iitta, diig amunu nug sipsip ewam diiatta dokkunu elele iitta amu, nug sipsip gaiɗ laippu, eheɗ haknu ofa haknu awa wakkuoitte. Am nug 1 kilogram plaua enanag olip goɗenppa kaboliak, ee aegnu ofa daakkunu, amu olip goɗen kap aɗit ele awa wakkuoitte. Aakku mana mettak danab nug eheɗ haknu ofanu sipsip nag dawai amu, aria ee aegnu ofanu ee aeg ele aɗa, nug huma epponitta mettaknu ofa hekku. Amuppa nug heeb, danab o ah amu nug Kayaknu neekkakppa oppiaawak daakku.

²² Am danab o ah nug Kayak ele ouqa dayaknu hette ele, nug ele uppuɗil beɗulag nakok aɗit, o uppuɗil beɗulag okkai nag aɗit, nug attem aokkunu elele daatte amu, nug diiatta dokkuoitte. Laa amuam ib etta hipunin haknu ofa haknu dayebeb, amu laa am manaknu ofa haknu daakku.

²³ Deɗ eblaih ewamppa amu, laa nug beɗu uhuqak awom ele, nug Kayak ele ouqa dayaknu kobol hekkunu, mettid haknu peh lag danab ah appa qagmetteb ele, nug lag amu odppa, Yawe noobppa, amu haknu nuhig mana mettak akka, mana mettak danab toppa wakkuoitte.

²⁴ Am mana mettak danab nug sipsip gaiɗ, eheɗ haknu ofa daakkun daatte, amu olip goɗen ele awa, Yawe noobppa huma epponitta mettaknu ofa hekku.

²⁵ Anam ha mala, nug sipsip gaiɗ, eheɗ haknu ofa haknu baag otaɗeb mauheb, amu nug tiig laa awa, danab nug Kayak ele ouqeya daaglahnu bekkun daatte, amu daug bami naɗiap-ppa mewowa, eppeg naɗiap tanigppa mewowa, amu baeg tanig naɗiap-ppa ele mekku.

²⁶ Am mana mettak danab nug olip goɗen laih laa ele gokkaɗeb, nug nug eppeg naneh gottu mettom ooppa nokku.

²⁷ Gokkaɗowa, nug eppeg hiqal naɗiap meeb, goɗenppa nob, amu awa, haen eblaih aɗit ele Yawe noobppa tauɗ qedakku.

²⁸ Amu mana mettak danab nug goɗen eppeg oo nanehppa daatte amu awa, danab Kayak ele ouqeya daaglahnu bekkun daatte, amu daug bami naɗiap, amuppa mewowa, amu eppeg doɗo tanig naɗiap, amuppa mewowa, amu baeg naɗiap tanigppa mekku. Nug eheɗ haknu ofa hak, nug tiig amu ele amu heum amu, amu biaib tiig amu qaɗeppa nug goɗenppa anam hekku.

²⁹ Am mana mettak danab nug goɗen laih daatte, nug laa Kayak ele ouqeya daaglahnu bekkun daatte amu, nug nug igippa gokkaɗeb nokku. Mana mettak danab nug keeke amu oh hette amu, ib amuppa amu, nug heeb, danab o ah amuam Yawenu neekkakppa oppiaawak daakku.

³⁰ Anam hak dayeb amu, mana mettak danab nug uppuɗil beɗulag nakok aɗit, o uppuɗil beɗulag okkai nag aɗit, danab o ah nug attem babaittom amu awa, mana mettak hekku.

³¹ Laa amu ib etta hipunin haknu ofa haknu, laa amu manaknu ofa haknu. Nug ee aegnu ofa ele oh awa qaɗabppa ma, amu mana mettak danab nug mana mettak amu Kayak metta, ib amuppa nug danab o ah nug Kayak ele ouqeya daaglahnu bekkun daatte, am nuhignu nug Yawe noobppa eheɗ haknu nob nau tiigppa iitta mekkunu heeb elele medakku.

³² Nai imuam laa nug gaɗa oɗe nau ele, nug eɗua ena daatte, nug Kayak ele ouqa dayaknu kobol hekkunu hette, amge nug keeke kuɗum iitta amunu, nug doɗ oh elelenab aɗa wakkunu elele iitta amu, nai imuam nug attem attem hekku am aakku,” awa aum.

Keeke gi qak nau beumppa, eɗua ena dayaknu nai

³³ Amu Yawe Nug Moses, Aron ele amelahppa aum.

³⁴ “Haen ag Kanan wan, wan amuam ag aulag daakkunu madattem amu, haen da ag madappi noppeg, da heppi, geha gi, gaɗa oɗe nau bia, ag laulag qekku.

³⁵ Lag laa anam elenu mameg nug ukka, mana mettak danab amegppa inam akkuoitte. ‘Gi, gaɗa oɗe nau bia, da laul qeum anidttem,’ awa akku.

³⁶ Am mana mettak danab nug lag ii italom dayaya, nug lakkan keeke oh Kayaknu neekkakppa dubuttid ele amanu, nug lag mameg amegppa, keeke oh akka, laih mekkununab akku. Lag mameg nug anam heeb, mana mettak danab nug lag amu italkku.

