Lewitikas 11 - Nobonob Baibel

Doɗ lanaknu, ii lanaknu ele epeɗiak daatteb

¹ Aria, Yawe Nug Moses, Aron ele amelahppa aum.

² “Aa Israel danab ah amelagppa nai imu apeɗ doyeg!” awa aum. ⌊Nug anam a amu, Moses, Aron ele aa Israel danab ah amelagppa inam apiɗ.⌋ “Doɗ wanppa bau daatteb, amu laa ag lanaknu epeɗiak daatteb. Laa am iitta.

³ Laa ag lanaknu epeɗiak daatteb am doɗ ag eppeg baeg di ele gamagppa obatak ele, amu ee eɗua kele be, eɗua latte ele, doɗ amu ag lakkulagnu elele.

⁴ Amge ag doɗ laala onilkad diiak ele imuam, ag ii lamana. Aɗinu? Ag eppeg baeg di gamagppa obatak ele, amge ag ee lawona, eɗua kele be, eɗua lanak kobolppa ii latteb. Laala ag ee lawona, eɗua kele be, eɗua lanak kobolppa latteb, amge ag eppeg baeg di gamagppa obatak iitta amunu, doɗ imu anen anen ag keeke aɗit amu oh iitta, amunu ag lakkulagnu elele iitta. Doɗ amuam, kamel. Kamel ag ee lana, toppua gona, eɗun kelaeg be latteb, amge ag eppelkad baelkad di gamagppa obatak iitta amunu, ahilagnu, ag ii lanaknu epeɗiak daatteb.

⁵ Rok badsa, men okkaippa daatteb, ag ee lana, toppa gona, eɗun kelaeg be latteb, amge ag eppelkad baelkad di gamagppa obatak iitta amunu ahilagnu, ag ii lanaknu epeɗiak daatteb.

⁶ Doɗ hea ag ee lana, toppa gona, eɗun kelaeg be latteb, amge ag eppelkad baelkad di gamagppa obatak iitta amunu, ag lakkulagnu elele iitta.

⁷ Bo amu ag eppelkad baelkad di gamagppa obatak ele, amge ag ee lawona, eɗua kele be, eɗua lanak kobolppa ii latteb amunu, ag lakkulagnu elele iitta.

⁸ Ag doɗ amu teppulkad ii lamana; o iitta mauhppig, ag beɗulag ele ii lauɗadmana. Doɗ amuam ahilagnu ag ii lanaknu epeɗiak daatteb.

⁹ Aria, doɗ ag leppa daanna oitteb ele, amu dilagnu amu, doɗ amu ag gonelkad, guhilkad ele, ag yuppate o iitta leppate daatteb amu, ag amu oh lakkulagnu elele.

¹⁰ Amge, doɗ ag leppa daanna oitteb, imuam yuppanute, o leppanute, amu ag doɗ naunau huanaknab laippu oittebte, o doɗ okkaite, ag gonelkad guhilkad iitta ele, ag lakkulagnu elele iitta. Ag amunu oolagppa uuaknab dooglagnu daatte.

¹¹ Ag amu uuaknab doonna, ag teppulkad ii lamana, amu ag mauhppig gaɗalagnu ele oolagppa uuaknab dooglagoitte.

¹² ⌊Da bael aɗu eɗue madittem.⌋ Ag doɗ laa oh leppa daatteb ele, ag guhilkad, amu gonelkad iitta ele amu, ag doɗ amu dilagnu oolagppa uuaknab dooglagoitte.

¹³ Aria, ainu amu, ag ai imunu ag oolagppa uuaknab doona, ag iinab lakkulagoitte. Genab, ai imunu ag oolagppa uuaknab dooglagoitte. Amu ai amuam, ai igel, kaub, kaub hinqakib,

¹⁴ kait kokoɗ, kait hinqak digdig,

¹⁵ alɗal digdig,

¹⁶ hipunai qeqeɗi ele, hipunai gayak baag eheɗ ele, kanai, kihkih digdig,

¹⁷ hipunai nakok, kormoran, hipunai okkai,

¹⁸ hipunai hakkab, atu taɗakppan hipunai, ospe,

¹⁹ stok, qaɗ digdig, hupoe, meɗeb ele.

²⁰ Amu keeke naunau, ag haulkad ele, amge ag wanppa baelkad waɗeleppa oitteb ele, ag keeke amunu oolagppa uuaknab doona, ag ii lattaglagoitte.

²¹ Amge keeke naunau, ag haulkad ele, amge ag wanppa baelkad waɗeleppa oitteb ele, ag oolagppa laippu laippu ag lakkulagnu elele. Amuam keeke laala ag baelkadppa oolnan oolnan oitteb ele.

²² Keeke amuam, tap-lokus digdig, kriket, tap-lokus bikkab ele, amu tap digdignu ele. Amu oh ag lattaglagnu elele.

²³ Ag amu lakkulag, amge keeke laa oh ag haulkad ele, amu ag wanppa ele baelkad waɗeleppa oitteb ele, ag amunu oolagppa uuaknab doona, ag ii lakkulagoitte.

²⁴ Doɗ amu ag heppeg, ag Kayak ele ouqa dayaknu elele iitta daaglag. Aun laa nug amunu laa mauhom gaɗa lauɗidkku amu, nug Kayak ele ouqa dayaknu elele iitta dayeb ukkeb, tueb batakku.

²⁵ Laa nug doɗ amunu laa mauhom, gaɗa aɗa maweb gokku dayeb amu, nug nuhig lamen ihadkkuoitte. Nug Kayak ele ouqa dayaknu elele iitta dayeb ukkeb, tueb batakku.

²⁶ Am doɗ laala ag baelkad di gamagppa obatak daatteb, amge ag baelkad di gamagppa obataknab ii daatteb, o iitta ag ee lawona, eɗua kele be, eɗua lanak kobolppa ii latteb amu, ahilagnu doɗ amuam ii lanaknu epeɗiak daatteb. Ag doɗ amunu laa mauhom gaɗa aɗona amu, ag Kayak ele ouqa dayaknu elele iitta daaglag.

²⁷ Amu doɗ ag eppelkad, baelkad waɗele ohppa oitteb ele, pusi, qai ele baeg bia ele amu, doɗ amunu ag ii lanaknu epeɗiak daatteb. Aun laa nug doɗ amunu laa mauhom gaɗa aɗakku amu, nug Kayak ele ouqa dayaknu elele iitta dayeb ukkeb, tueb batakku.

²⁸ Aun laa nug doɗ amunu laa mauhom gaɗa aɗa, maweb gokku dayeb amu, nug nuhig lamen ihadkkuoitte. Nug Kayak ele ouqa dayaknu elele iitta dayeb ukkeb, tueb batakku.

²⁹ Doɗ naunau, ag oolag wan qeeqe oitteb, ag oolagppanu doɗ ii lanaknu epeɗiak daatteb am inam. Mol, tog, peɗi naɗi diig oh,

³⁰ tikkun, peɗi okkai laa, gililppan peɗi, peɗi laa ihippa daatteb, peɗi laa beɗu eɗuak eɗuak bette ele.

³¹ Doɗ naunau, ag oolag wan qeeqe oitteb oolagppanu amu, doɗ naunau amu oh ag ii lamananu epeɗiak daatte. Haen aun laa nug doɗ amunu laa mauhom gaɗa aɗakku amu, nug Kayak ele ouqa dayaknu elele iitta dayeb ukkeb, tueb batakku.

³² Haen doɗ amunu laa mauha, na qa, keeke laa qaɗeppa teeb, keeke amuppa aɗi laa haknu daatte amu, keeke amuam Kayaknu neekkakppa dubuttid ele daatte. Amuam genab, keeke lamenppate, o lamen heɗiag eleppate, o doɗ gaɗappate, o iitta ad gaɗappate hak, amu ohppa anam daakku. Keeke amu le ooppa mekkulag. Keeke amuam Kayaknu neekkakppa dubuttid ele dayeb ukkeb, tueb batakku. Anam hak dimppa, keeke amu nug Kayak nuhig neekkakppa dubuttid iitta dayebeb, amu baula uɗatab mettaglagnu elele.

³³ Doɗ amunu laa nug mauha, wan waa ooppa na qa noob amu, keeke oh waa amu ooppan am Kayaknu neekkakppa dubuttid ele. Ag waa amu aoɗppeg, iitta mekkuoitte.