³⁷ Am nug lagnu gililppa, kaala laa grin bia, o kokoɗ bia qak anidkku dayeb, keeke amu nug gilil ooppa noak daakku dayeb amu,

³⁸ nug lag amu deɗ eblaih aɗit ele anam od manak daakkunu od manowa gokku.

³⁹ Am deɗ eblaih aɗitppa amu, mana mettak danab nug eɗua ukka, lag amu italkkuoitte. Keeke qak amu lag gililppa, aben laih ele awom dayeb amu,

⁴⁰ mana mettak danab nug heeb, laa ag gilil men, keeke amu qak ele amu loppaɗna aoglagoitte. Lopaɗna aona, ag aon gona maoppeg, aab okkai dimittim, aben Kayaknu neekkakppa dubuttid ele, amuppa gokku.

⁴¹ Anam heppeg, mana mettak danab nug heeb, ag lag ooppan men gilil oh kuhappeg neeb, ag aon gona maoppeg, aab okkai dimittim, aben Kayaknu neekkakppa dubuttid ele, amuppa gokkuoitte.

⁴² Anam hewona amu, ag men baula men tatamnu amu abenppa mekkulagnu aon mewona, ag gilil qaɗeppa simen gililppa laittaknu laidkkulagoitte.

⁴³ Amge keeke amu oh hak dimppa gi qak amu baula lag amuppa bekku dayeb amu,

⁴⁴ mana mettak danab nug eɗua ukka, lag amu italkkuoitte. Nug ukka, gililppa gi qak amu aben laih ele gi qak ukkom anidkku dayeb amu, amuam gi, gaɗa oɗe nau bia, am keeke laa aɗa he nauhtte ele amunu, lag amuam Kayaknu neekkakppa dubuttid ele daatte.

⁴⁵ Amunu ag lag amu loppaɗppeg neeb, ag gililnu men, simen gilil qaɗeppa mak, lag ebehi ele amu, ag keeke amu oh aben aab dimittim Kayaknu neekkakppa dubuttid ele, amuppa aon gona, agappeg gokkuoitte.

⁴⁶ Aun laa nug lag amu od manak dayebeb, nug lag amuppa nokku amu, nug am Kayak ele ouqa dayaknu elele iitta daakku. Nug anamib dayeb ukkeb, tueb batakku.

⁴⁷ Aun aɗi ag lag amuppa daanna niitteb, o ee latteb ele, ag lamen keeke ahilkad ihaladkkulagoitte.

⁴⁸ Mana mettak danab nug deɗ eblaih aɗitppa nug gililppa aben gi qak anidkkunu ukka, anam anidkku dayeb amu, nug anam aakku hekkuoitte. Amge simen laittak dimppa, mana mettak danab nug eɗua ukka, lag amu gililppa gi qak amu ⌊baula ii beum,⌋ aben laih ⌊ele⌋ ii ukkom anidkku dayeb amu, nug lag amu aakku Kayaknu neekkakppa dubuttid iitta akku. Aɗinu? Gi, oɗe gaɗa nau bia, keeke laa aɗa he nauhtte ele amu, gi amu aakku iitta meum.

⁴⁹ Mana mettak danab nug lag amu heeb eɗua, Kayaknu neekkakppa oppiak ele daakkunu amu, nug heeb, laa nug ai aɗit, ad sida maha laala, muɗi kokoɗnab maha, amu hisop ad eppeg ele medakku.

⁵⁰ Am mana mettak danab nug hinai laa le ele, le amuam le gotteppan itak ele amu, hinai amu dayebeb, nug ai laa awa, hinai am ai amu waappa dayebeb, amu nug ai hinai attan qekku.

⁵¹ Nug qeeb, mana mettak danab nug ai laa, ad sida, muɗi kokoɗnab amu hisop eppeg ele aɗa, ai laa baag otaɗe, tiig noa, hinai le ele ooppa daatte, nug amu ooppa meeb noob, eɗua eeɗeb bekku. Nug amu hewowa, nug lag haen eblaih aɗit ele tauɗ qedakku.

⁵² Nug ib amuppa, amuam ai tiig, le, le amuam le gotteppan itak ele, ai ii mauhak, ad sida, hisop eppeg, amu muɗi kokoɗnab, keeke amuppa nug heeb, lag Kayaknu neekkakppa oppiak ele dayeb,

⁵³ nug ai bau daatte ele amu aab dimittim, dad okkai, appa heeb ukka oikku. Mana mettak danab nug keeke amu oh hette amu, ib amuppa amu, nug heeb, lag amuam Kayaknu neekkakppa oppiaawak dayeb, lag amuam Kayaknu neekkakppa dubuttid iitta daakku.”

⁵⁴ Amuam gaɗa oɗe nau ele, o gaɗappa nahig qak oɗe,

⁵⁵ o gi lamenppatai, o lag ooppatai bette,

⁵⁶ o gaɗa titiɗak bette, o laih aegaeg bak, o hekkaɗa baknu babaittaknu ɗo aakku.

⁵⁷ Nai dim lamitta haknu imu, am Kayak ele ouqa dayaknu, o iitta Kayak ele ouqa dayaknu elele iitta amu ippunikkak daatte. Ɗo imu, gaɗa oɗe nau ele digdig, haen ag danab ah gaɗalagppa betteb, amu gi keeke qaɗeppa bette ele oh tonadtte.