³⁴ Amu le waa amuppanu ukka, ee laa, danab lalo, am ee amu qeeb, amu ee amu Kayaknu neekkakppa dubuttid ele daakku. Aria, le tappiɗ amuppa daatte ele amu, le amu ele Kayaknu neekkakppa dubuttid ele daakku.

³⁵ Keeke atten laa doɗ amunu mauhom, gaɗa na qa qaɗep qette amu, keeke amuam Kayaknu neekkakppa dubuttid ele daakku. Waate, iitta ee manaknu keeke wanppa hakte amu, ag aoɗppeg, qatti qatti nekkuoitte. Keeke amuam Kayaknu neekkakppa dubuttid ele daatte, amu ag amunu anam doyeg!

³⁶ Keeke amu oh Kayaknu neekkakppa dubuttid ele daatteb, amge doɗ amunu laa mauhom, gaɗa le moɗppa noa qeum dayeb, o le qeppuɗia bakppa noa qeum dayeb amu, le amu Kayaknu neekkakppa dubuttid ii daama. Amge, aun laa nug doɗ gaɗa amu awa, laih mette amu, nug am Kayak ele ouqa dayaknu elele iitta daakku.

³⁷ Am doɗ amunu laa mauha, ee aeg datta eppaknu mak qaɗeppa na qekku dayeb amu, ee aeg amu dubuttid ii tema, am ee aeg amu Kayaknu neekkakppa dubittid ele ii daama.

³⁸ Amge ee aeg amu leppu qak dayebeb, doɗ amunu laa mauhom, gaɗa na qa qeeb amu, ee aeg amuam Kayaknu neekkakppa dubuttid ele daakku.

³⁹ Amu doɗ laala, Kayak Nug ag lakkulagnu aum ele, amu laa mauheb, aun laa nug doɗ amu gaɗa lauɗidkku amu, nug Kayak ele ouqa dayaknu elele iitta dayeb ukkeb, tueb batakku.

⁴⁰ Am aun laa nug doɗ amunu teppu lakku, oo iitta gaɗa mawa ukka laih mekku, nug lamen nuhig ihakkuoitte. Am nug aakku Kayak ele ouqa dayaknu elele iitta dayeb ukkeb, tueb batakku.

⁴¹ Doɗ naunau, ag oolag wan qeeqe oitteb, ⌊laa matu anakppa daatteb, am laala ele⌋, ag doɗ amunu ag oolagppa uuaknab dooglag. Doɗ amu ag iinab lamana.

⁴² Doɗ amu laa ag baelkad, eppelkad iitta, ag oolag wan qe gotteb; am doɗ amu laa ag baelkad, eppelkad ele, amge ag oolag wan qeeqe oitteb, doɗ amu oh ag aibnab lappig. Aɗinu? Doɗ amu ohnu ag oolagppa uuaknab dooglagnu daatte.

⁴³ Ag lauɗadna, Kayaknu neekkakppa dubuttid tak ele daaglagnu aib heppig. Ag lauɗadkkulag amu, ag Kayak ele ouqa dayaknu elele iitta daaglag. Ag aib anam heppig.

⁴⁴ Aɗinu? ⌊Yawe Nug inam aum daatte.⌋ ‘Da am Yawe, ahilag Kayak. Da oppiaawak daattem amunu, ag dahilnu tituana meɗak daaglagnu hena, ag dahilnu, ag oppiaawak ele dayeg! Ag doɗ laa ag oolag wan qeeqe oitteb ele, ag amu aɗualadkkulag dayeb, ag da ele ouqa dayaknu elele iitta amunu, ag aib aɗualadppig.

⁴⁵ Aɗinu? Da am Yawe. Da ag ahilag Kayak daakkulnu, da ag Isip wanppan diiyi, ippa uɗippig. Da am oppiaawak daattem amunu, ag dahilnu, oppiaawak ele daaglagoitte,’ awa aum.

⁴⁶ Imuam ɗo, amu ɗo amunu ulum nai ele wanppan doɗ, ai keeke, amu doɗ ag leppa bauklel daanna oitteb ele oh dilag nai aakku mattak.

⁴⁷ Anam aakku amunu, ag doɗ aɗi am ii lanaknu epeɗiak daatteb, amu doɗ aɗi am lanaknu epeɗiak daatteb amu, ag amu epeɗin anidna, ag doɗ Kayaknu neekkakppa lanaknu epeɗiak daatteb aakkuib lakkulag.” Moses nug anam aum.